Be kunndɛ afɔtuɛ ng’ɔ kwla yo be ye’n

SƐ AFƆTUƐ yɛ amun kunndɛ’n, be dimɛn i yalɛ. Like nga w’a ju su’n yɛle kɛ sran wie’m be yo ninnge wie mun naan sran’m be fa uka be wun. Lika kɛ Angle’m be lɔ sa annzɛ Zapɔn annzɛ Amlɛnkɛn’m be mɛn’n i ja gua lɔ’n, sran’m be ta fluwa nga sran’m be fa uka be wun’n, be to kpa. Asa kusu’n, be yi ninnge sɔ’m be su flimu, be yo be su aɲia yɛ be yi wie televiziɔn nun. I sɔ ninnge’m b’a tru kpa. Ninnge sɔ’m be nun’n, be waan sɛ sa wie o ɔ su’n, ɔ bɔbɔ a kwla wun i trawlɛ. A boman wɛ usaman sran uflɛ ngwlɛlɛ afɛ. ?Sa benin su ndɛ yɛ fluwa nin flimu sɔ’m be kan ɔn?

Ninnge nga be fa sran’m be ɲin sie su’n, i wie yɛle sran yolɛ’n nin yasua nin bla nga bé jɛ́ i’n i kunndɛlɛ’n, ɔ nin ba’m be talɛ’n. Asa ekun’n, sɛ sran kun i akunndan’n sanngan annzɛ ɲrɛnnɛn tɔ i su annzɛ i aja’n saci’n, be kle i wafa ng’ɔ kwla jran kekle’n. Sran kpanngban be kunndɛ wafa nga be kwla yaci aliɛ dan dilɛ’n nin siklɛti nɔnlɛ’n yɛ nzan dan nɔnlɛ’n be su afɔtuɛ. ?Sanngɛ afɔtuɛ nga be man be’n, be kwla yo be ye? Wie liɛ’n, be kwla yo be ye sanngɛ nán blɛ ngba nun ɔn. Ɔ maan Biblu’n nun ndɛ nga i su akunndan bulɛ’n ti kpa. Ɔ se kɛ: “Sran nga i bɔbɔ ɔ kwlá ukɛ-mɛn i wun’n, ɔ lafi ndɛ kwlaa nga be kan kle i’n su. Sran ng’ɔ si sa’n kusu, ɔ niɛn i ja ng’ɔ tu’n su kpa.”—Nyanndra Mun 14:15.

Fluwa nga be fa uka be wun’n, be timan kɛ fluwa nga be fa suan foto cilɛ annzɛ aniɛn kanlɛ annzɛ sika nun junman dilɛ’n be sa. I sɔ fluwa liɛ’m be kwla uka sran kun naan w’a si like kun yo naan w’a tanninman sika dan. Sanngɛ junman dilɛ nun o, aja’n nun o, ba’m be talɛ nun o, annzɛ kɛ sran’n i akunndan sanngan’n, fluwa nga be fa uka be wun’n, be liɛ’n, be timan sɔ. Mɛn dilɛ wafa kun annzɛ sran kun bɔbɔ i akunndan liɛ’n yɛ be kle sran mun ɔn. I sɔ’n ti’n, maan e usa e wun kɛ: ‘?Wan yɛ ɔ man afɔtuɛ sɔ’n niɔn? ?Ninfan yɛ afɔtuɛ sɔ’n fin ɔn?’

Nán cɛn ngba yɛ sa sifuɛ’m be ndɛ nga be kan’n, ɔ taka like kpa kun sa su ɔ. Wie’m be liɛ’n afɔtuɛ nga sɛ be man ɔn, be kwla ɲan su’n yɛ be man ɔn. Afin be si kɛ sɛ be kan ndɛ nga sran’m be kunndɛ kɛ bé tí’n, be kwla ɲan sika kpanngban. Nvle kun nun’n, be nga be yi flimu annzɛ fluwa nga sran’m be kwla fa uka be wun’n, sika nga be ɲɛn i’n, ɔ tra miliar mɔcuɛ tra su afuɛ nuan kwlaa!

?Wafa sɛ yɛ ninnge sɔ’m be kwla yo sran kun ye ɔ?

Kɛ sran’m be nian flimu mun annzɛ fluwa nga be kwla fa uka be wun’n be nun’n, afɔtuɛ ng’ɔ kwla yo be ye’n yɛ be kunndɛ ɔ. Sanngɛ wie liɛ ndɛ nga be wun be ninnge sɔ’m be nun’n, be ti ndɛ kanlɛ ngbɛn. Ndɛ sɔ’m be wie yɛle kɛ: ‘Sɛ a bu sa nga be tɔ ɔ su’n be wun akunndan kpa’n, á wún be trawlɛ. Like kwlakwla nga a kunndɛ’n, sɛ sika o, sɛ alaje o, sɛ a nin ɔ wiengu mun be tranlɛ fɛ o, sɛ a bu be wun akunndan kpa’n a kwla ɲan be.’ ?Afɔtuɛ kɛ ngalɛ sa’n kwla yo sran kun ye? ?Ɔ kwla uka sran kun naan w’a jran sa nga be tɔ i su’n, be ɲrun kekle?

Maan e fa fluwa nga be kan sran nin sran be tranlɛ nin aja’n be ndɛ’n, mɔ b’a tru kpokpaa’n, naan e nian. ?Fluwa sɔ’m be uka sran mun naan aklunjuɛ w’a tran awlo nun naan b’a tran likawlɛ titi? Nán blɛ ngba nun ɔn. Bla kun m’ɔ di i sɔ ninnge’m be su junman’n, ɔ kannin Amlɛnkɛn’m be mɛn’n i ja gua lɔ fluwa klɛfuɛ kun su ndɛ. Bla sɔ’n waan sran sɔ mɔ i fluwa’n truli kpa’n, ɔ “kle be nga be kanngan nun’n be wafa nga be nin sran’m be kwla tran klanman’n, ɔ nin wafa nga be bɔbɔ be kwla bu be wun sran’n.” Fluwa’n i klɛfuɛ’n waan sɛ a nin sran kun o nun naan ɔ yoman ye naan sɛ a nin i be te o nun’n, nn a su kpɛ ɔ bɔbɔ ɔ bo buɛ. I ndɛ sɔ’n i bo’n yɛle kɛ, kɛ ɔ yo naan sran kun jran sa nga be o i su’n be ɲrun naan ɔ kunndɛ be trawlɛ’n, like ng’ɔ ti cinnjin’n, yɛle kɛ ɔ yo like nga sɛ ɔ yo ɔ, ɔ si kɛ ɔ́ wún i wun fɛ’n.

Ɔ ti su kɛ afɔtuɛ kpa wie kwla tran fluwa annzɛ flimu nga sran kun kwla fa ukɛ i wun’n, be nun. Sanngɛ be nun wie’m be kwla yo tɛ. Sa kun su’n, sa sifuɛ kun kwla man sran kun i afɔtuɛ kpa. Sanngɛ sa uflɛ su afɔtuɛ ng’ɔ́ mán’n, ɔ kwla yo maan sa ng’ɔ o sran’n su’n, ɔ yo tɛ kpa tra laa’n. Afɔtuɛ kpanngban nga be o fluwa nin flimu sɔ’m be nun’n, mɔ be nun wie’m be sansan be wun bɔbɔ’n, be wlɛ wunlɛ leman ba. ?Wan i afɔtuɛ liɛ’n su yɛ amun kwla lafi ɔ? Amun usa amun wun kɛ: ‘?Sran ng’ɔ man afɔtuɛ’n, ɔ niannin nun kunndɛli sa sɔ’n, i su like kpa annzɛ i bɔbɔ i klun akunndan ɔn? ?Nán sika annzɛ aɲrunɲan kunndɛlɛ’n ti yɛ ɔ kan sɔ ɔ?’

Fluwa kun m’ɔ boli sran ye yolɛ i bo nán andɛ sa’n, yɛle Biblu’n. Sa kpanngban nga fluwa annzɛ flimu nga sran’m be fa uka be wun’n, be kan be ndɛ’n, ɔ nin sa uflɛ wie mun’n, Biblu’n man be su afɔtuɛ kpakpa. Ɔ suli sran miliɔn kpanngban kpa be bo maan be fali ndɛ nga su: “Maan Nyanmiɛn bo amun uflɛ yɛ ɔ kaci amun akunndan’n. Yɛ an fa nzuɛn uflɛ.” (Efɛzfuɛ Mun 4:23, 24) Biblu’n kle e like nga ti yɛ sa’m be tɔ e su’n, ɔ nin wafa nga e kwla jran be ɲrun kekle’n. I cinnjinfuɛ’n, yɛle kɛ ɔ kle e like nga ti yɛ ɔ ti kpa kɛ e yo sa ng’ɔ ti kpa’n. Ndɛ ng’ɔ́ bá lɛ’n, ɔ́ wá klé e sa nga ti yɛ Biblu’n ti sɔ’n.