Awlobo’n nun Ɲanmiɛn sulɛ’n kwla man nguan!
KƐ BÉ wá kún “alɛ Anannganman Nyanmiɛn b’ɔ kwla like kwlaa yo’n i cɛn dan’n” nun’n, wafa ng’ɔ́ yó sro’n, maan e bu i akunndan kan e nian! (Sa Nglo Yilɛ 16:14) Ɲanmiɛn nuan ijɔfuɛ Mise fali nzɔliɛ ninnge wie mun kɛnnin i ndɛ klanman kpa. Ɔ klɛli i kɛ: “Oka’m bé kán ase. Kongokongo’m be kusu bé kló, bé kló kɛ sin w’a kan awɛma’m be sua naan ɔ su klo sa. Bé sónji kɛ wie kusu-ɔ nzue w’a kpɛn ndroliɛ nun naan ɔ su sonji sa.” (Mise 1:4) ?Be nga be suman Zoova’n, wafa sɛ yɛ i bo’n gúa tɛ kpa mán be ɔ? Ɲanmiɛn Ndɛ’n waan: “Sran nga anannganman maan bé wú cɛn sɔ’n nun’n, bé gúa lɛ sa. Kɛ ɔ fɛ i asiɛ’n i bue kun b’ɔ́ fá jú i bue uflɛ su’n.”—Zeremi 25:33.
Awlobo kpɛn mɔ be nun kpanngban be kunngba yɛ be ta ba mun’n, kɛ be ti i sɔ liɛ’n, ɔ fata kɛ be mma mɔ b’a yo kpɛnngbɛn kan mɔ be kwla bu akunndan’n be ti’n, be usa be wun kɛ: ‘?Bé fín Armagedɔn alɛ’n nun fíte?’ Biblu’n gua e awlɛn su nzue kɛ blɛ nga i sɔ sa’n jú’n, sɛ be nin Zoova be afiɛn’n mantan kpa’n, bé fín nun fíte.—Matie 24:21.
Nga ti yɛ ɔ ti cinnjin kɛ awlobo’n fa blɛ kun su Ɲanmiɛn’n
Siɛ nin niɛn mun, amun yo like kwlaa nga amun kwla yo’n naan amun ta amun mma’m be kpa “e Min’n liɛ’n su, yɛ an tu be fɔ, an kle be ngwlɛlɛ.” (Efɛzfuɛ Mun 6:4) Ɔ ti cinnjin kpa kɛ amun nin amun mma’m be suan Biblu’n nun like. E kunndɛ kɛ e mma kanngan’m be yo kɛ Klistfuɛ nga be o Filipu lɔ’n sa. Pɔlu yoli be mo afin be ɲin yili Zoova be klunklo su. Ɔ klɛli i kɛ: “Min sran kpa mun, kɛ n wo amun wun lɔ bɔ amun nyin fa yi min titi’n [amun yoli aɲinyiɛfuɛ’n], siɛn’n, kannzɛ n nun-man lɔ’n, maan amun nyin yi min [amun yo aɲinyiɛfuɛ] kpa tra laa’n. Kɛ ɔ ko yo naan amun a nyan amun ti mlɔnmlɔn’n, an mian amun nyin di junman kpa.”—Filipfuɛ Mun 2:12.
?Kɛ amun nunman lɛ’n, amun mma’m be nanti Zoova i mmla’m be su? ?Yɛ kɛ be o suklu lɔ’n nin? ?Wafa sɛ yɛ amun uka amun mma mun naan b’a wun i wlɛ kɛ Zoova i mmla’m be ti kpa man be, naan kɛ amun nunman lɛ’n b’a fa be su ɔ?
I sɔ yolɛ’n nun’n, amun awlobo nun Ɲanmiɛn sulɛ’n kwla yo naan amun mma’m b’a lafi Ɲanmiɛn su kpa. I sɔ’n ti’n, ninnge cinnjin nsan mɔ be kwla yo naan amun awlobo’n nun Biblu’n nun like suanlɛ’n w’a yo ye’n, maan e koko be su yalɛ.
Nán amun kpɛ nun cɛn
Aniɛn nga i klikli nun be klɛli Biblu’n i nun’n, ndɛ mma nga be kacili i kɛ ‘le kun,’ Zɔb 1:6 nun’n, ɔ kle kɛ kɛ i blɛ’n ko ju’n be yia anzi mɔ be ti Ɲanmiɛn i mma mun’n, Ɲanmiɛn i ɲrun lɛ. Amun nin ba’m be yo i sɔ kunngba’n. Amun kle cɛn nin dɔ kun kɛ ɔ ti amun awlobofuɛ’m be Ɲanmiɛn sulɛ liɛ. Kpɛkun amun jrɛn i sɔ’n su. Asa kusu’n, kɛ mɔ be siman be ɲrun sa’n ti’n, amun kpa blɛ kun ekun be sie i lɛ.
Kɛ ɔ́ cɛ́ kɔ́’n, nán amun kpɛ amun awlobo nun Biblu’n like suanlɛ’n, i nun cɛn. Nán amun wla fi su kɛ be nga amun kle be Biblu’n nun like’n, be nun cinnjinfuɛ mun yɛle amun mma mun. Kusu, be yɛ Satan kunndɛ kɛ ɔ́ trá be ɔ. (1 Piɛr 5:8) Sɛ televiziɔn nianlɛ ti annzɛ ninnge uflɛ wie mɔ be timan cinnjin’n ti amun ɲin kpa amun awlobofuɛ’m be Ɲanmiɛn sulɛ’n su’n, nn Satan w’a kwla amun.—Efɛzfuɛ Mun 5:15, 16; 6:12; Filipfuɛ Mun 1:10.
Maan ɔ yo ye sakpa
Nán like suanlɛ sa ngbɛn yɛ ɔ fata kɛ be suɛn i awlobofuɛ’m be Ɲanmiɛn sulɛ kɔnguɛ’n i nun ɔn. Amun mian amun ɲin naan ɔ yo amun wun sa ye. ?Wafa sɛ? Ɔ ju wie’n, sa nga bé wá jú amun mma’m be su cɛn nga bé bá lɛ’n annzɛ le mɔcuɛ nga bé bá lɛ’n be nun’n, amun koko be su yalɛ. Wie liɛ’n, amun kwla yi jasin fɛ’n bolɛ’n nun ninnge’m be nglo. Mantuan’m be klo ninnge nga be si be yo kpa’n. Wafa nga amun bo jasin fɛ’n, sɛ amun yi i nglo flan nun naan amun bu wafa nga kɛ be tanndan amun ɲrun’n amun kwla sɔ su’n i akunndan’n, ɔ́ úka be. I liɛ’n, kɛ bé dí Ɲanmiɛn Sielɛ’n i jasin fɛ’n bolɛ’n junman wafawafa mun’n, bé láfi be wun su.—2 Timote 2:15.
Kɛ amun mma’m be wiengu’m be mianmian be’n, wafa nga be kwla jrɛn i ɲrun kekle’n, amun kwla yi be nglo wie. Kɛ amún kókó yalɛ’n, amun yo naan amun mma’m be kunndɛ wafa nga be kwla tɛ be wiengu’m be su’n. Ɔ kwla yo be kosan usalɛ naan be kan kekle ng’ɔ tɔ be su’n ɔ nin lika ng’ɔ tɔ be su’n be ndɛ. Kpɛkun sɛ be yo i sɔ like’n annzɛ kusu sɛ be jran kekle’n, like ng’ɔ kwla yo be’n be kɛn i ndɛ wie. Cɛn wie’n amun yi wafa nga be kwla tɛ be wiengu’m be su’n, i nglo.
Ninnge wie’m be kwla uka ba mun naan be nin Zoova be afiɛn’n w’a mantan’n naan b’a di i junman’n kpa. Awlobofuɛ’m be Ɲanmiɛn sulɛ nun’n, siɛ nin niɛn’m be kwla kle be mma’m be kɛ sɛ be fɛ i sɔ’n sie be ɲrun’n mmlusuɛ kpanngban o nun. I sɔ’n nun’n, be nga suli Zoova kpa’n be su ndɛ’n kwla uka amun naan amun a uka amun mma mun naan b’a wun kɛ atin kpafuɛ nga be kwla fa su’n, yɛle kɛ be fa Zoova i sulɛ’n sie like kwlaa ɲrun. Amun yo maan amun mma’m be klo atin bolɛ junman annzɛ Betɛli lɔ junman dilɛ’n annzɛ suklu nga be flɛ i École de formation ministérielle i dilɛ. Annzɛ kusu amun yo maan be klo blɛ kwlaa nun Ɲanmiɛn junman dilɛ’n i wafa uflɛ wie mun.
Amun nian amun wun su: Nán maan e wla fi su kɛ siɛ nin niɛn wie mɔ be kunndɛ kɛ be mma’m be yo kpa’n, be fa ba’m be ɲin sie i like nga be kunndɛ kɛ be wa’n yo’n su tratra su. Ɔ maan ninnge kpakpa nga ba’m be su yo be dɔ nga su’n, be ɲin kpa be su. Ɔ fata kɛ amun wla amun mma’m be fanngan naan be fa ninnge kpakpa kɛ Betɛli lɔ junman dilɛ annzɛ ngaliɛ difuɛ junman dilɛ sa’n, be sie be ɲrun kɛ bé yó. Kusu i sɔ yolɛ’n nun’n, amun nian amun wun naan like nga amun kunndɛ kɛ amun mma’m be yo’n, w’a flanman be. Annzɛ be sa sin w’a bubuman be. (Kolɔsfuɛ Mun 3:21) Nán amun wla fi su le kɛ amun wa’n bɔbɔ yɛ ɔ fata kɛ ɔ klo Zoova ɔ, nán amun ɔn. (Matie 22:37) I sɔ’n ti’n, amun kunndɛ wafa nga like ng’ɔ su yo i dɔ nga su’n ti’n amun kwla yo i mo’n. Nán amun jran like ng’ɔ yomɛn i dɔ nga su’n, i su sa trilili. Amun uka be naan ninnge kwlaa nga Zoova yoli mannin be’n ti’n, be si i ye. I sin’n, amun yaci amun wa’n i bɔbɔ nun naan ɔ kle kɛ ɔ si Zoova i aklunye’n i su ye.
Maan ɔ yo fɛ
Like nsan su ng’ɔ kwla yo naan amun awlobofuɛ’m be Ɲanmiɛn sulɛ’n w’a yo ye’n yɛle kɛ maan ɔ yo fɛ. ?Wafa sɛ yɛ amun kwla yo sɔ ɔ? Wie liɛ’n, amun kwla tie anɔ yilɛ annzɛ amun kwla nian Zoova i Lalofuɛ’m be video kun. Kpɛkun amun koko su yalɛ. Annzɛ kusu amun kwla kanngan Biblu’n i bue kun nun likawlɛ. Biblu’n i bue nga sran’m be koko yalɛ lɛ’n, amun kwla cɛcɛ nun kpɛkun sran kun kanngan kun nun, sran kun kanngan kun nun.
Sasafuɛ Tranwlɛ’n nin Réveillez-vous! be nun’n, ndɛ wie’m be o nun e kwla koko be su yalɛ e awlobo’n nun. I wie yɛle ndɛ nga be flɛ i “ Que repondriez-vous ? ” m’ɔ o Réveillez-vous! kwlaa i bue 31 nun’n. Sasafuɛ Tranwlɛ’n wie’m be nun’n, ndɛ nga be flɛ i kɛ “Maan e kle e mma’m be like” ɔ ti ba kanngan’m be liɛ.
E periodiki’m be kan aniaan wie mɔ be su Ɲanmiɛn kpa’n be su ndɛ. E kwla jrɛn i sɔ’n su e kle e mma’m be kɛ sɛ like ng’ɔ ti sran kun cinnjin’n yɛle Zoova sulɛ’n, nn ajalɛ m’ɔ leman wunsu yɛ w’a fa ɔ.
Kusu amun nian amun wun naan amun awlobo’n nun Biblu’n nun like suanlɛ’n w’a yoman ba’m be kosan usalɛ sa trilili. I wie yɛle kɛ be seli siɛ nin niɛn’m be kɛ be wla be mma’m be fanngan naan ndɛ nga be koko su yalɛ awlo lɔ’n, ɔ nin wafa nga be kwla fa ndɛ sɔ’m be su’n, i su akunndan nga be bu’n yɛ wafa nga be wun fa yo be’n, be klɛ be sie. Nán amun mian ba’m be fii kɛ be kanngan nga be klɛli’n nun sran’m be kwlaa be ɲrun. Sɛ ɔ yo sɔ’n, be su klɛman ndɛ ng’ɔ o be klun sakpa’n. Amun man ba’m be atin naan be ninnge wie’m be ka nvialiɛ nun.
Sɛ amun awlobofuɛ’m be Ɲanmiɛn sulɛ’n nun’n, amun kpɛman nun cɛn naan ɔ yo ye sakpa yɛ ɔ yo fɛ’n, Zoova rá amun ɲin mɔ be mian’n su kpa. Blɛ ngunmin kun sɔ m’ɔ ti amun awlobofuɛ’m be liɛ’n, ɔ́ yó maan be nin Zoova be afiɛn’n mántan kpa. Kpɛkun bé yó juejue Ɲanmiɛn ninnge’m be nun.
[Kuku, bue 31]
Maan e fa akunndan
“Kɛ e nin e mma bla kanngan mun é súan like’n, min nin min wun e koko like ng’ɔ fata kɛ e siesie naan y’a wɔ asɔnun’n aɲia’n bo’n, i su yalɛ. Kpɛkun e se e mma’m be kɛ be yi desɛn kun be fa bo like nga e suannin’n i kpɔlɛ. Wie liɛ’n, e yi Biblu’n nun ndɛ’m be nglo annzɛ ndɛ nga é kó kɛ́n i jasin fɛ’n bolɛ’n nun’n, e flan nun. E like suanlɛ’n nun’n, e nian ndɛ ng’ɔ nin be fata’n kpɛkun e yo maan ɔ yo fɛ.”—J.M., ɔ fin Amlɛnkɛn’m be lɔ.
“Kɛ ɔ ko yo naan sran nga n kle i Biblu’n nun like’n i wa’n w’a wun wafa nga be nian laa fluwa mɔ be ɲɔnɲɔn i’n nun’n, e nunnunnin Ezai fluwa’n i ndɛ tre mun nin i ndɛ mma’m be nimielo mun. Kpɛkun e fali fluwa sɔ mun e sasali su yɛ e fa tiyo kun e sieli i ngbɛsungbɛsu nɲɔn’m be su. I sin’n, ba’n miɛnnin i ɲin naan ɔ́ yó kɛ nga Zezi fa yoli i Nazarɛti lɔ Ɲanmiɛn ndɛ suanlɛ nin i srɛlɛ sua nun’n sa. Ndɛ sɔ m’ɔ o Lik 4:16-21 nun’n, be klɛli i kɛ Zezi ‘tikeli su, ɔ wunnin lika nga Ezai klɛli’n,’ m’ɔ kunndɛ’n. (Ezai 61:1, 2) Sanngɛ kɛ ba’n waan ɔ́ yó kɛ Zezi sa wie’n, ɔ wunnin kɛ fluwa tɛnndɛn sɔ mɔ ndɛ tre nin ndɛ mma’m be nimielo’n nunman nun’n i nun’n, Ezai ndɛ tre 61 i wunlɛ’n ti kekle. Ɔ maan wafa nga Zezi niannin fluwa sɔ’n nun’n, ɔ yoli i ɲɛnmɛn. I ti’n yasua kan sɔ’n seli kɛ: ‘Zezi tinnin o!’”—Y.T., ɔ fin Zapɔn.
[Foto, bue 30]
Ninnge’m be nglo yilɛ’n kwla uka amun mma mun naan b’a jran be wiengu’m be ɲrun kekle.
[Foto, bue 31]
Amun mian amun ɲin naan amun awlobofuɛ’m be Ɲanmiɛn sulɛ’n yo fɛ.