?Ngue ti yɛ ɔ fata kɛ e ɲin yi kpɛnngbɛn mun ɔn?
AMLƐNKƐN’M be mɛn’n i lika nga be flɛ i Californie i jenvie nuan lɔ’n, waka nga sran’m be ta be foto ci kpa’n, be nun kun o lɔ. Be flɛ i kɛ Siprɛs. Ɔ jin i liɛ ngunmin. Be waan waka sɔ’n w’a di afuɛ 250 tra su. Kɛ mɔ sran’m be sieli i nzɔliɛ kɛ waka sɔ’n w’a cɛ kpa ti’n, be niɛn i lika kpa. I wie yɛle kɛ be fali ɲanman be trɛli i ase yɛ be fali yɛbuɛ wie’m be guɛli i bo naan w’a tɔman.
Siprɛs sɔ’n maan e wla kpɛn Klistfuɛ kpɛnngbɛn nga be o e afiɛn mɔ be su Ɲanmiɛn tititi’n be su. Wafa kun mɔ be yo sɔ’n yɛle jasin fɛ mɔ be bo’n. Ɲanmiɛn nuan ijɔfuɛ Zoɛli seli kɛ “ngbɛn-ngbɛn’m” bé kán ndɛ ng’ɔ o Biblu’n nun’n klé sran mun. (Zoɛ. 3: 1-5; Yol. 2:16-21) Dɔ kpanngban nga aniaan sɔ’m be fa uka sran mun naan b’a si ‘Nyanmiɛn sielɛ’n i jasin fɛ’n,’ maan e bu i akunndan kan e nian! (Mat. 24:14) Ɲanmiɛn Sielɛ’n i jasin bofuɛ kpɛnngbɛn sɔ’m be nun wie’m be jrannin kekle ɲrɛnnɛn klelɛ nin sa kekle uflɛ wie’m be ɲrun lele. Siprɛs waka ngbɛn sa’n, i cɛlɛ mɔ w’a cɛ’n ti’n be fa ɲanman nin yɛbuɛ be fa trɛ i ase. ?Yɛ aniaan kpɛnngbɛn nga be o e afiɛn’n nin? ?Ɔ fataman kɛ e ɲin yi be naan e yi be ayɛ?
Laa’n, Ɲanmiɛn Zoova seli i nvlefuɛ’m be kɛ: “Amun wun sran oke mun-ɔn, maan amun nyin yi be. Amun bu min sran titi. Min yɛ n ti Anannganman amun Nyanmiɛn’n nin-ɔn.” (Sau. 19:32) Andɛ’n, aniaan kpanngban mɔ ‘be su’ Ɲanmiɛn w’a di afuɛ kpanngban kpa’n, be o Zoova i sufuɛ’m be afiɛn. (Mis. 6:8) Kɛ bé nánti Ɲanmiɛn Ndɛ’n i nun mmla’m be su titi bé kɔ́’n, be ti je’n ti kɛ “famiɛn kle sa.”—Nya. 16:31.
Akoto Pɔlu wlali Timote m’ɔ te yo gbanflɛn kan’n i su nun kɛ: “Nán ijɔ kpɛnngbɛn mun.” Sanngɛ i waan Timote ‘fa be bu i si,’ naan ɔ ‘bu bla kpɛnngbɛn mun i nin.’ (1 Tim. 5:1, 2) Yɛle kɛ sɛ ɔ wun be nga be ti w’a bo je’n, maan i “nyin yi be.” I sɔ’n kle weiin kɛ Zoova klo kɛ e ijɔlɛ nun’n, e yi i sɔ aɲinyiɛ’n i nglo.
Rɔmfuɛ Mun 12:10 se kɛ: “An [dun mmua] bu amun wiengu sran.” Asɔnun’n i sunianfuɛ’m be ɲin yi Klistfuɛ nga b’a yo kpɛnngbɛn’n. Sanngɛ e wiengu i sran bulɛ nun’n, ɔ fata kɛ e kwlakwla e dun mmua e fa ajalɛ.
Kusu awlobo’n nun’n, ba mun yɛ ɔ fata kɛ be nian be si ɔ nin be nin yɛ be nannan’m be lika ɔ. Waka siprɛs i liɛ’n, sran’m be kunndɛli wafa nga be kwla sɛsɛ i naan w’a cɛ’n. Yɛ dɔ nga su be te yo sɔ. I sɔ’n ti’n, ɔ fata kɛ e kunndɛ wafa e kwla bu e si nin e nin yɛ e nannan mɔ b’a yo kpɛnngbɛn’n be sran’n. I wie yɛle kɛ sɛ e sie e su be nuan bo’n, ɔ́ yó naan y’a jranman su cinnjin kɛ é yó e klunklo like naan e buman be wie.—Nya. 23:22; 1 Tim. 5:4.
Kpɛnngbɛn nga be o e afiɛn’n, be ti cinnjin Zoova ɲrun. Ɔ su yiman be ase le. (Jue. 71:18) Ɲanmiɛn Kpli wla be fanngan naan b’a kwla su i tititi. E kusu maan e suan kpɛnngbɛn’m be bo naan e ɲin yi be titi.
[Foto mun, bue 13]
Ɔ fata kɛ be suan siprɛs waka’n i bo’n, i kunngba’n ɔ fata kɛ e suan kpɛnngbɛn’m be bo naan e ɲin yi be.
[Foto cifuɛ mun, bue 13]
American Spirit Images/age fotostock