Maan e wun like nga be ti cinnjin kpa’m be wlɛ
‘Amun wun like nga be ti kpa’m be wlɛ.’—FIL. 1:10.
?AMÚN TƐ́ SU SƐ?
?Aolia nun sa nga Ezai nin Ezekiɛli nin Daniɛli be wunnin be’n, be wla e fanngan kɛ e yo ngue?
?Kɛ e wun like ng’ɔ ti Zoova i anuannzɛ’n i bue ng’ɔ o asiɛ’n su wa’n i cinnjin kpa’n, ngue yɛ i sɔ’n kle e ɔ?
?Like suanlɛ nga ti’n, ngue yɛ amun a fua kɛ amún yó ɔ?
1, 2. ?Junman cinnjin benin yɛ Zezi seli i sɔnnzɔnfuɛ mun kɛ bé wá dí ɔ? ?Kosan benin yɛ atrɛkpa’n, i sɔnnzɔnfuɛ’m be fa usali be wun?
CƐN kun’n, Zezi kannin Ɲanmiɛn i sua’n i sacilɛ ndɛ kleli i sɔnnzɔnfuɛ mun. Ndɛ sɔ’n sanngannin Piɛli nin Zaki nin Zan, ɔ nin Andre be akunndan’n. (Mar. 13:1-4) I ti’n, kɛ Zezi nin be ngunmin be o lɛ’n, be usɛli i kɛ: “?Blɛ onin yɛ sa sɔ’m bé yó-ɔ, yɛ nguɛ yɛ ɔ ti ɔ balɛ’n nin mɛn’n i awieliɛ’n i nzɔliɛ nin-ɔn? Kle ye.” (Mat. 24:1-3) Kɛ Zezi tɛ́ be su’n, ɔ kannin sa nga bé wá jú naan b’a nunnun Zerizalɛmu klɔ’n, be ndɛ kleli be. Sanngɛ w’a kaman ngalɛ’n su. Ɔ kannin sa sroesroe nga bé wá klé kɛ Satan i mɛn tɛ’n i nunnunlɛ’n w’a mantan koko’n, be ndɛ wie. Sa sɔ’m be nun wie yɛle kɛ bé kún alɛ, awe kpɛ́n, yɛ sran’m be klun yó wi kpa. Sanngɛ Zezi kannin junman kpa kun mɔ bé wá dí’n, i ndɛ kleli be wie. Ɔ seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.”—Mat. 24:7-14.
2 Klist nin i sɔnnzɔnfuɛ’m be boli Ɲanmiɛn Sielɛ’n i jasin fɛ’n likawlɛ. (Lik 8:1; 9:1, 2) Ɔ maan be wla kwla kpɛnnin su kɛ Zezi seli be kɛ: “Awie’n w’a yo ye dan, sanngɛ junman difuɛ’m b’a sɔn-man. I sɔ’n ti’n, an se fie i fuɛ’n maan ɔ fa sran naan be wɔ i fie’n su.” (Lik 10:2) Atrɛkpa’n, be usali be wun kɛ: ‘?Nin yɛ sran nga bé wá dí fie’n i su junman’n bé fín ɔn? ?É yó sɛ naan y’a kwla bo jasin fɛ’n “mɛn wunmuan’n nun” naan ‘sran’n kwlaa b’a ti?’ Sɛ ɔ ti kɛ sran si i ɲrun lɔ sa’n, nn be wunnin kɛ ndɛ kan sɔ mɔ Zezi kannin m’ɔ o Matie 24:14 nun’n, ɔ su kpɛn su. Ɔ maan, be nuan bó be wun.
3. ?Wafa sɛ yɛ ndɛ nga Zezi kannin m’ɔ o Lik 21:34 nun’n, ɔ kpɛn su andɛ ɔ? ?Kosan benin yɛ ɔ fata kɛ e fa usa e wun ɔn?
3 Ndɛ nga Zezi kannin’n su kpɛn su andɛ. Sran akpinngbin kpanngban be bo Ɲanmiɛn Sielɛ’n i jasin fɛ’n asiɛ’n i bue kwlaa su. (Eza. 60:22) Sanngɛ Zezi kleli kɛ blɛ kasiɛn nun’n, i sɔnnzɔnfuɛ wie’m be su nianman jasin fɛ’n nun be boman. Yɛle kɛ bé fá like uflɛ yolɛ cící be ti. (An kanngan Lik 21:34 nun.) E wun kɛ ndɛ ng’ɔ kannin’n kpɛn su andɛ. Yɛle kɛ Ɲanmiɛn i sufuɛ wie’m be faman Ɲanmiɛn junman dilɛ’n siemɛn i like kwlaa ɲrun. Ajalɛ nga junman kunndɛlɛ nin i dilɛ nun’n, annzɛ suklu dilɛ nun’n, annzɛ ninnge’m be tolɛ nun be fa be’n, be yi i sɔ liɛ’n i nglo. Be nun wie’m be fa be ɲin su yiyilɛ kaci be junman. Wie’m be kusu’n, mɛn nun ninnge’m be ti kokolɛ’n ti’n, be kwlá suman Ɲanmiɛn kpa. I sɔ’n ti’n, maan e tinuntinun e usa e wun kɛ: ‘?Yɛ min li? ?N fa Ɲanmiɛn i klun sa yolɛ’n n sie i like kwlaa ɲrun?’
4. (a) ?Ngue yɛ Pɔlu srɛli kɛ Filipu lɔ Klistfuɛ’m be yo ɔ? ?Ngue ti yɛ ɔ srɛli sɔ ɔ? (b) ?Like suanlɛ nga, ɔ nin ng’ɔ́ bɛ́ i sin lɔ’n nun’n, ngue yɛ é kɛ́n i ndɛ ɔ? ?Ye benin yɛ i sɔ’n yó e ɔ?
4 Klistfuɛ klikli’m be kplili kpa naan b’a kwla fa Ɲanmiɛn junman’n i dilɛ’n, b’a sie i like kwlaa ɲrun. I sɔ’n ti’n, akoto Pɔlu srɛli kɛ Klistfuɛ nga be o Filipu lɔ’n, ‘be wun like nga be ti [cinnjin] kpa’m be wlɛ.’ (An kanngan Filipfuɛ Mun 1:9-11 nun.) Kɛ akoto Pɔlu sa’n, Klistfuɛ klikli’m be dan lika ‘be trali be anwlɛn be kannin Nyanmiɛn ndɛ’n, yɛ srɛ w’a kun-man be.’ (Fil. 1:12-14) I sɔ kunngba’n, e nun sunman e tra awlɛn e kan Ɲanmiɛn Ndɛ’n yakpa su andɛ. Like suanlɛ nga nun’n, é wá kán Zoova i anuannzɛ’n i ndɛ. Kpɛkun like nga Zoova yo naan Matie 24:14 i nuan w’a yia’n, é kɛ́n i ndɛ wie. Asa ekun’n, é wún like nga i sɔ liɛ’n ɔ su e bo kɛ e bɔbɔ annzɛ e nin e awlofuɛ mun e yo’n. Kpɛkun like suanlɛ ng’ɔ́ bɛ́ i sin’n, ɔ́ wá kán like nga é yó naan e sa sin w’a bubuman e’n, naan y’a ka Zoova i anuannzɛ’n nun titi’n i ndɛ.
ZOOVA I ANUANNZƐ’N I BUE NG’Ɔ O ƝANMIƐN SU LƆ’N DI JUNMAN KPA
5, 6. (a) ?Ngue ti yɛ Zoova tikeli i sufuɛ wie’m be ɲin maan be wunnin i anuannzɛ’n i bue ng’ɔ o ɲanmiɛn su lɔ’n niɔn? (b) ?Ngue yɛ aolia nun Ezekiɛli wunnin i ɔ?
5 Ninnge kaka o lɛ mɔ Zoova maan b’a klɛman be Biblu’n nun ɔn. I wie yɛle kɛ w’a kanman wafa nga e tinunmiɛn’n di junman’n, ɔ nin wafa nga nglo lɔ ninnge’m be ti siesiewa’n be su ndɛ tɛkɛtɛkɛ’n kwlaa. Sanngɛ, ɔ kannin ninnge kwlaa ng’ɔ fata kɛ e si be naan y’a kwla wun i klun sa’n i wlɛ’n, naan e ɲin w’a yi i’n, be ndɛ. (2 Tim. 3:16, 17) Ninnge sɔ’m be nun kun yɛle i anuannzɛ’n i bue ng’ɔ o ɲanmiɛn su lɔ’n. Nanwlɛ, kɛ e kanngan i su ndɛ nga Ezai nin Ezekiɛli ɔ nin Daniɛli be tinuntinun be klɛli’n, ɔ nin nga Zan klɛli i Sa Nglo Yilɛ fluwa nun’n, e siman wie se! (Eza. 6:1-4; Eze. 1:4-14, 22-24; Dan. 7:9-14; Ngl. 4:1-11) Ɔ ti kɛ Zoova w’a uke e ɲin naan y’a wun sa nga be ju ɲanmiɛn su lɔ’n sa. ?Ngue ti yɛ ɔ kannin sa sɔ’m be ndɛ kleli e ɔ?
6 Zoova kunndɛ kɛ ɔ tran e klun titi kɛ e ti i anuannzɛ’n i nunfuɛ wie. Zoova i anuannzɛ’n i bue ng’ɔ o ɲanmiɛn su lɔ’n, ɔ di junman kpa naan Zoova i klun sa’n kpɛn su. Sa kun m’ɔ kle sɔ’n, yɛle aolia nun sa nga Ezekiɛli wunnin i’n. Ɔ wunnin kondokaa dandan wie mun. Kondokaa sɔ’m be kondo ndɛndɛ kpa. Kpɛkun, be kwla kpɛ be wun kpɛ kunngba be fa atin uflɛ. (Eze. 1:15-21) Asa ekun, Ezekiɛli wunnin sran ng’ɔ yo mɔ kondokaa’m be kpɛ be wun’n. Ezekiɛli seli kɛ: “N wunnin kɛ sran wafa sɔ’n ɔ ti nyannyan kɛ yɛbuɛ kpa b’ɔ bo mianmian’n sa, kpɛkuun ɔ ti kɛ sin wie yɛ ɔ sin yiɛ i sa.” Ɔ guɛli i ndɛ’n su seli kɛ: “Nyanmiɛn i nyannyan’n yɛ ɔ o lɛ ɔ.” (Eze. 1:25-28) Nanwlɛ’n, sa sɔ’n boli Ezekiɛli i nuan dan! Like ng’ɔ wunnin i aolia nun’n, ɔ kleli i kɛ Zoova tinngɛ i anuannzɛ’n, naan i wawɛ’n yɛ ɔ fa yo sɔ ɔ. Wafa nga Zoova i anuannzɛ’n i bue ng’ɔ o ɲanmiɛn su lɔ’n su di junman’n, aolia nun like nga Ezekiɛli wunnin i’n, ɔ yi i nglo klanman kpa.
7. ?Ngue yɛ sa nga Daniɛli wunnin i aolia nun’n, ɔ wla e fanngan kɛ e yo ɔ?
7 Sa nga Daniɛli wunnin i aolia nun kusu’n, ɔ yo maan e fa e wla gua Zoova nin Zezi be su. Daniɛli wunnin “sran oke kun.” Zoova yɛle sran sɔ’n. Ɔ ti famiɛn bia kun mɔ i ja’m be ti kukluuklu’n, mɔ be kwla kpɛ be wun’n i su. (Dan. 7:9) Zoova kunndɛli kɛ Daniɛli si kɛ i anuannzɛ’n su di junman kpa. Ɔ su yo naan i klun sa’n kpɛn su. I sin’n, Daniɛli wunnin “like kun b’ɔ fa klɔ sran.” Zezi i ndɛ yɛ Daniɛli su kan ɔn. Zoova mɛnnin i kwlalɛ naan ɔ sie anuannzɛ’n i bue ng’ɔ o asiɛ’n su wa’n. Nán le nɲɔn kun yɛ Klist yó sɔ ɔ. Afin “i kwlalɛ sɔ’n ɔ́ trán lɛ tititi, i blɛ’n su sin-man le, yɛ i sielɛ’n su nunnunman le.” (Dan. 7:13, 14) Sa sɔ’n wla e fanngan, ɔ maan e fa e wla gua Zoova nin like ng’ɔ su yo’n su. Asa ekun’n, e fa wla gua Zezi m’ɔ ti e atin klefuɛ’n i su afin i yɛ Zoova fali kwlalɛ’n mɛnnin i ɔ.
8. ?Kɛ Ezekiɛli nin Ezai be wunnin sa nga Zoova tikeli su kleli be’n, ngue yɛ be yoli ɔ? ?Ngue yɛ ɔ fata kɛ i sɔ’n su e bo kɛ e yo ɔ?
8 ?Kɛ e ti Zoova i anuannzɛ’n i bue ng’ɔ o ɲanmiɛn su lɔ’n i su ndɛ sɔ mun’n, ngue yɛ ɔ fata kɛ e yo ɔ? Ɔ fata kɛ e kan e wun ase kɛ Ezekiɛli sa. Afin like nga Zoova su yo’n, ɔ yo sro. (Eze. 1:28) Sɛ e bu Zoova i anuannzɛ’n i akunndan’n, é yó like nga Ezai yoli’n wie. Kɛ Zoova kúnndɛ sran naan ɔ ko kan sa ng’ɔ su yo’n i ndɛ’n, Ezai w’a sisimɛn i bo, ɔ ɔli. (An kanngan Ezai 6:5, 8 nun.) Ezai lafili su kɛ Zoova fanngan nun’n, like fi su kwlá tɛnndɛnmɛn i ɲrun naan w’a kwlá dimɛn i junman’n. Kɛ i sa’n, maan e kunndɛ kɛ é wlá e wun ase é dí Ɲanmiɛn i junman’n i kpa é fá súan i anuannzɛ’n i bo. Kɛ e si kɛ anuannzɛ nga e o nun’n, Zoova i junman’n yɛ ɔ di i sa trilili’n, i sɔ’n wla e fanngan kpa!
ZOOVA I ANUANNZƐ’N I BUE NG’Ɔ O ASIƐ’N SU WA’N
9, 10. ?Ngue ti yɛ ɔ yoli cinnjin kɛ Zoova taka i anuannzɛ’n i bue asiɛ’n su wa?
9 Zoova sinnin i Wa’n i lika takali i anuannzɛ’n i bue asiɛ’n su wa. Anuannzɛ sɔ’n, ɔ nin i bue ng’ɔ o ɲanmiɛn su lɔ’n be di junman kunngba’n. ?Ngue ti yɛ ɔ yoli cinnjin kɛ be taka anuannzɛ’n i bue asiɛ’n su wa naan b’a di junman nga Matie 24:14 kɛnnin i ndɛ’n niɔn? É wá kán sa nsan ndɛ.
10 Sa’n i klikli’n yɛle kɛ, Zezi seli kɛ i sɔnnzɔnfuɛ’m bé wá bó jasin fɛ’n “lele fá jú asiɛ’n i awieliɛ.” (Yol. 1:8) I nɲɔn su’n yɛle kɛ, ɔ fata kɛ be kle i sɔnnzɔnfuɛ’m be Ɲanmiɛn ndɛ’n yɛ be wla be fanngan. (Zan 21:15-17) I nsan’n su yɛle kɛ, ɔ fata kɛ i sɔnnzɔnfuɛ’m be yia be su Zoova naan be kle be jasin fɛ’n i bolɛ. (Ebr. 10:24, 25) Nanwlɛ, sɛ anuannzɛ fi nunman lɛ m’ɔ́ úka Klist i sɔnnzɔnfuɛ mun’n, i kwlaa sɔ’n su yoman ye le.
11. ?Wafa sɛ yɛ e kwla suan Zoova i anuannzɛ’n i bo ɔ?
11 ?Wafa sɛ yɛ e kwla suan Zoova i anuannzɛ’n i bo ɔ? I kun yɛle kɛ be nga Zoova nin Zezi be lafi be su mɔ be fali be kɛ be dun e ɲrun mmua jasin fɛ’n i bolɛ nun’n, ɔ fata kɛ e lafi be su wie. Aniaan sɔ’m be kwla se kɛ bé fá be blɛ nin be wunmiɛn’n wlá mɛn nga nun sa’m be siesielɛ’n nun. Sanngɛ nán i sɔ liɛ’n yɛ ɔ ti be cinnjin ɔn. ?Yɛ lele nin andɛ, ngue yɛ ɔ ti Zoova i anuannzɛ’n i bue ng’ɔ o asiɛ’n su wa’n i cinnjin ɔn?
‘LIKE NGA BE TI KPA’N’ YƐ Ɔ TI BE CINNJIN ƆN
12, 13. ?Wafa sɛ yɛ asɔnun kpɛnngbɛn’m be nian jasin fɛ’n bolɛ junman’n su ɔ? ?Ngue yɛ i sɔ’n kle amun ɔn?
12 Asiɛ wunmuan’n su’n, asɔnun kpɛnngbɛn nga be ɲin w’a ti kpa Ɲanmiɛn i sulɛ nun’n, Zoova sie be kɛ be nian be nvle’n nun lɔ jasin fɛ bolɛ junman’n su naan be fa junman’n i nun ta. ?Wafa sɛ yɛ be yo i sɔ liɛ’n niɔn? Ka naan b’a fa ajalɛ kun’n, be nian Ɲanmiɛn Ndɛ’n nun. Ɔ maan, Ɲanmiɛn Ndɛ’n ‘m’ɔ ti kɛ kannin sa’n, ɔ kpaja be bo. Ɔ kpaja be nyrun atin’n su weiin.’ Asa ekun’n, be srɛ Zoova tankaan kpa naan ɔ kle be atin.—Jue. 119:105; Mat. 7:7, 8.
13 Kɛ nga Klistfuɛ klikli’m be blɛ su asɔnun kpɛnngbɛn’m be fa yoli’n sa’n, asɔnun kpɛnngbɛn nga be siesie jasin fɛ bolɛ junman’n andɛ’n, be ‘kan [Ɲanmiɛn] i ndɛ’n tititi.’ (Yol. 6:4) Kɛ be wun wafa nga be nvle liɛ’n, ɔ nin mɛn wunmuan’n nun’n, jasin fɛ’n bolɛ junman’n kɔ i ɲrun’n, ɔ yo be fɛ dan. (Yol. 21:19, 20) Be kpɛman mmla tɛkɛtɛkɛ be mianmianman aniaan mun. Sanngɛ atin nga Ɲanmiɛn Ndɛ’n nin Ɲanmiɛn wawɛ’n kle be’n, be fa su naan jasin fɛ bolɛ junman’n w’a ɔ i ɲrun’n. (An kanngan Sa Nga Be Yoli’n 15:28 nun.) Kɛ be yo sɔ’n, be kle asɔnunfuɛ’m be ajalɛ kpa.—Efɛ. 4:11, 12.
14, 15. (a) ?Ngue yɛ aniaan kaka be yo naan y’a kwla bo jasin fɛ’n mɛn’n wunmuan’n nun ɔn? (b) ?Kɛ amun suan Ɲanmiɛn Sielɛ’n i jasin fɛ’n i bo’n, ɔ yo amun sɛ?
14 Aliɛ ba kwlaa nun’n, e niaan’m be nun kpanngban be di junman kekle kpa be klɛ fluwa nga bé wá fíte mun. Kpɛkun, be siesie aɲia kanngan nin dandan mun. Wie mun ekun be kaci fluwa sɔ mun aniɛn 600 tra su nun. Be kwlaa sɔ’n, be tuaman be kalɛ. Junman dan sɔ mɔ be di ti’n, sran kpanngban be kwla suan “Nyanmiɛn i abonuan sa b’ɔ yoli’n” be bɔbɔ be klɔ aniɛn’n nun. (Yol. 2:7-11) Aniaan gbanflɛn nin talua kaka wie mun kusu be di junman mannzin nga be fa yi fluwa mun’n, be su. I sin’n, be fa fluwa sɔ mun ko man mɛnmɛn’m be nun Zoova i Lalofuɛ’m be asɔnun mun.
15 Aniaan kaka kpa ekun be di junman wie mun naan e ɲin w’a tran jasin fɛ bolɛ junman’n su. I wie yɛle kɛ aniaan wie’m be kplan aɲia sua mun. Wie’m be uka be nga tukpacɛ kekle wie tɔ be su’n, annzɛ be nga sanvuɛsa kɛ asiɛ m’ɔ keje’n sa’n, ɔ ɲan be’n. Wie’m be kusu be siesie e aɲia dandan mun. Wie’m be liɛ’n, kɛ aniaan’m bé dí anuannzɛ’n i suklu’n, be kle be like. Be kwlaa sɔ’n, be tuaman be kalɛ. ?Ngue ti yɛ be yo i kwlaa sɔ’n niɔn? Be yo sɔ naan jasin fɛ bolɛ’n w’a yoman kekle e sa nun, naan kusu y’a si Ɲanmiɛn ndɛ’n i kpa. Asa ekun’n, be yo sɔ naan sran kaka kpa ekun be wa su Zoova. Nanwlɛ, Zoova i anuannzɛ’n i bue ng’ɔ o asiɛ’n su wa’n i ɲin o ninnge nga be ti cinnjin kpa’m be su!
MAAN E NIAN ZOOVA I ANUANNZƐ’N I LIƐ’N SU
16. ?Kɛ amun nin amun awlobo’n bé sú Ɲanmiɛn awlo lɔ’n, annzɛ kɛ amun ngunmin bé súan Biblu’n nun like’n, ngue yɛ amun kwla yo ɔ?
16 ?Cɛn kunngun e tran e bu junman nga Zoova i anuannzɛ’n di’n i akunndan? Kɛ aniaan wie’m be nin be awlobo’n bé sú Ɲanmiɛn awlo lɔ’n, annzɛ kɛ be ngunmin bé súan Biblu’n nun like’n, be kunndɛ anuannzɛ’n i su ndɛ e fluwa’m be nun, kpɛkun be bu su akunndan. Sɛ e fa blɛ e suan aolia nun sa nga Ezai, nin Ezekiɛli, nin Daniɛli yɛ Zan be wunnin be’n, be su like’n, é sí like kpanngban yɛ é dí aklunjuɛ. E fluwa nin DVD wie’m be kle e Zoova i anuannzɛ’n i su ndɛ fɛfɛ kpanngban wie. Fluwa sɔ’m be nun kun mɔ be yili i blɔfuɛ nun’n, be flɛ i Les Témoins de Jéhovah : Prédicateurs du Royaume de Dieu.
17, 18. (a) ?Like suanlɛ nga ti’n, ngue yɛ amún wá yó ɔ? (b) ?Kosan benin yɛ ɔ fata kɛ e fa usa e wun ɔn?
17 Ɔ ti kpa kɛ e bu like nga Zoova sin i anuannzɛ’n i lika yo’n i akunndan. Kɛ anuannzɛ kpa sɔ’n sa’n, maan e dun mmua yo like nga be ti cinnjin kpa’n. Sɛ e yo sɔ’n, é kán ndɛ nga Pɔlu kannin’n wie. Ɔ seli kɛ: “Nyanmiɛn i aunnvuɛ b’ɔ si ye b’ɔ fa e wlali junman nga nun’n ti’n, e sa sin bubu-man ye.” (2 Kor. 4:1) Asa’n, ɔ wlali i niaan Klistfuɛ’m be fanngan seli kɛ: “Nán maan e sa sin bubu ye sa kpa yolɛ’n nun, afin sɛ y’a fɛ-man’n, cɛn wie é nyɛ́n i nuan like.”—Gal. 6:9.
18 ?Ajalɛ benin yɛ ɔ fata kɛ e ngunmin annzɛ e nin e awlobo’n e fa naan y’a dun mmua yo ninnge nga be ti cinnjin kpa’n niɔn? ?Ngue yɛ ɔ fata kɛ e yaci be yolɛ naan e ɲin w’a tran jasin fɛ’n bolɛ junman’n su kpa ɔ? Like suanlɛ ng’ɔ́ bá lɛ nun’n, é wá kán ninnge nnun be ndɛ. Ninnge sɔ’m bé wá úka e naan junman nga Zoova i anuannzɛ’n di’n, y’a nian su y’a di wie titi.
[Foto, bue 18]
[Foto bue 20]