NDƐ NG’Ɔ KLƐ FLUWA’N SU’N | ?NGUE TI YƐ ƝANMIƐN I KLOLƐ TI KEKLE MAN SRAN WIE MUN ƆN?
Sa nga ti yɛ Ɲanmiɛn i klolɛ ti kekle man sran wie mun’n
“‘Klo ɔ Min Nyanmiɛn’n kpa, fa ɔ wla’n kwlaa guɛ i su, maan wɔ akunndan’n kwlaa trɛn i su.’ I yɛ ɔ ti mmla klikli nin i nun dan nin-ɔn.”—Zezi Klist kannin sɔ afuɛ 33 nun.a
Ɲanmiɛn i klolɛ ti kekle man sran wie mun kpa. Afin be bu i kɛ Ɲanmiɛn o be wun mmua, naan sran ndɛ lomɛn i, naan ɔ yo wlɛ bɔbɔ. Ndɛ nga sran wie’m be kan’n yɛ:
“N srɛli Ɲanmiɛn titi kɛ ɔ uka min. Sanngɛ kɛ ń srɛ́’n, m bɔbɔ kunngba’n n se min wun kɛ sran ndɛ loman Ɲanmiɛn naan be kwlá faman be wun mɛntɛnmɛn i. M buli i kɛ Ɲanmiɛn timan kɛ klɔ sran mɔ sa kwla yo i ya annzɛ ɔ yo i fɛ’n sa.”—Marko, ɔ fin Itali.
“Laa’n, Ɲanmiɛn sulɛ’n ti min cinnjin kpa. Sanngɛ m’an bumɛn i le kɛ Ɲanmiɛn klo sran naan sran ndɛ lo i. N seli min klun lɔ kɛ i like yolɛ yo ya naan sran’m be fɔ tulɛ ngunmin yɛ ɔ si i ɔ.”—Roza, ɔ fin Guatemala.
“M bakan nun’n, m buli i kɛ Ɲanmiɛn fɛ i ɲin sie sran’m be su kunndɛ sa tɛ nga be yo’n. Naan kɛ sran kun fɔn cɛ’n, nn ɔ su tu i fɔ. I sin, n wa buli i kɛ Ɲanmiɛn fɛmɛn i wun mantanman sran. Naan ɔ ti kɛ mɛn siefuɛ kun mɔ i like liɛ ng’ɔ si i’n yɛle i junman’n sa. Be ng’ɔ sie be’n, be ndɛ lomɛn i.”—Rɛmɔndu, ɔ fin Kanada.
?Yɛ ɔ li? ?A bu i wie kɛ Ɲanmiɛn kloman sran? Asɔnun kɔfuɛ’m be fali kosan sɔ’n usali be wun laa. Lele nin andɛ, be te usa. I sɔ’n ti’n, kɛ afuɛ nga be flɛ i 500 lele m’ɔ afuɛ nga be fɛ i 1.500 mántan’n, asɔnun kɔfuɛ’m be dan lika b’a srɛman Ɲanmiɛn Kpli kun. Afin sran’m be wa sroli Ɲanmiɛn tratrali su. Laa sa’m be su like suanfuɛ kun m’ɔ suan Will Durant kɛnnin i sɔ’n i ndɛ. Ɔ seli kɛ: “?Ɲanmiɛn m’ɔ kun srɛ m’ɔ o e wun mmua’n, wan yɛle klɔ sran m’ɔ́ sé kɛ ɔ́ kɛ́n i klun ndɛ klé i ɔ?”
?Ngue ti yɛ sran’m be wa buli i kɛ Ɲanmiɛn ‘kun srɛ naan ɔ o e wun mmua ɔ’? ?Ɲanmiɛn i su ndɛ bɔbɔ nga Biblu’n kan’n yɛle benin? ?Sɛ a si Ɲanmiɛn i su ndɛ ng’ɔ ti nanwlɛ’n, á kló i?