?E tu i yolɛ cɛn’n e sie?
?Ngue like yɛ e tu i yolɛ cɛn’n e sie ɔ? Yɛle e fluwa DPA i su klɛklɛlɛ. Ɔ ti aniaan nga b’a yo be batɛmu’n be liɛ. Kɛ mɔ e ‘siman like ng’ɔ́ yó e ainman’n’ ti’n, ɔ ti cinnjin kɛ bikisa’n are yolɛ wafa nga sɛ tukpaciɛ tɔ e su kekle kpa’n, e klo kɛ be fa yo e’n, maan e klɛ e sie. (Zak 4:14; Yol. 15:28, 29) I sɔ yolɛ nun’n, be yili flimu kun m’ɔ kwla uka e. Be flɛ i kɛ Soigner sans transfuser — Besoins et droits du patient. Maan e nian naan i sin’n, like nga e wunnin i wlɛ’n, e fa wlɛ i srɛlɛ nun. I sɔ nun’n, kosan nga bé bá yɛ’n be kwla uka e. Ndɛ nanndoliɛ: Flimu’n nun’n, be kle sran mɔ be su kpaci be nun. I sɔ’n ti’n, sɛ siɛ nin niɛn’m be waan be nin be mma’m bé nían’n, maan be bu i akunndan.
(1) ?Ngue ti yɛ dɔɔtrɔ wie’m be buli sran’m be kplo’n nun mmoja wlalɛ’n i su akunndan uflɛ ɔ? (2) Flimu’n nun’n, be kleli sran wie mɔ be nun kpacilɛ w’a yoman pɔpɔ dɔɔtrɔ’m be sa nun. Sanngɛ i yolɛ nun’n, b’a wlaman sran’n i nun mmoja. Amun bobo sran nun kpacilɛ sɔ’n be nun nsan su. (3) ?Mɛn’n nun dɔɔtrɔfuɛ nɲɛ yɛ be kplinnin su kɛ sran’m be are yolɛ nin be nun kpacilɛ’n nun’n, be su wlaman be nun mmoja ɔ? ?Yɛ ngue ti yɛ be fɛli i sɔ ajalɛ’n niɔn? (4) Kɛ dɔɔtrɔfuɛ wie’m be ko nianniannin wafa nga dɔɔtrɔ wie’m be nun be fa mmoja be fa di junman’n, ngue yɛ be sieli i nzɔliɛ ɔ? (5) ?Ngue ti yɛ blɛ sunman nun’n, mmoja mɔ be fa wla tukpacifuɛ’m be kplo nun’n, ɔ yoman be ye ɔ? (6) ?Kɛ dɔɔtrɔ wie’m b’a faman mmoja mɔ be yoli sran’m be are wafa uflɛ, mɔ i bo’n guali kpa’n, ngue ndɛ yɛ be kannin ɔn? (7) ?Ngue yɛ ɔ yo mɔ mmoja’n wie sran nun ɔn? ?Sran’n i mmoja’n kwla kpɛ su lele ju sɛ naan w’a yo tɛ w’a mɛn i? ?Ngue yɛ be kwla yo naan i mmoja ng’ɔ kpɛli su’n, w’a sin i osu ɔ? (8) ?Ngue yɛ be kwla yo naan sran kun i mmoja’n nun ninnge kanngan nga be flɛ be globules rouges w’a ba nun ɔn? (9) ?Kɛ bé kpáci sran kun nun’n, ngue yɛ be yo naan i mmoja’n w’a sonjiman dan ɔn? (10) ?Kɛ ɔ yo naan be fa mmoja be fa yo ba kaan kun annzɛ sran kun m’ɔ o wie nuan i are, mɔ be yo be are wafa uflɛ’n, ɔ kwla yo be kpa? (11) ?Sran are yolɛ ng’ɔ nin i fata’n i su mmla cinnjin kpa kun yɛle benin? (12) ?Are wafawafa nga be yo ɔ be manman sran mmoja’n, ngue ti yɛ ɔ fata kɛ e dun mmua bu nga e kplin su’n i akunndan sie ɔ? ?Ngue yɛ ɔ kwla uka e i sɔ yolɛ nun ɔn?
Are yolɛ’n i wun ajalɛ nga be kannin be ndɛ flimu’n nun’n, be su falɛ’n ti sran kun bɔbɔ i ti su trɔ. Maan ajalɛ ng’ɔ́ fá’n, ɔ nin ninnge ng’ɔ suɛnnin i Biblu’n nun’n be wɔ likawlɛ. ?Are yolɛ wafa nga amún kplín su kɛ be fa yo amun annzɛ amun mma mun’n, amun a dun mmua bu i akunndan? ?Yɛ amun klɛli ajalɛ kwlaa nga amún fá’n fluwa DPA su? Sɛ an klo kɛ amún wún ndɛ sɔ’n i ɲrun nin i sin kpa’n, an nian fluwa ‘Ɲanmiɛn klo e’n’ i ndɛ tre 7 nun. Biblu’n i akua nga be kannin be ndɛ lɔ’n, amun nian be nun wie. Asa ekun’n, an nian afuɛ nga be flɛ i 2006, Novamblu Ɲanmiɛn Sielɛ Blɛ junman fluwa’n, i afiɛn fluwa’n nun kan be klɛli i kɛ “?Ajalɛ mennin yɛ ń fɛ́ i m bɔbɔ min mmoja’n i nun ninnge mun ɔ nin are yolɛ mɔ be kwla fa m bɔbɔ min mmoja’n be yo’n be su ɔ?” i nun. Sɛ amun a wie i sɔ yo’n, ajalɛ kwlaa nga amun fali be’n, maan amun klɛklɛ be amun fluwa DPA su. Ɔ nin i fata kɛ sran nga amun klɛklɛli be dunman amun fluwa DPA su’n, ɔ nin amun osufuɛ nga be timan Zoova i Lalofuɛ’n, be si ajalɛ nga amun fali’n i kpa.
[Kuku, bue 3]
• ?Are wafa nga amún kplín su kɛ be fa yo amun nin amun mma mun’n, amun a dun mmua bu i akunndan sie?
• ?Kɛ mɔ e siman sa nga ɔ kwla ɲan e’n, amun a wie amun fluwa DPA i su klɛklɛ yɛ ɔ o amun sa nun cɛn kwlaa?