?E si ajalɛ nga é fá’n?

Mɛn wunmuan’n nun’n, siɛn’n dɔɔtrɔ sua nga be kpaci sran’m be nun lɔ’n mɔ be wlaman be nun mmoja’n, be su sɔn kpa kɔ i ɲrun. ?Ayre yolɛ wafa nga be manman sran mmoja’n, e si nun ndɛ kpa? Ɔ fata kɛ e si nun ndɛ naan y’a kwla fa ajalɛ kpa e wun ayre yolɛ wafa’n nin e nun kpacilɛ ndɛ’n nun. I sɔ’n ti’n, maan e nian flimu Pas de sang : la médecine relève le défi. I sin’n, maan e srɛ Ɲanmiɛn, kpɛkun e fa kosan nga be lɔngɔ su yɛ’n e usa e wun e nian. Ndɛ nanndoliɛ: flimu nun’n, be kle sran mɔ be su kpaci be nun’n. I sɔ’n ti’n, sɛ siɛ nin niɛn’m be waan be nin be mma’m bé nían’n, maan be bu i akunndan.

(1) ?Like cinnjin benin ti yɛ Zoova i Lalofuɛ’m be faman mmoja’n niɔn? (2) ?Zoova i Lalofuɛ’m be wun ayre yolɛ nun’n, ngue like yɛ be kunndɛ ɔ? (3) ?Tukpacifuɛ’m be wun ayre yolɛ nun’n, ajalɛ benin yɛ be bɔbɔ be le i wun atin ɔn? (4) ?Ngue ti yɛ ɔ nin i fata kɛ e kunndɛ ayre yolɛ wafa nga be kwla fa kaci sran’n i nun mmoja wlalɛ’n niɔn? (5) ?Sɛ mmoja tu sran kun dan kpa’n, ninnge nɲɔn benin mun yɛ be ti dɔɔtrɔ’m be cinnjin ɔn? (6) ?Ninnge nnan nga ayre yolɛ wafa nga be fa kaci sran nun mmoja wlalɛ’n be taka su’n, yɛle benin? (7) ?Wafa sɛ yɛ dɔɔtrɔ mun (a) be kwla yo naan mmoja w’a tuman sran ngboko ɔ, (b) be kwla fa mmoja’n nun globules rouges mun be sie ɔ, (c) be kwla yo naan mmoja w’a ba sran nun ndɛndɛ ɔ, (d) be kwla yo naan sran’n i mmoja’n w’a sin i osu’n nun ɔn (be flɛ i blɔfuɛ nun récupération du sang épanché)? (8) An yiyi ayre yolɛ wafa mɔ be yo naan mmoja w’a tuman sran’n i ngboko’n mɔ be flɛ be (a) hémodilution ɔ nin (b) récupération du sang épanché be nun. (9) ?Ngue like yɛ ɔ fata kɛ e kunndɛ kɛ é sí i ayre yolɛ wafa nga be fa kaci sran’n i nun mmoja wlalɛ’n i su ɔ? (10) ?Kɛ sran’n i nun kpacilɛ’n ti kekle’n, sɛ b’a mɛnmɛn i mmoja’n, be kwla kpaci i nun? (11) ?Like kpa benin yɛ be su wun i dɔɔtrɔ’m be afiɛn lɔ ɔ?

Ayre yolɛ’n i wun ajalɛ nga be kannin be ndɛ flimu’n nun’n, be su falɛ’n ti sran kun bɔbɔ i ti su trɔ. Sran kun i ajalɛ ng’ɔ́ fá’n, ɔ taka ninnge ng’ɔ suɛnnin i Biblu’n nun’n, i su. ?Ayre yolɛ wafa nga be fa kaci sran’n i nun mmoja wlalɛ’n, amun a dun mmua bu nga amún kplín su kɛ be fa yo amun bɔbɔ’n, annzɛ amun mma mun’n i akunndan? ?Yɛ amun klɛli ajalɛ kwlaa nga amún fá’n, fluwa DPA su? Kɛ ɔ ko yo naan amun a koko ndɛ nga su yalɛ kpa’n, an nian ndɛ nga be flɛ i “ Questions des lecteurs ” m’ɔ o Sasafuɛ Tranwlɛ’n (w-F), afuɛ 2004 nun, Zuɛn 15 nin afuɛ 2000 nun, Ɔktɔblu 15 nun’n, be nun. I sin’n, maan amun nian ndɛ nga ɔ o afuɛ 2006 nun Novamblu Ɲanmiɛn Sielɛ Blɛ junman i afiɛn fluwa’n nun’n. Be flɛ i: “?Ajalɛ mennin yɛ ń fɛ́ i m bɔbɔ min mmoja’n i nun ninnge mun ɔ nin ayre yolɛ mɔ be kwla fa m bɔbɔ min mmoja’n be yo’n be su ɔ?”, naan ayre yolɛ nun’n, amun fa amun ajalɛ liɛ. Yɛle kɛ sɛ amún kplín su, annzɛ amun su kplinman su o. I agualiɛ su’n, maan amun nian nun kpa naan ajalɛ nga amun fali be’n, sɛ amun klɛli be kpa amun fluwa DPA su o. Ɔ nin i fata kɛ sran ng’ɔ́ íjɔ amun nuan’n ɔ nin amun osufuɛ nga be timan Zoova i Lalofuɛ’n, be si ajalɛ nga amun fali’n. Asa ekun’n, maan be si like nga ti yɛ amun fali ajalɛ sɔ’n.