Aniaan nga e nin i bo jasin fɛ’n, maan e suɛn i bo kpa
1. ?Kɛ e nin sran uflɛ bo jasin fɛ’n, wafa sɛ yɛ i sɔ’n uka e ɔ?
1 Le kun’n, Zezi fɛli i sɔnnzɔnfuɛ 70 yɛ ɔ “sunmannin be nnyɔn-nnyɔn” kɛ be ko kan Ɲanmiɛn ndɛ’n kle sran mun. (Lik 10:1) Kɛ m’ɔ yoli sɔ’n, e si kɛ kɛ bé kán ndɛ’n bé kɔ́’n, nn bé súan be wiengu bo, bé wlá be wun fanngan. ?E kusu’n, kɛ e nin aniaan kun é bó jasin fɛ’n, wafa sɛ yɛ e kwla suɛn i bo ɔ?
2. ?Kɛ aniaan nga e nin i bo jasin’n su yiyi ndɛ nun’n, ngue yɛ ɔ fata kɛ e yo ɔ? ?Ngue ti yɛ ɔ fata kɛ e yo sɔ ɔ?
2 Maan e sie e su: Kɛ aniaan’n yíyí ndɛ’n nun klé sran’n, maan e sie e su kpa e tie. (Zak 1:19) Sɛ Biblu’n ndɛ mma wie yɛ ɔ su fa sran’n i ɲin sie su’n, maan e kusu e fa e Biblu’n e nian nun wie. Sran nga ijɔlɛ’n wo i nuan’n, sɛ e niaan nin o sɛ sran ng’ɔ bo jasin’n kle i nin o, maan e fa e ɲin sie i su. Nán e to e ɲin lika uflɛ. Sɛ sran’n wun kɛ e sie e su kpa e tie ndɛ’n, i kusu yó sɔ wie.
3. ?Wafa sɛ yɛ e kwla bua e niaan’n i ndɛ liɛ’n nun naan i klun w’a jɔ su ɔ?
3 Maan e si nun bua: Aniaan nga e nin i bo jasin’n, sɛ e ju awlo kun nun naan i yɛ ɔ bo ndɛ’n i kanlɛ bo’n, maan e yaci i nun maan ɔ ijɔ. Maan ɔ dun e ɲrun mmua. I sran bulɛ wafa kun yɛ ɔ o lɛ. (Rɔm. 12:10) Nán maan e kpɛ i nuan ndɛ. Wie liɛ’n, i wla kwla fi ndɛ nga i waan ɔ́ kán’n su. Annzɛ ɔ kwla kunndɛ kɛ e ukɛ i naan ɔ tɛ sran’n i kosan ng’ɔ yili’n su. Sɛ ɔ ti sɔ’n, nán maan e tɔtɔ nun e kankan ndɛ uflɛ sanngɛ maan e sin i ndɛ’n i atin’n nun. (Nya. 16:23; Aku. 3:1, 7) Yɛ e fa kɛn i lɛ. Sɛ e kunndɛ kɛ é búa nun’n, maan jasin nga aniaan boli i kanlɛ bo’n nin e ndɛ liɛ’n, be sa su klanman.—1 Kor. 14:8.
4. ?Kɛ é bó jasin fɛ’n, ngue yɛ e kwla yo naan e klun w’a jɔ naan junman’n w’a ba nvlɛ ɔ?
4 Kɛ Zezi i sɔnnzɔnfuɛ 70 be ɔli nɲɔnnɲɔn be ko boli jasin fɛ’n mɔ be bali’n, “be klun jɔli.” (Lik 10:17) E kusu, sɛ e suan aniaan nga e nin i bo jasin i bo’n, yɛle kɛ sɛ e sie e su’n naan e si i ndɛ nun bua’n, é klun jɔ́ yɛ e junman’n bá nvlɛ.