Sɛ e kunndɛ kɛ é ɲán aniɛn uflɛ nun fluwa ndɛndɛ kpa’n

Ɔ ju wie’n, e fluwa nga be yi be aniɛn uflɛ’m be nun’n, be nun yɛ be nga e to be’n, be kunndɛ kɛ bé kánngan ɔn. Kusu nn i wie nunman e asɔnun liɛ’n nun. ?Amun si kɛ, sɛ amun le ɛntɛnɛti nin mannzin ng’ɔ yi fluwa’n, amun bɔbɔ amun kwla yi fluwa sɔ mun aniɛn ko yo 400 nun? I yiwlɛ wafa’n yɛ:

• Amun fa e ɛntɛnɛti adrɛsi, be nian ɛntɛnɛti su.

• Bue nga a ka lɛ fite su’n, i fama su lɛ’n, be klɛklɛli aniɛn wie’m be lɛ. Asiɛ’n i desɛn nga a wun i lɛ’n, tin su naan aniɛn kwlaa nga be nun fluwa o ɛntɛnɛti su’n, b’a fite.

• Aniɛn nga a kunndɛ kɛ á yí i nun fluwa’n, tin su. Á wá ká lɛ wún fluwa wafawafa nga a kwla yi’n. Ɔ kwla yo fluwa nɲa, fluwa pɛplɛpɛ, yɛ fluwa wie’m be nun ndɛ akpasua mun. Kɛ mɔ ɛntɛnɛti i bue nga a su di su junman lɛ’n, ɔ fite aniɛn nga a dun mmua tinnin su’n i nun’n, sɛ a wunman ndɛ nga be klɛli be bue sɔ’n su’n be wlɛ’n, nán ɔ klun titi ɔ.

• Tin ndɛ nga be klɛklɛlɛ lɛ’n, be nun kun su. Kɛ a ko yo sɔ’n, ndɛ uflɛ m’ɔ klɛ aniɛn sɔ’n nun’n, ɔ́ wá ká lɛ fíte. A kwla yi e fluwa’n i nun ndɛ sɔ’n siɛn’n. I lɛ nun’n, tin fluwa yilɛ nzɔliɛ ng’ɔ o nglo lɔ lika liɛ nun’n, i su.

E fluwa’m be nun kaan sa yɛ e fali be e sieli i ɛntɛnɛti su ɔ. Be nun wie mun ekun, be o asɔnun’m be nun. Kɛ e ko yo mɔ Ɲanmiɛn ndɛ’n ko lo sran’n i kpa’n, maan e wla fluwa’m be bo asɔnun’n nun.