Kosan’m be su tɛlɛ

◼ ?Wan yɛ ɔ fata kɛ ɔ fɛ i sɔ ajalɛ’n niɔn?

E fluwa wie’m be sin’n, bue kaan kun o lɛ mɔ be nga be kunndɛ kɛ bé ɲán e fluwa wie mun annzɛ be kunndɛ kɛ be kle be Biblu’n nun like’n, be kwla klɛklɛ nun fa ko man Betɛli’n. Asa kusu’n, be kwla fa anuannzɛ’n i ɛntɛnɛti adrɛsi’n (www.watchtower.org) be fa srɛ kɛ be kle be Biblu’n nun like. I sɔ’n ukali sran kpanngban naan b’a si ndɛ nanwlɛ’n. Sanngɛ, aniaan wie’m be bɔbɔ be klɛli be niaan wie annzɛ sran uflɛ wie i dunman ɔ nin i adrɛsi’n fluwa bue sɔ’m be su annzɛ ɛntɛnɛti su naan Betɛli’n ɔ blɛ be sran sɔ’n i fluwa annzɛ ɔ fa aniaan wie mun kɛ be ko nian be osu. I sɔ mɔ be yoli’n ɔ kpɛli ndɛ ba.

Kɛ Betɛli’n ko mannin sran sɔ’m be fluwa’n, w’a yoman be nun wie’m be fɛ. Afin kɛ mɔ nán be bɔbɔ yɛ be wlali fluwa sɔ’m be bo’n, ɔ yo be kɛ anuannzɛ’n w’a fa be adrɛsi’n naan ɔ su mianmian be kɛ be kanngan e fluwa’m be nun sa. Naan wá blɛ́ be fluwa titi kɛ be kanngan nun. Asa kusu, jasin bofuɛ nga be seli be kɛ be ko nian sran sɔ’m be osu’n, sran sɔ’m be nun wie’m be plannin. I sɔ’n yoli jasin bofuɛ sɔ’m be kɛnsrɛn. I sɔ’n ti’n, ɔ fataman kɛ jasin bofuɛ kun i bɔbɔ fa ajalɛ kɛ ɔ́ klɛ́ i niaan annzɛ sran uflɛ wie i dunman ɔ nin i adrɛsi fluwa bue sɔ’m be su, annzɛ ɛntɛnɛti su. Ɔ fata kɛ sran’n bɔbɔ yɛ ɔ fa ajalɛ kɛ ɔ́ klɛ́ fluwa bue sɔ’n su annzɛ ɔ́ fá anuannzɛ’n i ɛntɛnɛti adrɛsi’n, ɔ́ fá srɛ́ kɛ be blɛ i e fluwa’m be wie annzɛ be kle i Biblu’n nun like ɔ. Sɛ w’a yoman sɔ’n, Betɛli’n su faman fluwa ko manman sran’n annzɛ ɔ su seman kɛ be ko niɛn i osu.

?Ɔ maan wafa sɛ yɛ e kwla uka e niaan kun annzɛ sran uflɛ wie naan w’a kwla si ndɛ nanwlɛ’n niɔn? Sɛ e fluwa mun yɛ e kunndɛ kɛ ɔ kanngan be nun’n, e bɔbɔ e kwla ko fa mɛn i. Sɛ kusu sran sɔ’n kunndɛ kɛ ɔ́ súan Biblu’n nun like’n, naan ɔ tranman e jasin bowlɛ’n nun’n, sɛ e siman wafa nga e ko yo naan y’a kwla wun i tranwlɛ nun lɔ asɔnun kpɛnngbɛn’m be wun’n, e kwla klɛklɛ fluwa Veuillez suivre l’intérêt (S-43) i su e man e asɔnun’n i fluwa klɛfuɛ’n. Ɔ́ níannían nun, kpɛkun ɔ́ fá kó mán Betɛli’n. Sanngɛ sɛ sran sɔ’n o bisua, annzɛ ɔ o dɔɔtrɔ kun nun’n, ɔ fataman kɛ e nuan to Betɛli’n kɛ ɔ fa sran naan ɔ ko kle i Biblu’n nun like. Maan e se sran sɔ’n kɛ sɛ aniaan wie’m be bo jasin fɛ’n bisua sɔ’n nun annzɛ dɔɔtrɔ sɔ’n nun’n, i bɔbɔ kwla wun be wun. Annzɛ e kwla se i kɛ i bɔbɔ ɔ klɛ Betɛli’n i fluwa.