Maan e ko nian be osu ndɛndɛ

Kɛ ɔ fin cɛn mɔ e kpɛli e ɛntɛnɛti adrɛsi jw.org i ba’n, be nga be klɛ e fluwa kɛ be kunndɛ kɛ bé súan Biblu’n nun like’n, b’a uka su kpa. Asa ekun’n, nzra nun jasin fɛ’n bolɛ’n i su ajalɛ uflɛuflɛ nga e fali be le nɲɔn nga nun’n, be yo maan sran wie mun ekun be kunndɛ kɛ bé súan Biblu’n nun like. I sɔ’n ti’n, Betɛli’n fa ajalɛ ndɛndɛ naan be uka sran sɔ mun. I wie yɛle kɛ, kɛ sran kun ko klɛ jw.org su kɛ be ukɛ i naan ɔ suan Biblu nun like’n, Betɛli’n klɛ asɔnun kpɛnngbɛn nga sran sɔ’n wo be jasin bowlɛ’n nun’n, be fluwa jw.org su. Sɛ be wan w’a cɛ o, yɛle cɛn ba nɲɔn. Sanngɛ nganniɛn nga be gua e su’n, yɛle kɛ sran wie mɔ be kunndɛ kɛ bé súan Biblu’n nun like’n, be minndɛ lele le mɔcuɛ kpanngban. ?E yo sɛ naan y’a uka sran sɔ mun ndɛndɛ naan be konvi w’a tuman Biblu’n nun like suanlɛ’n su?​—Mark 4:14, 15.

Sɛ sran kun m’ɔ tranman amun jasin bowlɛ’n nun’n, ɔ kunndɛ kɛ ɔ́ súan Biblu’n nun like’n, amun klɛklɛ i su ndɛ fluwa nɲa Veuillez suivre l’intérêt (S-43) su ndɛndɛ, naan amun fa man asɔnun’n i fluwa klɛfuɛ’n. Nán maan asɔnun aɲia nga amún wá yó i le mɔcuɛ sɔ’n nun’n ɔ sin ka naan amun a yo i sɔ liɛ’n. Kpɛkun, cɛn kunngba sɔ’n nun annzɛ kɛ lika’n cɛn’n, maan fluwa klɛfuɛ’n kusu wɔ jw.org su naan ɔ klɛ fluwa’n ko man Betɛli’n. Ɔ fata kɛ asɔnun kpɛnngbɛn’m be nian e ɛntɛnɛti adrɛsi’n su tikatika. Sɛ Betɛli klɛ be kɛ be ko nian sran kun osu’n, nán maan be sisi be bo. Yɛ sɛ be se jasin bofuɛ kun kɛ ɔ ko niɛn i osu’n, maan i sɔ liɛ’n yo i cinnjin dan. Sɛ jasin bofuɛ’n w’a toman sran’n i awlo lɔ’n, ɔ kwla yaci i telefɔnu nimielo’n lɔ.