E uka sran mun naan be tie Ɲanmiɛn ndɛ’n
1. ?E Nvle kun aɲia ‘Maan Ɲanmiɛn Sielɛ Blɛ’n ju!’ i bo lɔ’n, fluwa benin yɛ be yili be ɔ? ?Ngue ti yɛ e kwla fa be e di junman kpa ɔ?
1 E Nvle kun aɲia ‘Maan Ɲanmiɛn Sielɛ Blɛ’n ju!’ i bo lɔ’n be yili fluwa uflɛ nɲɔn. I kun yɛle Amun tie Ɲanmiɛn ndɛ’n naan amun a ɲan nguan tititi. Yɛ kun ekun mɔ i nun kannganlɛ’n ti pɔpɔ’n yɛle Amun tie Ɲanmiɛn ndɛ’n. Kɛ mɔ be nun ndɛ’n w’a sɔnman ti’n, be kwla kacikaci be aniɛnaniɛn’m be nun ndɛndɛ kpa, yɛ be kacilɛ’n ti pɔpɔ. I kpa bɔbɔ’n kɛ bé yí fluwa sɔ mun Angle nun’n, nn b’a dun mmua man atin kɛ be kaci be aniɛn 431 nun.
2. ?Wan mun yɛ fluwa sɔ’m be kwla uka be ɔ?
2 ?Wan mun yɛ fluwa sɔ’m be kwla uka be kpa ɔ? Maan e fa e ɲin e sie i sa wie mɔ be ju mɛn wunmuan’n nun titi’n be su:
• Jasin fɛ’n bofuɛ kun nin sran kun be su koko yalɛ. Ɔ kwla yo sran mɔ blɛ yɛ w’a to i, annzɛ kusu sran kun m’ɔ ɔli i osu nianlɛ’n ekun ɔn. Ɔ wun i wlɛ kɛ sran sɔ’n siman fluwa annzɛ ɔ siman fluwa nun kanngan kpa.
• Jasin fɛ’n bofuɛ kun su bo jasin’n kle sran wie mun aniɛn nga y’a kaciman fluwa kpanngban nun’n, annzɛ aniɛn nga y’a kaciman fluwa wie fi nun’n i nun. Annzɛ jasin fɛ’n bowlɛ lika’n nun’n aniɛn nga sran’m be bɔbɔ be kan’n, be simɛn i kanngan.
• Jasin fɛ’n bofuɛ kun su bo jasin bobo’m be aniɛn’n nun.
• Siɛ annzɛ niɛn kun kunndɛ kɛ ɔ́ klé i wa kan m’ɔ nin a siman kanngan’n i ndɛ nanwlɛ’n.
3. ?Ngue yɛ ɔ o fluwa Amun tie Ɲanmiɛn ndɛ’n nun ɔn?
3 ?Wafa sɛ yɛ be klɛli fluwa sɔ mun ɔn? Fluwa Amun tie Ɲanmiɛn ndɛ’n i nun ndɛ’n w’a sɔnman. Blɛ sunman nun’n, ndɛ ɲanman kun nin Biblu’n nun ndɛ mma kun yɛ be klɛ i fluwa’n i ja ngua lɛ ɔ. Be fa e ɲin sie i ndɛ cinnjin’m be su. ?Ngue ti ɔ? ?Sɛ sran kun man amun fluwa kun mɔ be klɛli i aniɛn nga amun simɛn i’n i nun’n, kannzɛ bɔɔ i nun foto’m be ti klanman sɛ’n amun sɔ nun? Ɔ si’ɛ. I kunngba’n fluwa nga i nun ndɛ’n sɔnnin’n ɔ bubu be nga be siman kanngan’n be sa sin ndɛndɛ kpa. Ɔ maan desɛn’m be o fluwa’n i bue ngba su. Kpɛkun nzɔliɛ ninnge wie’m be o lɛ be kle e wafa nga e kwla koko desɛn sɔ’m be su yalɛ kunngunngun’n.
4. ?Ngue yɛ ɔ o fluwa Amun tie Ɲanmiɛn ndɛ’n naan amun a ɲan nguan tititi i nun ɔn?
4 Desɛn nga be o fluwa Amun tie Ɲanmiɛn ndɛ’n nun’n, be kunngba yɛ be o Amun tie Ɲanmiɛn ndɛ’n naan amun a ɲan nguan tititi nun ɔn. Be yili fluwa sɔ’n kɛ be fa uka be nga be siman kanngan kpa’n annzɛ be nga be su suan kannganlɛ’n. Asa kusu’n, sɛ sran kun su kle sran uflɛ i Biblu’n nun like’n, kannzɛ bɔbɔ fluwa Amun tie Ɲanmiɛn ndɛ’n yɛ ɔ o like suanfuɛ’n i sa nun’n, sanngɛ ɔ kwla fa Amun tie Ɲanmiɛn ndɛ’n naan amun a ɲan nguan tititi tinngɛ like suanlɛ’n. Kɛ be fa like suanlɛ kun sa’n, kosan kun o fluwa i bɛ su i nglo lɔ lika’n nun. Kosan sɔ’n yɛ like suanlɛ’n tɛ su ɔ. Be klɛli ndɛ wie mun nin Biblu’n nun ndɛ mma wie mun fa ukali dɛsɛn’m be su. Fluwa’n i ja gua lɛ’n i bue sunman su’n, be klɛli ndɛ wie mun nin Biblu’n nun ndɛ wie mun kuku’m be nun. Sɛ amún nían naan amun like suanfuɛ’n kwla suɛn i bo’n, amun kwla jran su be koko yalɛ.
5. ?Blɛ benin nun yɛ e kwla fa fluwa sɔ mun e man ɔn? ?Yɛ wafa sɛ yɛ e kwla yo i sɔ ɔ?
5 Wafa nga e kwla fa be e di junman’n: Kɛ amún bó jasin fɛ’n anuananuan’m be nun’n, sɛ ɔ nin i fata’n, kannzɛ nán be yɛ e fa di junman anglo sɔ’n nun’n, sanngɛ amun kwla fa man sran’n. (Amun nian kuku “?Wafa sɛ yɛ e kwla fa be e man ɔn?” i nun.) Kɛ é kó nían sran’n i osu ekun’n, e kwla fa mɛn i. E kwla se kɛ min waan ń fá like kun ń klé wɔ, kpɛkun y’a fa fluwa’n y’a wlɛ i sa nun.
6. ?Wafa sɛ yɛ é fá fluwa sɔ mun é klé sran mun Biblu’n nun like ɔ?
6 Kɛ mɔ b’a klɛman kosan fluwa Amun tie Ɲanmiɛn ndɛ’n nun’n ti’n, i nun yalɛ kokolɛ’n su yoman kosan usalɛ nin i su tɛlɛ, kɛ nga e fa yo i fluwa Biblu’n kle i nun’n sa. Lika kwlaa nun’n, sran’m be klo kɛ be koko ndɛ wie’m be su yalɛ kle be. I sɔ’n ti’n, jran desɛn’m be su kan Biblu’n nun ndɛ mun kle like suanfuɛ’n. Like nga be yi i nglo desɛn’m be nun’n, yiyi nun juejue su kle i. Usɛ i naan ɔ kan like nga ɔ wun i desɛn’m be su’n, ɔ nin be su akunndan nga ɔ bu’n, be ndɛ. Kanngan Biblu’n nun ndɛ mma nga ɔ o ja gua lɛ’n i nun, naan a nin i be koko su yalɛ. Usɛ i kosan naan ɔ kɛn i klun ndɛ. I liɛ’n sɛ ɔ wun ndɛ’n i wlɛ’n, á wún i weiin. Sɛ kusu fluwa Amun tie Ɲanmiɛn ndɛ’n naan amun a ɲan nguan tititi yɛ ɔ o i sa nun’n, desɛn kwlaa nga amun ju su’n, maan amun kanngan i su ndɛ’n nin Biblu’n nun ndɛ mma’m be nun.
7. ?Wafa sɛ yɛ e kwla uka e like suanfuɛ’n naan w’a wɔ i ɲrun ɔn?
7 E uka like suanfuɛ’n naan ɔ wɔ i ɲrun: E lafi su kɛ yalɛ kokolɛ sɔ’n úka amun like suanfuɛ’n, naan w’a kunndɛ kannganlɛ’n i wun atin, naan i bɔbɔ w’a kwla si Zoova. (Mat. 5:3; Zan 17:3) I sɔ’n ti sɛ fluwa Amun tie Ɲanmiɛn ndɛ’n i nun yɛ amun suan like’n, ɔ́ jú i ɲrun’n, a kwla kle like suafuɛ’n i kannganlɛ naan amun a suan Amun tie Ɲanmiɛn ndɛ’n naan amun a ɲan nguan tititi i nun like. Kannzɛ bɔbɔ like suanfuɛ’n wie fluwa sɔ’m be nun like suan’n, sanngɛ be kwlá yomɛn i batɛmu. Ɔ nin i fata kɛ ɔ suan fluwa Biblu’n kle annzɛ fluwa uflɛ wie m’ɔ kwla ukɛ i naan w’a wun Biblu’n nun ndɛ’n i wlɛ kpa’n, i nun like.
8. ?Ngue ti yɛ fluwa uflɛ sɔ mɔ e kwla fa uka sran mun naan b’a tie Ɲanmiɛn ndɛ’n ti’n, asenna’n yɛ o e nuan ɔn?
8 Sɛ sran’m be waan bé ká nguan nun tititi’n, ɔ fata kɛ be tie sran nga ɔ yili nglo nin asiɛ’n i nuan ndɛ’n. (Eza. 55:3) Zoova klo kɛ “sran’m be kwlaa,” be suan wafa nga be kwla tie i ndɛ’n. Be nga be siman kanngan bɔbɔ’n be o nun wie. (1 Tim. 2:3, 4) Nanwlɛ, fluwa uflɛ sɔ mɔ e kwla fa uka sran mun naan b’a tie Ɲanmiɛn ndɛ’n ti’n, asenna’n yɛ o e nuan ɔn.
[Kuku, bue 3]
?Wafa sɛ yɛ e kwla fa be e man ɔn?
Maan e fa sran’n i ɲin’n sie i fluwa’n i bue 2 nin 3 su, naan e usɛ i kɛ: “?A kunndɛ kɛ á trán mɛn kun m’ɔ ti kɛ nga sa’n i nun? [Maan sran’n tɛ kosan’n su.] Ɲanmiɛn ndɛ’n se kɛ ɔ cɛn kan’n Ɲanmiɛn wá yó maan mɛn’n káci lika klanman kpa kun. Mɛn sɔ’n nun’n sran’m bé wá dí alaje kpɛkun sran fi su yoman yalɛfuɛ annzɛ tukpacifuɛ. Like nga ɔ fata kɛ e yo naan y’a tran mɛn sɔ’n nun’n ɔ o ndɛ mma nga nun. [An kanngan Ezai 55:3 nun; be klɛli ndɛ mma sɔ’n fluwa’n i bue nsan’n su’n i ti su nglo lɔ.] Ndɛ sɔ’n wla e fanngan kɛ e ‘bla’ Ɲanmiɛn sin naan e ‘tie’ i nuan ndɛ’n. ?Sanngɛ wafa sɛ yɛ e kwla tie Ɲanmiɛn ndɛ’n niɔn?” Wafa nga be tɛli kosan sɔ’n su’n, fa fluwa’n i bue nnan su naan amun koko su yalɛ. Sɛ ɔ leman blɛ’n, yaci fluwa’n i sa nun, naan amun nuan sɛ cɛn nga á bá ekun’n i su.