‘Nán e nin sran kan ndɛ’
1. ?Sɛ ndɛ tiefuɛ’n fa ya’n, Biblu’n nun afɔtuɛ benin yɛ é nánti su ɔ?
1 E Zoova sufuɛ mun’n, e kloman ndɛnngan. Aunjuɛ ndɛ yɛ e kan ɔn. (Eza. 52:7) Sanngɛ kɛ é bó jasin fɛ’n awlo’m be nun’n, sran wie’m be plan e su. ?I lɛ nun’n, ngue yɛ é yó naan e nin be y’a kanman ndɛ ɔ?—Rɔm. 12:18.
2. ?Ngue ti yɛ ɔ fata kɛ e yo ngwlɛlɛfuɛ ɔ?
2 Maan e yo ngwlɛlɛfuɛ: E si kɛ be nga be plan e su’n, be kloman ndɛ nanwlɛ’n. Sanngɛ wie liɛ’n, like uflɛ ti yɛ be plan ɔn. Atrɛkpa’n, nán blɛ m’ɔ ti i nuan su’n i nun yɛ e bobo be anuan’n niɔn. Wie liɛ kusu’n, sran’n bɔbɔ i sa yalɛ wie ti yɛ ɔ plan ɔn. I kwlaa yoli o, maan e wun i wlɛ kɛ sran’m be akunndan’n w’a saci ti yɛ be sɔman e nun klanman ɔn. (2 Kor. 4:4) Sɛ e wun i wlɛ sɔ’n, be aeliɛ’n sɔ́n e nun, yɛ e su faman ya wie.—Nya. 19:11.
3. ?Wafa sɛ yɛ é klé kɛ e ti aɲinyiɛfuɛ ɔ?
3 Maan e yo aɲinyiɛfuɛ: Sran sunman be le ninnge wie mɔ be lafi su kpa ɔ. (2 Kor. 10:4) Ɔ maan sɛ bé sɔ́ e nun annzɛ be sɔman e nun’n, ɔ ti kɛ be bɔbɔ sa. Ɔ fataman kɛ e bu e wun kɛ e si Biblu’n nun like tra be naan i ti’n, é yó be finfin. Ɔ maan sɛ sran kun se kɛ ɔ sɔman e nun’n, e jaso e wɔ e kɔlɛ.
4. ?Wafa sɛ yɛ e kwla kle kɛ e nuan nun ndɛ’n yo fɛ ɔ?
4 Maan e nuan nun ndɛ’n yo fɛ: Sɛ sran’n kan e ndɛ yaya’n, maan e tɛ su amanniɛn su. (Kol. 4:6; 1 Piɛ. 2:23) Nán maan e se kɛ é sí akplowa. Sanngɛ maan e nuan sɛ. Sɛ ɔ nin i fata’n, maan e usa sran’n amanniɛn su like nga ti yɛ ɔ kpɛntɛn’n. Wie liɛ kusu’n, maan e jaso e wɔ e kɔlɛ.—Nya. 9:7; 17:14.
5. ?Sɛ e nin sran y’a kanman ndɛ’n, wafa sɛ yɛ i bo’n kwla gua kpa ɔ?
5 Sɛ e nin sran’n y’a kanman ndɛ’n, i bo’n gúa kpa. Yɛle kɛ sɛ jasin bofuɛ uflɛ to i cɛn uflɛ’n, ɔ́ sɔ́ i nun klanman. (Rɔm. 12:20, 21) Kannzɛ ɔ jrɛn i ndɛ liɛ’n su cinnjin’n, sanngɛ cɛn wie lele ɔ kwla kaci e niaan. (Gal. 1:13, 14) Sɛ be sɔ e nun annzɛ be sɔman e nun o, maan e tra e awlɛn, nán maan e nin sran kan ndɛ. I liɛ’n, é yɛ́yɛ́ e junman’n kpɛkun Zoova ɲrun bá ɲan.—2 Kor. 6:3.