Wafa nga e kwla fa fluwa ?Wan mun yɛ be yo Zoova i klun sa’n andɛ ɔ? e di junman’n
Fluwa pɛplɛpɛ uflɛuflɛ m’ɔ fa Biblu’n nun like suanfuɛ’m be ɲin sie i Zoova i anuannzɛ’n su’n
1. ?Ninnge nsan benin ti yɛ be yili fluwa Zoova i klun sa’n niɔn?
1 ?Amun a fa fluwa uflɛuflɛ ?Wan mun yɛ be yo Zoova i klun sa’n andɛ ɔ? b’a bo junman dilɛ bo? Like nga ti yɛ be yili fluwa sɔ’n, yɛle kɛ (1) ɔ yo maan Biblu’n nun like suanfuɛ’m be si Zoova i Lalofuɛ mun, kpɛkun (2) ɔ uka be naan b’a si ninnge nga e yo’n, yɛ (3) ɔ kle be wafa nga Zoova i anuannzɛ’n di junman’n. Fluwa pɛplɛpɛ Zoova i klun sa’n ti like suanlɛ fluwa. I bue kun ti like suanlɛ kun. Ɔ maan, kɛ e nin Biblu’n nun like suanfuɛ’n e ko wie like suan’n, e kwla fa miniti nnun annzɛ blu e suan nun like.
2. Amun kan ninnge nga be o fluwa’n nun’n be ndɛ.
2 Fluwa’n i nun ninnge mun: Ndɛ akpasua nsan o fluwa’n nun. Kɛ nga e dun mmua kannin’n sa’n, ndɛ akpasua kwlaa kan Zoova i Lalofuɛ’m be su ndɛ trele kun. Like suanlɛ 28 nga be o fluwa’n nun’n, be nun sunman be flɛlɛ’m be ti kosan. Kpɛkun ndɛ ce nga be klɛli be ble tuun kpa’n be tɛ kosan sɔ’m be su. I nun foto’m be fin nvlenvle 50 tra su nun. Be kle kɛ e di e junman’n mɛn wunmuan’n nun. Like suanlɛ wie’m be nun’n, kuku kun o fluwa’n i ja ngua lɛ. Be flɛ i kɛ “Like nga a kwla yo’n.” Ajalɛ nga be o kuku sɔ’m be nun’n, e kwla wla sran nga e kle i like’n i fanngan naan ɔ fa be su.
3. ?Wafa sɛ yɛ e kwla fa fluwa Zoova i klun sa’n e di junman ɔn?
3 Wafa nga e kwla fa fluwa’n e di junman’n: Maan e dun mmua e fa like suanlɛ’n i flɛlɛ’n, e kle like suanfuɛ’n. I sin’n, kɛ é kánngan nun likawlɛ’n, maan e fa i ɲin e sie i ndɛ ce nga be klɛli be ble tuun kpa’n be su. Kɛ e ko wie i yo’n, maan e fa kosan nga be o fluwa’n i ja ngua lɛ’n e flan nun. E kwla kanngan like suanlɛ’n i wunmuan’n nun, annzɛ kusu e kwla kanngan ndɛ kpɔlɛ kun nun, e koko su yalɛ ka naan y’a kanngan uflɛ nun. Biblu’n nun ndɛ mma ng’ɔ fata kɛ e kanngan nun’n, maan e bu i akunndan. Nán maan e ɲin kpa foto nin kuku mɔ be flɛ be “Like nga a kwla yo’n,” be su. Blɛ sunman nun’n, ɔ fata kɛ e suan fluwa’n i nun like e lɔngɔ su, nán maan e tɔtɔ nun. Sanngɛ sɛ like suanlɛ kun ti cinnjin man sran kun’n, e kwla fa e ɲin e sie su trele. I wie yɛle kɛ sɛ aɲia dan kun w’a mantan koko’n, e kwla koko like suanlɛ 11 i su yalɛ.
4. ?Ngue ti yɛ fluwa uflɛuflɛ nga y’a ɲɛn i yɛ’n ti’n e di aklunjuɛ ɔ?
4 Kɛ e nin sran kun e suan Biblu’n nun like’n, e ukɛ i naan w’a si i Si m’ɔ o ɲanmiɛn su lɔ’n. Sanngɛ ɔ fata kɛ e kan Zoova i anuannzɛ’n, i su ndɛ e kle i wie. (Nya. 6:20) Fluwa uflɛuflɛ nga y’a ɲɛn i yɛ’n, ɔ́ úka e naan y’a kwla di junman sɔ’n. I ti kɛ e o yɛ’n, aklunjuɛ’n w’a kun e kpo!