?Wan mun yɛ be yo Zoova i klun sa’n andɛ ɔ?
1. ?Blɛ benin nun yɛ é wá bó e fluwa ?Wan mun yɛ be yo Zoova i klun sa’n andɛ ɔ? i nun like suanlɛ bo ɔ? ?Yɛ wafa sɛ yɛ i sɔ’n yó e ye ɔ?
1 Kɛ ɔ́ fɛ́ i le mɔcuɛ m’ɔ bo i bo Ɔktɔblu i le 28 su’n, é wá súan e fluwa ?Wan mun yɛ be yo Zoova i klun sa’n andɛ ɔ? i nun like asɔnun’n i Biblu’n nun like suanlɛ aɲia’n i bo. E nvle kun aɲia nga be flɛ i “Ɔ ti’n mɔ a fa bu akunndan’n, sie i kpa” i bo yɛ fluwa uflɛuflɛ sɔ’n fiteli ɔ. Ɔ fa Biblu’n nun like suanfuɛ’n i ɲin sie i Zoova i anuannzɛ’n su. I nun like suanlɛ’n wá úka e naan y’a wun i wlɛ kpa ekun kɛ Zoova i anuannzɛ’n mɔ e o nun’n, ɔ ti e cenjele like. Sanngɛ nɛ́n i ngba ɔ. I sɔ’n úka ekun naan y’a si jasin bolɛ fluwa sɔ’n i kpa.—Jue. 48:14.
2. ?Wafa sɛ yɛ é súan e fluwa pɛplɛpɛ’n i nun like aɲia’n i bo ɔ?
2 Wafa nga é súan nun like’n: Ɔ fata kɛ aniaan ng’ɔ́ tínngɛ like suanlɛ’n yo naan like suanlɛ’m be kwlaa be di dɔ kunngba’n. Maan ɔ kanngan like suanlɛ’n i flɛlɛ’n nun fa fiti like suanlɛ 28 be kwlaa be su. I sin’n, maan ɔ se kannganfuɛ’n kɛ ɔ kanngan ndɛ kpɔlɛ klikli’n nun. Kɛ ɔ ko wie i kanngan’n, aɲia’n i tinngɛfuɛ’n úsa nzrafuɛ’m be kosan kun. Kosan sɔ mɔ i bɔbɔ siesieli i laa’n, ɔ taka like suanlɛ’n i su fitilɛ’n su. I sin’n, ndɛ kpɔlɛ mɔ be ndɛ ɲanman klikli’n ti ble tuun kpa’n, maan be kanngan be nun kunngunngun. Sɛ ndɛ ɲanman ble tuun kun i bo ndɛ kpɔlɛ’m be ti nɲɔn’n, maan be kanngan be nun likawlɛ. Kɛ be ko wie be nun kanngan’n, maan aɲia’n i tinngɛfuɛ’n se nzrafuɛ mun naan be kle wafa nga ndɛ kpɔlɛ sɔ’m be yiyi like suanlɛ’n i flɛlɛ’n nun’n. Asa ekun’n, be kwla kan desɛn nin foto nga be o fluwa’n nun’n be su ndɛ wie. Sɛ blɛ o lɛ’n, maan be kanngan Biblu’n nun ndɛ mma nga like suanlɛ’n taka su’n be nun. Kwlaa naan b’a fa be ɲin b’a sie i like suanlɛ uflɛ su’n, maan aɲia’n i tinngɛfuɛ’n fa kosan nga be o fluwa’n i ja ngua lɛ’n fa flan like suanlɛ’n nun. Sɛ kuku nga be flɛ i “Like nga a kwla yo’n” i wie o like suanlɛ’n nun’n, maan kannganfuɛ’n kanngan nun. Kpɛkun maan aɲia’n i tinngɛfuɛ’n usa aniaan mun naan wafa nga afɔtuɛ sɔ’m be kwla yo Biblu’n nun like suanfuɛ kun i ye’n, be kɛn i ndɛ. Sɛ blɛ o lɛ’n, maan aɲia’n i tinngɛfuɛ’n fa like suanlɛ’m be flɛlɛ’n fa flan aɲia’n nun. Maan ɔ tran e klun kɛ Biblu’n nun like klelɛ nun’n, ɔ nunman nun kɛ san fii e nanti ajalɛ sɔ’n su.
3. ?Ngue yɛ ɔ fata kɛ e yo naan fluwa’n i nun like suanlɛ’n w’a yo e ye kpa ɔ?
3 Kɛ ɔ ko yo naan aɲia sɔ’n w’a wla e fanngan kpa’n, ɔ fata kɛ e siesie e wun ka naan y’a wɔ i bo. Maan e mian e ɲin naan e tɛ kosan’m be su wie. Kɛ é súan fluwa’n i nun like’n, maan e usa e wun kɛ: ?Ngue ti yɛ ndɛ nga bé kɛ́n i yɛ’n kwla uka Biblu’n nun like suanfuɛ mun ɔn? Maan fluwa uflɛuflɛ sɔ’n i nun like suanlɛ’n yo e cinnjin. I liɛ’n, é kwlá úka sran uflɛ mun naan b’a yo Zoova i klun sa’n naan b’a kwla ɲan anannganman nguan.—1 Zan 2:17.