Fluwa pɛplɛpɛ uflɛuflɛ mɔ é wá fá mán’n!
1. ?Fluwa benin yɛ Novamblu anglo nun’n, é fá bó jasin ɔn? ?Yɛ, ngue ti yɛ be yili fluwa sɔ’n niɔn?
1 E nvle kun aɲia mɔ i flɛlɛ’n yɛle “Maan e tran minndɛ!” mɔ e yoli i afuɛ nga be flɛ i 2009 nun’n, i bo’n, fluwa uflɛuflɛ kun fiteli. Be flɛ i kɛ La Bible — Quel est son message ? Novamblu anglo nun yɛ asiɛ wunmuan’n su’n, asɔnun’m bé fá bó sran’m be fa manlɛ bo ɔ. ?Ye benin yɛ fluwa sɔ’n wá yó e jasin bowlɛ’n i nunfuɛ mun ɔn? Sran kpanngban, i li be nga be timan Klistfuɛ’n, be siman ndɛ ng’ɔ o Biblu’n nun’n i dan lika. I sɔ’n ti’n, fluwa’n i bue 3 su’n, be kannin kɛ be yili fluwa sɔ’n naan “ɔ bo ndɛ ng’ɔ o Biblu’n nun’n su kle e.”
2. ?Ndɛ benin yɛ e kwla kan naan y’a fa fluwa’n y’a man ɔn?
2 Wafa nga é fá mán’n: E kwla se sran’n kɛ: “Min waan ń kánngan Biblu’n nun ndɛ mma kun nun ń klé wɔ naan a kle min wafa nga a bu ndɛ sɔ’n. [Kanngan 2 Timote 3:16 nun.] Sran kpanngban be waan ndɛ sɔ’n ti nanwlɛ. Wie’m be kusu be waan fɛ ngbɛn yɛ Biblu’n i nun ndɛ’m be yo ɔ. ?Yɛ ɔ li? [Maan sran’n tɛ kosan’n su.] Ɔ ti su kɛ sran kun le i Ɲanmiɛn sulɛ wafa liɛ. Sanngɛ, sɛ e bo e ɲin ase e nian Biblu’n nun’n, ɔ ti kpa. [Fluwa’n i su fitilɛ ndɛ ng’ɔ o fluwa’n i bue 3 i nglo lɔ lika liɛ nun’n, kanngan nun.] Biblu’n i nun ndɛ mɔ be boli i kpɔlɛ fluwa nga nun’n, ɔ yo fɛ kpa. Kɛ á wá kánngan nun’n, á wá síe like ɲɛnmɛn kpa kun nzɔliɛ. Yɛle kɛ, Biblu’n i nun ndɛ’n kwlaa taka ndɛ trele kun su.”
3. ?Ajalɛ uflɛ kun ekun mɔ e kwla fa’n, i li sɛ lika nga e bo jasin fɛ’n lɛ’n, sran kpanngban be timan Klistfuɛ’n, yɛle benin?
3 Ajalɛ kun ekun mɔ e kwla fa’n, i li sɛ lika nga e bo jasin fɛ’n lɛ’n, sran kpanngban be timan Klistfuɛ’n, yɛ ɔ o yɛ: “Wafa nga a bu ndɛ ng’ɔ o Ɲanmiɛn Ndɛ’n nun yɛ’n, n kunndɛ kɛ a bo su kle min. [Kanngan Jue Mun 37:11 nun.] ?Kɛ ndɛ sɔ’n wá kpɛ́n su’n, wafa sɛ yɛ asiɛ’n wá káci ɔ? [Maan sran’n tɛ kosan’n su.] Ndɛ ng’ɔ o Biblu’n nun’n, mɔ sran’m be kwla fa cici be wla’n, kannzɛ be finwlɛ’n nin be Ɲanmiɛn sulafilɛ’n ti sɛ’n, be nun kun yɛ ɔ o lɛ ɔ.” Ndɛ kpɔlɛ ng’ɔ o fluwa’n i bue 3 su’n, i nglo lɔ lika liɛ nun’n, kanngan nun.
4. ?Wafa sɛ yɛ e kwla fa fluwa pɛplɛpɛ’n e bo sran kun i Biblu’n nun like klelɛ bo ɔ?
4 Biblu’n nun like klelɛ i bo bolɛ: Kɛ e kɔ sran’n i osu nianlɛ’n, e kwla bo ndɛ nga e nin i e kokoli su yalɛ’n, i su e fa kpɛn i wla. Fluwa’n i bue ng’ɔ yiyi ndɛ sɔ’n nun’n, e fɛ i nun ndɛ kpɔlɛ kun annzɛ nɲɔn naan e nin i e koko su yalɛ. I yolɛ nun’n, maan e fa ndɛ kpɔlɛ sɔ’m be su kosan nga be nin i fata’n mɔ be o like suanlɛ’n i awieliɛ lɔ’n, e usɛ i. Annzɛ kɛ e kɔ i osu nianlɛ’n, sɛ e kunndɛ kɛ é ká lɛ é fá fluwa Biblu’n kle é mɛ́n i’n, e nin i e kwla kanngan ndɛ ng’ɔ o fluwa pɛplɛpɛ’n i bue kasiɛn su’n, i nun. Kpɛkun e fa fluwa’n e mɛn i. I sin’n, maan e se i kɛ ɔ kle e fluwa Biblu’n kle i ndɛ tre ng’ɔ lo i kpa’n. Kpɛkun ndɛ tre sɔ’n, e nin i e nian i nun ndɛ kpɔlɛ kun annzɛ nɲɔn nun. Maan e kwlaa e wla e wun ase e fa fluwa sɔ’n e bo jasin fɛ’n, Novamblu anglo’n nun!