Maan e si jasin fɛ’n i bo kpa tra laa: Maan e yo naan ndɛ’n kan sran’m be awlɛn

?NGUE TI YƐ Ɔ TI CINNJIN-ƆN?: Be nga be kpali be sieli be ngunmin’n nin bua’m be wie’m be yia sran wafawafa kwlaa kɛ be w’a ‘fa nzue ng’ɔ man nguan’n naan be su yiman deiin.’ (Ngl 22:17) Nzue sɔ’n ti ajalɛ kwlaa nga Zoova fali naan klɔ sran’m b’a ɲan be ti sa tɛ’n nin wie’n be sa nun’n, be nzɔliɛ. Kɛ ɔ ko yo naan y’a uka sran wafawafa kwlaa naan b’a su Zoova’n, ɔ fata kɛ e bo “jasin fɛ m’ɔ ti anannganman’n” e kle be. I sɔ yolɛ nun’n, maan e kan ndɛ’n naan ɔ kan be awlɛn.—Ngl 14:6.

?WAFA SƐ YƐ É YÓ I SƆ-Ɔ?:

• Maan ndɛ nga é kán’n nin Biblu’n nun ndɛ mma nga é kánngan nun’n be kan e jasin bowlɛ nun lɔ sran’m be awlɛn. I sɔ yolɛ nun’n, e kwla nian wafa nga e nin sran mun e kwla koko yalɛ’n i su ajalɛ nga be kle e’n su. Annzɛ kusu e kwla kan ndɛ kun mɔ e sieli i nzɔliɛ kɛ sran’m be sɔ nun klanman’n. ?Ndɛ benin nin Biblu’n nun ndɛ mma benin yɛ be kan sran’m be awlɛn-ɔn? ?Sa benin yɛ ɔ juli koko nun wa mɔ e kwla jran su naan e nin sran mun y’a koko yalɛ-ɔ? ?Ndɛ benin yɛ ɔ kwla yo yasua kun annzɛ bla kun i cinnjin-ɔn?

• Wafa nga e asa’n su’n be yo sran like annzɛ be yo ninnge mun’n, e nian su e yo wie.—2Ko 6:3, 4

• Maan e fa fluwa nin video nga be o e Like klelɛ ninnge’m be siewlɛ nun’n e di junman titi naan y’a kwla uka be nga Ɲanmiɛn ndɛ lo be’n.

• Be sieli fluwa nin video mɔ be o aniɛn kaka nun’n e ɛntɛnɛti adrɛsi’n su. Maan e wɔ lɔ naan e fa nga be o aniɛn nga be tɛ i kan e jasin bowlɛ nun’n be nun’n.

• Maan ndɛ nga é kán’n nin sa ng’ɔ o sran’n su’n, be wɔ likawlɛ. (1Ko 9:19-23) ?Sɛ e to sran kun mɔ i sran wie wuli’n, ndɛ benin yɛ e kwla kan naan y’a fɔnvɔ i-ɔ?

AN NIAN VIDEO’N. I SIN’N, AN TƐ KOSAN NGA’M BE SU:

• ?Ndɛ benin yɛ jasin bofuɛ’n nin sran’n be boli i su yalɛ kokolɛ bo-ɔ?

• ?Sa benin yɛ ɔ o sran’n su-ɔ?

• ?Biblu’n nun ndɛ mma benin yɛ ɔ nin sran’n i su sa’n be kɔ likawlɛ-ɔ? ?Yɛ ngue ti-ɔ?

• ?Ajalɛ benin yɛ amun kwla fa naan ndɛ nga amún kán’n w’a yo amun jasin bowlɛ nun lɔ sran’m be fɛ-ɔ?