LIKE NGA KLISIFUƐ’M BE YO’N
Bu ɔ wun kɛ nga Zoova fa bu wɔ’n sa
“Zoova klo i sran mun.” (Ju 149:4) Kannzɛ fɔ e nun’n, sanngɛ ɔ fɛ i ɲin sie i e nzuɛn kpakpa mun nin ninnge nga e kwla yo be’n be su. Ɔ ju wie’n, kɛ ɔ ko yo naan e fa e ɲin sie i e nzuɛn kpakpa’m be su’n ɔ kwla yo kekle. Wie liɛ’n wafa nga e wiengu’m be bu e’n ti’n, e buman e wun sran. Asa’n, sɛ e fa e ɲin e sie i ninnge nga e yoli be laa’n be su’n e kwla bu i kɛ Zoova kwlá kloman e. ?Sɛ e bu i sɔ’n, ngue yɛ ɔ kwla uka e-ɔ?
Nán maan e wla fi su kɛ Zoova wun like nga klɔ sran kwlá wunmɛn i’n. (1Sa 16:7) I sɔ’n kle kɛ e nzuɛn nga e bɔbɔ e sieman be nzɔliɛ’n, ɔ fɛ i ɲin sie be su. Ng’ɔ ti kpa’n yɛle kɛ Biblu’n uka e naan y’a si wafa nga Zoova bu e’n. Biblu’n nun ndɛ mma wie mun ɔ nin sran wie’m be su ndɛ’m be kle kɛ Zoova klo i sufuɛ mun dan. Sɛ e kanngan be nun’n, e kwla wun i sɔ liɛ’n i wlɛ.
AN NIAN VIDEO NGA BE FLƐ I KƐ MAAN E SI KPA KƐ ZOOVA KLO E. I SIN’N, AN TƐ KOSAN NGA’M BE SU:
?Wafa sɛ yɛ sunnzun ase ng’ɔ kan wanndifuɛ kun nin i si’n be ndɛ’n, ɔ uka e naan y’a wun wafa nga Zoova bu e’n i wlɛ-ɔ?
?Sɛ sran kun yoli sa tɛ naan ɔ miɛn i ɲin naan ɔ nin Zoova be afiɛn w’a sɛ ekun’n, ngue yɛ ɔ kwla ukɛ i naan w’a si kpa kɛ Zoova klo i-ɔ?—1Zn 3:19, 20
?Kɛ aniaan’n kanngannin Zozafati nin Davidi be su ndɛ’n nun m’ɔ buli i su akunndan’n ye benin yɛ ɔ ɲɛn i-ɔ?