“Amun kle like nga amún sú i’n”

1. (1) ?Ngue yɛ ɔ fata kɛ e yo naan y’a di aklunjɔɛ kpafuɛ’n niɔn? (2) ?Yɛ ngue ti yɛ ɔ fata kɛ e yo sɔ naan y’a di aklunjɔɛ-ɔ? (Ezai 48:17, 18)

E SI Ɲanmiɛn klo e dan. Ɔ kunndɛ kɛ e di aklunjɔɛ dɔ nga su nin e ɲrun lɔ. (Aku. 3:12, 13) Wafa ng’ɔ yili klɔ sran mun’n ti’n, be kwla si ninnge wie’m be yo kpa. Sanngɛ w’a yiman be kɛ be sie be bɔbɔ be wun, annzɛ be bɔbɔ be kle like ng’ɔ ti kpa’n nin like ng’ɔ ti tɛ man be’n. (Aku. 8:9; Zer. 10:23) Ɔ si kɛ like nga e ko yo naan y’a di aklunjɔɛ kpafuɛ’n, yɛle kɛ e su i yɛ e niɛn i mmla’m be su e nanti.—An kanngan Ezai 48:17, 18 nun.

2. (1) ?Akunndan benin yɛ Satan kunndɛ kɛ e bu-ɔ? (2) ?Yɛ ngue yɛ Zoova yoli-ɔ?

² Satan kunndɛ kɛ e bu i kɛ e mianman Zoova wun naan y’a di aklunjɔɛ, naan klɔ sran’m be kwla sie be bɔbɔ be wun. (Bob. 3:​4, 5) Kɛ ɔ ko yo naan Zoova w’a kle kɛ Satan ti gblɛfuɛ’n, ɔ yacili klɔ sran’m be nun naan be sie be bɔbɔ be wun le nɲɔn kun. Yɛ wafa nga i bo gua mannin klɔ sran mun’n, e kwlaa e si i. Sanngɛ Biblu’n kan yasua nin bla wie mɔ be suli Zoova mɔ i sɔ’n ti’n, be dili aklunjɔɛ’n be ndɛ. Sran sɔ’m be nun kun yɛle Zezi Klisi, yɛ aklunjɔɛ ng’ɔ dili i Zoova i sulɛ’n nun’n, ɔ leman wunsu. Like suanlɛ nga nun’n, é wá fá e ɲin é síe i sa nga ti yɛ Zezi fali ajalɛ kɛ ɔ́ sú Zoova’n su. Kpɛkun é wá kán sa nga ti yɛ ɔ fata kɛ e su Ɲanmiɛn’n i ndɛ. Yɛ i agualiɛ su’n, é wá kán sa nga ti yɛ e fali ajalɛ kɛ é sú Zoova’n i ndɛ.

SA NGA TI YƐ ZEZI FALI AJALƐ KƐ Ɔ́ SÚ ZOOVA’N

3. (1) ?Ngue yɛ Satan seli Zezi kɛ ɔ yo-ɔ? (2) ?Yɛ wafa sɛ yɛ Zezi tɛli i su-ɔ?

³ Kɛ Zezi bali asiɛ’n su’n, ɔ fata kɛ ɔ kle sran ng’ɔ́ sú i’n. Kɛ be yoli Zezi i batɛmun cɛ’n, Satan seli i kɛ sɛ ɔ yo like kunngba cɛ fa su i’n, ɔ́ fá asiɛ’n su famiɛn diwlɛ’m be kwlaa fá mɛ́n i. Sanngɛ Zezi tɛli i su kɛ: “Satan, jaso lɛ! Afin be klɛli i kɛ: ‘Zoova m’ɔ ti ɔ Ɲanmiɛn’n yɛ ɔ fata kɛ a koto i bo-ɔ, yɛ i kunngba cɛ yɛ ɔ fata kɛ a su i-ɔ.’” (Mat. 4:8-10) ?Ngue ti yɛ Zezi fali ajalɛ kɛ ɔ́ sú Zoova-ɔ?

4-5. ?Sa nga ti yɛ Zezi fali ajalɛ kɛ ɔ́ sú Zoova’n, i wie yɛle benin?

⁴ Sa cinnjin nga ti yɛ Zezi fali ajalɛ kɛ ɔ́ sú Zoova’n, yɛle kɛ ɔ klo i Si Zoova dan. (Zan 14:31) Asa’n Zezi si kɛ i sɔ yɛ ɔ fata kɛ ɔ yo-ɔ. (Zan 8:​28, 29; Ngl. 4:11) Ɔ si kɛ Zoova ti yɛ e o nguan nun-ɔn, naan i klun ti ufue, yɛ ɔ ti nanwlɛfuɛ. (Jue. 33:4; 36:9; Zak. 1:17) Ɔ si kɛ Zoova dili i nanwlɛ titi. Yɛ ninnge kwlaa ng’ɔ le be’n be fin i. (Zan 1:14) Sanngɛ Satan liɛ’n, wie’n yɛ ɔ fa cɛli klɔ sran mun-ɔn. Asa’n i ɲin ti kpli, yɛ sran ndɛ lomɛn i. (Zan 8:44) I kwlaa sɔ’n ti’n, Zezi w’a kunndɛman le kɛ ɔ́ yó ɲin kekle kɛ Satan sa.—Fip. 2:5-8.

⁵ Sa kun ekun mɔ i ti yɛ Zezi fali ajalɛ kɛ ɔ́ sú Zoova’n, yɛle kɛ ɔ buli wafa nga i bo’n gúa’n i akunndan. (Ebr. 12:2) Ɔ si kɛ sɛ ɔ su i Si Ɲanmiɛn guɛ i ti nin i bo’n, Ɲanmiɛn i dunman’n yó sanwun. Kpɛkun i sɔ’n yó maan sa tɛ’n nin wie mɔ Satan kpɛli be ba’n, be su tranman lɛ kun.

SA NGA TI YƐ ZOOVA NIN SULƐ FATA’N

6-7. (1) ?Ngue ti yɛ andɛ’n sran kpanngban be suman Zoova-ɔ? (2) ?Sanngɛ ngue ti yɛ i kunngba cɛ yɛ ɔ fata kɛ e su i-ɔ?

⁶ Andɛ’n sran kpanngban be siman Zoova i nzuɛn m’ɔ yo ɲɛnmɛn’n. Yɛ be siman ninnge kwlaa ng’ɔ yo mannin be’n. I sɔ’n ti yɛ be sumɛn i-ɔ. Be ti kɛ sran nga akoto Pɔlu boli jasin fɛ’n kleli be Atɛnin lɔ’n be sa.—Yol. 17:19, 20, 30, 34.

⁷ Akoto Pɔlu seli Atɛninfuɛ’m be kɛ Ɲanmiɛn Kpli yɛ ɔ “man sran’m be kwlaa be nguan-ɔn. Asa ekun’n, i ti yɛ be lo wunmiɛn-ɔn.” Ɔ seli ekun kɛ: “I dunman nun ti yɛ e o nguan nun-ɔn, yɛ i dunman nun ti yɛ e kwla like yo-ɔ.” Ɲanmiɛn yɛ ɔ yili like kwlaa-ɔ, ɔ “yoli maan nvlenvle’m be kwlaa be fin sran kunngba.” Ɔ maan i kunngba cɛ yɛ ɔ fata kɛ e su i-ɔ.—Yol. 17:25, 26, 28.

8. ?Ngue yɛ Zoova su yomɛn i le-ɔ? An yiyi nun.

⁸ Zoova yɛ ɔ yili like kwlaa-ɔ. Asa’n i yɛ ɔ sie nglo nin asiɛ’n niɔn. I sɔ’n ti’n, sɛ ɔ klo’n ɔ kwla mian e kɛ e su i. Sanngɛ Zoova su yoman sɔ le. Sanngɛ kusu ɔ kleli weiin kɛ ɔ o lɛ sakpa naan e tinuntinun e ndɛ lo i dan. Ɔ kunndɛ kɛ klɔ sran kpanngban kpa be nin i tra janvuɛ naan be yo i janvuɛ tititi. (1 Tim. 2:​3, 4) I sɔ’n ti’n, Zoova kle e like naan e kan ninnge kpakpa ng’ɔ́ wá yó be’n, ɔ nin wafa ng’ɔ́ wá yó ninnge sɔ mun’n be ndɛ e kle e wiengu mun. (Mat. 10:​11-13; 28:​19, 20) Asa’n ɔ yoli maan be takali asɔnun bo mun, yɛ ɔ sieli asɔnun kpɛnngbɛn mun naan be nian e lika.—Yol. 20:28.

9. ?Ngue yɛ ɔ kle weiin kɛ Zoova klo sran kwlaa-ɔ?

⁹ Like nga Zoova yo man be nga be waan nán e se kɛ Ɲanmiɛn o lɛ bɔbɔ’n, ɔ kle kpa kɛ ɔ klo sran sakpa. Maan e bu sa nga i akunndan e nian. Kɛ ɔ fɛ i laa lele andɛ’n, sran miliaa kpanngban kpa be faman Zoova i mmla’n su. Like nga be bɔbɔ be bu i kɛ ɔ ti kpa annzɛ ɔ ti tɛ’n, i su yɛ be nian be nanti-ɔ. Ɔ nin i sɔ ngba’n, Zoova man be ninnge nga be sa miɛn i wun naan b’a ka nguan nun naan kusu b’a di aklunjɔɛ’n. (Mat. 5:44, 45; Yol. 14:​16, 17) Zoova ti’n, be le janvuɛ nin osufuɛ mun, be le ba, be di junman yɛ be ɲan be junman’n i su mmlusuɛ wie mun. (Jue. 127:3; Aku. 2:24) I kwlaa sɔ’n kle weiin kɛ e Si Ɲanmiɛn klo sran kwlaa. (Tul. 34:6) Siɛn’n maan e kan sa nga ti yɛ e fa ajalɛ kɛ é sú Zoova’n, ɔ nin wafa nga i kusu yra e su’n, be nun wie’m be ndɛ.

SA NGA TI YƐ E FA AJALƐ KƐ É SÚ ZOOVA’N

10. (1) ?Like klikli nga ti yɛ e su Zoova’n yɛle benin? (Matie 22:37) (2) ?Zoova i awlɛn m’ɔ tra’n, i su ye benin yɛ a ɲɛn i-ɔ? (Jue Mun 103:​13, 14)

¹⁰ Kɛ Zezi sa’n, klolɛ mɔ e klo Zoova dan’n i ti yɛ e su i-ɔ. (An kanngan Matie 22:37 nun.) Kɛ e si Zoova i nzuɛn mun’n, e kunndɛ kɛ é fá e wun é mɛ́ntɛn i. I nzuɛn sɔ’m be nun kun yɛle kɛ ɔ trɛ i awlɛn e wun. Izraɛlifuɛ’m be blɛ su’n, kɛ be fɛmɛn i ndɛ’n su’n, ɔ se be kɛ: “Amun yaci, amun kaci amun sa. Ninnge tɛtɛ nga amun yo be’n, amun yaci be yolɛ.” (Zer. 18:11) Zoova si kɛ fɔ wo e nun naan e ti fa. (An kanngan Jue Mun 103:​13, 14 nun.) Kɛ e fa blɛ e bu Zoova i awlɛn m’ɔ tra’n nin i nzuɛn onga’m be su akunndan kpa’n, e kunndɛ kɛ é sú i tititi. ?Nɛ́n i-ɔ?

11. ?Sa nga ti yɛ e fa ajalɛ kɛ é sú e Si Ɲanmiɛn’n, i wie ekun yɛle benin?

¹¹ Like kun ekun mɔ i ti yɛ e su Zoova’n, yɛle kɛ e si kɛ i sɔ yɛ ɔ fata kɛ e yo-ɔ. (Mat. 4:10) Asa’n e si kɛ, sɛ e su Zoova lele e guɛ i ti nin i bo’n, i bo’n gúa kpa. Kɛ e nin Zoova e nanti klanman’n, i sɔ’n yo maan i dunman’n yo sanwun. Asa ekun’n e kle kɛ Satan ti gblɛfuɛ. Kpɛkun e Si Ɲanmiɛn i klun jɔ. Sɛ andɛ’n e fa ajalɛ kɛ é sú Zoova’n, e kwla lafi su kɛ ɔ́ mán e nguan m’ɔ leman awieliɛ’n naan y’a kwla su i tititi.—Zan 17:3.

12-13. ?Ngue yɛ Zanin nin Pamun be su ndɛ’n kle e-ɔ?

¹² Sɛ ba kanngan mun bɔbɔ’n be suan Zoova i su like’n, be kwla klo i tankaan kpa. I liɛ’n, kɛ bé ɲín bé kɔ́’n, klolɛ sɔ’n júe be awlɛn nun titi kɛ sin wie sa. I wie yɛle aniaan bla kun mɔ be flɛ i Zanin nin kun ekun mɔ be flɛ i Pamun be liɛ’n.a Sran kun nin i sinma-ɔ. I nun mɔ Zanin le afuɛ 11 mɔ Pamun kusu le afuɛ 10, yɛ be boli Biblu’n nun like suanlɛ bo-ɔ. Be si nin be nin be kunndɛman kɛ bé súan Biblu’n nun like. Be seli Zanin nin Pamun kɛ, kɛ bé kɔ́ be asɔnun liɛ’n nun’n, sɛ be su be su’n, be kwla kplin su kɛ Zoova i Lalofuɛ’m be kle be Biblu’n nun like. Zanin seli kɛ: “Like nga Zoova i Lalofuɛ’m be kleli min’n ti’n, m’an nɔnman drɔgi yɛ m’an kunndɛman bian sukusuku kɛ min wiengu suklu ba mun sa.”

¹³ Kɛ ɔ́ kɔ́ i ɲrun’n, be nɲɔn’n be kacili jasin bofuɛ. I sin’n, be kacili atin bofuɛ. Kɛ ɔ́ yó sɔ’n, nn be nian be si nin be nin mɔ b’a yo oke’n be lika. Kɛ Zanin buli sa ng’ɔ juli be su’n i akunndan’n, ɔ seli kɛ: “Min bɔbɔ n wunnin i weiin kɛ Zoova niɛn i janvuɛ’m be lika, naan kɛ nga 2 Timote 2:19 fa kan’n sa’n, ‘Zoova si be nga be ti i liɛ’n.’” Nanwlɛ, be nga be fa ajalɛ kɛ bé kló Zoova naan bé sú i’n, Zoova nian be lika tititi.

14. ?Ngue yɛ e yo naan e wiengu’m b’a si Zoova i su ndɛ nanwlɛ’n niɔn? (An nian foto mun wie.)

¹⁴ E kunndɛ kɛ e wiengu’m be si Zoova i su ndɛ nanwlɛ’n. Wienun-ɔn, a le janvuɛ kun m’ɔ ti kpa-ɔ. Asa’n i klun ti ufue, yɛ ɔ yaci sa nga be yo i’n cɛ. ?Sɛ sran kun se kɛ ɔ janvuɛ sɔ’n i klun yo wi naan ɔ diman nanwlɛ’n, ngue yɛ á yó-ɔ? Saan á kplí i ti. ?Nɛ́n i-ɔ? I wafa kunngba’n, kɛ Satan nin i minniɛn’m be saci Zoova i dunman’n, e muanman e nuan. E kɛn i su ndɛ nanwlɛ’n juejue su e kle sran mun. (Jue. 34:1; Eza. 43:10) E ijɔlɛ’n nin e ayeliɛ’n nun’n, e kle kɛ e tu e klun e su Zoova.

15. ?Kɛ akoto Pɔlu kpɔcili ninnge wie mun naan w’a kwla su Zoova’n, i su ye benin yɛ ɔ ɲɛnnin i-ɔ? (Filipufuɛ Mun 3:​7, 8)

¹⁵ Kɛ ɔ ko yo naan y’a su Zoova kɛ ɔ nin i fata’n sa’n, annzɛ kusu y’a tu e klun y’a su i kpa y’a tra laa’n, e klun klo su e kpɔci ninnge wie mun. I sɔ yɛ akoto Pɔlu yoli-ɔ. Kɛ ɔ ko yo naan w’a kwla kaci Klisi i sɔnnzɔnfuɛ naan w’a su Zoova’n, ɔ yacili junman dan ng’ɔ di i Zifu’m be Ɲanmiɛn sulɛ’n nun’n. (Gal. 1:14) I sɔ m’ɔ yoli’n ti’n, ɔ dili aklunjɔɛ kpa Zoova i sulɛ’n nun, yɛ ɔ lafili su kɛ ɔ nin Klisi bé dí famiɛn ɲanmiɛn su lɔ. Ajalɛ ng’ɔ fɛli i kɛ ɔ́ sú Zoova’n, w’a yomɛn i nsisɔ le. E kusu ɔ su yoman e nsisɔ le.—An kanngan Filipufuɛ Mun 3:7, 8 nun.

16. ?Ngue yɛ Zulia i su ndɛ’n kle e-ɔ? (An nian foto mun wie.)

¹⁶ Sɛ Zoova i sulɛ’n yo e cinnjin tra like kwlaa’n, ɔ́ yrá e su dɔ nga su nin e ɲrun lɔ. Maan e kan aniaan bla kun mɔ be flɛ i Zulia’n i ndɛ. I nun mɔ Zulia ti talua kan m’ɔ nin-a siman ndɛ nanwlɛ’n, ɔ to jue be asɔnun’n nun. Jue tofuɛ dan kun sieli i nzɔliɛ kɛ i nuan nun yo fɛ. Ɔ maan ɔ kleli i like naan ɔ si jue to kpa. Kɛ ɔ yoli sɔ’n, w’a cɛman, Zulia i dunman’n wa fuli kpa. Yɛ sran dandan’m be ɲrun yɛ ɔ to jue siɛn’n niɔn. Ɔ ɔli suklu dan kun mɔ be kle sran mun miziki bolɛ lɔ’n nun. Blɛ sɔ’n nun’n, i wiengu suklu ba kun kannin Ɲanmiɛn i ndɛ kleli i. Ɔ seli i kɛ Ɲanmiɛn le dunman, naan be flɛ i Zoova. W’a cɛman, Zulia wa boli Biblu’n nun like suanlɛ bo. Lemɔcuɛ kwlakwla’n, ɔ suan like kpɛ nɲɔn. I sin’n, ɔ fali ajalɛ kɛ ɔ́ yáci jue tolɛ naan ɔ́ fɛ́ i blɛ’n nin i wunmiɛn’n sú Zoova. Ajalɛ sɔ’n i falɛ w’a yoman pɔpɔ. Ɔ seli kɛ: “Sran sunman be seli min kɛ n su saci like kpa nga Ɲanmiɛn fa mannin min’n. Sanngɛ like nga n kunndɛ’n yɛle kɛ ń tú min klun ń sú Zoova.” ?Kɛ ɔ bu ajalɛ sɔ m’ɔ fali i afuɛ ablasan yɛ’n i akunndan’n, i sɔ’n yo i sɛ? Ɔ seli kɛ: “Min wla gua ase fɔun. Yɛ n lafi su kɛ cɛn wie lele’n, Zoova fá like kwlaa nga min awlɛn o su’n mán min.”—Jue. 145:16.

NÁN E YACI ZOOVA SULƐ

17. ?Ngue yɛ ndɛ nga akoto Pɔlu kannin’n, ɔ kle e-ɔ?

¹⁷ Y’a ju mɛn’n i bue nuan koko kpa. Akoto Pɔlu seli kɛ: “‘Ɔ ka kaan sa’n,’ ‘sran m’ɔ o atin’n su’n, ɔ́ bá. Ɔ su kaman siɛn.’” (Ebr. 10:37) ?Ngue yɛ ndɛ sɔ’n kle e-ɔ? Yɛle kɛ, blɛ nga i nun yɛ sran’m be kwla fa ajalɛ kɛ bé sú Zoova’n ɔ su wa wie. (1 Kor. 7:29) Yɛ sɛ dɔ nga su e su Zoova’n, kannzɛ sa kekleekle’m bé tɔ́ e su’n, sanngɛ e si kɛ “ɔ ka kaan sa’n” e su fɛman kun.

18. ?Ngue yɛ Zoova nin Zezi be kunndɛ kɛ e yo-ɔ?

¹⁸ Zezi wlali sran’m be fanngan kɛ be kaci i sɔnnzɔnfuɛ, naan kɛ be ko kaci i sɔnnzɔnfuɛ’n nán be yaci i su sulɛ. (Mat. 16:24) I sɔ’n ti’n, sɛ e su Zoova w’a cɛ bɔbɔ’n, maan e fua kpa kɛ e su yacimɛn i sulɛ le. Zoova kunndɛ kɛ e yia nda nga e tɛli i kɛ é sú i titi’n i nuan. Ɔ ju wie’n, i sɔ yolɛ’n timan pɔpɔ. Sanngɛ kɛ e yo sɔ’n, i su ye nga e ɲɛn i dɔ nga su bɔbɔ’n, ɔ ti dan.—Jue. 35:27.

19. ?Ngue yɛ Jɛnin i su ndɛ’n kle e-ɔ?

¹⁹ Sran wie’m be bu i kɛ Zoova i sulɛ’n ti afɛ dan. Gbanflɛn nin talua wie’m be bu i kɛ sɛ be su Zoova’n, like kpa sán be wun. Aniaan gbanflɛn kun mɔ be flɛ i kɛ Jɛnin’n, ɔ seli kɛ: “Ɔ yoli min kɛ min wiengu nga e nin be e ɲinnin likawlɛ’n, be di aklunjɔɛ sa, afin be ko yiyi be ɲin su, be le be soman mun, be to zevideo nga be yo nzaje sa’m be nun’n. Kusu nn min liɛ’n, jasin fɛ bolɛ’n nin aɲia’m be bo tranlɛ’n yɛ n si i-ɔ. Ɔ maan ɔ yoli min kɛ Zoova i Lalofuɛ mɔ n ti’n, ɔ ti kɛ n wo bisua sa.” ?Akunndan sɔ mɔ Jɛnin buli’n, i bo’n guali sɛ? Ɔ seli kɛ: “I sɔ’n ti’n, n dili min fuka nɲɔn’n nun. I bo bolɛ’n nun’n, ɔ yoli min fɛ. Sanngɛ nán aklunjɔɛ kpafuɛ’n yɛ n dili-ɔ. Kɛ ɔ yoli sɔ’n, n ma buli Biblu’n nun ndɛ’n i su nantilɛ’n, i su ye nga n kwla ɲɛn i’n i akunndan. Kpɛkun n fali ajalɛ kɛ ń tú min klun ń sú Zoova. Kɛ ɔ fɛ i lɛ’n, n wun kɛ Zoova tɛ min srɛlɛ’m be su.”

20. ?Ngue yɛ ɔ fata kɛ e fua kpa kɛ é yó-ɔ?

²⁰ Zoova i sufuɛ kun toli jue mɛnmɛnnin i. Ɔ seli kɛ: “Sran nga a kpɛ i mɔ a fɛ i mantan ɔ wun kɛ ɔ tran ɔ awlo’n nun’n, i liɛ su ti ye.” (Jue. 65:4) I sɔ’n ti’n, maan e fua kpa kɛ é sú Zoova titi. Kɛ Zozie sa’n, maan e se kɛ: “N liɛ’n, e nin min awlobofuɛ mun é sú Zoova.”—Zoz. 24:15.