An yo Zoova i kanga
“Nán an yo fuɛn [...]. An di e Min’n i junman’n kpa.”—RƆM. 12:11.
?AMÚN TƐ́ SU SƐ?
?Ngue ti yɛ Rɔmfuɛ Mun 12:11 waan Klistfuɛ’m be di Ɲanmiɛn i junman’n be yo i kanga ɔ?
?Ngue yɛ é yó naan y’a kaciman Satan nin i mɛn’n be kanga ɔ?
?Kɛ sran kun di Zoova i junman ɔ yo i kanga’n, mmlusuɛ onin yɛ ɔ ɲɛn i ɔ?
1. ?Wafa sɛ yɛ sran sunman be bu kanga dilɛ’n niɔn? ?Ngue ti yɛ Rɔmfuɛ Mun 12:11 waan Klistfuɛ’m be di Ɲanmiɛn i junman’n be yo i kanga ɔ?
SRAN sunman be kunndɛman kɛ bé dí sran junman bé yó i kanga. Afin be waan kanga dilɛ’n ti afɛ nin ɲrɛnnɛn wunlɛ ngunmin. Sanngɛ be nga be di Ɲanmiɛn i junman be yo i kanga’n, be bumɛn i kɛ ɔ ti afɛ nin ɲrɛnnɛn wunlɛ. Afin Ɲanmiɛn Ndɛ’n waan Ɲanmiɛn ti sran klofuɛ. I sɔ’n ti’n, Klistfuɛ kun kwla fɛ i wun man Ɲanmiɛn kɛ ɔ́ dí i junman’n ɔ́ yó i kanga. I sɔ yɛ akoto Pɔlu seli i niaan Klistfuɛ mun kɛ be yo ɔ. Ɔ seli kɛ be “di e Min’n i junman’n kpa” be yo i kanga klolɛ mɔ be klo i’n ti. (Rɔm. 12:11) ?Ngue yɛ sran ng’ɔ ti Ɲanmiɛn i kanga’n yo ɔ? ?Ngue yɛ é yó naan y’a kaciman Satan nin i mɛn’n be kanga ɔ? ?Kɛ sran kun di Zoova i junman yo i kanga’n, mmlusuɛ onin yɛ ɔ ɲɛn i ɔ?
“Ɔ KLO I MIN’N”
2. (a) ?Ngue ti yɛ Izraɛli lɔ kanga kun kwla se i min’n kɛ ɔ kɔman ɔn? (b) ?Ngue ti yɛ kanga’n kplin su kɛ be fiti i su’n niɔn?
2 Kɛ be se kɛ be di Ɲanmiɛn i junman be yo i kanga’n, Mmla nga Ɲanmiɛn fa mannin Izraɛlifuɛ mun’n tu i ɲin kle e. Yɛle kɛ afuɛ nso kwlaa nun’n, mmla’n waan Zuifu’m be yaci be kanga’m be nun. (Tul. 21:2) ?Yɛ sɛ kanga’n klo i min’n naan i waan ɔ kɔman’n nin? I lɛ nun’n, Zoova kle like ng’ɔ fata kɛ kanga’n i min’n yo’n. Ɔ fata kɛ ɔ fa kanga’n mantan anuan’n annzɛ anuan’n i waka’n, kpɛkun ɔ fiti i su’n nin tulie. (Tul. 21:5, 6) Kanga’n i su’n i fitilɛ’n lɛ bo. Ebre aniɛn’n nun’n, sɛ be waan bé sé kɛ sran kun ti aɲinyiɛfuɛ’n, be se kɛ ɔ sie i su sran nuan bo. Ɔ maan kɛ be fiti kanga’n i su’n, i sɔ’n kle kɛ like nga i min’n wá sé i kɛ ɔ yo’n, ɔ́ yó i titi. I kunngba’n yɛle be nga be fa be wun man Zoova’n be liɛ’n. Kɛ mɔ be klo be min Zoova ti’n, like ng’ɔ se kɛ be yo’n yɛ be yo i titi ɔ.
3. ?Ngue ti yɛ e fa e wun man Ɲanmiɛn ɔn?
3 Kwlaa naan b’a yo e batɛmu’n, e seli kɛ é yó Zoova klun sa naan é káci i kanga. E seli Zoova kɛ e ɲin yí i naan é yó like ng’ɔ se e kɛ e yo’n. Sran fi w’a mianman e kɛ e fɛ i sɔ ajalɛ’n. Gbanflɛn nin talua nga be yo be batɛmu’n, be bɔbɔ yɛ be fɛ i ajalɛ ɔ. Be si nin be nin’m be mianman be. Yɛ be yoman sɔ naan be si nin be nin’m be klun jɔ be wun. Nanwlɛ, klolɛ mɔ sran kun klo e Min Zoova’n, i ti yɛ ɔ fɛ i wun mɛn i ɔ. Akoto Zan waan: “Nyanmiɛn i klolɛ’n yɛlɛ kɛ e fɛ i ndɛ’n su, i ndɛ sɔ’n i su falɛ’n yo-man ya.”—1 Zan 5:3.
Y’A ƝAN E TI SANNGƐ E TI ƝANMIƐN I KANGA
4. ?Sɛ e waan ‘sa kpa’n yɛ ɔ kaci e nzuɛn’n,’ ngue yɛ ɔ fata kɛ e yo ɔ?
4 Kɛ Zoova man e atin kɛ e yo i kanga’n, ɔ yo e fɛ dan. Ɔ maan é lɛ́ i ase. Sɛ e lafi e ti kpɔlɛ tɛ nga Klist yili’n su’n, e su yoman sa tɛ’n i kanga kun. Kannzɛ e tɛ yo sa tɛ yofuɛ’n, sanngɛ e fali e wun mannin Zoova nin Zezi kɛ be sie e. I sɔ yɛ akoto Pɔlu kɛnnin i ndɛ i fluwa kun m’ɔ klɛli’n nun ɔn. Ɔ seli kɛ: “Amun nin Krist-Jésus amun sran wunmuan bɔ amu’an kaci’n ti, amun kusu an bu amun wun kɛ an wuli, ɔ maan amun nin sa tɛ’n amu’an bu, yɛ an wo Nyanmiɛn dunman nun.” Ɔ seli ekun kɛ: “?An si-man kɛ sɛ an fa amun wun man sran kun bɔ an kaci i sran’n bɔ amun nyin yi i’n, wuun an ti i kanga? Ɔ maan an kwla fa amun wun man sa tɛ yolɛ bɔ i agualiɛ yɛlɛ wie’n annzɛ anyinyiɛ bɔ amun fa man Nyanmiɛn bɔ i agualiɛ yɛlɛ sran i sran kpa kacilɛ’n. Ń yó Nyanmiɛn i kwla o, afin laa’n, sa tɛ’n ti amun nzuɛn, sanngɛ siɛn’n, amu’an fa ndɛ nanwlɛ nga be kleli amun’n su kpa. Nyanmiɛn deli amun nzuɛn tɛtɛ’n nun, sa kpa’n yɛ w’a kaci amun nzuɛn-ɔn.” (Rɔm. 6:11, 16-18) Maan e sie ndɛ nga Pɔlu kannin’n i nzɔliɛ. Ɔ seli kɛ e ‘fa ndɛ nanwlɛ nga be kleli e’n su kpa.’ Ndɛ sɔ’n kle kɛ, kɛ e fali e wun mannin Zoova ti siɛn’n, ‘sa kpa’n yɛ ɔ kaci e nzuɛn ɔn.’
5. ?Ngue ti yɛ kɛ ɔ yo naan e di Ɲanmiɛn junman’n i kpa’n, ɔ timan pɔpɔ ɔ?
5 E fali e wun mannin Ɲanmiɛn kɛ é dí i junman’n. Sanngɛ kɛ ɔ yo naan e di i kpa’n, ɔ timan pɔpɔ. Afin like nɲɔn tanndan e ɲrun. I klikli’n yɛle fɔ m’ɔ o e nun’n. Fɔ’n tanndannin akoto Pɔlu ɲrun wie. Ɔ maan ɔ seli kɛ: “Nyanmiɛn mmla’n i sufalɛ’n yo n fɛ min anwlɛn’n nun, sanngɛ n wun kɛ sa uflɛ o lɛ. Min nzuɛn b’ɔ maan n yo sa tɛ’n, ɔ nin akunndan nga b’ɔ maan n klo kɛ ń yó sa kpa’n, be ti kɛ sran nnyɔn bɔ be si akplowa sa, lele n fa tɛfuɛ’n su, ɔ maan n kaci sa tɛ yofuɛ mlɔnmlɔn.” (Rɔm. 7:22, 23) Fɔ’n nun yɛ be wuli e ɔ. I sɔ’n ti’n, ɔ fata kɛ e kpli kpa naan e konvi w’a sɔman sa tɛ yolɛ’n. Akoto Piɛli seli kɛ: “Amu’an nyan amun ti, i sɔ’n ti, an yo sa ng’ɔ ti kpa’n. Nán amun ti nyanlɛ sɔ’n kaci sa tɛ, sanngɛ maan be wun kɛ an ti Nyanmiɛn i sran mun.”—1 Piɛ. 2:16.
6, 7. ?Ngue yɛ Satan yo naan sran’m be klo mɛn dilɛ ɔ?
6 Like kun ekun ng’ɔ tanndan e ɲrun’n yɛle mɛn’n. Satan yɛ ɔ sie mɛn nga ɔ. Ɔ kunndɛ kɛ ɔ́ síe e wie naan e kaci mɛn’n nunfuɛ. I sɔ’n ti’n, ɔ fa ninnge tɛtɛ mun sie e ɲrun naan e kpɔci Zoova nin Zezi. (An kanngan Efɛzfuɛ Mun 6:11, 12 nun.) Wafa nga Satan yo’n i kun yɛle kɛ, ɔ yo naan e klo mɛn’n nun ninnge mun. I sɔ’n ti’n, akoto Zan wla e su nun kpa se kɛ: “Nán an klo mɛn dilɛ’n, nán an klo ninnge nga be o mɛn’n nun’n. Sran ng’ɔ klo mɛn dilɛ’n, wuun ɔ klo-man e Si’n. Like nga be yo be mɛn’n nun’n i kwlaa’n: be nyin b’ɔ blo ninnge’m be su’n, nin akunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi fin-man e Si’n, sanngɛ be ti mɛn’n nun nzuɛn.”—1 Zan 2:15, 16.
7 Sran’m be ɲin blo ninnge’m be kunndɛlɛ’n su. Satan yo maan sran’m be bu i kɛ ɔ min nga a lɛman sika’n, a kwlá diman aklunjuɛ. I sɔ’n ti be tike butiki dandan mun lika’m be nun trilili. Televiziɔn nin fluwa’m be nun’n, be kle sran mun kɛ be klo mɛn dilɛ naan be to ninnge nga be fite uflɛuflɛ mun. Asa ekun’n, be fa mɛn’n nun lika nglanman kpa mun kle sran mun. Yɛ be wlawla e kɛ e nin be nga be suman Ɲanmiɛn’n e wɔ lɔ e ko di mɛn. Lika kwlaa nun’n, ndɛ ng’ɔ o sran’m be nuan’n yɛle kɛ: ‘Maan e di mɛn ke!’
8, 9. ?Ngue yɛ ɔ ti aya tɛ kpa ɔ? ?Yɛ ngue ti yɛ ɔ ti aya tɛ kpa ɔ?
8 Akoto’m be blɛ su’n, mɛn dilɛ’n i su akunndan nga sran’m be bu’n i wie yɛ Klistfuɛ wie’m be tɔli i bulɛ su ɔ. Ɔ maan akoto Piɛli tuli be fɔ. Ɔ seli kɛ: “Kɛ aliɛ ko cɛn’n, sa ng’ɔ yo be fɛ’n yɛlɛ mɛn dilɛ’n, kɛ a wun be’n, nyannzuɛn kun wɔ. Kɛ amun nin be yia aliɛ’n su’n, amun nyin gua ase, be saci amun wun, yɛ be gblɛgblɛ sa nga be yo’n ɔ yo be fɛ. Be ijɔ dandan ngbɛn, be fa ninnge nga klɔ sran nyin blo su’n laka be nga be nin be wiengu bɔ be fa-man atin kpafuɛ su’n be su bu’n. Be se be kɛ be maan bé nyán be ti, sanngɛ be bɔbɔ be ti kɛ kanga sa sa tɛ b’ɔ ti be nzuɛn’n ti. Afin sɛ sran kun kwla sran kun’n, yɛ ɔ sie i-ɔ.”—2 Piɛ. 2:13, 18, 19.
9 Sɛ “ninnge nga klɔ sran nyin blo su’n” i wie yɛ e kunndɛ’n, e su ɲanman e ti. Sanngɛ Mmusu’m be si Satan yɛ ɔ́ síe e ɔ. (1 Zan 5:19) Aɲanbeun ninnge’m be kunndɛlɛ’n ti aya tɛ kpa. Sran ng’ɔ tɔ nun m’ɔ trɛ i’n, saan ɔ́ fɛ́ kpa naan w’a ɲɛn i ti.
JUNMAN KPA ƝANLƐ’N
10, 11. ?Wan mun yɛ Satan kunndɛ be kpa ɔ? ?Wafa sɛ yɛ suklu dan dilɛ’n tanndan gbanflɛn nin talua’m be ɲrun ɔn?
10 Be nga be nin a wunman sa wlɛ’n, yɛ Satan kunndɛ be kpa ɔ. I lɛ nun’n, sran ng’ɔ ɲan be ndɛndɛ be kpa’n yɛle gbanflɛn nin talua mun. Kɛ gbanflɛn nin talua’m be fa be wun man Zoova kɛ bé yó i kanga’n, ɔ yo Satan i ya kpa. Sanngɛ nán gbanflɛn nin talua’m be ngunmin yɛ be ajalɛ’n yo Satan i ya ɔ. Kɛ sran kun fɛ i wun man Zoova’n, ɔ yo Satan ya. Nanwlɛ, Satan kunndɛman kɛ be nga be fa be wun man Zoova’n, be su i mlɔnmlɔn.
11 E wunnin kɛ Izraɛlifuɛ’m be blɛ su’n, be fiti kanga wie’m be su’n. Kɛ bé fíti kanga’n i su’n, ɔ yo i ya. Sanngɛ yaya sɔ’n cɛman. I su fitiwa’n, ɔ́ wá klé kɛ ɔ ti sran kun liɛ. I sɔ kunngba’n, gbanflɛn nin talua nga be kunndɛman kɛ bé nían be wiengu’m be ayeliɛ tɛ’n su’n, ɔ yo kekle man be kpa. I wie yɛle kɛ, Satan kle kɛ sran ng’ɔ di junman dan mɛn nga nun’n, nn i liɛ w’a yo ye. Sanngɛ Klistfuɛ’m be liɛ’n, be wun i wlɛ kɛ Zoova i junman mɔ sran kun dun mmua di’n, i ti yɛ i liɛ yo ye ɔ. Zezi seli kɛ: “Be nga be si kɛ be di Nyanmiɛn ninnge’m be yalɛ’n, be liɛ su ti ye, afin Nyanmiɛn yɛ ɔ sie be sakpa-a!” (Mat. 5:3) Sran ng’ɔ fɛ i wun man Zoova’n, nán Satan klun sa yɛ ɔ kunndɛ kɛ ɔ́ yó ɔ. Zoova klun sa yɛ i waan ɔ́ yó ɔ. I sɔ’n ti’n, i like ng’ɔ klo i’n yɛle Zoova i mmla’n, yɛ ɔ bu i akunndan kɔnguɛ nin wia su. (An kanngan Jue Mun 1:1-3 nun.) Sanngɛ suklu dan dilɛ’n kwla tanndan Zoova i sufuɛ kun i ɲrun. Yɛle kɛ suklu dilɛ’n ti’n, blɛ sunman ɔ su ɲɛnmɛn i ti naan w’a bu Ɲanmiɛn Ndɛ’n i akunndan naan w’a su Zoova kpa.
12. ?Ajalɛ onin yɛ gbanflɛn nin talua sunman be kwla fa ɔ?
12 Klistfuɛ nga be di junman sran sa nun’n, wie liɛ be kle be yalɛ dan. Fluwa klikli nga Pɔlu klɛ ko mannin Korɛntifuɛ mun’n i nun’n, ɔ seli kɛ: “Kɛ ɔ́ flɛ́ wɔ bɔ a ti kanga’n, nɛ́n i sɔ’n yo wɔ ya, sanngɛ sɛ a kwla yo maan a kaci diewa’n, yo.” (1 Kor. 7:21) Sɛ Klistfuɛ kun i min’n kle i yalɛ naan i ti ɔ kwlá suman Zoova’n, ɔ fata kɛ ɔ yo like nga m’ɔ maan ɔ kwla ɲɛn i ti’n. I wie yɛle andɛ suklu dilɛ’n. Mɛn sunman nun’n, awa kle afuɛ ng’ɔ fata kɛ suklu ba’m be di suklu lele ju’n. Sɛ suklu ba kun wie afuɛ sɔ’n i di naan ɔ klo kɛ ɔ́ kɔ́ i ɲrun naan ɔ́ dí suklu dan’n, ɔ kwla fɛ i ajalɛ. Sɛ Klistfuɛ kun kunndɛ kɛ ɔ́ dí junman dan mɛn’n nga nun naan i sɔ’n ti ɔ fa ajalɛ kɛ ɔ́ dí suklu dan’n, ɔ su kwlá ɲɛnmɛn i ti naan w’a di Ɲanmiɛn junman’n i kpa.—An kanngan 1 Korɛntfuɛ Mun 7:23 nun.
?YƐ SUKLU DANDAN DILƐ’N NIN?
13. ?Suklu wafa onin yɛ Zoova i sufuɛ sunman be kunndɛ kɛ bé dí ɔ?
13 Akoto Pɔlu seli Kolɔs lɔ Klistfuɛ mun kɛ: “An sasa amun wun, nán maan sran fi fɛ i sa ng’ɔ si i’n nin sa ngbɛn wie fa laka amun naan ɔ nyan amun. Sa sɔ’m be fin lalafuɛ’m be nzuɛn’n, nin ninnge nga e nannan’m be kle’n, be fin-man Krist.” (Kol. 2:8) Andɛ suklu’m be nun’n, sa nga “be fin lalafuɛ’m be nzuɛn’n, nin ninnge nga e nannan’m be kle’n,” yɛ suklu klefuɛ sunman be kle ɔ. Be nga be di i sɔ suklu’n, lele nin i kɛ bé wíe i dí mɔ bé fíte’n, wie liɛ be siman be sa ti like yo. I sɔ’n ti’n, Zoova i sufuɛ’m be liɛ’n, suklu nga i nun be suan like yolɛ’n yɛ be kunndɛ bé dí ɔ. I liɛ kɛ bé fíte’n, be kwla yo be sa ti like naan b’a di Ɲanmiɛn junman’n kpa. I lɛ nun’n, be fa afɔtuɛ nga Pɔlu mannin Timote’n su. Ɔ seli kɛ: “Nanwlɛ, sɛ sran kun su Nyanmiɛn naan i nyin yi like ng’ɔ lɛ, i sɔ’n ti anyanbeun like dan. I sɔ’n ti’n, sɛ e nyan like e di’n, yɛ sɛ e nyan tannin kla’n, maan ɔ ju ye.” (1 Tim. 6:6, 8) Klistfuɛ’m be kunndɛman fluwa mɔ kɛ be wie suklu di’n, ɔ ‘kan be wun ndɛ kle sran mun’n.’ Sanngɛ, be kunndɛ kɛ bé dí Ɲanmiɛn junman’n i kpa.—An kanngan 2 Korɛntfuɛ Mun 3:1-3 nun.
14. ?Kɛ nga Filipfuɛ Mun 3:8 fa kan’n sa’n, wafa sɛ yɛ Pɔlu buli sran wunmuan mɔ Ɲanmiɛn maan ɔ nin Klist b’a kaci’n niɔn?
14 Akoto Pɔlu dili suklu Zuifu’m be mmla klefuɛ kun mɔ be flɛ i Gamaliɛli i ja su. Like nga Pɔlu suannin’n, sɛ ɔ ti e blɛ su’n, é sé kɛ Pɔlu dili inivɛsite. ?Sanngɛ kɛ Pɔlu buli sran wunmuan mɔ Ɲanmiɛn maan ɔ nin Klist b’a kaci’n i akunndan’n, wafa sɛ yɛ ɔ buli like ng’ɔ sili i laa’n niɔn? Ɔ klɛli kɛ: “Nanwlɛ, kɛ m bu min Min Krist-Jésus i silɛ bɔ n si i’n like kpa sakpa’n ti, ɔ maan m bu-man like’n wie fi like.” Ɔ seli ekun kɛ: “I ti m’an yaci like’n kwlaa kɛ ɔ́ yó naan Krist a yo n like kpa naan min nin i y’a kaci sran wunmuan’n ti.” (Fil. 3:8) Pɔlu i ndɛ sɔ’n, gbanflɛn nin talua’m be kwla bu i akunndan naan sɛ bé dí suklu dan annzɛ be su diman’n, b’a fa ajalɛ kpa. Ɔ kwla uka siɛ nin niɛn mun wie naan suklu wafa nga be mma’m bé dí’n, b’a fɛ i ajalɛ. (An nian desɛn mun.)
SUKLU NGA ZOOVA KLE’N YO SRAN YE
15, 16. ?Suklu onin yɛ Zoova i sufuɛ’m be trɛn i bo ɔ? ?Ngue ti yɛ be kle e like ɔ?
15 ?Ba nga be kɔ mɛn’n nun suklu dandan’m be nun’n, ngue yɛ blɛ sunman be yo i lɔ ɔ? Be yo ɲin kekle, yɛ be jaso awa nin i janunfuɛ’m be wun. (Efɛ. 2:2) Zoova i sufuɛ’m be liɛ’n, ɔ timan sɔ. Be asɔnun’m be nun’n, be kle be like kpafuɛ’n. Le mɔcuɛ kwlaa nun’n, be tran Ɲanmiɛn junman dilɛ suklu’n i bo. Sanngɛ nɛ́n i ngba ɔ. Ɔ lɛ atin bofuɛ nga be nin a jaman bla’n be suklu. Be flɛ i École biblique pour les frères célibataires. Yɛ atin bofuɛ nga b’a ja bla nin bian’n, ɔ lɛ be suklu liɛ. Be flɛ i École biblique pour couples chrétiens. Be kle e like suklu sɔ’m be bo naan e ɲin yi e Min Ɲanmiɛn Zoova.
16 Sɛ e nian fluwa nga be flɛ i Index des publications Watch Tower ɔ nin Watchtower Library m’ɔ o CD su’n, é wún ndɛ fɛfɛ sunman. Zoova i sulɛ ti yɛ be kle e like ɔ. Be kle e wafa nga e kwla uka e wiengu mun naan b’a siesie be nin Ɲanmiɛn be afiɛn’n. (2 Kor. 5:20) Kɛ ɔ yo sɔ’n, be kusu be kwla fa like kunngba’n kle sran uflɛ.—2 Tim. 2:2.
SRAN NG’Ɔ YO ƝANMIƐN KANGA’N I LIƐ YO YE
17. ?Sɛ e di Zoova i suklu liɛ’n, mmlusuɛ benin yɛ é ɲɛ́n i ɔ?
17 Junman difuɛ nsan be wun ɲanndra nga Zezi buli nun’n, be yoli junman difuɛ nɲɔn be mo. Yɛle kɛ be min’n ukali be sa su, afin be dili i junman’n i kpa. (An kanngan Matie 25:21, 23 nun.) Sɛ e di Zoova i suklu liɛ’n, e liɛ yó ye yɛ e klun jɔ́. I wie yɛle gbanflɛn kun mɔ be flɛ i Mikaɛli’n, i liɛ’n. Ɔ si fluwa kpa. Ɔ maan cɛn kun’n, i suklu klefuɛ’m be yiɛli i naan bé wlɛ́ i fanngan kɛ ɔ di inivɛsite. Mikaɛli liɛ ng’ɔ kannin’n, ɔ boli be nuan. Yɛle kɛ, ɔ seli be kɛ ɔ́ dí suklu nga be suan be sa ti like yolɛ mɔ be fite ndɛndɛ’n. I liɛ’n, ɔ́ kwlá yó titi atin bofuɛ. Ajalɛ nga Mikaɛli fali’n w’a yomɛn i nzisɔ. I waan: “Kɛ n yoli atin bofuɛ nin asɔnun kpɛnngbɛn’n, ninnge nga be kleli min’n be leman wunsu. Sɛ n dili suklu tɛnndɛn naan n dili junman dan’n, nn n ɲannin sika kpanngban. Sanngɛ wafa nga Ɲanmiɛn yra min su’n, ɔ ti kpa tra sika lele. Ajalɛ nga n fɛli i kɛ n diman suklu dan’n, n wun kɛ ɔ ti ajalɛ kpa dan.”
18. ?Ngue ti yɛ suklu nga Zoova kle’n yɛ ɔ ti kpa dan ɔn?
18 Zoova i suklu nun’n, be kle e Zoova i klun sa’n naan y’a kwla yo i kanga y’a su i. Ɔ maan e wla o su kɛ cɛn wie lele’n, ‘é nyán e ti, e su saci-man kun.’ Kpɛkun ‘nyrun nga Nyanmiɛn mma’m bé nyɛ́n i cɛn nga bé nyán alaje’n, e dunman’n tɛ́ nun wie.’ (Rɔm. 8:21) Sanngɛ like ng’ɔ yo e fɛ dan’n yɛlɛ kɛ, kɛ e di Zoova i suklu’n, e kle kɛ ɔ ti e Min naan e klo i kpa sakpa.—Tul. 21:5.
[Foto, bue 14]
[Foto, bue 16, 17]
?Junman onin yɛ á dí ɔ?