Ndɛ akpasua uflɛ mɔ é fá bó sran’m be Biblu’n nun like klelɛ bo’n
1. ?Ndɛ akpasua uflɛ benin yɛ siɛn’n, ɔ́ wá fíte Sasafuɛ Tranwlɛ’n nun ɔn? ?Yɛ ngue yɛ é fá ndɛ akpasua sɔ’n é yó ɔ?
1 Kɛ ɔ́ fɛ́ i Fevrie anglo’n nun’n, ndɛ akpasua uflɛ kun wá fíte Sasafuɛ Tranwlɛ’n nun siɛn’n. É fá ndɛ akpasua sɔ’n é bó sran’m be Biblu’n nun like klelɛ bo. I flɛlɛ’n yɛ: “Maan e suan Ɲanmiɛn Ndɛ’n nun like.” Ndɛ akpasua kwlaa sɔ’m be nun kannganlɛ wá yó e jasin bowlɛ i nunfuɛ’m be nun wie’m be fɛ kpa. Sanngɛ be siesieli be nun ndɛ’n naan kɛ e nin sran mun é kókó yalɛ’n, e fa uka e wun.
2. ?Wafa sɛ yɛ be siesieli ndɛ akpasua sɔ’n i nun ndɛ mun ɔn?
2 I nun ndɛ’n: Ndɛ akpasua sɔ’n i flɛlɛ’n ɔ nin i nun ndɛ ce’m be ti kosan. Be klɛli be kɛ e fa usa sran nga e nin i é kókó yalɛ’n. Asa ekun’n, be klɛli Biblu’n nun ndɛ mma wie’m be nimielo ngunmin. Be yoli i sɔ naan e nin sran nga é kókó yalɛ’n y’a kanngan Biblu’n nun trele. Asa kusu’n, i nun ndɛ kpɔlɛ’m be ti kpekpeekpe. Be klɛli be sɔ naan e nin sran’n y’a kwla koko su yalɛ i anuan’n nun lɛ. I kun ekun yɛle kɛ ndɛ akpasua’m be fa e ɲin sie i fluwa Biblu’n kle su. Ɔ maan sɛ ɔ yo’n, e kwla fa fluwa sɔ’n e kle sran’n i Biblu’n nun like.
3. ?Awloawlo’m be nun jasin fɛ’n bolɛ nun’n, wafa sɛ yɛ e kwla fa ndɛ akpasua uflɛ sɔ’n e bo sran’m be Biblu’n nun like klelɛ bo be anuan’n nun lɛ ɔ?
3 Wafa nga é fá dí junman’n: Kɛ amún fá periodiki’m bé mán’n, ndɛ nga akpasua sɔ’n kɛn i ndɛ’n, amun kwla jran su be usa sran’n i kosan kun m’ɔ kwla yo i fɛ’n. I wie yɛle kɛ Sasafuɛ Tranwlɛ Fevrie 1 nun’n, bé kán Biblu’n i kpa m’ɔ ti’n i ndɛ. Ɔ maan e kwla jran su e usa sran’n kɛ: “?A bu i kɛ Biblu’n fin Ɲanmiɛn annzɛ kusu ɔ ti fluwa ngbɛn wie mɔ i nun ndɛ’n yo fɛ ɔ? [Maan sran’n tɛ kosan’n su.] Ndɛ fɛ kpa kun o lɛ mɔ n klo kɛ ń fá klé wɔ ɔ.” I sin’n, fa sran’n i ɲin sie i kosan klikli’n su, kpɛkun kanngan ndɛ kpɔlɛ klikli’n nun. Yɛ kanngan Biblu’n nun ndɛ mma nga be klɛli i lɛ’n nun. Kanngan kosan’n nun ekun, kpɛkun se sran’n kɛ ɔ tɛ su. Nja, sɛ amún nían naan amun kwla koko kosan wie’m be su yalɛ ekun’n, amun yo. Wafa nga be siesieli kosan mun mɔ kun le i nimielo’n, amun nian su be koko yalɛ. Ka naan e nin sran’n y’a titi nun’n, maan e fɛ i ɲin e sie kosan ng’ɔ bɛ i sin’n i su. Cɛn nga é kó níɛn i osu ekun’n, maan e nuan sɛ su. Maan e mian e ɲin naan le mɔcuɛ kwlaa nun’n, e nin sran’n e koko kosan wie mun ekun be su yalɛ. E yo i sɔ lele naan fluwa uflɛ w’a fite naan y’a yo i kunngba sɔ’n ekun. Ajalɛ kun ekun mɔ e kwla fa’n yɛle kɛ e kpɛ i kpo e se sran’n i trele kɛ e klo kɛ e nin i é súan Biblu’n nun like. I sin’n, e fa ndɛ akpasua sɔ’n e ka lɛ e bo i Biblu’n nun like klelɛ bo.
4. ?Kɛ é sá e sin é kó nían sran’m be osu ekun’n, wafa sɛ yɛ e kwla fa ndɛ akpasua sɔ’n e di junman ɔn?
4 Sran nga e man be periodiki titi’n, ɔ nin be nga e ko nian be osu’n, e kwla fa ndɛ akpasua uflɛ sɔ’n, e uka be kpa liɛ su. E kwla se be kɛ: “Ndɛ akpasua uflɛ kun fite Sasafuɛ Tranwlɛ’n nun siɛn’n. N kunndɛ kɛ ń klé wɔ wafa nga e kwla suan nun like’n.” Nanwlɛ, e klo kɛ ndɛ akpasua uflɛ sɔ’n, ɔ uka sran kpanngban naan “be wun sa ng’ɔ ti nanwlɛ’n i wlɛ kpa.”—1 Tim. 2:4.