Maan e bo jasin fɛ’n i kpa tra laa: Kɛ sran’n kunndɛman kɛ ɔ nin e kókó yalɛ’n, ndɛ nga e kwla kan’n

?Ngue ti yɛ ɔ ti cinnjin ɔn? Wienun ɔn amun si kɛ aunmuan dan wie su wa fita naan sɛ sran’m b’a wanndiman’n, saan wulɛ yɛ bé wú ɔ. Amun a ko to amun mantanfuɛ wie naan amún bó ndɛ sɔ’n su klé i. Sanngɛ ɔ kpɛ amun nuan ndɛ, kpɛkun ɔ se amun kɛ ɔ ɲɛnmɛn i ti. ?I sɔ m’ɔ kannin’n ti’n, amún múan amun nuan amún yáci i lɛ bé kɔ́? E jasin bowlɛ’n nun’n, sran sunman be sieman be su e nuan bo. Be siman kɛ be o wie’n nin nguan’n be afiɛn, naan jasin fɛ nga e bo’n kwla de be. Wie liɛ’n, dɔ nga e to be lɔ’n su’n, be sa ti mianwa. (Mat. 24:37-39) Annzɛ kusu e suɛn mɔ sran’m be tɔn’n, be fali su. (Mat. 11:18, 19) Ɔ maan be bu i kɛ e o Ɲanmiɛn sulɛ wafa nga i nunfuɛ’m be yo sa tɛtɛ’n be nun wie. (2 Piɛ. 2:1, 2) Sɛ i klikli’n nun’n e wun kɛ ndɛ’n yoman sran’n i fɛ’n, nán maan e yaci i lɛ e wɔ.

?Wafa sɛ yɛ é yó i sɔ ɔ?

Ka naan y’a ko bo jasin fɛ’n awloawlo’m be nun’n, ndɛ nga sran’m be kwla kan naan be nin e b’a kokoman yalɛ’n, maan e fa blɛ kan e bu i akunndan. Kpɛkun maan e bu wafa nga e kwla tɛ su’n i akunndan wie.
Sɛ sran’n man ndɛ wie su kɛ ɔ́ fá kpálo e ndɛ’n, nán e niɛn i sɔ’n ti naan é sé kɛ é múan e nuan. Maan e mian e ɲin naan e nin i e koko yalɛ. ?Wafa sɛ yɛ e kwla yo i sɔ liɛ’n niɔn? Maan e luɛluɛ i. E kwla se kɛ: “Min liɛ’n, be nga Ɲanmiɛn ndɛ’n ti be cinnjin kɛ wɔ sa’n, yɛ n kunndɛ be ɔ.” Wie liɛ’n, sɛ e si sa ng’ɔ o sran’n i su’n, i sɔ’n kwla uka e naan y’a bo jasin fɛ’n y’a kle i. Yɛle kɛ sɛ sran’n se e kɛ ɔ ɲɛnmɛn i ti’n, e kwla tɛ i su kɛ: “N wun i wlɛ. Sanngɛ ka naan m’an wɔ’n, min waan ń fá fluwa nga ń mán wɔ.” Wie liɛ kusu’n, sɛ sran’n waan e ndɛ’n timɛn i cinnjin’n, e kwla usɛ i kɛ: “?Ndɛ nga Biblu’n kan’n yɛ ɔ timan ɔ cinnjin ɔn? ?Annzɛ Ɲanmiɛn sulɛ’n niɔn?”
Maan e yo i ngwlɛlɛ su. Nán e wla fi su kɛ Zoova mianman sran kun fii kɛ ɔ tie i ndɛ’n. (Mml. 30:19) Zoova ɲrun’n, sran kun bɔbɔ yɛ ɔ́ súɛ i trɔ’n niɔn. (Gal. 6:5) Ɔ maan sɛ sran’n kunndɛman kɛ ɔ nin e kókó yalɛ mlɔnmlɔn, ɔ fata kɛ e wɔ e ɲrun. Sɛ e kle kɛ e ti aɲinyiɛfuɛ’n, aniaan uflɛ kwlá bó jasin fɛ’n klé i cɛn uflɛ.—1 Piɛ. 3:15.

Anglo nga nun’n, maan e yo nga e nian:

Wie liɛ’n, sran nga e to i’n kunndɛman kɛ ɔ nin e kókó yalɛ. Kɛ e nin e wiengu jasin bofuɛ’n e kaci e sin’n, maan e koko wafa nga cɛn uflɛ e kwla tɛ i su klanman’n, i su yalɛ.