B’A UKA NINNGE’M BE GUA’N SU ?É YÓ I SƐ?

Maan ɔ ɲin yi like nga a le i’n

Be nga be ɲin yi like nga be le i’n, be di aklunjɔɛ. Asa’n, kɛ lika’n yo kekle be su’n, like nga be sa ju su’n yɛ be to-ɔ.

LIKE NGA TI YƐ I SƆ’N TI CINNJIN’N

Fluwa sifuɛ kun m’ɔ suan Zesika Kolɛɛ’n, ɔ sieli i nzɔliɛ kɛ blɛ sunman’n be nga be ɲin yi like nga be le i’n, kannzɛ lika’n jran be su sɛ’n, be bu akunndan kpa titi. Asa’n, ɔ sieli i nzɔliɛ kɛ i sɔfuɛ’m be ɲin bloman sran like su. I sɔ’n ti yɛ be nga be ɲin yi like nga be le i’n be di aklunjɔɛ kpɛkun be kokoman dan’n niɔn. I kpa bɔbɔ’n, be nga be di aklunjɔɛ kpa’n be nun wie’m be leman sika kaka. I li be nga be fa be ɲin sie i ninnge nga be ti cinnjin kpa mɔ sika kwlá toman’n be su’n, be yɛ be di aklunjɔɛ dan’n niɔn. I wie yɛle kɛ be fa blɛ naan be nin be awlofuɛ mun nin be janvuɛ’m b’a yo ninnge mun likawlɛ.

“Sɛ e ɲan like e di’n, yɛ sɛ e ɲan tralɛ e wla’n, maan ɔ ju e.”—1 Timote 6:8.

LIKE NGA A KWLA YO’N

Nán fa ɔ wun sunnzun sran uflɛ. Sɛ a fa ɔ wun sunnzun be nga be le sika’n, ɔ ɲin su yiman like nga a le i’n kun. I kpa bɔbɔ’n, ɔ ɲin bló be ninnge’m be su. Asa’n, be nga a fa ɔ wun sunnzun be’n, atrɛkpa’n kalɛ ng’ɔ o be su’n ɔ timan aɔwi. Bla kun m’ɔ tran Senegali mɔ be flɛ i Nikɔlu’n, ɔ seli kɛ: “Ɔ nunman nun kɛ n ɲan ninnge kaka naan m’an di aklunjɔɛ. Kannzɛ n leman sika kɛ min wiengu’m be sa’n, sanngɛ sɛ min ɲin yi like nga n le i’n, min klun kwla jɔ.”

Yo nga nian: Nán fa ɔ ɲin sie i be nga be kan sika dan mɔ be le i’n i ndɛ rezo sosio’m be su’n nin televiziɔn nun’n be su.

“Kannzɛ sran kun le aɲanbeun ninnge kpanngban’n, nán ninnge sɔ mun yɛ be mɛn i nguan-ɔn.”—Liki 12:15.

Kle kɛ a si ye. Be nga be si ye’n, blɛ sunman’n be ɲin yi like nga be le i’n. Bian kun m’ɔ tran Aiti mɔ be flɛ i Robɛɛtɔn’n, ɔ seli kɛ: “Ɔ ju wie’n, n tran n bu ye nga sran wie’m be yoli e nin min awlofuɛ mun’n i akunndan. Kpɛkun n la sran sɔ’m be ase. Asa’n, n kle min wa yasua m’ɔ le afuɛ mɔcuɛ’n kɛ sɛ sran wie mɛn i like’n, maan ɔ yo i kwla.”

Yo nga nian: Cɛn kwlakwla’n, klɛ like kun m’ɔ yoli ɔ fɛ kpa’n sie. Kpɛkun la Ɲanmiɛn i ase. A kwla lɛ i ase ɔ wun m’ɔ sanndi wɔ’n, annzɛ ɔ awlobofuɛ mɔ be bo ti kun’n, annzɛ janvuɛ kpa mɔ a le i’n, annzɛ bɔbɔ nzue m’ɔ tɔ’n i ti.

“Sran nga i klun ti jɔwa’n, cɛn yɛ ɔ di i sa trilili-ɔ.”—Ɲanndra Mun 15:15.

Ɔ ju wie’n, kɛ ɔ yo naan e ɲin yi like nga e le i’n ɔ ti kekle. Sanngɛ sɛ e mian e yo sɔ’n, é ɲán su ye. Yɛle kɛ é dí aklunjɔɛ. Aklunjɔɛ’n kusu’n, sika kwlá toman.