Guerra—Pag-atubang sa Resulta Kaini
PAANO nakakayang atubangon kan mga tawo an makolog na pangyayari nin guerra? Tanganing magkaigwa nin kaaraman sa temang ini, an Magmata! nag-interbio nin nagkapirang biktima nin guerra.
Si Bob Honis kaiba kan manampulong ribong Marino kan E.U. na nakilaban sa ikaduwang guerra mundial sa labanan sa Iwo Jima sa solnopan Pasipiko. An saiyang estorya ipinublikar bako tanganing makapasusto kundi tanganing ipaheling na posibleng maomayan an nagkapira sa ibong nin pinakamakolog na mga eksperyensia.
An Makolog na Pangyayari
“Pinonan niamo an samuyang pagdangadang sa Iwo Jima kan 8:30 n.a. kan Pebrero 19, 1945. An mga kanyon kan bapor de guerrang Tennessee nagpondo na sa pagputok sa likod niamo, asin dangan an samuyang sakayan pasiring sa baybayon tinanyog nin mga bomba hale sa mga kanyon kan kaiwal sa baybayon. Malaadon an mga emosyon, na andam para sa maabot na pakikilaban, nagkurahaw ako sa tahaw kan makuring kariribokan, ‘Tadai man kami!’ mantang sinusundan niamo an enot na nananalakay na hukbo.
“Sa pagdatong sa baybayon, dai akong ibang napaparong kundi an makababaldeng parong nin pulbura, abo nin bulkan, asin nin nasosolong kagamitan. Tinamaan an samong sakayan. Nagadan tolos-tolos an drayber, asin nagkararaot an gabos niamong kagamitan.
“Dai ko malingawan an pakaheling sa ibang nagadan na marino. An saro palaob sa baybay. An saiyang panguerrang bota, na mayo na nin suwelas, biyong nakalaso sagkod sa tuhod, sa putol nang hoben, masasarig na tabay. Sa pagheling sa sakong too mantang suminuksok ako sa dali-daling kinalot na taguan, naheling ko an saro pang marino na medyo nakadoko na kapot pa sa saiyang daghan an saiyang riple, na pugot na an payo. Lakop sa baybayon an garadan nang marino, na an kadakol nagkapurotolan sagkod na dai na mamidbid. Kapinonan sana ini.
“Kan ikaduwang aldaw sinugo ako tanganing helingon an saro sa samuyang mga posisyon. Makatatakot nanggad an naheling ko! Sarong puminutok na bomba an nagpalupad sa mga tabay asin mga takyag kan enot na marinong naheling ko. Nakasulot pa an saiyang takop sa payo asin an panbogkos sa kuko. Buklat na gayo an saiyang mga mata, na nagtotohorok nin diretso sa enotan na garo sia may hararom na hinohorophorop. Nagkawararak na siring sa naraot na mga kawatan, an ibang miembro kan grupo nagin mga pidaso nin pakit na laman na nagkawararak sa malumoy, maitom na abo nin bulkan.
“An daing herak na panggadan nagpadagos sagkod sa ikatolong aldaw. Dangan an mga gadan nagpoon nang malapa nin marikas. An parong nagin sobra an bata. Lakop idto. Dai idto madudulagan.
“Pakatapos nin apat na aldaw nin maringis na labanan, kan Pebrero 23 nangyari an bantog na ngonyan na pag-itaas kan Amerikanong bandera sa Bukid nin Suribachi. Imbes na maogma, pagkadesesperar sana an namatean ko. An mga gadan yaon saen man. An buhay garo baratohon. An maringis na guerra nagpadagos sagkod kan Marso 26, kan sa katapustapusi nabihag an Iwo Jima, pakatapos nin mga semana nin mayong ontok na daing herak na garadanan. Kanigoan kadakulang garadanan—sa kabilogan 26,000 na Amerikano asin Hapones an ginaradan sa sarong isla na 20 kilometro kuwadrado sana kadakula!
An Resulta
“Panahon kutana idto nin dakulang kaogmahan kan pinahale ako sa mga Marino asin nakasumaro liwat an sakong pamilya. Alagad imbes, naglataw na ngonyan an nagtatalubo sa boot ko—sarong makatatakot na kadaihan nin direksion asin pakamate nin pagkadaing kamanungdanan.
“An mga hapot padagos na nagpapadusa sa sako. Kun an buhay baratohon na gayo, ano pa an dahelan na mabuhay? Totoo daw na igwa nin nagmamakolog na Dios? Ako daw perming makagigirumdom kan sakong mga eksperyensia sa bilog kong buhay? Minsan pakatapos kong pakasalan an sakong agom, si Mary, an padusa nagpadagos. Dai akong naheheling na paglaom nin magdadanay, maogmang ngapit, kundi guerra asin orog pang bakong rasonableng garadanan sagkod, sa katapustapusi, an kalaglagan kan daga asin kan gabos na buhay digdi.
Pakanompong kan Solusyon
“Dai naghaloy pagkakasal mi, kami mag-agom dinalaw nin duwang Saksi ni Jehova. Nagtao ini nin oportunidad sa sako na maghapot nin nagkapirang nagsisiyasat na hapot manongod sa guerra, pagtios, asin sa katuyohan nin buhay. An mga simbag sa sakong mga hapot itinao tolos-tolos hale sa Biblia.
“Iyo, igwa nin mamomoton na Dios na nagmamakolog asin na sa dai na mahahaloy maresolber kan gabos niatong kolog asin kamondoan. (Salmo 83:18; Kapahayagan 21:1-4) Dai, mayo nin autoridad nin Dios an mga guerra sa pagmawot nin tawo nin politikal na mga pasohan. (Salmo 46:9; Isaias 2:4; Juan 18:36) Dai, an daga dai malalaglag sa nuklear na biyong pagkatunaw. Magdadanay ini sagkod lamang, bilang sarong paraisong ontokan para sa gabos na makaaabot sa mga kahagadan nin Dios.—Salmo 37:29; Isaias 45:18; Kapahayagan 11:17, 18.
“Mantang nagpapadagos an sakong pag-adal kan nakapupukaw sa pusong mga panuga sa Biblia, an kadaihan sa boot ko luway-luway na napanigoan. Ako nagin mapanarig na an Kahadean nin Dios an solamenteng realistikong paagi sa pagpapangyari nin katoninongan asin seguridad sa daga. An ralaban nin Dios sa Armagedon sa katapustapusi an mahale kan gabos na karatan sa daga.—Daniel 2:21, 22; Mateo 6:10; Kapahayagan 16:14-16.”
Magpatalubo nin Paglaom sa mga Panuga nin Dios
Minaoyon an iba na an pakanood kan katotoohan manongod sa katuyohan nin Dios sa daga asin sa Saiyang mga rason para sa temporaryong pagtogot sa karatan an nagin pinakamapuwersang dahelan sa pagtabang sa sainda na atubangon an natatada pang kakologan sa boot bunga kan guerra.
Dai ini nangangahulogan na an propesyonal na medikal na tabang tibaad dai na kaipuhan kun minsan. Alagad an tunay na paglaom, na basado sa mapananarigan na mga panuga nin Dios sa Biblia, nagtatao nanggad nin panlaog na kosog tanganing matagalan an seryosong mga problema.
Minsan siring, tibaad bako kamong personal na apektado kan makolog na pangyayari nin guerra. Alagad tibaad may midbid kamo na siring. Ano an magigibo nindo tanganing makatabang? “Magin mapagsabot asin nakapagpapakosog sa mga nagtitios sa paaging ini,” an sinabi nin sarong biktima kan makolog na pangyayari nin guerra, si Mary C. “Tabangan an siring na mga tawo na maglaom sa ngapit, na maghorophorop kan mga panuga nin Dios, bakong kan mga mamondong pangyayari kan nakaagi,” an sadol nia. Iyo, magin matinios asin maheherakon. Magpasensia. Asin pagmaigotan na tabangan sindang magpatalubo nin paglaom para sa ngapit.
‘Alagad,’ tibaad sabihon nindo, ‘paano masasabi na duman sa mga nagtirios nin makolog na pangyayari sa guerra, saro pang guerra, an Armagedon, an magigin solusyon?’ An Armagedon, an ralaban nin Dios tumang sa gabos na karatan, magigin guerra na mayong inosenteng mga biktima. Dai kaini babalgahon an mga prinsipyo nin hustisya asin karahayan. Ini ‘ipakikipaglaban sa katanosan,’ na dian solamenteng an mga marompot an magagadan.—Kapahayagan 19:11; Talinhaga 2:20-22.
An Armagedon dai magkakaigwa nin makatatakot na gayong mga epekto pakatapos, mayong paorootrong um-om o iba pang sikolohikal na mga lugad. An bagong kinaban nin Dios an maotob kan makahulang ladawan na ipininta sa Isaias 65:17-19: “An dating mga bagay dai na magigirumdoman, . . . asin dai na madadangog . . . an tingog nin tinangis o an tingog nin inagrangay.”
An gabos na nakaaging biktima nin nanggagadan na guerra asin kadahasan, minsan an mga gadan, magkakaigwa nin pakinabang sa guerrang ini. (Salmo 72:4, 12-14; Juan 5:28, 29) Isip-isipon ini—an pagbabalik kan Paraiso nin katoninongan na orihinal na katuyohan nin Dios.
“An paglaom na ini na itinatao kan Biblia,” an sabi ni Bob Honis, “an liyabe sa pag-atubang sa resulta nin guerra. An gabos na nadanyaran kan makolog na pangyayari nin guerra makikinabang sa siring na paglaom. An klaseng ini nin paglaom an, siring kan sinasabi kan Biblia, ‘angkla para sa kalag.’”—Hebreo 6:19.
[Blurb sa pahina 8]
“Naglataw na ngonyan an nagtatalubo sa boot ko—sarong makatatakot na kadaihan nin direksion asin pakamate nin pagkadaing kamanungdanan”
[Mga ritrato sa pahina 7]
Kan pasiring sa Iwo Jima, pinag-adalan niamo an mga modelo kan isla
Maheheling si Honis sa too sa itaas
[Credit Line]
U.S. Marine Corps
[Ritrato sa pahina 9]
Si Bob asin si Mary Honis ngonyan