Mga Aking Daing Istaran—Igwa daw nin Solusyon?
AN MGA tawong tunay na nagmamakolog sa saindang mga kapwa tawo habong umontok na garo baga mayo nang ibang magigibo para sa mga aking daing istaran. Narerealisar nindang an mga aki sa tinampo nangangaipo nin orog pa kisa sa istaran. An mga aki nag-ooswag kun igwa sinda nin katoninongan nin isip, nakaoogmang gibohon, marahay na salud, asin kompiansa sa sadiri. An mga lalaki asin babaeng daing kapasloan na nagmamakolog sa kapakanan nin iba andam an boot na nag-aalok kan saindang sadiri sa kapakanan kan mga daing istaran, asin angay ini sa komendasyon. Alagad sa ibong kan saindang mga pagmamaigot, nagdadanay an problema kan mga aking daing istaran.
An rason iyo na an presenteng sistema na naggigibo nin mga kamugtakan na nagbubunga nin daing istaran na mga aki dai mapapakarahay. Arog ini kan naraot na lunadan na dai na maiirahay. Sa realistikong paagi, bako daw dapat niatong akoon na an pagigin may nahahaman nin tawo sana dai makakapangyari nin matanos na sosyedad nin tawo?
Alagad, makaoogma, posible an pagbabago—alagad bakong paagi sa tawo. Solamenteng an Makakamhan na Dios an may kakayahan asin kadonongan na haleon nin lubos an nakararaot sa daga. An saiyang Tataramon, an Biblia, nagsasabi sato dapit sa administrasyon kan saiyang langitnon na Kahadean asin kun paano kaini ootobon an pagmawot nin tawo para sa matanos na mga kamugtakan digdi mismo sa daga.—Daniel 2:44.
Nagmamakolog an Dios
Iniisip daw nindong posible na haleon nin Dios an presenteng sistema asin iintrodusir an bagong paagi nin buhay? Kun iyo, girumdomon na bako sanang an kaligtasan nin tawo kundi, orog sa gabos, kalabot an ngaran ni Jehova Dios. Bilang an Kaglalang, an nangongorog sa gabos na halimbawa nin pagigin areglado asin pagigin nasa oras, sinisierto nia kita na mahiro sia sa saiyang itinalaan na panahon asin paagi, asin paagi ini kan saiyang Kahadean. Sa aktuwal, an Kahadean na iyan bakong bagay na bakong sierto asin bakong malinaw kundi sarong langitnon na gobyerno, na makakatao nin pangangataman asin progresibong instruksion tanganing trataron an tunay na mga pangangaipo nin tawo.—Isaias 48:17, 18.
Puwedeng isapuso nin aking daing istaran an mga tataramon ni David sa Salmo 27:10: “Kun bayaan ako kan sakong ama asin kan sakong ina, si Jehova mismo an maampon sa sako.” Nakakapakosog man na maaraman na an hababang kamugtakan sa kinaban dai nagdidiskuwalipikar sa saro na makanood dapit sa kabotan nin Dios. An Talinhaga 22:2 nagsasabi: “An mayaman asin an dukha nagsabatan. An Kaggibo sainda gabos iyo si Jehova.” Iyo, an mga dukha, kun sinsero, makasisierto na si Jehova Dios andam an boot na tabangan sinda.—Salmo 10:14, 17.
Si Jehova interesado sa satong karahayan asin nakaaaram kun paano paninigoan an satong makatanosan na mga pagmawot. Sarong beses hinapot nia an mga Israelitas paagi ki propeta Isaias: “Bako daw ini an pag-ayuno na pinili ko? . . . Bako daw iyan an paghiras kan saimong tinapay sa nagugutom, asin palaogon mo sa saimong harong an mga tawong dukha, daing harong? Na, kun makaheling ka nin huba, tahoban mo sia?” (Isaias 58:6, 7) Ini an pagkapantay asin hustisya na pangyayarihon nin Dios paagi kan saiyang gobyerno sa Kahadean. Mayo ni sarong dai iintindihon o tatrataron na garo dai sia nag-eeksister. Kaya, ipinaaaram sato kan Salmo 145:19: “Ootobon nia an mawot kan mga natatakot sa saiya, asin dadangogon nia an agrangay ninda na tabangan, asin sinda saiyang ililigtas.” An pagkamoot sa Dios asin sa kapwa an magigin pangenot na puwersa tanganing pagsararoon an pamilya nin tawo. Bilang resulta, an problema kan mga aking daing istaran mareresolberan. Mayo ni saro an pababayaan!
An Pagkabakong Sangkap nin Tawo Makaoolang daw sa Katuyohan nin Dios?
Dai, an maraot na tendensia nin tawo dai totogotan na olangon an katuyohan nin Dios na bagohon an daga na magin paraiso nin kagayagayahan. An mga nagkapribilehiyong mabuhay sa bagong kinaban nin Dios, magsalang huli ta nakaligtas sinda sa ralaban nin Armagedon, siring sa ilinadawan sa Biblia, o huli ta sinda binuhay liwat hale sa mga gadan tanganing mabuhay liwat sa daga, mapakokosog na gibohon an saindang pinakamarahay nanggad.—Juan 5:28, 29; Kapahayagan 16:14, 16.
Mayong siisay man na naghihimate an makanonompong na daing kamanungdanan an saiyang gibo. An saiyang gibo babalosan sono dian. Tabi mangnohon an panuga nin Dios: “Dai sinda magtotogdok asin iba an mag-oontok; dai sinda matanom asin iba an makakan. Huli ta magigin siring sa aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan, ni mangangaki man sinda para sa karibokan; huli ta sinda an mga aki na kompuwesto kan mga pinili ni Jehova, asin an saindang mga aki kaiba ninda.” (Isaias 65:22, 23) Habo daw nindo asin kan saindong pamilyang maheling an kaotoban kan mga tataramon na ini? Asin magayagaya nanggad na maaraman na sa panahon na idto dai kamo makanonompong saen man nin gutom, kadaihon, daing trabaho, o mga aking daing istaran!
Mayong duwa-duwa, idtong sa presente nagtitios nin kakulangan sa ikabubuhay, siring kan mga aking daing istaran, pahahalagahan nin lubos pa an mga bendisyon nin maogmang pamilya asin komportableng harong. Siring kan mababasa niato sa Isaias 65:17: “An dating mga bagay dai na magigirumdoman, ni masabong pa iyan sa puso.” An mga tawong magkakaigwa nin pribilehiyong mabuhay sa panahon na idto makanonompong na an maraot na mga kamugtakan napara na sagkod lamang asin an mga tawo sa gabos na nasyon, lenguahe, asin mga rasa iribang magtatrabaho sa mamomoton na pagkamagturugang. An mga pamilyang makaliligtas pasiring sa panahon na iyan mayong duwa-duwang padagos na magpapamuraway sa Dios. An Salmo 37:11 nagsasabi dapit sa daganon na Paraisong iyan: “An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.”
Paano Kamo Makapag-aandam kan Saindong Sadiri Para sa Ngapit?
Maski ngonyan, posibleng mag-ako nin nagtataong buhay na kaaraman asin kultibaron an marahay na mga kuwalidad, siring kan pagkamoot asin kabootan. Paano? Namomotan ni Jehova an pamilya nin tawo, asin paagi kan saiyang Aki, si Jesu-Cristo, Saiyang ‘dinadagka an mga tawo ki Cristo’ paagi kan Saiyang Tataramon asin Saiyang banwaan. (Juan 6:44) Igwa man sia nin organisasyon sa daga na may programa sa pagtotokdo na makatatabang saindong gibohon an kabotan nin Dios tanganing makalaom kamo sa maogma asin makahulogan na buhay sagkod lamang. Kaya, an maogmang bareta nin Kahadean ihinuhulit sa mga nangangaipo. (Mateo 24:14) Sinasabi kan Tataramon nin Dios: “An naoongis sa saiyang kapwa nagkakasala, tara an nagpapaheling nin marahay na boot sa mga dukha maogma.” (Talinhaga 14:21) Nakaoogma sa pusong maaraman na minsan an mga dukha puwedeng dumolok sa Dios kun tama an saindang motibo. Nagsurat an salmista: “Alagad ako nasasakitan asin nagkakaipo. O Dios, humiro ka tolos para sa sakuya. Ika an sakuyang tabang asin an Paratao nin dudulagan sa sakuya. O Jehova, dai ka mag-atraso.”—Salmo 70:5.
Iyo, an Tataramon nin Dios makakatao saindo nin tunay na paglaom para sa ngapit. Alagad, an ordinaryong paggamit kan tataramon na “paglaom” dai permi nangangahulogan nin kasiertohan. Sa Brazil parateng madadangog nin saro an ekspresyon na: “A esperança é a última que morre” (na kaagid sa Ingles kan “Hope springs eternal”). An ideya iyo an pagdanay na naglalaom maski pa kun garo mayong basehan para digdi. Sa kabaliktaran, an Kasuratan nagtatao nin solidong mga rason sa pagpapadanay nin marigon na pagtubod sa Dios asin paglaom sa saiyang mga panuga. Mababasa niato sa Roma 10:11: “Mayo nin nagtutubod sa saiya na mapapasopog.” An siring na basado sa Bibliang paglaom dai masagkod sa pagkasudya. Kun paanong tunay an mga ngangalasan sa satong daga, na nagpapatotoo kan kadonongan asin pagkamoot ni Jehova, siring man an kaotoban kan mga hula sa Biblia nagpapangyari saindong magkaigwa nin positibong paglaom, sarong tunay na paglaom sa ngapit.—Roma 15:13.
An Kahadean nin Dios an tunay na solusyon para sa mga aking daing istaran, iyo, para sa gabos na namomoot sa karahayan. An pagkua nin tamang kaaraman sa Biblia ngonyan magpapagin posible saindo tanganing magkaigwa nin kaogmahan asin daing katapusan na buhay sa bagong kinaban nin Dios. An paglaom sa mga panugang ini bakong bunga nin imahinasyon. Siring kan ipinahayag kan Talinhaga 11:19: “An sarong marigon na naninindogan para sa katanosan nakalinya para sa buhay.”
[Ritrato sa pahina 9]
“Dai sinda matanom asin iba an makakan.”—Isaias 65:22
[Credit Line]
Retrato kan FAO
[Ritrato sa pahina 10]
“Huli ta magigin siring sa mga aldaw nin kahoy an mga aldaw kan sakuyang banwaan.”—Isaias 65:22