Mga Saksi ni Jehova sa Bilog na Kinaban—India
INDIA! An mahiwas na subkontinenteng ini istaran nin 1 sa kada 6 na tawo sa planetang ini. Gabos-gabos, labing 1,000 lenguahe asin dialekto an ginagamit sa pano nin pagkalaenlaen na dagang ini. An kadaklan na tawo Hindu, 83 porsiento sinda, mantang an 11 porsiento Muslim, na an natatada pa mga Sikh, Budista, Jainista, asin Kristiano sa ngaran.
Pambihira an kapangganahan kan Mga Saksi ni Jehova sa India kan nakaagi pa sanang mga taon. Nakanompong sinda nin arog-karnerong mga tawo na andam na manindogan nin marigon sa kampi kan Kahadean ni Jehova, sa ibong kan gabos na klase nin pangigipit asin pagtumang.
Halimbawa, an sarong aking babae sa sarong tradisyonal na pamilyang Hindu napilay huli sa polyo poon sa pagkaaki. An pagsakit na inagihan nia nagpangyari sa saiya na mag-isip manongod sa Dios asin sa katuyohan nin buhay. Nagsiyasat sia sa dakol na relihion para sa simbag alagad dai nakanompong nin karangahan. Bilang resulta, nawaran sia nin pagtubod sa relihion, minsan ngani sa Dios dai.
Kan panahon na ini duwang Saksi an nakanompong sa aking babaeng ini sa saindang ministeryo sa harong-harong. “Napaluha ako kan madangog kong binabasa ninda an Kapahayagan 21:4,” an paggirumdom nia. Nag-ako sia nin dakol na publikasyon kan Watch Tower Society asin nag-oyon sa sarong pag-adal sa Biblia sa harong sa ibong kan pagtumang kan saiyang ina. An aking babae naggibo nin dakol na pagbabago sa saiyang buhay, mapusong inatubang an pagtumang nin paryentes, asin nagin bautisadong Saksi. An sabi nia: “Harayo na an naabot ko, asin nagin masakiton an dalan. Alagad si Jehova Dios perming nasa kaibahan ko asin tinawan ako nin dakulang katoninongan asin kagayagayahan.”
Marigon Para sa Dalisay na Pagsamba sa Eskuelahan
An sarong tugang na daragita pinaduman kan saiyang maestra sa sarong simbahan na Katoliko kaiba kan iba pang mga kaklase. An tugang na babae magalang na nagsayuma, na sinasabi na sia saro sa Mga Saksi ni Jehova asin dai masamba sa siisay man o sa ano man apuera ki Jehova. Sinabi kan maestra na pagduman kan gabos na iba pa sa simbahan, maninigo man siang umiba. Alagad an tugang na babae marigon na nanindogan asin nagsabi na mantang an mga maduman sa simbahan dai mamimibi ki Jehova, aram nia na dai sia puedeng umatender duman.
Huli sa karigonan kan aking babae, boot kan saiyang maestra na makaaram pa nin orog. Kaya kan sunod na aldaw tinawan sia kan tugang na babae nin sarong artikulo sa An Torrengbantayan dapit sa pagsamba ki Jehova. Naghanga sa saiyang nabasa, pinalibre sia kan maestra sa gabos na relihiosong aktibidad sa eskuelahan. An tugang na babae nakapasakamot nin sampulong magasin sa saiya asin sa iba pang maestra.
Binalosan an Pagkuyog sa Pagboot nin Dios Dapit sa Dugo
Dai pa sana nahahaloy naglakop an epidemya nin kalintura gikan sa virus sa nagkapirang parte kan estado nin Kerala. An helang na ini nakadadanyar na marhay sa mga bato asin nagreresulta sa pangangaipo nin dialysis. Usong ginigibo an mga pag-ineksion nin dugo. Sa sarong siudad 14 katawo an ilinaog sa ospital na igwa kan helang na ini. An saro sa mga pasyenteng ini Saksi, sarong magurang sa lokal na kongregasyon. Sinabihan sia na pag-ineksion nin dugo an solamenteng ikabobolong. Ipinaliwanag kan magurang an saiyang Makakasuratan na mga paniniwala asin marigon na sinayumahan an dugo. (Gibo 15:28, 29) Pakatapos nin dakol na pakiargumento an mga doktor nagsabi na sia magagadan huli sa pagsayuma niang ineksionan nin dugo.
An 13 pang pasyente nag-ako nin dugo. Makamomondo, sinda gabos nagadan sa laog nin nagkapirang aldaw. An tugang an solamenteng nakaligtas! Nabiglang marhay an mga autoridad sa ospital. An medikal na mga tawohan naghangang marhay sa regular na pagsongko kan mga miembro kan kongregasyon. Pakapaluwasa sa saiya sa ospital, pinasalamatan kan tugang an mga doktor, alagad sinda nagsabi: “Taano ta pinasasalamatan mo kami? Pasalamatan mo an saimong Dios, si Jehova. Sia an nagligtas saimo. Ipamibi mo man kami sa saimong Dios, si Jehova.”
[Kahon sa pahina 24]
SUMARYO KAN NASYON
1994 Taon nin Paglilingkod
PINAKAHALANGKAW NA BILANG NIN NAGPAPATOTOO: 14,271
KATIMBANG: 1 Saksi sa 65,266
NAG-ATENDER SA MEMORIAL: 38,192
PROMEDYONG MGA PARAHAYAG NA PAYUNIR: 1,780
PROMEDYONG MGA PAG-ADAL SA BIBLIA: 12,453
BILANG NIN NABAUTISMOHAN: 1,312
BILANG NIN MGA KONGREGASYON: 410
SANGANG OPISINA: LONAVLA
[Retrato sa pahina 25]
Sangang opisina, Lonavla
[Retrato sa pahina 25]
Pagpapatotoo may koneksion sa kombension na “Daing Katapusan na Maogmang Bareta” kan 1963
[Retrato sa pahina 25]
Paghuhulit sa sarong tindero sa luwas kan Red Fort sa Delhi