Pagpaogma sa Saindong Buhay Pampamilya
Kasumpay kan Kapitulo 5: An Agom na Babae na Namomotan na Gayo
“Madara Minsan Daing Tataramon”
36-38. Ano an pirang paagi na maabot an puso nin agom na bakong kapagtubod?
36 Kun beses, mas mapuersa an mga aksion kisa sa mga tataramon, asin nangorogna sa mga agom na lalaki na bakong kapagtubod sa Tataramon nin Dios. Dapit sa sainda si apostol Pedro nagsabi: “Sinda [puedeng] madara minsan daing tataramon paagi sa gawe kan saindang agom na babae, huli sa pakaheling sa saindong malinig na gawe na may hararom na paggalang.” (1 Pedro 3:1, 2) Dakol na lalaking daing pagtubod an nagrereklamo na an saiyang agom perming “naghuhulit” sa saiya, asin iyan ikinaaanggot nia. Kabaliktaran kaiyan, an iba nagturubod huli sa pakaheling sa pagkaliwat na nagibo kan katotoohan kan Tataramon nin Dios sa saindang agom. Parate na an mga tawo orog na napahihiro kan pakaheling sa sarong sermon kisa sa pakadangog dian.
37 Kun kamo nakikipag-olay sa saindong agom na daing pagtubod, “an saindo logod na pagtaram danay na igwa nin kabootan,” mataktika, o “tinimplahan nin asin,” arog kan sabi kan teksto. Igwa nin panahon na magtaram. “Siring sa mga mansanas na bulawan sa mga inukit na pirak an tataramon na itinaram sa tamang kapanahonan kaiyan,” sabi kan Biblia. Nanluluya daw an boot kan lalaki? Tibaad may maraot na nangyari sa saiyang trabaho. Tibaad pahalagahan nia sa mismong oras na ini an pirang tataramon na may pagsabot. “An managom na mga tataramon . . . mahamis sa kalag asin bolong sa mga tolang.” (Colosas 4:6; Talinhaga 25:11; 16:24) O, depende sa kamugtakan, tibaad ikapahayag na an gabos kan pagkapot nindo sa saiyang kamot: Nasasabotan ko iyan, nasa kampi mo ako, tatabangan taka kun kaya ko.
38 Minsan pa kun sia dai nindo kasaro sa pagtubod, ipinaheheling kan Tataramon nin Dios na kamo maninigo pa man giraray na magpasakop sa saiya. Tibaad pag-abot nin panahon an marahay nindong gawe makadara sa saiya, tanganing sia umiba na sa saindong pagtubod. Iyan magigin maogmahon na aldaw nanggad! Asin kun umabot an panahon na iyan, maaaraman nia na mas dakol an dahelan na kamo kamotan nia kisa sa dati niang aram. Huli ta an saindong kaimbodan, kaiba nin pagigin marigon para sa aram nindong tama, nakatabang sa saiya na makapangapot sa “tunay na buhay.”—1 Corinto 7:13-16; 1 Timoteo 6:19.
39, 40. Anong mga kualidad, na nalilista sa Tito 2:4, 5, an minagibo sa babae na magin mahalaga, bako sanang sa saiyang agom, kundi pati ki Jehova?
39 Sinasadol kan Kasuratan an Kristianang mga agom, baga man an saindang agom nagtutubod o daing pagtubod, “na mamoot sa saindang agom na lalaki, mamoot sa saindang mga aki, magin marahay an kaisipan, mabini, mga paratrabaho sa harong, marahay, nagpapasakop sa agom nindang lalaki, tanganing an tataramon nin Dios dai mapaglanghadan.”—Tito 2:4, 5.
40 Kun ini gibohon nindo, agom na babae, sa bilog nindong makakaya, kamo mamomotan na gayo, bako sanang kan saindong agom, kundi pati ni Jehova Dios.