Noarin Matatapos an Takot?

MABIBIGLA daw kamong maaraman na an tunay na seguridad konektado sa sarong tawo na nabuhay kaidtong 2,000 na taon na an nakaagi? Ipinaheheling an pangangaipo para sa pagkamoot, isinabi ni Jesu-Cristo an sarong pambihirang parabola: “May sarong tawo na naglulugsot hale sa Jerusalem pasiring sa Jerico asin naholog sa mga parahabon, na sia kapwa hinubaan asin pinaghampak, asin nagharale, na binayaan siang haros gadan na.” Minsan ngani an biktima dai inintindi nin duwang nag-agi, sarong maboot na Samaritano an nagpaheling nin pagkaherak. Minsan siring, siisay an may pagmakolog sa mga biktima nin krimen ngonyan? Anong pagkahale nin takot an satong malalaoman?​—Lucas 10:​30-37.

Minsan ngani naghihingakong nagtutubod sa Dios, dakol an naghohona na tawo an dapat na magpaotob nin ley asin areglo. Alagad matatapos daw nin mas magabat na mga padusa sa bilanggoan o nin mas dakol asin mas halangkaw an sueldong mga pulis an madahas na krimen? Talaga daw na naniniwala kamo na an mga ahensiang nagpapaotob nin ley, apisar kan sinserong mga paghihingoa na makatao nin seguridad, makahahale sa mga bagay na arog nin pag-abuso sa droga, organisadong krimen, asin kadukhaan? Pero, an satong pagkagutom asin pagkapaha sa katanosan dai kaipuhan na masayang.​—Mateo 5:6.

An Salmo 46:1 nagsasabi: “An Dios pailihan asin kakosogan para sa sato, sarong tabang na danay na makukua sa panahon nin mga kasakitan.” Maheheling niato na an mga tataramon na ini bako sanang magayon na berso.

Arog kan aram nindo, an mga bareta sa media aroaldaw na nagbabareta nin daing pakundangan na paggadan sa mga guerra sibil asin pagsalakay nin mga terorista. Sa ibang parte kan kinaban, nauuso an paggadan sa hinaboan na mga aki o sa mga nakaheling sa krimen. Taano an buhay ta nagin kadikiton na sana an halaga? Minsan ngani tibaad laen-laen an dahelan nin siring na kadahasan, igwa nin sarong dahelan na dai niato maninigong lingawan.

Oyon sa Tataramon nin Dios, an Biblia, “an bilog na kinaban namumugtak sa kapangyarihan kan maraot.” (1 Juan 5:19) Sa katunayan, ipinamidbid ni Jesu-Cristo si Satanas na Diablo bako sanang bilang putikon kundi bilang “paragadan.” (Juan 8:44) Sa pag-impluwensia sa katawohan sa laen-laen na paagi, pinalalakop kan makapangyarihan na espiritung linalang na ini an pag-orog nin kadahasan ngonyan. “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon,” an sabi kan Kapahayagan 12:12. Minsan siring, nakaoogma na an maraot na palakaw na ini sasalidahan nin “bagong kalangitan asin sarong bagong daga . . . , asin dian an katanosan an magdadanay.”​—2 Pedro 3:13.

Apuera kan makangangalas na paglaom na ini na sarong bagong kinaban, anong tabang an yaon sa sato ngonyan mismo?

Bago helingon an positibong simbag dian, marahay na girumdomon na minsan an tunay na mga Kristiano mayo nin garantiya na sinda magigin protektado sa krimen. Ilinadawan ni apostol Pablo an nagkapirang peligro na personal na inatubang nia. Sia namugtak “sa mga pag-alaman sa mga salog, sa mga pag-alaman sa mga tulisan, sa mga pag-alaman sa sadiri [niang] rasa, sa mga pag-alaman sa mga nasyon, sa mga pag-alaman sa siudad, sa mga pag-alaman sa kaawagan, sa mga pag-alaman sa dagat.” (2 Corinto 11:26) Pero natagalan ni Pablo an mga peligrong ini. Iyo man ngonyan; paagi sa pagmamaan, makapagpapadagos kita sa paggibo kan satong mga trabaho sa pinakanormal na paaging mahihimo. Pag-olayan niato an nagkapirang bagay na makatatabang.

Kun an saro nag-iistar sa sarong peligrosong komunidad, an marahay na paggawe puedeng magin proteksion, huling an mga tawo nagmamasid na marhay sa iba. Minsan ngani an mga parahabon nagpaplano asin naggigibo nin mga krimen, an dakol ibinibilang an saindang sadiri na normal na mga tawo. Likayan an pagtatsar sa saindang ginigibo, asin dai nindo paghingoahon na aramon kun sa ano sinda kalabot. Sa siring, maiinaan nindo an posibilidad na kamo baloson ninda. Girumdomon na hinihingoa kan mga parahabon na aramon kun siisay an may bagong bakalon o mabakasyon asin kun siring mahale sa saindang harong, kaya mag-ingat sa kun ano an saindong ihinahayag sa iba.

Nanompongan kan dakol sa Mga Saksi ni Jehova na an saindang reputasyon bilang mga ministro nagtao sa sainda nin risang proteksion. Parateng ipinaheheling nin mga kriminal na iginagalang ninda an mga Kristianong iyan, na daing pagpapalaen na nagboboluntaryo sa pagtabang sa mga tawo sa komunidad. An mga Saksi bakong paragadan o parahabon, ni sinda “parapakilabot sa mga bagay nin iba,” na huli kaini bako sindang peligro.​—1 Pedro 4:15.

Seguridad sa Bagong Kinaban nin Dios

Ikinamomondo niato an “pag-orog nin katampalasanan” na ihinula ni Jesu-Cristo, alagad imbes na maghadit nin labi-labi, makasasarig kita na madali nang paraon nin Dios an maraot na palakaw na ini. Apuera sa paghula nin pambilog na kinaban na paghuhulit kan “maogmang baretang ini kan kahadean,” pinagirumdom ni Jesus an saiyang mga parasunod: “An makatagal sagkod sa katapusan iyo an maliligtas.”​—Mateo 24:​12-14.

Makasisierto kita na an mga nambibiktima sa iba, na kun beses may labi-labing karingisan, paparaon. An Talinhaga 22:​22, 23 nagsasabi: “Dai mo paghabonan an dukha huli ta sia dukha, asin dai mo pagronoton sa tata an nasasakitan. Huli ta si Jehova mismo ipakikipaglaban sinda, asin hahalean nanggad nia nin kalag an mga naghahabon sa sainda.” Paparaon ni Jehova an mga paragibo nin maraot, arog baga kan mga parahabon, paragadan, asin naggagamit kan sekso sa salang paagi. Dugang pa, dai nia iignorohon an mga biktima nin siring na mga krimen. Panggaganahan nia an saindang kawaran asin biyong paoomayan an saindang salud.

Iyo nanggad, an mga ‘minarayo sa maraot asin naggigibo nin marahay’ magkakamit nin buhay na daing katapusan magsalang paagi sa pakaligtas sa maabot na dakulang kahorasaan o paagi sa pagkabuhay liwat hale sa mga gadan. “An mga matanos mismo magmamana kan daga, asin sinda mag-eerok dian sagkod lamang.” (Salmo 37:​27-29) Makukua an siring na mga pakinabang huli sa pantubos na atang ni Jesus. (Juan 3:16) Alagad paano an magigin buhay sa ibabalik na Paraiso?

An buhay sa irarom kan Kahadean nin Dios magigin tunay na maogma. Ihinuhula ni Jehova: “An sakuyang banwaan kaipuhan na mag-erok sa matoninong na mga erokan asin sa mga harong na may lubos na kompiansa patin sa trangkilong mga pahingaloan.” (Isaias 32:18) An gabos na magkakamit nin buhay na daing katapusan naliwat na an saindang personalidad. Mayo nang biko o maraot, ni magigin biktima nin siring na tawo an siisay man. Si propeta Miqueas nagsasabi: “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.” (Miqueas 4:4; Ezequiel 34:28) Kabaliktaran nanggad kan peligrosong mga komunidad ngonyan!

[Kahon sa pahina 6]

MAGMAAN

An dakol na kriminal nagtatrabaho sa bilog na panahon, na ginigibong propesyon an krimen. Tibaad sinda nagtatrabaho nin grupo-grupo na manduwaduwa o tolo-tolo, maski ngani saro sana an may badil na nakapunta sa saindo. Orog na naririsa na mientras na mas hoben an kriminal, mas peligroso sia. Ano an magigibo nindo kun kamo an mabiktima?

Magdanay na kalmado tanganing dai nerbioson an parahabon​—an kakulangan nia nin eksperyensia puedeng makagadan. Kun kamo saro sa Mga Saksi ni Jehova, magpamidbid kamo. Pero, magin andam na itao an hinahagad kan parahabon. Kun mag-aatraso kamo, maorog an peligro. Sa huri, tibaad mamatean nindong puede nang hagadon na ibalik sa saindo an mga papeles na nagpapamidbid sa saindo o na tawan kamo nin pamplete.

Parate na dai nindo masasabi kun siisay an kriminal. An ibang parahabon mga adikto sa droga o propesyonal na kriminal, an iba gusto sanang makakua nin kuartang pankakan. Sa arin man na pangyayari, dai kamo magdara nin dakulang kantidad nin kuarta. Likayan an pagpaheling nin alahas, bulawan na singsing, o mamahalon na relo. Maglakaw asin magbiahe sa normal na paagi, na dai nagpapaheling nin takot. Dai kamo magturohok sa mga indibiduwal na garo baga gusto nindo siang mamidbid. Sa kaso nin mga baradilan sa tinampo, dumapla kamo; an bado puedeng labahan pakatapos kaiyan.​—Sarong dating pulis sa Rio de Janeiro.

[Retrato sa pahina 5]

Magdanay na kalmado asin itao an hinahagad kan parahabon. Kun mag-aatraso kamo, maorog an peligro