Ulelaalikwa kwi Bungano lya Citungu Ilya “Bakatemwa ba Buntungwa”

UKUTULA mu November 1989, ilyashi lya buntungwa lyalipangwa ilyalumbuka ukucila kale lyonse. Abantu ba mu fyalo fya ku Eastern Europe ukucilisha baleipakisha ubuntungwa bwa bupolitiki ubwakulilako ukucila fintu bakwete pa myaka 40 no kucilapo.

Lelo kuliko ubuntungwa bwacindamisha ukucilapo pa buntungwa ubuli bonse ubwa bupolitiki. Kuti twabelenga pa lwa bwene mu Cebo ca kwa Lesa, Baibolo. Yesu Kristu inshita imo atile: “Mukeshibe cine, ne cine cikamulenga abantungwa.” (Yohane 8:32) Ee, Abena Kristu baipeela balilubulwa ukufuma ku kutiina umuntu kabili ukufuma ku busha bwa lubembu ne mfwa, nga fintu tubelenga pa Abena Roma 6:18, 22. Tubelenga na kabili ukuti “ukuli umupashi wa kwa Yehova, e kuli ubuntungwa.” (2 Abena Korinti 3:17, NW) Na kuba, Icebo ca kwa Lesa citambika icilolelo cabembela ukuti “ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.”—Abena Roma 8:21.

Nga ca kuti uuli onse alefwaya ukunonka ubuntungwa bwa Bwina Kristu pa nshita ino, afwile ukubikako kubombesha kwa cine cine. Tacili mu kwanguka ukuba fye umulandu wa kukonkelela inshila ya kukaanya kwacepako. Kabili ku kutwalilila ukuipakisha ubu buntungwa cisendako ukubombesha kwalundwapo, mu cilolwa ca maka ayo yakongamina ku kutupusula buntungwa: Satana Ciwa, icalo cakwe icibifi, no kukongamina kwesu ukwapyanwa ukwa lubembu. Yehova Lesa alipayanya ukwaafwa ukupitila mu Cebo cakwe icaputwamo, ukupitila mu mupashi wakwe uwa mushilo, kabili ukupitila mu kuteyanya kwakwe ukumoneka.—Luka 11:13.

Ku kwaafwa bonse abatemwa ubuntungwa ukukosha ukwikatisha kwabo pa buntungwa, amabungano ya uno mwaka aya citungu aya Nte sha kwa Yehova yacita ubulungi ku kupeelo mutwe “Bakatemwa ba Buntungwa.” Aya mabungano yakabako inshiku shitatu mu butali, ukutendeka pali Cisano ulucelo pa 9:20 no kutwalilila ukufika 4:00 p.m. pa Mulungu. Bonse abakesa bakapembesulwa lwa ku mupashi no kukulililwa ku malyashi ya kukumbamo, ukulanshanya kwa kusekesha, ifilangililo fyakufumamo cimo, ne cilangililo ca kubimbula ica muno nshiku; nelyo tatufwile ukusuulako insansa sha kubishanya kwa kukafyo umutima ne fibusa fya kale ne fipya, ubuseko bwa kuilunda ku makana ya bambi ukwimba inyimbo shesu isha Bufumu, no kwakana mu mapepo ya cintubwingi aya kuyumfwa kwa ku mutima.

Shi bonse ababomfi baipeela aba kwa Yehova beleka icili conse ukupumfyanya ukubapo kwabo pali Cisano ulucelo lintu aya mabungano yakatendeka. Kabili shininkisheni ukwisa te mu kuba fye na Baibolo yeka ne citabo ca nyimbo lelo na kabili na pensulo na notibuku ku kulemba ifyebo. Iseni, na kabili, no kwibukila kwa cine cine ukwa kukabila kwenu ukwa ku mupashi ngo lubali lwa bantu abantungwa.—Mateo 5:3.