Kalata Ukufuma ku Australia

“Nalabelengamo Icungulo pa Konta Umulilo”

NGA mwatontonkanya pa fyo imishi ya mu Australia yatalukana, kuti mwamona kwati ciswebebe ceka ceka umwakaba see umushaba na bantu. Lelo muli iyi ncende mulekala abantu 180,000. Abantu bonse abekala mu Australia baba 18,000,000.

Abafyashi bandi, Inte sha kwa Yehova, balinsendelepo mu kushimikila muli iyi ncende, kale ilyo nali umwaice. Nalipapile ifyo iyi ncende yakula e lyo ne fyo imoneka bwino. E lyo cimbi ico natemenwe, bantu bekala kulya. Balikosa sana kabili tabayafya. Nomba apo na ine nalikwata umukashi na bana babili, abali ne myaka 10 na 12, nalefwaya na bo bayaimwena ifyo kwawama.

Ifyo Twapekenye Ulwendo

Intanshi twalikele pa nshi no kumona ifyalefwaikwa. Bushe ni kwi twingakwanisha ukufika? Ni nshiku shinga tukayaikalako? Munyinefwe umo no mukashi wakwe, na bapainiya ba nshita yonse babili aba mu cilonganino cesu balikonkele. Twasuminishenye ukuti tukaya pa kati ka mwaka, amasukulu nga yalala. Lyene twalembele kalata ku maofeshi ya Nte sha kwa Yehova aya muno calo cesu ica Australia ayabela mu musumba wa Sydney no kulomba ukuti batupeele icifulo ca kuyabombelako. Batwebele ukuyabombela mu mushi wali mupepi na kalitauni akanono ako beta ati, Goondiwindi akabela ku masamba ya musumba wa Brisbane umo twikala. Ukufuma mu Brisbane ukufika pali aka kalitauni paba amakilomita 400.

Balitwebele ukuti kwaliba icilonganino ca Nte sha kwa Yehova mu Goondiwindi. Ici caliweme sana. Twalishibe ukuti cimo icikawama sana pali ulu lwendo, kumonana na bena Kristu banensu. Twaebele aba mu cilonganino kulya ukuti tuli no kwisa. Balyankwile ne nsansa sana ica kuti twalimwene ukuti balefwaisha ukuti tukaye.

Ilyo tatulaima, twalikumene no kulanshanya ifya kushimikila abantu imbila nsuma iya Bufumu bwa kwa Lesa muli ilya mishi. Twalefwaya maka maka ukucindika intambi sha bekala mushi abo beta ati amaAborigine. Abantu ba mitundu imo baliikwatila ififulo fyabo abene. Kanshi ukuya fye mu cifulo bekala ukwabula ukuti bamusuminishe, musaalula.

Twafika mu Mishi

Awe ubushiku bwa kwima bwasukile bwafika. Twalongele ifyo twalekabila mu myotoka shibili no kutendeka ukuya. Mu nshila twalemona amabala ayo balima ne mpanga umwali ifyani e lyo ne fimuti. Apa ninshi na kasuba nakatula takuli na makumbi. Twalyendele amaawala ayengi twasuka twafika mu Goondiwindi. Twafikile pa cifulo apaba imiputule ya beni iya kusonkela apo bemika na makaravani ya kwikalamo.

Ubushiku bwakonkelepo, pa Mulungu, akasuba kalibalike kabili kwali na kamwela akasuma, kanshi yali ni nshita iisuma iya kushimikila. Mu lusuba, iyi ncende ilakaba sana ukufika na kuli 40°C! Ukufuma apa, twaendele amakilomita 30 ukufika pa mushi wa bantu abo beta ati amaAborigine. Pali uyu mushi e po twabaliile ukwiminina. Batwebele ukuyamona ba Jenny, ba mwine mushi abakalamba abakwata ne mfwi umutwe onse. Balikutike sana ilyo twalebelenga Amalembo kabili balitemenwe ilyo twabapeele icitabo citila, Sambilila Kuli Kasambilisha Mukalamba.a Lyene balitusuminishe ukwingila mu mushi no kushimikilako na bekala mushi bambi.

Abaice pali ulya mushi baletutangilila no kulabilisha ukuti natwisa. Bonse abo twalesanga pa mayanda, balekutika no kupoka ifitabo twalebapeela ifilanda pali Baibolo. Papitile fye akashita kanono, ne fitabo twakwete fyalipwile, apa ninshi ne nshita ya kubwelela ku tauni ku kulongana yalikumene. Ilyo tushilabwelelamo twalilaile ukuti tukabwela mu kumona abo tushalanshenye na bo.

Ilyo twali mu kulongana akasuba, mu Ng’anda ya Bufumu mwakabile na see ku congo ca bantu abalelanshanya ne nsansa no kubikana icibusa. Ba Nte 25 abekala kulya, baleshimikila sana ubukombe bwa Bufumu ku bantu 11,000 abekala muli ilya mishi yonse. Nte munensu umo atwebele ukuti: “Twatasha sana pa kwisatwafwa.” Pa numa ya kulya kulongana kwaweme nga nshi, twaile mu kulyako ifya kulya. Ilyo tushilalala, twaposeele utunama ifya kulya. Utu tunama tusangwa kulya, twaleshingauka karavani twaleikalamo.

“Pa Konta Umulilo Ubushiku”

Inshiku shibili ishakonkelepo, twaile mu fifulo fimo umwali amayanda ayengi pa ncende imo ifyabelele ku mupaka wa citungu ca Queensland na New South Wales. Muli iyi mishi mwaliba ifimuti e lyo kumbi kwaba fye impanga iyabatama umwaba umulemfwe uo ing’ombe ne mpaanga shiya mu kulya. Mu nshila twalemona tu kangaroo tuletensha amatwi ilyo twaumfwa ukuti tuleisa. Ifyuni ifikalamba ifyapala bamwakatala, fyaleenda busaka busaka akatalamukila mu mpanga.

Pali Cibili akasuba, twasangile ing’ombe ishingi shileenda mu musebo panono panono. Bakacema balapishanya imikuni ya ng’ombe muli incende, maka maka mu nshita ya lusuba. Tapakokwele twakumenye kacema nanina pali kabalwe. Nalimike motoka, nafuma no kumuposha. Ayaswike ati: “Endita mukwai.” Uyu shikulu-bantu uwali ne mbwa, aliminine twatendeka no kulanshanya.

Pa numa ya kulanshanya pa kashita akanono, natendeke ukumweba ubukombe bwa mu Baibolo. Balipapa abati: “Nshatala-umfwapo ubukombe ubuli bonse ubwa mu Baibolo ukutula ku bwaice bwandi!” Atile bashimapepo bene e balenga abantu mu calo ukuba ne mibele yabipa. Na lyo line alicindike sana Baibolo. Pa numa ya kulanshanya nankwe ifyaba mu Malembo, namulangile icitabo citila, Cinshi Baibolo Isambilisha?b Apokele ici citabo no kucibika mu tumba anjeba no kuti, “Nga cilanda pa fyo Baibolo isambilisha, nalacibelenga icungulo pa konta umulilo.”

Twabwelele ku Ng’anda

Ubushiku, ilyo twali ku Ng’anda ya Bufumu, twashimikile aba bwananyina ifyo twabombele. Balilaile ukuti bakabwelelako ku bo twashimikile. Ilyo ukulongana kwapwile, calikosele ukubashalikapo. Twalitemwanene nga nshi kabili twalikoseleshanya sana.—Abena Roma 1:12.

Ubushiku bwakonkelepo twalibwelelemo ku mwesu. Ilyo twatontonkenye pa fyo twabombele, bonse twalisumine ukuti Yehova alipaalile umulimo wesu icine cine. Twalimwene ukuti Yehova ali na ifwe. Ilyo twafikile ku ng’anda, naipwishe abana ukuti: “Ni kwi mwingatemwa ukuyatandala umuku ukakonkapo nga kwaba cuti? Bushe kuti mwatemwa twaya ku mpili?” Baaswike ati, “Awe tata, tukaye na kabili kulya kwine ku mishi mu kushimikila.” Umukashi wandi na o atile, “Mwalanda bwino mwe bana. Kulya kuntu kwaliweme sana!”

[Amafutunoti]