Ilyashi Lya Bakabilisha Ba Bufumu

Ukufwaya Abayana mu Ncende Shabela Ukutali Isha Australia

INCENDE shimo ishabela mu citungu cikalamba icaba mu kati ka calo ca Australia takwatala akuya Inte sha kwa Yehova pa myaka 12. E ico Inte sha kwa Yehova aba ku Darwin, umusumba ukalamba uwabela ku Kapinda ka ku Kuso, bapekenye lulu wa nshiku 9 uwa kushimikila, ukufwaya abayana.—Mateo 10:11.

Ukupekanishisha lulu uyu kwatendeke ninshi kucili imyeshi 12 ku ntanshi, ukusanshako no kupanga bamapu aba ici citungu icakula ukucila bakilomita 800,000. Ici citungu cikalamba sana ica kuti icalo ca New Zealand kuti caingilamo imiku itatu. Pa kutwafwa ukwishiba ifyo ici citungu cakula, elenganyeni ukuti umusebo uwapaatuka mu musebo ukalamba uwalola pa ng’anda ukupita mwi farmu basungilamo ing’ombe walepa amakilomita 30! Na kabili ukufuma pe farmu limo ukuya pa libiye, pamo paba intamfu ukufika ku makilomita 300 nelyo ukucilapo.

BaNte ukufika kuli 145 e baipeele ukubombako uyu mulimo. Bamo bafumine ukutali sana ku Tasmania. Bamo babomfeshe imyotoka yakwatisha sana amaka umo basendeele ifya kubomfya ilyo bali kulya, ifyela fya kulungishisha bamotoka e lyo na mafuta. Bambi na bo basendeele ifipe fyabo mu fya kukulikila kuli bamotoka. Kabili, amabasi yabili ayasenda abantu 22 e yo baashime no kulipila indalama pa kuti yasende abashakwete imyotoka yalinga ukubomfya kuli ilya ncende. Bamunyina na bankashi abaninine amabasi bashimikile sana sana ku bantu abaleikala mu matauni ayanono ayo basalile ukuyashimikilako.

Ilyo bashilatendeka ulwendo, bamunyina balipekenye amalyashi ne filangililo fya kubomfya ifya kubafwa ukushimikila imbila nsuma muli ici cifulo caibela. Ku ca kumwenako, pa kushimikila bwino bwino mu cifulo umwikala abantu abetwa ba Aborijini, umo afwile ukukonka imikalile imo imo no kwishiba intambi sha aba bantu. Balandile na pa fya kupoosa amano ku filengwa na Lesa, ne fya kwafwilishako ukucingilila inama sha mu mpanga.

Bakasabankanya abengi balikwete ifya kukumanya ifingi ifyaibela. Ku ca kumwenako, ku cifulo cimo ukwikala ba Aborijini, bamunyinefwe bapekenye ukulanda ilyashi lya Baibolo ilya ku cintubwingi. Mwine mushi umwanakashi e waile mu kwishibisha abantu. Pa numa, ifitabo 5 no tutabo 41 fyalipeelwe ku bantu abasangilwe kuli uku kulongana. Ku cifulo na cimbi, bashimikile ku mwina Aborijini. Uyu muntu alikwete Baibolo ya King James Version, lelo yali iya kale kabili iyalepauka. Ilyo bamwipwishe nga alishibe ishina lya kwa Lesa, alisumine kabili afumishe Ulupungu lwa kwa Kalinda ulwa kale mwi tumba lye jaketi lyakwe. Abelengele muli magazini, kabili ayambwile amashiwi ya pali Marko 12:30, ayatila: “Uletemwa Yehova Lesa obe no mutima obe onse.” Atile, “ala ili lembo nalilitemwa.” Pa numa ya kulanshanya ifya mu Baibolo pa nshita ntali, alisumine ukupoka Baibolo iipya ne mpapulo shimbi ishilanda pali Baibolo.

Mupepi na ku citungu ca Gulf of Carpentaria, mwine mushi uwakwete ifarmu ilikalamba sana ilya ng’ombe, alitemenwe ubukombe bwa Bufumu. Ilyo bamulangile ifitabo fya Icitabo Candi ca Malyashi ya mu Baibolo na Ukwishiba Uko Kutungulula ku Mweo wa Muyayaya,a aipwishe nga ca kuti kwaliba impapulo mu lulimi lwa ciKriol. Ici calibapapwishe, pantu nangu ca kuti abena Aborijini abengi balalanda iciKriol, banono abaishiba ukubelenga ulu lulimi. Kanshi ababomfi bonse fye 50 abalebomba pali lilye farmu bena balishibe ukubelenga ululimi lwa ciKriol. Mwine mushi alitemenwe sana ukupokako impapulo shilanda pali Baibolo mu lulimi lwa ciKriol, kabili apeele baNte inambala ya foni yakwe pa kuti balelanshanya nankwe.

Mu nshiku 9 isha kubombesha mu mulimo wa kushimikila, amaBaibolo 120, ifitabo 770, bamagazini 705 na mabroshuwa 1,965 fyalishalikwe. Kabinge, ifipempu fya kubwelelamo 720 fyalicitilwe, na masambililo ya Baibolo 215 yalitendekwe.

Cine cine, insala ya ku mupashi iya bantu abengi abayana abaikala muli ici citungu cikalamba icabela ukutali, yaliikushiwe mu kupelako.—Mateo 5:6.

[Futunoti]

[Mapu pe bula 30]

(Nga mulefwaya ukumona mapu, moneni muli magazini)

AUSTRALIA

KU KAPINDA KA KU KUSO

Darwin

Gulf of Carpentaria

Sydney

TASMANIA