Bushe Kuti Waingilishako Ilumbo Lyobe Kuli Yehova mu April?
1 Kemba wa malumbo Davidi akwete ukufwaisha kwa kufuma ku mutima ukwa kulumbanya Yehova mu kupokelelwa, na muli ifyo abilishe ukuti: “Ndetootesha kuli Yehova ku kanwa kandi, kabili mu kati ka bengi ndemutasha.” (Amalu. 109:30) April ni nshita yawamisha iya ‘kufushapo pa kumutasha’ pa kwingilishako ukwakanamo kwesu mu butumikishi bwa mwi bala. (Amalu. 71:14) Bushe ulepanga ukuba pa kati ka bengi abacite fyo pa kuilunda ku mitande ya bapainiya ba kwafwilisha?
2 Tantika Nomba: “Amapange ya wacincila yatwala ku kutuntumika,” e fyo twacinkulwako pa Amapinda 21:5. Ici cipinda iwe ukutwala umulandu kuli Yehova mwi pepo, ukumubika intanshi mu mapange yobe. (Amapi. 3:5, 6) Mu kukonkapo, ceeceeta ukutantika kobe ukwa ndakai ku kupima umo ukuteulula kwingacitwa ku kupoosa avareji wa maawala yabili cila kasuba mu butumikishi. “Ukulubule” nshita kobe ukufuma ku mibombele imbi kukusuminisha ukupeelesha inshita yafulilako ku mulimo wa kushimikila.—Efes. 5:16, NW.
3 Lanshanyeni no Kubombela Pamo: Umutumwa Paulo alandile ulwa bamo abaali “cisansamushi” kuli wene mu kupwishishisha ubutumikishi bwakwe. (Kol. 4:11) Lanshanya amapange yobe na bambi abalefwaya ukulembesha mu April. Ukutungilila kwabo no kwampana kuti fyaletako ubunonshi bwa ku mupashi kuli bonse babili. Kangalila wa mulimo kuti akwafwa nga ca kuti nukwata ifipusho pa lwa kutantika kwa mulimo nelyo icifulo ca kubombelamo.
4 Ukubombela pamo no kutungilila ukufuma mu kati ka lupwa kuti kwaafwa icilundwa cimo na cimo ukucita bupainiya. Utumilimo twa pa ŋanda kuti pambi twapeelwa kuli bambi pa kashita akepi. Ukutantika kwa kubomba iyi milimo kuti pambi nako kwakabila ukuteululwa. Ukukumana kwa lupwa ku kulanshanya uku kukabila kuti kwaba kwa kwaafwa mu kupwishishisha ubuyo bobe. Ukulanshanya kusuma no kubombela pamo e mfungulo ku kutunguluka.
5 Sungilila Imimwene Yashininkishiwa: Wisuswa ukufumyapo ukucitikako kwa kubomba bupainiya pa mulandu wa mibele yabipa. Abacaice mu masukulu, abalambuka, banamayanda abakwata abana, imitwe ya ndupwa ababomba inshita yonse, bonse bene baliba na maka ya kucita amalambo—kabili mu kuba ne nsansa—ku kubomba bupainiya mu April. Balasuminishanya na kemba wa malumbo ukuti “ku batambalala ulwa kutasha e luyene,” kabili tabalangulukapo ukubikako ukubombesha kwalundwako ukukabilwa ku kupoosa amaawala 60 mu butumikishi nge ca kulenga ukulufya. (Amalu. 33:1) Nga ca kuti tauli na maka ya kulembesha, mulandu nshi te kwakanina mu buseko pa kwingilishako imibombele yobe nga kasabankanya wa mu cilonganino?
6 Ku bengi, ukubomba bupainiya bwa kwafwilisha mu April kwaliba pa kutanukila ukuya ku mulimo wa bupainiya bwa nshita yonse. Pa kuba nabengilishako imibombele yabo, basangile ukuti ukutanuka ukuya ku mulimo wa bupainiya bwa nshita yonse kwashininkishe ukuba ukwayangukilako.
7 Ukulolesha pa kubwelela pa nshi twakwete mu mulimo wa magazini uyu mwaka wapwa, ukwabulo kutwishika umo na umo uwa ifwe naimika amabuyo ya kuwamyako. Ku kukwaafwa ukucite ci, Sosaite naitantika ubushiku bwa magazini ubwaibela nga nshi. Ubu bukaba Cibelushi ca kubalilapo mu April. Icipande ca kusambililamo ica bubili mu Ulupungu lwa kwa Kalinda ulwa January 1, 1994, nacikwata imitubululo iingi mu kuba ne cilolwa ca kucincimusha uyu mulimo. May 1994 na kabili ukaba mweshi waibela uwa kutambika bamagazini no kulembesha mwi bala no wa kukoselesha umulimo wa bupainiya bwa kwafwilisha. Nangu cibe fyo, bamagazini balingile ukupeelwa mu kupimpa umweshi uuli onse. Ukufika kuli ubu buyo, ifilonganino kuti pambi fyatantika inshiku sha lyonse isha magazini mu kuba ne cilolwa ca kukuulilila ukucincimuka. Shi lekeni tubombeshe na maka mu kwananya “ululimi lwine lwine” ukupitila muli bamagazini.—Sefa. 3:9.