Ukusakamana Ubumi—Ifyo Ubufumu bwa kwa Lesa Bukacita

“Nangu ca kuti pali ino nshita COVID-19 naicepako mwi sonde lyonse, tatulingile ukulamona kwati nacipwa ubu bulwele te kuti bulete amafya ku bumi bwa bantu mu calo conse.. . . Tulingile ukwishiba ukuti kukaba icikuko na cimbi ku ntanshi icapalako, kabili tufwile ukuipekanya.” E fyalandile ba—Dr. Tedros Adhanom Ghebreyesus, ba dairekita-general ba kabungwe ka World Health Organization, pa 22 May, 2023.

Abantu abengi balishala na mafya ayalekanalekana pa mulandu ne cikuko ca COVID-19. Bushe amabuteko no tubungwe utulolekesha pa bumi bwa bantu, bakaipekanya ku cikuko icikesa kabili pa nshita imo ine no kusakamana abantu ku malwele ayaliko pali ino nshita?

Baibo yalilanda pa buteko ubukalenga fwe bantu tukabe no bumi ubo tufwaya ukukwata. Itila “Lesa wa mu muulu akemya ubufumu” nelyo ubuteko. (Daniele 2:44) Ilyo ubu buteko bukalateeka, “takuli umwikashi uukatila: ‘Nindwala.’” (Esaya 33:24) Abantu bonse bakaba no bumi ubusuma kabili bakaba na maka nga yalya yene bakwete ilyo bali abalumendo nelyo abakashana—Yobo 33:25.