Mulandu Nshi Mubombela Lesa?
Imfumu iyaletiina Lesa yalepanda amano umwana wa iko umwaume ukuti: “Ishiba Lesa wa kwa wiso no kumubombela no mutima wa cishinka kabili no mweo wa kuitemenwa.” (1 Imilandu 28:9) Cine cine, Yehova afwaya ababomfi bakwe ukumubombela ne mitima ya kutasha.
FWE Nte sha kwa Yehova, tulasumina ukuti lintu batulondolwelele amalayo yaba muli Baibolo umuku wa kubalilapo, imitima yesu yaiswilemo fye ukutasha. Cila bushiku, twalesambililapo icintu icipya pa lwa mifwaile ya kwa Lesa. Ukufwaisha kwesu ukwa kubombela Yehova “no mutima wa cishinka kabili no mweo wa kuitemenwa” kwalekoselako lintu twasambilila ifyafulilako pa lwa wene.
Abengi abasanguke Nte sha kwa Yehova balatwalilila ukubombela Yehova no buseko ubwingi ubumi bwabo bonse. Nangu cibe fyo, Abena Kristu bamo balatendeka bwino, lelo mu kupita kwa nshita, balalaba imilandu iitulenga ukubombela Lesa. Bushe ico calicitika kuli imwe? Nga calicitika, mwifuupulwa. Ubuseko mwalufya kuti bwabukululwa. Mu nshila nshi?
Tontonkanyeni pa Mapuaalo Yenu
Ica kubalilapo, etetuleni pa mapaalo mupokelela cila bushiku ukufuma kuli Lesa. Tontonkanyeni pa fya bupe fisuma ifyafuma kuli Yehova pamo nga: ifintu ifyalekanalekana ifyo abumba, ifyo onse engabomfya te mulandu ne cifulo akwata mu bwikashi nelyo nga mupiina nelyo mukankaala, ifya kulya ne fya kunwa fintu atupayanishisha, ubumi buntu muipakisha, ukwishiba icine ca Baibolo, ne cacindamisha, ica bupe ca mwana wakwe. Imfwa yakwe yamwiswilile inshila ya kubombela Lesa na kampingu wasanguluka. (Yohane 3:16; Yakobo 1:17) Lintu mwaetetula sana pa busuma bwa kwa Lesa, e lintu mukalacililako ukumutasha. Lyene umutima wenu ukamulenga ukumubombela pa mulandu wa kutasha pali fyonse ifyo acita. Ukwabulo kutwishika mukatendeka ukumfwa nga fintu kemba wa malumbo aumfwile uwalembele ukuti “Mwe Yehova Lesa wandi, ifipesha amano ifyo mwacitile fingi, na matontonkanyo yenu ayalola kuli ifwe; takuli uwingapashaniwa kuli imwe! . . , fyalifula, te kuti fipendwe.”—Amalumbo 40:5.
Aya amashiwi yalembelwe na Davidi, umuntu uyo ubumi bwakwe bushali ubwabulamo amafya. Ilyo aali umulumendo, Davidi ali uwauluba pa nshita ntali pantu Imfumu ibifi Shauli na basole ba iko balefwaya ukumwipaya. (1 Samwele 23:7, 8, 19-23) Davidi na o alikwete ifyo anakilemo fintu aleshomboka na fyo. Alisumine ici mu Ilumbo 40 ukuti: “Ifibi fyanshinguluka fyasuka fyabulo kupendeka, amampuulu yandi yansanga, no kuleka mfilwe ukupunama; yaba ayengi ukucile nseke sha mushishi wa ku mutwe wandi.” (Amalumbo 40:12) Ca cine, Davidi alikwete amafya, lelo tayamwanshishe. Aletontonkanya pa nshila Yehova alemupaalilamo, te mulandu na mafya yakwe, kabili asangile ukuti ayo amapaalo yalicilile nga nshi pa mafya yakwe.
Lintu mwamona ukuti amafya yenu nelyo ukuimona uushafikapo fyacilamo, kuti caba bwino ukutontonkanya pa mapaalo yenu, nga fintu Davidi acitile. Ukwabulo kutwishika, ukutasha pa mapaalo ya musango yo e kwamulengele ukuipeela kuli Yehova, e co amatontonkanyo ya musango yo na kabili kuti yamwafwilisha ukubukulula ubuseko no kumwafwilisha ukubombela Lesa ukufuma ku mutima wa kutasha.
Ukulongana kwa pa Cilonganino Kuti Kwayafwa
Ukulunda pa kwetetula pa busuma bwa kwa Yehova, tulakabila ukubishanya na Bena Kristu banensu. Cilakoselesha ukukumana lyonse na baume, abanakashi, na bacaice abatemwa Lesa kabili abapampamina pa kumubombela. Ifya kumwenako fyabo kuti fyatulenga ukubombako no mweo onse mu mulimo wa kwa Yehova. Ukubapo kwesu pa Ng’anda ya Bufumu kuti kwabakoselesha na bena.
Ca cine, lintu twabwela ku ng’anda pa numa ya kubombesha ubo bushiku nelyo lintu twafuupulwa pa mulandu wa bwafya bumo nelyo ico twanakamo, te kuti canguke ukutontonkanya pa kusangwa ku kulongana pa Ng’anda ya Bufumu. Pa nshita ya musango yo, kuti nakalimo twakabila ukuisalapula, kwati nalimo ‘tuletutaula umubili wesu,’ pa kuti twingomfwila ifyo twaebwa pa lwa kulongana na Bena Kristu banensu.—1 Abena Korinti 9:26, 27; AbaHebere 10:23-25.
Bushe ica musango yo nga cacitika, kuti twasondolwela ukuti cine cine tatwatemwa Yehova? Iyo. Abena Kristu bakosoka aba pa kale abo ukutemwa kwabo ukwa kuli Lesa kwali ukushingatwishikwa balepilikita pa kuti bacite ukufwaya kwa kwa Lesa. (Luka 13:24) Umutumwa Paulo aali umo uwa abo Abena Kristu. Alondolwele apabuta ifyali mu mutima wakwe lintu atile: “Naishibo kuti muli ine, e kutila mu mubili wandi, tamwaikale cisuma; pantu ukufwayo kucite cisuma kwaba kuli ine, lelo ukucicita e ko nafilwa. Pantu icisuma ico mfwaya, nshicicita; lelo icibi ico nshifwaya, e co ncita.” (Abena Roma 7:18, 19) Kabili aebele Abena Korinti ukuti: “Pantu nga nabile mbila nsuma, te ca kutakishishapo kuli ine iyo; pantu umucikilisha walimfininina. . . . Pantu nga ncite ci ku kuitemenwa, ndi ne cilambu; lelo nga ncita ku kubulo kuitemenwa, mpeelwa fye umulimo.”—1 Abena Korinti 9:16, 17.
Ukupala fwe bengi, Paulo ali no kulemenena ku lubembu ulwalemucikila ukucita icalungama. Nangu cibe fyo, alelwisha uko kulemenena ku lubembu, kabili ilingi line, alecimfya. Kwena, Paulo tacitile ici na maka yakwe. Alembele ukuti: “Ndi na maka aya kucite fintu fyonse mu ulenkoselesha.” (Abena Filipi 4:13) Yehova, uwakoseshe Paulo, akakosha na imwe ukucite calungama nga mwalomba ukwafwa kwakwe. (Abena Filipi 4:6, 7) Eco “mulwile icitetekelo,” kabili Yehova akamupaala.—Yuda 3.
Tamulekabila ukulwa ubu bulwi mweka. Mu filonganino fya Nte sha kwa Yehova, ba eluda ba Bwina Kristu abakosoka, abo pa lwabo baletwalilila ‘ukulwila icitetekelo,’ baliba abaitememwa ukumwafwilisha. Nga mwaeba eluda ukuti amwafwilisheko, akatukuta ‘ukumusansamusha, NW.’ (1 Abena Tesalonika 5:14) Ico akafwaisha kuba “ngo mwa kufisama ku mwela, ngo mwa kubelama ku kupongoloka kwa mfula.”—Esaya 32:2.
“Lesa kutemwa,” kabili afwaya ababomfi bakwe ukumubombela pa mulandu wa kumutemwa. (1 Yohane 4:8) Nga ca kuti ukutemwa kwenu kulekabila ukubukululwa, citeni ifilekabilwa pa kuti mwingakubukulula, nga fintu cilangililwe pa mulu. Mukaba aba buseko ukuti mwalicitile fyo.