Umukululo wa Fipusho

◼ Cinshi cilingile ukwibukishiwa ukukuma ku kubelenga amaparagrafu pa kulongana?

Inshita ikalamba iyapeelwa kwi Sambililo lya Ulupungu lwa kwa Kalinda ne Sambililo lya Citabo pa Cilonganino ibomfiwa ku kubelenga amaparagrafu. Ici cilepilibula ukuti munyina wapeelwa nga kabelenga alikwata icishingamo cafina pamo nga kasambilisha. Afwile ukubelenga mu nshila ya kuti ifyebo filebelengwa ‘fyailukwa’ ica kuti bakakutika baumfwikisha no kukuntwa ukubombela pa co baumfwa. (Nehe. 8:8) E ico, kabelenga alekabila ukupekanishisha ulubali lwakwe bwino. (1 Tim. 4:13; moneni Isambililo 6 mu Icitabo ca Ukutungulula Isukulu.) Pano palipo ifyebo fyakatama pa kuti ukubelenga kwa pa cintubwingi kubemo ubupilibulo.

Shimpeni Amashiwi mu Kulinga: Mweneni libela amashiwi yalekabilwa ukukomailwapo pa kuti mwingayalumbula mu kumfwika.

Shimbuleni Amashiwi mu Kulungika: Ukushimbula amashiwi mu kulinga no kuyalumbula mu kumfwika kwalikatama pa kuti ibumba lingomfwikisha inumbwilo isho shili mu lupapulo. Fwailisheni fintu bamunyina bambi abafikapo bayashimbula.

Landeni mu Kupongomoka no Kucincimuka: Ukupongomoka mu kucincimuka kulalenga ubuseko, kulakumbamo inkuntu, kabili kulakunta bakakutika.

Beni aba Cikabilila Kabili aba Kulanshanya: Ukulanda mu cifyalilwa kwendela pamo no kulongoloka. Mu kuba no kupekanya no kupitulukamo, kabelenga kuti aba uwatekanya, kabili ici cikalenga ukubelenga kuleumfwika bwino ukucila ukutendusha.—Haba. 2:2.

Belengeni ifyebo nga fintu filembelwe: Amashiwi ya mwi samba capamo ne fyebo fili mu fya kwisalila ( ) nelyo [ ] filabelengwa lyonse mu kupongomoka nga ca kuti filelondolola ifyebo filembelwe mu kumfwika. Icafumishiwako fye fya kuloshako ifyo filangilila fye impapulo shafumamo ifyebo. Amashiwi ya mwi samba yalingile ukubelengwa apo yaloshiwako muli paragrafu, ukutendekelapo ukulanda ukuti: “Amashiwi ya mwi samba yalebelengwa ukuti: . . . ” Pa numa ya kuyabelenga, twalilileni fye ne ciputulwa cashalako ica paragrafu.

Lintu ukubelenga kwa pa cintubwingi kwacitwa bwino, yaba ni imo iya nshila shakatama isho ‘twingasambilishishamo bambi ukubaka fyonse ifyalandile’ Kasambilisha wesu Mukalamba.—Mat. 28:20.