Abateyanishiwa no Kupangashiwa ku Kusambilisha Bambi
1 Lintu Mose asontelwe ukuba uwa kwimininako Yehova, tayumfwile uwafikapo ku kubilisha icebo ca kwa Lesa kuli Farao. (Ukufu. 4:10; 6:12) Yeremia asokolwele ukuti taicetekele ku kuba na maka ya kubomba nga kasesema wa kwa Yehova, ukweba Lesa ukuti taishibe ifya kulanda. (Yer. 1:6) Te mulandu no kukanaicetekela kwabo mu kutendekelako, abo bakasesema bonse babili mu kushininkisha baali ni Nte sha kwa Yehova ishabula umwenso. Lesa alibapeele amaka ya kuba abafikapo bwino.
2 Ilelo, Yehova e watupayanishisha ifyo tukabila ku kupwilikisha ubutumikishi bwesu mu kuba no kucetekela. (2 Kor. 3:4, 5; 2 Tim. 3:17) Ukupala kalungisha wa bamotoka uwakwata ifibombelo fyonse, twalipangashiwa ku kupwilikisha mu kufikapo ubutumikishi bwesu ubo twapeelwa. Mu January tuletambika icitabo icili conse ica mabula 192 icasabankanishiwe pa ntanshi ya 1984 kabili ico icilonganino cikwete. Nangu cingati ifi fibombelo fya ku mupashi tafili ifipya, imitwe ya fiko iyashimpwa pa Malembo icili ya ndakai kabili ifi fitabo fikaafwa abantu ukusambilila icine. Inshila sha kulandilamo ishili pe samba kuti shateululwa ukulinge citabo icili conse iciletambikwa.
3 Ilyashi pa lwa masomo nalimo kuti lyabomfiwa ku kubimbula ubuseko mu Cebo ca kwa Lesa. Kuti mwatendeka ukulanshanya pa kusosa ukuti:
◼ “Ilelo abantu abengi balekomaila pa kukabila kwa masomo ayasuma. Ukulingana na fintu muletontonkanya, musango nshi uwa masomo untu umuntu alingile ukusupila pa kuti ashininkishe ukuti aba uwa nsansa apakalamba no kutunguluka mu bumi? [Lekeni asuke.] Abo abasambilila ukwishiba Lesa kuti banonkelamo ku ciyayaya. [Belengeni Amapinda 9:10, 11.] Ici citabo [lumbuleni umutwe wa citabo ico muletambika] cashimpwa pali Baibolo. Cisontelela ku ntulo yeka fye iya kwishiba uko kwingatungulula ku mweo wa muyayaya.” Langisheni ica kumwenako ca kulungatika mu citabo. Tambikeni icitabo no kutantika icipempu ca kubwelelamo.
4 Lintu mulebwelela kuli mwine ŋanda uyo mwalanshenye nankwe pa lwa bucindami bwa masomo ya Baibolo, nalimo kuti mwatila:
◼ “Ilyo natandele umuku wafumako, twalanshenye pa lwa Baibolo pamo nga intulo ya masomo ayo yengebekesha inshita yesu iya ku ntanshi iya ciyayaya. Kwena, cikabila ukubombesha pa kusambilila fintu tulekabila ukwishiba ukufuma mu Malembo. [Belengeni Amapinda 2:1-5.] Abantu abengi balacisanga ukuba icakosa ukumfwikisha ifiputulwa fimo ifya mu Baibolo. Kuti natemwa ukulangilila mu kwipifya inshila intu twabomfya apakalamba ku kwaafwa abantu ukusambilila ifyafulilako pa lwa fisambilisho fya kutendekelako ifya Baibolo.” Ukubomfya icitabo cashalikwe, kupukuleni pe bula lyalinga kabili langilileni isambililo lya Baibolo mu kwipifya. Nga ca kuti mwine ŋanda afwaya ukulasambilila lyonse, londololeni ukuti mukabwela ne citabo ca kwaafwa ukusambilila Ukwishiba Uko Kutungulula ku Mweo wa Muyayaya.
5 Abantu abengi balalungulushiwa ku kucula kwa mamilioni ya bana mu calo. Nakalimo kuti mwaafwa mwine ŋanda ukwishiba fintu Lesa amona ubu bulanda, pa kusosa ukuti:
◼ “Ukwabula ukutwishika mwalibelenga amalyashi pa lwa bana ukushinguluka isonde lyonse ababa ne nsala, abalwala, na balekeleshiwa. Mulandu nshi amateyanyo yayangwako yashabela na maka ya kuwamyako imibele? [Lekeni asuke.] Lesa afwaya fye icingawamisha ku bantunse. Moneni cintu alaya ku bana na bakalamba, nga fintu calembwa muli Baibolo. [Belengeni Ukusokolola 21:4.] Ici citabo [lumbuleni umutwe] cilapayanya ifyebo fyafulilako pa lwa calo ico Lesa akalenga umo ukucula kukapwa.” Nga cingacitika, isuleni pa cikope ico cilelangilila Paradise, kabili landenipo. Tambikeni icitabo, kabili tantikileni ukutandala na kumbi.
6 Nga ca kuti mu kutendekelako mwalandile pa lwa kucula kwa bana, pa kutandala kukonkelepo nalimo kuti mwatwalilila ukulanshanya pa kusosa ukuti:
◼ “Lintu naali pano nomba line, mwalumbulwile ukusakamikwa pa lwa bulanda bwa bana abacula pa mulandu wa mayanda yatobeka, icipowe, ukulwala, no lukaakala. Cilasansamusha ukubelenga Baibolo pa lwa calo umo nangu fye bana nelyo abakalamba tabakacule ku kulwala, ukukalipwa, nelyo imfwa. Ubusesemo mwi buuku lya kwa Esaya bulondolola ubumi bwawaminako ubukesa pe sonde.” Belengeni no kulanda pali Esaya 65:20-25. Pekanishisheni isambililo lya Baibolo mu citabo ca Ukwishiba.
7 Apantu caliba icaseeka ku bantu baya ku macalici ukubelesha ukupepa, kuti mwatendeka ukulanshanya pali uyu mutwe pa kusosa ukuti:
◼ “Pa nshita imo mu bumi bwesu, abengi aba ifwe twalipita mu mafya ayo yatukunta ukupepela ukwaafwa kwa kwa Lesa. Kabili nalyo line, abengi bayumfwa ukuti amapepo yabo tayasukwa. Cimoneka fye no kuti amapepo ya ntungulushi sha mipepele ishipepela umutende pa cintubwingi tayomfwika. Twalanda ifyo pa mulandu wa kuti inkondo no lukaakala fitwalilila ukucusha umutundu wa muntu. Bushe Lesa mu cituntulu alakutika ku mapepo? Nga ca kuti alakutika, mulandu nshi cimonekela ukuti amapepo ayafulisha ifi tayasukwa? [Lekeni asuke.] Ilumbo 145:18 lilondolola icifwaikwa pa kuti amapepo yesu yasukwe. [Belengeni ilembo.] Umulandu umo uli wa kuti amapepo kuli Lesa yafwile ukuba ayafumaluka kabili ayalingana ne cine cisangwa mu Cebo cakwe, Baibolo.” Langeni icitabo ico muletambika, kabili londololeni fintu cisosa pa lwa bucindami bwe pepo.
8 Lintu mulekonkanya pa fintu mwalanshenye ku numa pa lwe pepo, nalimo kuti mwaesha iyi nshila:
◼ “Naliipakishe ukulanshanya pa lwe pepo. Ukwabula ukutwishika mwalasanga amatontonkanyo ya kwa Yesu pa lwa fya kupepela ukuba ica kutungulula ca kwaafwa.” Belengeni Mateo 6:9, 10, ukulondolola ifya kwangwako fikalamba fintu Yesu akomailepo mwi pepo lya cilangililo. Langeni icipandwa 16, “Ifyo Wingapalama Kuli Lesa,” mu citabo ca Ukwishiba, kabili ipusheni nga kuti mwalangilila ifya kusambilila ifyebo.
9 Lintu caisa ku kusambilisha bambi ukwishiba Lesa, nalimo kuti twaipusha ukuti, “Nani uwingafikapo kuli ifi fintu?” Amalembo yasuka ukuti: “Ni fwe.”—2 Kor. 2:16, 17,NW.