Lombeni Ubwafwilisho
1 Amashiwi yapuutwamo aya kuti “inshita ishayafya” yatulenga ukumfwikisha umulandu ifintu fibipile fi pali lelo. (2 Tim. 3:1) Cinshi lyene mulingile ukucita lintu mwashingwana na mafya ya ku mupashi ayo pambi mwingamona ukuti yamwansha?
2 Bushe muli abaitemenwa ukushimikilako umuntu uwafikapo uo mwaba na o mu cilonganino? Bamo napamo kuti bashimunuka ukucite co pa mulandu wa kutiina ukuseebana nelyo ukuti bambi bakulabatwishika, nelyo ukukanafwaya ukutitikisha bambi, atemwa ukutontonkanya ukuti takuli uwingamyafwa ukufikapo. Kwena, ifwe bene tulingile ukubombesha ukusakamana imilimo yesu ukulingana na papelele amaka yesu, lelo tulingile lyonse ukuba abantungwa ukulomba ubwafwilisho ku milandu iikumine ubutuntulu bwesu ubwa ku mupashi.—Gal. 6:2, 5.
3 Aba Kumona Intanshi: Napamo kuti mwafwaya ukushimikilako katungulula we sambililo lya citabo kuntu musangwa no kwipusha ukubomba nankwe mwi bala. Ukucita ico kuti kwamupeela ishuko lya kumweba ukuti mulefwaya ukulunduluka lwa ku mupashi. Nga ca kuti mubomfi utumikila, mushimikileni ifyo mulekabila lwa ku mupashi lyena akeba baeluda ukuti bengamwafwa. Nelyo kuti mwaeba eluda uuli onse conse icilemusakamika.
4 Bwafwilisho bwa musango nshi mulekabila? Bushe kuliko cimo icilengele ukuti ukupimpa kwenu kufubalile? Bushe muli bafyashi abashakwata umwina mwenu kabili mulefwaya ukuti abana bapoose amano ku kulongana? Bushe muli bakoloci abalekabila ukwafwiwa? Nelyo bushe namukwatako ubwafya ubulelenga ukuti mube abafuupulwa? Imibele muli shino nshita shayafya kuti yabipisha ukucila—lelo kuti mwatunguluka. Ubwafwilisho e ko bwaba.
5 Fintu Abakalamba Bafwilisha: Baeluda cine cine balasakamana. Bakakutika ku masakamika yenu. Nga ca kuti kuli bakasabankanya na bambi abakwete amafya yamo yene, baeluda bakulaibukisha ayo mafya lintu balecema no kufunda icilonganino. Baba “ca kumwenako ku mukuni,” lyonse baba abaipekanya kabili abasekelela ukubombela pamo na imwe. (1 Pet. 5:3) Ukukutikisha lintu aba bamunyina babelesha balepelulula pa fishinte fya Baibolo kuti kwawamyako ubutumikishi bwenu no kumwaafwa mu mikalile yenu.—2 Tim. 3:16, 17.
6 Yesu alitupeela “ifya bupe ku bantu” ifingi. (Efes. 4:8) Ici cilepilibula ukuti baeluda balamupyungila. Babelako ukumwaafwa. Kabili bonse ‘benu.’ (1 Kor. 3:21-23) E ico, mu cifulo ca kusuulako fye, shipeni no kulanda na bo. Bebeni ubwafwilisho mulekabila.