Bushe Mulepushako Abantu Ukuti Bamwebeko na Bambi Abengatemwa Ukusambilila?

Nga ca kutila mulatungulula isambililo lya Baibolo, kuti cawama nga mwaipusha umusambi nga kuli ifibusa, balupwa nelyo abo aishiba abengatemwa ukusambilila Baibolo. Ilingi line umusambi kuti amweba amashina ayengi ya bantu bengatemwa ukusambilila. Nga ca kutila umusambi amusuminisha, kuti mwamulumbula ilyo mwatandalila abo bantu. Limbi kuti mwatila, “[Kantwa] alaipakisha sana ukusambilila Baibolo, kabili atontonkenye ukuti limbi na imwe kuti mwatemwa ukusambilila, tatulipilisha iyo.” Lyena langilileni panono ifyo ciba pa kusambilila ukubomfya icitabo ca Baibolo Isambilisha.

Nga mwalikwata umusambi uulelunduluka, kuti mwamukoselesha ukulondolwelako ifibusa na balupwa abengatemwa ukusambilila ifyo tusambilila na bantu. Cimo ico engacita kubetako kwi sambililo mukwata nankwe lyonse. Nelyo nga ca kutila bafilwa ukusangwako, kuti amulombelako ukukumana na bo bantu pa kuti mukabalangilile ifyo ciba pa kusambilila. Nga mwacite fyo umusambi kuti akoseleshiwa ukutendeka ukulalanda na bambi ifyo alesambilila mu Baibolo.

Abantu abo mupempula lyonse, nangu line tamulatendeka ukusambilila na bo Baibolo, kuti bamweba abengatemwa ukusambilila. Nga mwabatambika icitabo ca Baibolo Isambilisha, limbi kuti mwabepusha fye amuti, “Bushe mwalishibako bambi abengatemwa ukukwata ici citabo?”

Apo inshita tuleikalamo ye pamfya, tulefwaya inshila fye yonse iingabomba bwino ku kwafwa abantu ukumfwa no kupokelela imbila nsuma. Bushe mulepushako abantu ukuti bamwebeko na bambi abengatemwa ukusambilila?