ICIPANDE CA KUSAMBILILAMO 49
Bushe Yehova Alasuka Amapepo Yesu?
“Mukalilila kuli ine, mukesa no kupepa kuli ine, na ine nkomfwa kuli imwe.”—YER. 29:12.
ULWIMBO 41 Umfweni Ipepo Lyandi
IFYO TWALASAMBILILAa
1-2. Finshi ifingalenga twalatontonkanya ukuti Yehova tasuka amapepo yesu?
“SEKELELA nga nshi muli Yehova, Na o akakupeela ififwaya umutima obe.” (Amalu. 37:4) Ala ifi Yehova atulaya fyaliwama nga nshi! Nomba bushe tufwile ukwenekela Yehova ukutupeela fyonse ifyo twalomba ilyo line fye? Mulandu nshi twaipushisha ici cipusho? Natulandeko pa fya kumwenako. Nkashi umushimbe alepepa ukuti akasangwe kwi Isukulu lya Bakabila ba Bufumu. Nomba papita imyaka iingi ukwabula ukuti bamwite ukuyasangwako. Munyinefwe umwaice alepepa kuli Yehova ukuti amuposhe ubulwele alwala pa kuti alebombesha mu cilonganino, lelo talepola. Abafyashi abena Kristu balepepa ukuti abana babo bekafuma mu cine. Lelo abana babo basalapo ukuleka ukubombela Yehova.
2 Nalimo na imwe kwaliba ifyo mwalombapo Yehova ifishilacitika. Ne ci kuti calenga mwalatontonkanya ukuti Yehova asuka fye amapepo ya bantu bambi lelo tasuka amapepo yenu. Nalimo kuti mwalatontonkanya ukuti paliba fimo ifyo mwalufyanya. Ba nkashi Janiceb nabo e fyo baleumfwa. Bena na bena mwabo balepepa ukuti bakabombeleko pa Bethel. Batile: “Nalicetekele ukuti balatwita bwangu pa Bethel.” Nomba palipitile imyaka iingi ukwabula ukubeta. Ba Janice batile: “Nalyumfwile ububi kabili nshaishibe ifya kucita. Naletontonkanya ukuti bushe finshi nalufyanya Yehova? Nalepepa sana ukuti Yehova akasuke ipepo lyesu ilya kuya ku Bethel. Naletontonkanya ukuti mulandu nshi ashayasukila ipepo lyandi?”
3. Finshi twalasambilila muli cino cipande?
3 Inshita shimo kuti twalatwishika nga ca kuti Yehova alomfwa amapepo yesu. Na babomfi ba kwa Yehova bamo aba ku kale baleumfwa fimo fine. (Yobo 30:20; Amalu. 22:2; Haba. 1:2) Finshi mwingacita pa kuti mushininkishe ukuti Yehova alakutika ku mapepo yenu? (Amalu. 65:2) Pa kuti twasuke ici cipusho, twalaasuka ifipusho fitatu: (1) Finshi twingenekela Yehova ukucita nga twapepa kuli ena? (2) Finshi Yehova afwaya tulecita nga twapepa kuli ena? (3) Mulandu nshi limo tulingile ukupepela pa fintu fimbi?
FINSHI TWINGENEKELA YEHOVA UKUCITA NGA TWAPEPA KULI ENA?
4. Ukulingana na mashiwi yaba pali Yeremia 29:12, finshi Yehova atulaya?
4 Yehova alitulaya ukuti alomfwa amapepo yesu. (Belengeni Yeremia 29:12.) Yehova alitemwa ababomfi bakwe aba cishinka, kanshi lyonse alakutika amapepo yabo. (Amalu. 10:17; 37:28) Na lyo line, ici tacilepilibula ukuti lyonse alatupeela fyonse ifyo twalomba. Inshita shimo fimo ifyo tulomba Yehova akatupeela mu calo cipya.
5. Finshi Yehova abikako amano ilyo aleasuka amapepo yesu? Londololeni.
5 Ilyo Yehova ashila-asuka amapepo yesu alamona ifyo tulemulomba nga nafilingana ne fyo afwaya ukucita. (Esa. 55:8, 9) Cimo ico afwaya ca kuti, mwi sonde lyonse mwaba abantu abacumfwila kabili abasumina ukuti e walinga ukuteka. Nomba Satana alanda ukuti abantunse kuti baiteka fye bwino abene. (Ukute. 3:1-5) Pa kuti Yehova alange ukuti Satana wa bufi, alisuminisha abantu ukulaiteka abene. Nomba ifyo abantu bateka fyalilenga tukwate amafya ayengi muno nshiku. (Luk. Mil. 8:9) Twalishiba ukuti Yehova takafumyepo amafya yonse aya pali ino nshita. Nga afumyapo amafya tukwata, abantu bamo kuti batontonkanya ukuti abantunse kuti baiteka abene, kabili kuti bafumyapo na mafya tukwata.
6. Mulandu nshi tulingile ukucetekelela ukuti lyonse Yehova alasuka amapepo yesu mu nshila iisuma kabili iya mulinganya?
6 Yehova kuti ayasuka amapepo yamo yene mu nshila iyalekanalekana. Ku ca kumwenako, ilyo Imfumu Hisekia yalwele sana, yalilombele Yehova ukuti aiposhe. Yehova aliposeshe Imfumu Hisekia. (2 Isha. 20:1-6) Nomba ilyo umutumwa Paulo apepele kuli Yehova ukuti amufumye “umunga mu mubili,” nalimo ubulwele ubo alwele, Yehova tamuposeshe. (2 Kor. 12:7-9) Tontonkanyeni na kabili pa fyacitikile abatumwa babili, Yakobo na Petro. Imfumu Herode yalefwaya ukubepaya bonse babili. Aba bwananyina mu cilonganino balipepeleko Petro kabili nalimo balipepeleko na Yakobo wine. Nomba Yakobo balimwipeye, lelo Petro ena balimufumishe mu cifungo kuli malaika. (Imil. 12:1-11) Nalimo kuti twalatontonkanya ukuti mulandu nshi Yehova apusushishe Petro, lelo akana ukupususha Yakobo? Baibo tayalanda.c Ico twingacetekela fye ca kuti Yehova taba na “lufyengo” (Amala. 32:4) Kabili twalishiba ukuti bonse babili Petro na Yakobo, Yehova alebapaala. (Ukus. 21:14) Inshita shimo Yehova te kuti asuke amapepo yesu ukulingana ne fyo twale-enekela. Nomba apo twalicetekela ukuti Yehova alaasuka amapepo yesu mu nshila iisuma kabili iya mulinganya, tatuilishanya nga asalapo ukwasuka amapepo yesu mu nshila tushile-enekela.—Yobo 33:13.
7. Finshi ifyo tatulingile ukucita kabili mulandu nshi?
7 Tatulingile ukulalinganya ifyo Yehova asuka amapepo yesu ku fyo asuka amapepo ya bantu bambi. Ku ca kumwenako, inshita shimo kuti twapepa kuli Yehova ukuti atwafwe ukupwisha ubwafya bumo e lyo nomba Yehova akana ukwasuka ipepo lyesu. Lyena pa numa mwaishiba ukuti ubwafya mwapepelepo kwali na umbi uwapepelepo, kabili Yehova alyasuka ipepo lyakwe. Kuti twacita shani ifya musango uyu nga fyacitika? Ifi fine e fyo cali na kuli ba nkashi Anna. Balepepa ukuti abena mwabo ba Matthew bapole ubulwele bwa kansa. Pa nshita imo ine, kwali bankashi abakalamba babili abalwele ubulwele bumo bwine. Ba Anna balepepelako sana ba Matthew na balya bankashi babili. Bankashi babili balipolele, lelo ba Matthew balifwile. Pa kubalilapo ba Anna baletwishika nga ca kuti uwalengele balya bankashi bapole ni Yehova. Baletontonkanya ukuti nga ca kuti Yehova e walengele balya bankashi ukupola, mulandu nshi ashaposeshe abena mwabo? Kwena te kuti twishibe icalengele balya bankashi babili ukupola. Ico twaishiba ca kuti Yehova akafumyapo amafya yonse, kabili alafwaisha no kubuusha ifibusa fyakwe abafwa.—Yobo 14:15.
8. (a) Ukulingana na mashiwi yaba pali Esaya 43:2, Bushe Yehova atwafwa shani? (b) Bushe ipepo litwafwa shani nga tuli na mafya? (Tambeni vidio itila Ipepo Lilatwafwa Ukushipikisha Ilyo Tuli na Mafya.)
8 Yehova lyonse akulatutungilila. Apo Yehova ni Shifwe uwatutemwa, tafwaya ukumona tulecula. (Esa. 63:9) Na lyo line, tafumyapo amafya yonse ayo tukwata ayo twingalinganya ku mulilo nangu ku mimana. (Belengeni Esaya 43:2.) Nomba alitulaya ukuti akulatwafwa ilyo tuli na mafya. Kabili takaleke amafya tukwata ukutwalilila ukubako. Na kabili Yehova alatupeela umupashi wakwe uwa mushilo uutwafwa ukushipikisha. (Luka 11:13; Fil. 4:13) Kanshi kuti twacetekela ukuti lyonse Yehova akulatupeela ifyo tukabila pa kuti tutwalilile ukulashipikisha no kulamubombela ne cishinka.d
FINSHI YEHOVA AFWAYA TULECITA NGA TWAPEPA KULI ENA?
9. Ukulingana na mashiwi yaba pali Yakobo 1:6, 7, Mulandu nshi tulingile ukucetekelela Yehova ilyo tulepepa?
9 Yehova afwaya twamucetekela. (Heb. 11:6) Inshita shimo kuti twamona kwati amafya tukwete nayafula sana. Kuti twatendeka no kutontonkanya nampo nga Yehova kuti atwafwa nelyo iyo. Lelo Baibo yalitulaya ukuti Lesa nga atwafwa kuti ‘twaciluka icibumba.’ (Amalu. 18:29) Kanshi mu cifulo ca kuti tuletwishika, tufwile ukucetekela Yehova ukuti akaasuka amapepo yesu nga twapepa kuli ena.—Belengeni Yakobo 1:6, 7.
10. Landeni pa ca kumwenako icilelangilila ifyo tufwile ukucita pa numa ya kupepa kuli Yehova ukuti atwafwe.
10 Yehova afwaya tulecita ifintu ukulingana ne fyo tulepepelapo. Ku ca kumwenako, munyinefwe kuti alomba Yehova ukuti asuminishe abamwingisha incito ukuti bamupeele inshita ya kusangwa ku kulongana kwa citungu. Bushe Yehova kuti ayasuka shani ili pepo? Kuti akosha uwa bwananyina pa kuti alande na bamwingisha incito. Nomba munyina na o alingile ukucitapo fimo. Alingile ukuyalanda na bamwingisha incito. Nalimo kuti alanda nabo imiku iingi. Nalimo abamwingisha incito kuti bamweba ukubomba ubushiku bumbi. Inshita shimo kuti bamusuminisha ukuyasangwa mu kulongana, e lyo bamweba ukuti tabakamufoleshe pali isho inshiku alefwaya ukuyasangwa ku kulongana kwa citungu.
11. Mulandu nshi tulingile ukulapepela lyonse, kabili ukwabula ukuleka?
11 Yehova afwaya tulepepa ukwabula ukuleka pa filetucusha. (1 Tes. 5:17) Yesu atile fimo ifyo tupepelapo te kuti batupeele apo pene. (Luka 11:9) Kanshi tekwesha ukunenuka! Mulepepa lyonse kabili mulepepa ukwabula ukuleka. (Luka 18:1-7) Nga tulepepa ukwabula ukuleka, tulanga ukuti tulefwaisha Yehova ukwasuka ipepo lyesu. Kabili ninshi tulelanga ukuti twalicetekela ukuti Yehova kuti atwafwa.
MULANDU NSHI LIMO TULINGILE UKWALWILAKO IFYO TULEPEPELAPO?
12. (a) Cipusho nshi tulingile ukutontonkanyapo ilyo tulepepa kuli Yehova, kabili mulandu nshi? (b) Kuti twacita shani pa kuti tulelanga ukuti amapepo tupepa yalelanga ukuti twalicindika Yehova? (Moneni akabokoshi akaleti “Bushe Ifyo Mpepelapo Filanga Ukuti Nalicindika Yehova?”)
12 Nga ca kuti ifyo tulepepelapo taficitike, kuti twatontonkanya pa fipusho fitatu. Icipusho ca kubalilapo ca kuti, ‘Bushe ifyo ndefwaya nafilingana no kufwaya kwa kwa Lesa?’ Ilingi tutontonkanya ukuti natwishiba ifyo tulefwaya. Nomba ifyo tulomba nalimo te fyo tukabila. Kanshi nga tulepepela pa bwafya bumo, nalimo kuti kwaba inshila imbi iisuma ukucila pa nshila tulepepelapo. Kabili fimo ifyo tulomba tafilingana ne fyo Yehova afwaya ukucita. (1 Yoh. 5:14) Ku ca kumwenako, tontonkanyeni pa bafyashi twacilandapo pa kubalilapo. Balipepele ukuti Yehova alenge umwana wabo ukutwalilila ukuba mu cine. Ifi balepepelapo fyalemoneka kwati fyali fye bwino. Nomba Yehova tatupatikisha ukumubombela. Afwaya ifwe bonse ukubikako fye na bana, tuleisalilapo ukumupepa. (Amala. 10:12, 13; 30:19, 20) Kanshi abafyashi balingile ukulapepa kuli Yehova, ukumulomba ukuti alebafwa ukulafika umwana wabo pa mutima pa kuti atemwe Yehova no kuba cibusa wakwe.—Amapi. 22:6; Efes. 6:4.
13. Ukulingana na mashiwi yaba pa AbaHebere 4:16, ni lilali Yehova atwafwa? Londololeni.
13 Icipusho calenga bubili ico tulingile ukutontonkanyapo ca kuti, ‘Bushe inshita naifika iya kuti Yehova asuke ipepo lyandi?’ Nalimo kuti twalatontonkanya ukuti Yehova alingile ukwasuka ipepo lyesu apopene fye. Nomba Yehova aleshiba inshita yalinga ilyo tulefwaya ubwafwilisho. (Belengeni AbaHebere 4:16.) Nga ca kuti Yehova taswike ipepo lyesu pa nshita tule-enekela, nalimo kuti twatontonkanya ukuti Yehova takasuke ipepo lyesu. Nomba nalimo Yehova aletweba fye ukuti ‘te nshita yalinga.’ Ku ca kumwenako, tontonkanyeni pali munyina umwaice uwalepepa ukuti Yehova aposhe ubulwele alwele. Yehova aposha uyu munyina mu cisungusho, Satana nga atile icalengele uyu munyina alebombela Yehova, ni co alimuposeshe. (Yobo 1:9-11; 2:4) Na kuba Yehova alibika inshita umwine ilyo akafumyapo amalwele yonse. (Esa. 33:24; Ukus. 21:3, 4) Pali ino nshita tatwenekela Yehova ukutuposha mu cisungusho. Kanshi uyu munyina alingile ukupepa kuli Yehova ukuti amupeele amaka alekabila pa kuti ashipikishe ubu bulwele alwele. Na kabili alingile ukupepa ukuti amupeele mutende wa kulinda amatontonkanyo yakwe, pa kuti atwalilile ukubombela Yehova ne cishinka.—Amalu. 29:11.
14. Finshi mwasambilila ku fyacitike kuli nkashi Janice?
14 Tontonkanyeni pali nkashi Janice, uwalepepa ukuti akabombeleko pa Bethel. Palipitile imyaka 5 pa kuti eshibe ifyo Yehova ayaswike ipepo lyakwe. Atile: “Yehova abomfeshe ilya nshita ku kunsambilisha no kunenga ukuba umuntu umusuma. Ici calilengele namucetekela sana. Nalingile ukwalulako ifyo nalecita pa kuisambilisha. Kabili nalingile no kusambilila ukulasekelela konse uko nalebombela Yehova.” Pa numa, ba Janice na bena mwabo balibetile ukulabombela mu muputule. Ba Janice batile: “Yehova alyaswike ipepo lyandi, lelo mu nshila iyo nshale-enekela. Palipitile inshita pa kuti mone ifyo Yehova ayaswike ipepo lyandi, nomba naliba ne nsansa pantu nalimona ifyo Yehova antemwa e lyo ne fyo aba ne cikuuku kuli ine.
Nga mulemona ukuti Yehova ta-asuka ipepo lyenu, kuti mwapepelako pa fintu fimbi. (Moneni paragrafu 15)f
15. Mulandu nshi inshita shimo cacindamina ukukanalapepela fye pa fyo tulefwaya? (Moneni ne cikope.)
15 Icipusho calenga butatu ico tufwile ukutontonkanyapo ca kuti, ‘Bushe kuli fimbi ifyo ningapepelapo?’ Calicindama ukupepela pa fyo tulefwaya, nomba inshita shimo tatulingile ukulapepela fye pa fyo tulefwaya, lelo tulingile no kutontonkanya pa fyo Yehova alefwaya. Tontonkanyeni pali nkashi umushimbe uo twacilandapo, uwalepepa ukuti akasangwe kwi Isukulu lya Bakabila ba Bufumu. Ico afwaila ukuya kuli ili isukulu ni co afwaya ukuya uko abakubila imbila nsuma bacepa. Kanshi ilyo alepepa ukuti bakamwite ku sukulu, alingile no kulapepa ukuti Yehova amwafwe ukwishiba fimbi ifyo engacita pa kuti alebombesha mu mulimo wa kwa Lesa. (Imil. 16:9, 10) Pa numa ya kupepela pali ifi, kuti aipusha kangalila wa muputule ukuti amwebeko nga kuli icilonganino uko balefwaya bapainiya. Nelyo kuti alembela ku Bethel ukwipusha ukuti bamwebe uko bakasabankanya bacepa.e
16. Finshi twingacetekela?
16 Nga fintu twasambilila, Yehova kuti ayasuka amapepo yesu mu nshila iisuma kabili iya mulinganya. (Amalu. 4:3; Esa. 30:18) Inshita shimo Yehova kuti ayasuka amapepo yesu mu nshila iyo tushile-enekela. Na lyo line, lyonse Yehova alakutika ku mapepo yesu. Alitutemwa icine cine, kabili takatulekeleshe. (Amalu. 9:10) E ico “mulemucetekela inshita yonse” kabili mulemweba amafya yonse ayalemusakamika.—Amalu. 62:8.
ULWIMBO 43 Ipepo lya Kutootela
a Muli cino cipande twalasambilila umulandu twingacetekelela ukuti Yehova alasuka amapepo yesu mu nshila iisuma kabili iya mulinganya.
b Amashina yamo nabayalula.
c Moneni icipande citila “Bushe Mwalicetekela Ukuti Fyonse Ifyo Yehova Acita Fyalilungama?” icaba mu Ulupungu lwa kwa Kalinda ulwa February 2022, amapara. 3-6.
d Nga mulefwaya ukwishibilapo na fimbi pa fyo Yehova atwafwa ukushipikisha amafya, tambeni vidio itila Ipepo Lilatwafwa Ukushipikisha Ilyo Tuli na Mafya iyaba pa jw.org.
e Nga mulefwaya ukwishiba ifyo mwingacita pa kuti mubombeleko ku calo cimbi, moneni icitabo citila Abateyanishiwa ku Kucita Ukufwaya kwa kwa Yehova, icipa. 10, amapara. 6-9.
f UBULONDOLOSHI BWA CIKOPE: Bankashi babili balepepa ilyo tabalalemba formu ya kuya kwi Isukulu lya Bakabila ba Bufumu. Pa numa, umo pali aba bankashi babili bamwita ukuya kwi sukulu, e lyo umbi bakana ukumwita. Mu cifulo ca kumfwa ububi, nkashi uo bashaitile, alepepa na kabili kuli Yehova ukuti amwafwe ukwishiba fimbi ifyo engacita pa kuti atwalile ukulamubombela. Lyena alemba kalata ku Bethel, ukulomba ukuti aleya uko abakubila imbila nsuma bacepa.