Ifyo Mwingashininkisha Ukuti Yehova Alimutemwa

1. Bushe ababomfi ba kwa Yehova bamo bomfwa shani?

TULABA ne nsansa nga twaishiba ukuti Yehova alitemwa abantu bakwe. Baibo itila: “Yehova asekelela mu bantu bakwe.” (Amalu. 149:4) Nomba inshita shimo, bamo balafuupuka ica kuti batontonkanya abati, ‘Bushe Yehova alintemwa?’ Kwaliba ababomfi ba kwa Yehova abengi abalembwa mu Baibo aba kuti inshita shimo baleumfwa kwati Yehova tabatemenwe.—1 Sam. 1:​6-10; Yobo 29:​2, 4; Amalu. 51:11.

2. Ni bani abo Yehova atemwa?

² Baibo yalilanda ukwabula ukupita na mu mbali ukuti abantu abashapwililika, Yehova kuti abatemwa. Kuti twacita shani pa kuti Yehova atutemwe? Tufwile ukutetekela Yesu Kristu no kubatishiwa. (Yoh. 3:16) Nga twabatishiwa, tulanga pa cintubwingi ukuti twalilapila pa membu shesu no kuti twalilaya Lesa ukuti twakulacita ifyo afwaya. (Imil. 2:38; 3:19) Yehova alatemwa nga nshi nga twacita ifi pa kuti tube ifibusa fyakwe. Nga twatwalilila ukwesha na maka ukucita ifyo twalaile Yehova ilyo twaipeele kuli ena, akatwalilila ukututemwa kabili akalatumona ukuti tuli fibusa fyakwe.—Amalu. 25:14.

3. Mepusho nshi ayo twala-asuka?

³ Nomba cinshi cilenga bamo inshita shimo baleumfwa ukuti Yehova tabatemwa? Bushe Yehova alanga shani ukuti alitutemwa? Kabili cinshi cingalenga Umwina Kristu ashininkisha ukuti Lesa alimutemwa?

ICILENGA ABANTU BAMO BALEMONA KWATI YEHOVA TABATEMWA

4-5. Nangu ca kuti tumfwa ukuti tuli bacabecabe, finshi twingacetekela?

⁴ Ukufuma fye ku bwaice, fwe bengi tumfwa ukuti tatwacindama. (Amalu. 88:15) Munyinefwe uwe shina lya kuti Adrián alandile ukuti: “Lyonse ng’umfwa ukuti ndi wacabecabe. Ndebukisha ifyo nalepepa ilyo nali umwaice. Nalepepa ukuti ulupwa lwandi lukengile mu Paradaise nangu ca kuti nalishibe ukuti ine nshalingile ukuba mu Paradaise.” Ba Tony abashakulile mu lupwa lwa ba Nte balandile ukuti: “Abafyashi bandi tabatalile abanjebapo ukuti balintemenwe. Ici calengele ndemona ukuti fyonse ifyo nalecita tafyalengele bantemwe.”

⁵ Nga ca kuti na ifwe inshita shimo tumfwa ukuti tatwacindama, tufwile ukwibukisha ukuti Yehova umwine e watuletele mu cilonganino cakwe. (Yoh. 6:44) Alamona imibele iisuma iyo twakwata, kabili alitwishiba bwino ukucila ifyo fwe bene twayishiba. (1 Sam. 16:7; 2 Imila. 6:30) Kanshi kuti twacetekela ifi atweba ukuti twalicindama.—1 Yoh. 3:​19, 20.

6. Bushe umutumwa Paulo aleumfwa shani pa membu isho acitile kale?

⁶ Kwali fimo ifyo twacitile ilyo tushilasambilila icine nalimo ifilenga tuleipeela imilandu na pali ino ine nshita. (1 Pet. 4:3) Nangu fye Bena Kristu ababombela Yehova ne cishinka balalwisha pa kuti belacita ifyabipa. Bushe na imwe inshita shimo mumona ukuti Yehova te kuti amwelele? Ifi nge fyo mumfwa, kuti mwasansamuka nga mwaishiba ukuti ababomfi ba kwa Yehova aba cishinka nabo balyumfwapo ifi. Ku ca kumwenako, umutumwa Paulo alyumfwile sana ububi ilyo atontonkenye pa fyo alelufyanya. (Rom. 7:24) Kwena Paulo alilapiile pa membu shakwe kabili alibatishiwe. Na lyo line, umwine ailandile ukuti “nine nacepesha pa batumwa,” no kuti e ‘wacililepo’ ukuba umubembu pa babembu bonse.—1 Kor. 15:9; 1 Tim. 1:15.

7. Finshi tufwile ukulaibukisha pa membu isho twacitile kale?

⁷ Shifwe wa ku muulu alilaya ukuti nga twalapila kuti atwelela. (Amalu. 86:5) E ico nga ca kuti twalilapila ukufuma pa nshi ya mutima pa membu isho twacitile, kuti twacetekela ukuti Yehova alitwelela.—Kol. 2:13.

8-9. Finshi twingacita pa kuti twilaumfwa kwati tatubombesha mu mulimo wa kwa Yehova ica kuti te kuti atutemwe?

⁸ Bonse tulafwaya ukubombela Yehova ukufika apengapela amaka yesu. Nomba bamo kuti balamona kwati tababombesha mu mulimo wa kwa Yehova ica kuti te kuti abatemwe. Nkashi uwe shina lya kuti Amanda alandile ukuti: “Ntontonkanya ukuti pa kuti Yehova antemwe, mfwile ukulabomba sana na lintu ifintu fishili bwino. Ilingi line mona ukuti mfwile ukubomba ukucila na pa fyo ningakumanisha. Nga nafilwa ukubomba ukulingana ne fyo ndefwaya ukubomba, imona kwati Yehova na o alomfwa ububi.”

⁹ Kuti twacita shani pa kuti twilamona kwati tatubombesha mu mulimo wa kwa Yehova ica kuti teti atutemwe? Tufwile ukulaibukisha ukuti Yehova tapampamina fye pa cintu cimo. Tatwenekela ukucita ifintu ukucila pa fyo twingakumanisha. Alatasha pa fyo tumubombela, cikulu fye tulebomba apapelele amaka yesu. Na kabili, muletontonkanya pa bantu abalembwa mu Baibo abalebombela Yehova no mweo wabo onse. Natulandeko pali Paulo. Ali uwacincila pa myaka iingi ilyo alebomba umulimo wa kwa Lesa. Ale-enda intamfu iitali kabili alipangile ifilonganino ifingi. Nomba bushe Lesa alilekele ukumutemwa ilyo ifintu fya-alwike ica kuti aleka no kubila sana imbila nsuma? Awe. Paulo alitwalilile ukubomba apapelele amaka yakwe, kabili Yehova alimupaalile. (Imil. 28:​30, 31) Ifi fine e fyo caba na kuli ifwe. Inshita shimo ifyo tubombela Yehova kuti fya-aluka. Lelo icilenga tulemubombela, e co acindamika sana. Natulandeko pa nshila shimo isho Yehova alangilamo ukuti alitutemwa.

BUSHE YEHOVA ALANGA SHANI UKUTI ALITUTEMWA?

10. Ni nshila nshi twingomfwilamo ukuti Yehova aletweba ati alitutemwa? (Yohane 16:27)

¹⁰ Alitupeela Baibo. Yehova alitemwa ukweba ababomfi bakwe ukuti alibatemwa. Amalembo yalilanda imiku ibili ilyo Yehova aebele Yesu ukuti Mwana wakwe uo atemwa, uo asekelamo. (Mat. 3:17; 17:5) Bushe kuti mwatemwa Yehova nga alimwebele ukuti alimutemwa? Kwena te kuti tumfwe ishiwi lya kwa Yehova ukufuma mu muulu alelanda na ifwe, lelo alanda na ifwe ukupitila mu Cebo cakwe Baibo. Nga tulebelenga ifyo Yesu alandile mu mabuuku ya Mbila Nsuma, kuti caba kwati tuleumfwa ishiwi lya kwa Yehova ilyo aletweba ukuti alitutemwa. (Belengeni Yohane 16:27.) Yesu alepashanya sana Wishi. E ico nga twabelenga amashiwi ayo Yesu aebele abasambi bakwe abashali abapwililika lelo abali aba cishinka ukuti alibatemwa, kuti twashininkisha ukuti Yehova alitutemwa.—Yoh. 15:​9, 15.

11. Mulandu nshi twingalandila ukuti nga natukwata amafya tacipilibula ukuti Yehova naleka ukututemwa? (Yakobo 1:12)

¹¹ Ifyo atucitila. Yehova alafwaisha ukutwafwa ilyo tulekabila ubwafwilisho. Ku ca kumwenako, alatupeela ifyo tukabila. Inshita shimo Yehova alasuminisha ukuti ifyabipa fitucitikile nga filya cali kuli Yobo uwali umulungami. (Yobo 1:​8-11) Nga twakwata amafya, tacipilibula ukuti Lesa naleka ukututemwa. Lelo amafya yalalenga twalanga ifyo twatemwa sana Yehova ne fyo twamucetekela. (Belengeni Yakobo 1:12.) Nga natukwata amafya, tulamona ifyo Yehova atutemwa ne fyo atwafwa pa kuti tushipikishe.

12. Finshi twingasambilila ku fyacitikile ba Dmitrii?

¹² Tontonkanyeni pa fyacitikile munyinefwe Dmitrii uwa ku Asia. Incito yalipwile kabili alyeseshe pa myeshi iingi ukufwaya incito lelo taisangile. E ico asalilepo ukulabila sana imbila nsuma pa kuti alange ukuti alicetekela Yehova. Palipitile imyeshi iingi, lelo tasangile incito. Lyena uyu munyinefwe alilwele ica kuti taleima na pa busanshi. Atendeke ukutwishika nga ca kuti na pali iyi ine nshita ali umulume umusuma kabili umufyashi umusuma. Aletontonkanya no kuti Yehova alilekele ukumutemwa. Lyena bushiku bumo umwana wakwe umukashana apulintile amashiwi ayaba pali Esaya 30:15 ayatila: “Amaka yenu yakaba mu mutende na mu kutetekela.” Alimutwalile e lyo amweba ati: “Tata, nga mwaumfwa ububi, muleibukisha amashiwi ayaba pali ili lembo.” Ba Dmitrii bailwike ukuti Yehova aleafwa ulupwa lwabo pantu batwalilile ukukwata ifya kulya, ifya kufwala, no mwa kwikala. Batile: “Ico nalingile ukucita, kuteka umutima no kutwalilila ukutetekela Lesa wandi.” Nga ca kuti na imwe mwalikwata amafya nga ayo ba Dmitrii bakwete, mulecetekela ukuti Yehova alamusakamana kabili akulamwafwa pa kuti muleshipikisha.

13. Ni bani abo Yehova engabomfya pa kutulanga ukuti alitutemwa, kabili ababomfya shani?

¹³ Alatwafwa ukupitila mu ba bwananyina. Yehova alatulanga ukuti alitutemwa ukupitila muli bamunyinefwe na bankashi. Ku ca kumwenako, kuti alenga bamunyinefwe na bankashi batweba amashiwi ya kutukoselesha pa nshita ilya ine tuleyakabila. Ifi fine e fyo cali kuli nkashi umo uwa ku Asia ilyo akwete sana amafya. Incito yalipwile kabili alilwele sana. Lyena abena mwakwe balicitile ulubembu ulukalamba kabili balibafuutile bueluda. Uyu nkashi atile: “Nshaishibe icalengele ukuti ifi fyonse filecitika. Naletontonkanya nati, pafwile pali ifyo nalufyenye kabili Yehova alilekele ukuntemwa.” Uyu nkashi alipepele kuli Yehova no kumulomba ukuti amulange ukuti alimutemwa. Bushe Yehova amulangile shani ukuti alimutemwa? Nkashi yesu atile: “Baeluda balilandile na ine kabili balilengele namona ukuti Yehova alintemwa.” Ilyo papitile inshita, uyu nkashi alipepele kuli Yehova na kabili pa kuti amulange ukuti alimutemwa. Atile: “Pali bulya bwine bushiku, nalipokelele kalata iyo bamunyinefwe na bankashi mu cilonganino banembeele. Ilyo nalebelenga amashiwi aya kunsansamusha ayo banembeele, nalimwene ukuti Yehova alyaswike ipepo lyandi.” Cine cine Yehova alatulanga ukuti alitutemwa ukupitila mu ba bwananyina abatweba amashiwi ayasuma.—Amalu. 10:17.

14. Ni nshila nshi na imbi iyo Yehova atulangilamo ukuti alitutemwa?

¹⁴ Inshila na imbi iyo Yehova alangilamo ukuti alitutemwa, kupitila mu ba bwananyina abatufunda nga twalufyanya. Ku ca kumwenako, mu nshita ya batumwa Yehova alilengele ukuti umutumwa Paulo alembele Abena Kristu banankwe amakalata 14 ayaba mu Baibo. Muli aya amakalata, umutumwa Paulo alifundile Abena Kristu banankwe cikuuku cikuuku lelo ukwabula ukubapita mu mbali. Cinshi Yehova aebele Paulo ukuti afunde Abena Kristu banankwe? Pantu Yehova mufyashi umusuma, kabili alafunda abana bakwe ‘abo atemwa.’ (Amapi. 3:​11, 12) Kanshi nga ca kuti uwa bwananyina atufunda ukupitila muli Baibo, tatufwile ukumona kwati Yehova natufulilwa, lelo tufwile ukwishiba ukuti Yehova acili alitutemwa. (Heb. 12:6) Finshi fimbi ifyo Yehova atupeela ifitulanga ukuti alitutemwa?

NA FIMBI IFYO TWINGESHIBILAKO UKUTI YEHOVA ALITUTEMWA

15. Ni bani abo Yehova apeela umupashi wakwe uwa mushilo, kabili mulandu nshi ici cingalengela twashininkisha ukuti alitutemwa?

¹⁵ Yehova alapeela abo atemwa umupashi wakwe uwa mushilo. (Mat. 12:18) Kuti twayipusha atuti, ‘Bushe ndalanga ifisabo fimo ifya mupashi wa mushilo uwa kwa Lesa?’ Bushe pali ino nshita mulatekanishisha sana abantu ukucila ifyo mwali ilyo mushilasambilila pali Yehova? Na kuba, nga mulelanga sana ifisabo fya mupashi wa kwa Lesa, e lyo mukalashininkisha sana ukuti Yehova alimutemwa.—Moneni akabokoshi akaleti “Ifisabo fya Mupashi ni Ifi . . . ”

16. Ni bani abo Yehova abomfya pa kubila imbila nsuma, kabili ifi acita filenga muleumfwa shani? (1 Abena Tesalonika 2:4)

¹⁶ Yehova aliseekesha abantu abo atemwa imbila nsuma. (Belengeni 1 Abena Tesalonika 2:4.) Moneni ifyo ukubila imbila nsuma kwalengele nkashi uwe shina lya kuti Jocelyn ashininkishe ukuti Yehova alimutemwa. Bushiku bumo ilyo ba Jocelyn babuukile, baleumfwa sana ububi. Batile: “Nshakwete amaka, kabili naumfwile kwati nshacindama. Nomba nalebomba bupainiya kabili nalingile ukuya mu kubila imbila nsuma pali ubu bushiku. E ico nalipepele, naya na mu kubila imbila nsuma.” Pali bulya bushiku ilyo ba Jocelyn bali mu mulimo, balishimikile ba Mary kabili ba Mary balisumine ukutendeka ukusambilila Baibo. Ilyo papitile imyeshi, ba Mary balandile ukuti bulya bwine bushiku ba Jocelyn babashimikile pa ng’anda, balipepele kuli Lesa pa kuti abafwe. Finshi ba Jocelyn basambilile kuli ifi fyacitike? Batile: “Naumfwile kwati Yehova alenjeba ati, ‘Nalikutemwa.’” Kwena te bonse abengatemwa ukukutika imbila nsuma iyo tubila. Lelo kuti twacetekela ukuti Yehova alatemwa nga tule-esha apapelele amaka yesu ukubila imbila nsuma ku bantu.

17. Finshi mwasambililako ku fyo ba Vicky balandile pa cilubula? (Amalumbo 5:12)

¹⁷ Yehova alalenga abantu abo atemwa banonkelamo mu cilubula. (1 Tim. 2:​5, 6) Nomba kuti twacita shani nga ca kuti tumfwa kwati Yehova tatutemwa nangu ca kuti twalitetekela icilubula kabili twalibatishiwa? Tufwile ukulaibukisha ukuti te lyonse twingacetekela ifyo tumfwa, lelo Yehova ena kuti twamucetekela lyonse. Amona bonse abatetekela icilubula ukuti balilungama kabili alilaya ukuti akabapaala. (Belengeni Amalumbo 5:12; Rom. 3:26) Nkashi uwe shina lya kuti Vicky alimwene ukuti ukutontonkanya sana pa cilubula kwalilengele aishiba ukuti Yehova alimutemwa. Bushiku bumo pa numa ya kutontonkanya sana pa cilubula, ba Vicky batile: “Yehova alintekanishisha pa myaka yonse iyi. . . . Lelo cali kwati nalemweba nati: ‘Ukutemwa mwantemwa takwafikapo. Ilambo lya Mwana wenu linono sana te kuti lifumyepo ulubembu lwandi.’” Ilyo ba Vicky batontonkenye sana pa bupe bwa cilubula, batendeke ukumfwa ukuti Yehova alibatemwa. Na ifwe nga tuletontonkanya sana pa cilubula, tukalaumfwa ukuti Yehova alitutemwa.

18. Cinshi twingashininkisha nga twatwalilila ukutemwa Shifwe wa ku muulu?

¹⁸ Nangu ca kutila kuti twaesha na maka ukucita ifyo twasambilila muli cino cipande, inshita shimo kuti twafuupuka ica kuti twalaumfwa kwati Yehova tatutemwa. Nga ca kuti ifya musango uyu fyacitika, muleibukisha ukuti Yehova alitemwa “abatwalilila ukumutemwa.” (Yako. 1:12) E ico twalilileni ukupalama kuli Yehova kabili mulemona inshila ishalekanalekana isho alangilamo ukuti alimutemwa. Lyonse muleibukisha ukuti Yehova “taba kutali kuli ifwe umo umo.”—Imil. 17:27.