Kuti Mwacefyako Icilafi

YEHOVA LESA abumbile bongobongo wa muntu na maka yawamisha aya kwibukisha ifintu. Aipangiile ukuti ibe ubutala bwa kubuulamo ifyebo fyawamisha ifyabikwamo ukwabula ukuti filube. Imipangilwe ya bongobongo yumfwana no bufwayo bwa kwa Lesa ubwa kuti abantunse baleikala pe na pe.—Amalu. 139:14; Yoh. 17:3.

Lelo napamo mumona ukuti ifingi ifyo mubika mu muntontonkanya filalabwa. Cimoneka kwati cilya mulefwaya ukufiibukisha fyalabwa. Cinshi mwingacita pa kucefyako icilafi?

Bikeniko Amano

Ukubikako amano kulaafwa sana mu kucefyako icilafi. Nga twabelesha ukubebeta, ukutemwa abantu ne filecitika apo tuli, umuntontonkanya wesu ulacincimunwa. Lyene cikatwangukila ukubikako amano pa kubelenga nelyo ilyo twaumfwa fimo ifingatunonsha ku ciyayaya.

Caliseeka ukulaba amashina ya bantu. Lelo, fwe Bena Kristu, twalishiba ukuti abantu balicindama—e kutila Abena Kristu banensu, abo tushimikilako, na bambi abo tukumanya ilyo tulebomba imilimo ya cila bushiku. Cinshi cingatwafwa ukwibukisha amashina yabo? Umutumwa Paulo alumbwile amashina ya bantu ukucila pali 26 aba mu cilonganino cimo ico alembeele. Icilangilila ukuti alibatemenwe ca kuti talumbwile fye amashina yabo lelo alandilepo ne fintu fya kulungatika fimo fimo pa lwa bene. (Rom. 16:3-16) Bakangalila benda aba muno nshiku aba Nte sha kwa Yehova balebukisha amashina, nangu ca kuti balatandalila ifilonganino fyapusanapusana cila mulungu. Cinshi cibafwa? Napamo kuti balalumbula ishina lya uyo muntu imiku iingi ilyo balelanda nankwe pa muku wa kubalilapo. Balesha na maka ukwampanya ishina ne cinso. Cimbi ico bacita kupoosako inshita ukubomba mu butumikishi bwa mwi bala na bantu bapusanapusana e lyo no kulya pamo na bo. Ilyo mukakumana na umo, bushe mukamwibukisha ishina? Ica kubalilapo mufwile ukukwata umulandu usuma uwa kwibukishisha ishina lyakwe; lyene esheni imitubululo imo pa ili pa muulu.

Ukwibukisha ifyo mubelenga na ko kwalicindama. Cinshi cingamwafwa ukulaibukisha ifyo mubelenga? Ifibomba fyaba kutemwa ifyo mulebelenga e lyo no kufitesekesha. Mufwile ukutemwa ifyo mulebelenga pa kuti mwangweko sana. Teti mwibukishe ifyebo nga ca kuti amano yali fye kumbi ilyo muleesha ukubelenga. Pa kuti muletesekesha bwino ifintu, kano muleampanya ifyebo mulebelenga ku fintu mwabelesha nelyo ku fintu mwaishiba kale. Ipusheni mwe bene amuti: ‘Kuti nabomfya shani ifi fyebo mu bumi bwandi kabili ni lilali ningafibomfya? Kuti nafibomfya shani ukwafwa bambi?’ Cimbi icafwako ukutesekesha caba kubelenga ilongo lya mashiwi ukucila ukubelenga ishiwi limo limo. Cikamwangukila ukumfwikisha ifishinka no kwishiba ifipulilemo, ne co cikalenga mukaleibukisha bwangu.

Lubuleniko Inshita ya Kupitulukamo

Incenshi mu fya masomo shilakomaila pa bucindami bwa kupitulukamo. Mu kufwailisha kumo, incenshi ya pa koleji yalangilile ukuti ukupoosa fye miniti umo ukupitulukamo mu kwangufyanya kuti kwalenga mwaibukisha ifyebo ifingi nga nshi. E co ilyo fye mwapwa ukubelenga, nelyo ilyo mwabelengako iciputulwa cikalamba, pitulukenimo mu fishinka fikalamba mu mutima pa kuti mulefibukisha. Tontonkanyeni pa fyo mwingalondolola mu mashiwi yenu ifishinka fipya ifyo mwasambilila. Nga mwapitulukamo pa numa fye ya kubelenga icishinka, cikamwafwa ukwibukisha ico cishinka pa nshita yalepa.

Lyene mu nshiku shinono ishikakonkapo, fwayeni inshita ya kupituluka mu fyo mwabelengele ukupitila mu kushimikilako umbi ifyo fyebo. Napamo kuti mwashimikilako uwa mu lupwa, uwa mu cilonganino, untu mubomba nankwe, untu musambilila nankwe ku sukulu, umwina mupalamano, nelyo uo mwakumanya mu butumikishi bwa mwi bala. Esheni ukwibukisha ifishinka fikalamba e lyo no kupelulula kwa mu Malembo ukutungilila ifyo fishinka. Ukucite fi kukamunonsha, kukamwafwa ukukanalaba ifishinka fyacindama; cikanonsha na bambi.

Etetuleni pa Fyacindama

Ukulunda pa kupituluka mu fyo mubelengele no kushimikilako bambi, mukasanga ukuti ukwetetula pa fyacindama ifyo musambilile kukalamunonsha. Bakalemba ba Baibolo Asafi na Davidi bacitile fyo fine. Asafi atile: “Ndelumbule milimo ya kwa Yehova; pantu ndeibukishe fipesha amano fyenu fya kale. Kabili ndetontonkanyo kubomba kwenu konse, no kwetetule milimo yenu.” (Amalu. 77:11, 12) Davidi na o alembele ati: “Mu bulinde bwa bushiku ntontonkanya imwe,” kabili “njibukishe nshiku sha kale, ntontonkanye milimo yenu yonse.” (Amalu. 63:6; 143:5) Bushe mulacite fyo?

Ukutontonkanya sana pa milimo ya kwa Yehova, imibele yakwe, no kufwaya kwakwe kuti kwamwafwa ukwibukisha ifishinka no kumwafwa muli fimbi. Nga mwabelesha ukulatontonkanya pali fyo, mukalenga ifintu fyacindama icine cine ukubelelela mu mutima wenu. Mukalenga ubuntu bwenu ubwa lwa nkati ukumumungwa. Ifyo mukasunga mu mutwe fikalangilila ifyo mutontonkanya lwa nkati.—Amalu. 119:16.

Umulimo wa Mupashi wa kwa Lesa

Pa kwesha ukwibukisha icine pa lwa milimo ya kwa Yehova ne fyalandile Yesu Kristu, tatwashala fye pa mbilibili. Pa nshita ya bushiku ilyo ashilafwa, Yesu aebele abakonshi bakwe ati: “Ifi fintu nalanda kuli imwe ilyo ncili na imwe: lelo Ubukota [“kafwa,” NW], Umupashi wa mushilo uo Tata akamutumina mwi shina lyandi, wene akamusambilisha fyonse, no kumwibulula fyonse ifyo nasosele kuli imwe.” (Yoh. 14:25, 26) Mateo na Yohane bali pa basangilweko. Bushe umupashi wa mushilo cine cine wali ni kafwa wa musango yo kuli bene? Ee! Mupepi ne myaka 8 pa numa ya ici, Mateo alipwile ukulemba ilyashi lya kubalilapo ilya kulonsha pa bumi bwa kwa Kristu, ukusanshako no kwibukisha ifintu fyaumisho mutengo pamo nge Lyashi lya pa Lupili ne fishinka fyonse ifya ciishibilo ca kubapo kwa kwa Kristu ne ca kupwa kwa buno bwikashi. Ilyo papitile imyaka 65 pa numa ya mfwa ya kwa Yesu, umutumwa Yohane alembele Ilandwe lyakwe, ukusanshako ne fishinka ifyo Yesu asosele pa bushiku bwa kulekelesha ubo abatumwa bali na Shikulu wabo ilyo ashilatuula umweo wakwe. Ukwabula no kutwishika, Mateo na Yohane baleibukisha bwino sana ifyo Yesu asosele no kucita ilyo bali nankwe, lelo umupashi wa mushilo walibombele umulimo ukalamba uwa kushininkisha ukuti tabalabile ifishinka fyacindama ifyo Yehova alefwaya filembwe mu Cebo cakwe.

Bushe umupashi wa mushilo waba ni kafwa wa babomfi ba kwa Lesa lelo? Ee cine cine! Ca cine ukuti umupashi wa mushilo taubika mu matontonkanyo yesu ifintu ifyo tushatala atusambilila, lelo waba ni kafwa ku kutwibulwila ifintu fyacindama ifyo twasambilila kale. (Luka 11:13; 1 Yoh. 5:14) Lyene, ilyo cakabilwa, amaka yesu aya kutontonkanya yalacilimushiwa ku kuleka ‘twibukishe ifyebo ifyasoselwe libela kuli bakasesema wa mushilo, ne funde lya kwa Shikulu kabili Umupusushi.’—2 Pet. 3:1, 2.

‘Epali Mwalaba’

Yehova asokele abena Israele libili libili ati: ‘Epali mwalaba.’ Tacilepilibula ukuti aleenekela ukuti bali no kwibukisha fye fyonse ukwabula ukushako nangu kamo. Lelo talefwaya bobelwe ne fya pa lwabo ica kuti balaba ne ncitilo sha kwa Yehova. Bali no kutwalilila ukwibukisha ifyo Yehova abapuswishe lintu malaika wakwe aipeye amabeli ya mu Egupti yonse na lintu Yehova apaatwile Bemba Wakashika e lyo no kumwisala, ukuleka Farao ne milalo yakwe banwene. Abena Israele bali no kwibukisha ukuti Lesa alibapeele Amafunde pa Lupili lwa Sinai no kubatungulula ukupita mu matololo no kuyafika mu Calo Calaiwe. Ukukanalaba ifi fintu calolele mu kuti ukwibukisha ifi fintu kwali no kutwalilila ukwambukila imikalile yabo lyonse.—Amala. 4:9, 10; 8:10-18; Ukufu. 12:24-27; Amalu. 136:15.

Na ifwe bene tufwile ukusakamana epali twalaba. Ilyo tulepita mu mafya, tulekabila ukwibukisha Yehova, ukulaibukisha imibele ya kwa Lesa no kutemwa alangishe pa kutuma Umwana wakwe, uwapeele icilubula ca pa membu shesu pa kuti tukabe no mweo wapwililika umuyayaya. (Amalu. 103:2, 8; 106:7, 13; Yoh. 3:16; Rom. 6:23) Ukubelenga Baibolo lyonse no kuisanshamo mu kulongana e lyo no kubomba ubutumikishi bwa mwi bala kukatulenga ukukanalaba ifi fishinka fyawamisha.

Ilyo mulefwaya ukupingulapo pa fyakakala nelyo ifinono, ibukisheni ifi fishinka fyacindama, no kuleka fimwafwilishe mu kutontonkanya. Mwilaba. Shintilileni pali Yehova ukuti amutungulule. Ukucila ukumwena fye ifintu mu buntunse nelyo ukushintilila pa fyo umutima ushapwililika ulefwaya, ipusheni mwe bene amuti, ‘Kufunda nshi nelyo ifishinte fyaba mu Cebo ca kwa Lesa ifyo mfwile ukutontonkanyapo pa kupingulapo?’ (Amapi. 3:5-7; 28:26) Teti mwibukishe ifyo mushaumfwapo nelyo ifyo mushabelengapo. Lelo ilyo mulelunduluka mu kwishiba kwalungika na mu kutemwa Yehova, ifintu mwaishiba ifyo umupashi wa kwa Lesa ukamwafwa ukwibukisha fikafulilako, kabili ilyo ukutemwa Yehova kulekulilako, kuli no kumucincimuna ukubomba mu kumfwana ne fyo fine mwaishiba.