Ifipusho Ukufuma ku Babelenga

Bushe imitembo balesendelako icipao ca cipingo yalebikwa shani, pantu pali 1 Ishamfumu 8:8 patila yalemoneka Umwashila?

Ilyo Yehova apeela Mose ifya kukonka pa kukuula ihema mu matololo, icacindamishe pa fyo amwebele cali cipao ca cipingo. Muli ici cibokoshi ca golde e mwali ifipampa fya Malango e lyo ne fintu fimbi. Calesungwa mu muputule wa mu kati, Umwashilisha. Pa muulu wa Cipao pali ifimpashanya fya golde ifya bakerubi abayansa amapindo yabo. Pa kutila Icipao cingasendwa, cali ne mipeto mu mbali iya kwingishamo imitembo ibili iya cimuti ca mushita iya pamwako golde. Cailanga fye ukuti, imitembo yalebikwa mu mipeto yali mu mbali ya Cipao. Kanshi, ilyo Icipao cili pa cifulo ca ciko Umwashilisha mwe hema, umwaloseshe ku kabanga, imitembo yasontele ku kapinda ka ku kuso na ka ku kulyo. E fyo cali na lintu Icipao caikele mwi tempele lyakulile Solomone.—Ukufuma 25:10-22; 37:4-9; 40:17-21.a

Icipembe e calepatula Umwashilisha ku Mwashila (umuputule wa ku nse). Bashimapepo abaleba Umwashila te kuti balengele Umwashilisha no kumona Icipao, icaleimininako ukubapo kwa kwa Lesa. (AbaHebere 9:1-7) Kanshi, amashiwi yaba pali 1 Ishamfumu 8:8 kuti yamoneka ayaafya ukumfwa pantu yatila: “Imitembo yalilepele, ne mpela sha iko shamoneke umwashila pa cinso ca mwa mushilo mwa mu kati, lelo tayamoneke pa nse.” Amashiwi yamo yene yasangwa na pali 2 Imilandu 5:9. Ninshi cali shani pa kuti imitembo ilemoneka kuli bonse abali Umwashila mwe tempele?

Bamo batila imitembo yalekumya icipembe, no kutunkula mu cipembe. Lelo ico tacingacitika nga ca kuti imitembo yaloseshe ku kapinda ka ku kuso na ka ku kulyo, pantu ninshi icipembe na co calolele mu ntunga imo ine. (Impendwa 3:38) Ubulondoloshi bwalundwapo ubwaumfwika bwino e ko bwaba. Napamo imitembo yalemoneka ilyo icipembe cishafikile bwino bwino ku cibumba nelyo ilyo shimapepo mukalamba aleingila Umwashilisha. Icipao cena tapali apo cali no kumonekela pantu cacingilwe ne cipembe, lelo imitembo iyapulilemo ku mbali shonse yena napamo yalemoneka ilyo icipembe cacingulwako panono. Nangu ca kuti ubu bulondoloshi buleumfwika bwino, tatulekabila ukucikosha sana ukuti e fyo cali.

Cailanga fye ukuti, kwaliba ifingi ifyo tufwile ukusambilila. Umutumwa Paulo alumbwilepo fye finono muli kalata wakwe ku baHebere. Lyene atile: “Ifintu ifyo te kuti nsosepo pale pale nomba.” (AbaHebere 9:5) Ukubuushiwa kuli ku ntanshi ukwa ba busumino kufwile ukutulenga ukufwaisha ukwisakwata inshita ya kusambilila ku bantu baliko lilya pamo nga Mose, Aarone, Besalele, na bambi abaishibe bwino bwino imipangile ne mibombele ye hema.—Ukufuma 36:1.

[Futunoti]