Landeni Ululimi Lwine Lwine no Kwikala Kuli Pe na Pe!

“Fwayeni Yehova . . . fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.”—SEFANIA 2:3.

1. (a) Ni nshila nshi abasambi babomfya pa kusambilila ululimi lwa cilendo? (b) Mulandu nshi uwa kulandila ululimi lwine lwine?

ABASAMBI kuti pambi basambilila ululimi lupya pa kubomfya inshila ya grama nelyo inshila ya lulimi lulandwa. Pe samba lya nshila ya grama, balabomfya mu cinkumbawile ifitabo fya kusambililamo no kusambilila amafunde ya grama. Pe samba lya nshila ya lulimi lulandwa, balapashanya ifiunda ne fipasho fya mashiwi ifilandwa na kafundisha wabo. Inshila shonse shibili shilabomfiwa mu kusambilila “ululimi lwine lwine.” Kabili cili icakatama ukuti tulande ulu lulimi nga ca kuti tulesubila ‘ukubelama mu bushiku bwa bukali bwa kwa Yehova.’—Sefania 2:1-3; 3:8, 9.

2. Ni shani fintu twingasambilila icingetwa pambi amafunde ya grama aya lulimi lwine lwine?

² Icitabo cikalamba ica kusambililamo icibomfiwa ku kusambilila ululimi lwine lwine ni Baibolo. Isambililo lya mukoosha ilya yene ne lya mpapulo shashimpwa pali Baibolo likusambilisha icingetwa pambi amafunde ya grama aya lulimi lwine lwine. Isambililo lya Baibolo ilya pa ŋanda ilitungululwa na umo uwa Nte sha kwa Yehova ni ntendekelo isuma. Kuli abo abaipeela kale kuli Lesa, isambililo lya lyonse kabili ilya mukoosha ilya Malembo lyalibe lyakatama. Lelo bushe kwalibako ukucilisha inshila sha kufumamo cimo ku kusambilila ululimi lwine lwine? Kabili kumwenamo nshi kwisa ukufuma mu kulanda lwene?

Ifya Kusambilila Ululimi Lwine Lwine

3. Ni nshila nshi imo iya kusambilila ululi lwine lwine?

³ Inshila imo iya kusambilila ululimi lwine lwine ili kwampanya icine ulesambilila ne fishinka ifyo waishiba kale, pamo nga fintu umusambi wa lulimi pambi engampanya mu kulundulukilako amafunde yalekanalekana aya grama. Ku ca kumwenako, pa nshita imo kuti pambi walishibe ukuti Yesu Kristu Mwana wa kwa Lesa, lelo walishibe finono pa lwa milimo yakwe. Ukutule lyo, isambililo lya Baibolo kuti pambi lyalikusambilisha ukuti Kristu nomba ateka pamo nge Mfumu ya mu mulu no kuti mu kati ka Kuteka kwakwe ukwa Myaka Ikana Limo, umutundu wa muntu uwa cumfwila bakasumbulwa ukufika ku kupwililika. (Ukusokolola 20:5, 6) Ee, ukwampanya amatontonkanyo yapya na ayo ayaishibikwa kale kulawamya ukumfwikisha kobe ukwa lulimi lwine lwine.

4. (a) Ni nshila nshi imbi iya kusambililamo ‘amafunde ya grama’ aya lulimi lwine lwine, kabili bulondoloshi nshi ubwalembwa ubwa Baibolo ubwabomfiwa ku kulangilila ici? (b) Cinshi cacitike ilyo Gideone na baume bakwe imyanda itatu babuulile ncitilo? (c) Ubulondoloshi bwalembwa ubwa pali Gideone butusambilisha isambililo nshi?

⁴ Inshila imbi iya kusambililamo ‘amafunde ya grama’ aya lulimi lwine lwine ili kupanga ifikope fya fyakuponako fya mu Baibolo. Ukulangilila: Esha ‘ukumona no kumfwa’ ubulondoloshi bwalembwa pa Abapingushi 7:15-23. Mona! Umupingushi wa bena Israele Gideone nayakanya imilalo yakwe mu fiputulwa fitatu ifya baume umwanda umo cimo. Mu mfifi, mu mutalalila batentemuka ukufuma pa Lupili lwa Gilboa no kushinguluke nkambi iya bena Midiani balele utulo. Bushe bali abaipangasha bwino ne fyanso, aba imyanda itatu? Te mu fya bulwi. Pantu, bakolomwene uluseko lwa kutumfya ukufuma ku ba bulwi ba miiya! Umwaume umo umo akwete fye intandala, umutondo ukalamba uwa menshi, ne cenge mu kati na nkati ka mutondo. Lelo kutikeni! Pa cishibilo capeelwa, abaume umwanda abali pamo na Gideone balishe ntandala shabo no kutoba imitondo yabo iya menshi. E fyacita na bambi imyanda ibili. Ilyo bonse basumbula ifyenge fileaka, waumfwa uko balebilikisha abati: “Ulupanga lwa kwa Yehova no lwa kwa Gideone.” Fintu ici calenga abena Midiani umusonkwe! Bapumpana ukufuma mu matenti yabo, amenso yabo ayaisulamo utulo yatulumushiwa ku kutiina imingu shileaka ishisanike ifinshingwa no kubalamuna umwenso wa kutiine mipashi. Ilyo abena Midiani batendeka ukufulumuka, abaume ba kwa Gideone batwalilila ukulisha intandala shabo, kabili Lesa alenga abalwani babo ukulwishanya. Mwandi lisambililo lya maka mu lulimi lwine lwine! Lesa kuti apususha ababomfi bakwe ukwabula umulalo wa fita uwa buntunse. Ukulundako, “Yehova takaleke abantu bakwe, pa mulandu we shina lyakwe likulu.”—1 Samwele 12:22.

5. Ni shani fintu ukulongana kwa Bwina Kristu kwingaafwa ukulopolola imilandile yesu?

⁵ Lintu abasambi basambilishiwa ululimi lwa cilendo ukupitila mu nshila ya lulimi lulandwa, balesha ukubwekeshapo ifiunda fya kwa kasambilisha ne fipasho fya mashiwi mu kulungika. Mwandi mashuko yawama aya mu nshita ayabako ku kulanda ululimi lwine lwine pa kulongana kwa Bwina Kristu! Palya tulomfwa bambi baleilumbulwila abene muli lulya lulimi lwa cine ca mu Malembo, kabili kuti pambi twakwate shuko lya kulandapo ifwe bene. Bushe tulakwato mwenso wa kuti pambi kuti twasosa icintu cimo icalubana? Twileka ico cibe e kusakamikwa kwesu ukukalamba, pantu icilubo icalungikwa mu cikuuku kuli eluda uuletangilila pa kulongana kwa musango uyo pamo nge Sambililo lya Ulupungu lwa kwa Kalinda kuti calopolola imilandile yesu. E ico, sangwa no kwakana mu kulongana kwa Bwina Kristu lyonse.—AbaHebere 10:24, 25.

Ukusokelelamo kwa Kukowela

6. Mulandu nshi kwabelako ukucilana kwa musango uyo pa kati ka Nte sha kwa Yehova na mateyanyo ya butotelo aya Kristendomu?

⁶ Abo ababilisha imifwaile ya kwa Yehova no kubilisha Ubufumu bwakwe ubwa mu mulu balanda ululimi lwine lwine pamo nge Nte shakwe. Balalengo kwishibikwa ishina lyakwe no kumubombela “umutima umo,” nelyo mu kuba no kusuminishanya kumo. (Sefania 3:9) Nangu cingati amabutotelo ya Kristendomu yalikwata Baibolo, tayalanda ululimi lwine lwine nelyo ukulilila kwi shina lya kwa Lesa mu citetekelo. (Yoele 2:32) Tabakwata ubukombe bwaikatana ubwashimpwa pa Malembo. Mulandu nshi? Pantu babika ifishilano fya butotelo, amano ya ku calo, na bucishinka bwa bupolitiki pa mulu wa Cebo ca kwa Lesa. Imifwaile yabo, amasubilo, ne nshila fya ici calo cibifi.

7. Kupusana nshi pa kati ka Nte sha kwa Yehova na mabutotelo ya bufi kwalangililwa pali 1 Yohane 4:4-6?

⁷ Kristendomu—na kuba, ubuteko bwa calo conse ubwa butotelo bwa bufi—talanda ululimi lumo lwine nge fyo Inte sha kwa Yehova bacita. Mu ca kusekesha, kuli abo abalelanda ululimi lwine lwine, umutumwa Yohane alembele ukuti: “Imwe muli ba kwa Lesa, . . . kabili mwacimfya ababe fi; ico Uuli muli imwe acila uuli mu ba pano isonde. Bene ba pano isonde, e co balandile fya pano isonde, na ba pano isonde balebomfwa. Ifwe tuli ba kwa Lesa: uwaishiba Lesa omfwa kuli ifwe; uushaba wa kwa Lesa, tomfwa kuli ifwe.” (1 Yohane 4:4-6) Ababomfi ba kwa Yehova balicimfya bakasambilisha ba bufi pantu Lesa, uwaba mu bantu bakwe, “acila [Ciwa] uuli mu ba pano isonde,” sosaite ya buntunse iishalungama. Apantu abasangu “ba pano isonde,” kabili balikwata umupashi wa liko uubifi, “[balande] fya pano isonde, na ba pano isonde balebomfwa.” Lelo abantu umo umo abapale mpaanga balakutika kuli abo aba kwa Lesa, ukumwensekesha ukuti abantu ba kwa Yehova balanda ululimi lwine lwine ulwa cine ca Baibolo ulwapayanishiwa ukupitila mu kuteyanya kwakwe.

8. Cishibilo nshi ica muntu wa bupulumushi?

⁸ Ubusangu bukalamba bwalisobelwe, kabili ‘ica nkama ca bupulumushi’ cali kale kale mu kubomba mu mwanda wa myaka wa kubalilapo C.E. Mu nshita, abantu abapokelele—nelyo abapokolwele—ififulo fya kusambilisha mu cilonganino basambilishe ififundisho ifingi ifya bufi. Ululimi lwabo lwali ukutali ukufuma ku lwine lwine. E co kwaimine “umuntu wa bupulumushi” uwabamo abengi, bashibutotelo ba Kristendomu, abakakililwa ku fishilano fya butotelo bwa bufi, amano ya ku calo aya buntunse, ne fisambilisho fishili fya mu malembo.—2 Abena Tesalonika 2:3, 7.

Ululimi Lwine Lwine Lwaumfwika mu Kusaalala kwa Calo

9. Fya kwimako nshi ifya butotelo fyaliko mu kati ka mwanda wa myaka walenga 19?

⁹ Ni mpendwa fye inono iya bantu batiina Lesa ‘ebalwila icitetekelo icapeelwe limo na limo ku bashila.’ (Yuda 3) Ni kwi uko abasumina ba musango uyo bengasangwa? Pa myanda ya myaka, ubutotelo bwa bufi bwasungile bacinkupiti mu mfifi ya ku mupashi, lelo Lesa alishibe abo abanono abakwete ukusuminisha kwakwe. (2 Timote 2:19) Kabili lyene, pa kati ka kwaluka kwa fya makwebo, ifya kupangapanga, ne fya kwangalila pamo ifya mu mwanda wa myaka walenga 19, kwaimineko amashiwi ayaibela ukufuma kuli babele wa cinkumbawile uwa cimfulumfulu ca butotelo bwa bufi. Utumabumba tunono twaeseshe ukubelenga ifishibilo fya nshita no kusobela ukwisa kwa cibili ukwa kwa Yesu, lelo te bonse balandile ululimi lwine lwine.

10. Libumba nshi ilya “kwisa kwa cibili” Lesa asalile ukulanda ululimi lwine lwine, kabili mulandu nshi cili icamoneka ukuti ukuboko kwa kwa Yehova kwaba na bene?

¹⁰ Mu 1879, nangu cibe fyo, cabele icalengama lishiwi nshi ilya “kwisa kwa cibili” lyalesobolwapo kuli Yehova ukulanda ululimi lwine lwine pamo nge Nte shakwe. Ukufika pali ilya nshita akalibumba kanono ake sambililo ya Baibolo akatungulwilwe na Charles Taze Russell kalekumana mu Pittsburgh, Pennsylvania, U.S.A. Baali nabashininkisha ukuti ukwisa kwa cibili ukwa kwa Yesu kwali no kutendeka ukubapo kwakwe ukwa kukanamoneka, ukuti inshita ya kumanama kwa calo yali ku ntanshi, kabili ukuti ici cali no kukonkwapo no Kuteka kwa Myaka Ikana Limo ukwa kwa Kristu ukwali no kubweseshamo Paradise pe sonde, mu kuba no bumi bwa ciyayaya ku bantunse ba cumfwila. Mu July 1879 aba Basambi ba Baibolo batendeke ukusabankanya magazini iyaishibikwa nomba pamo nga Ulupungu lwa kwa Kalinda. Amakope fye 6,000 e yaananishiwe aya lwafumine ulwa kubalilapo. Lelo “ukuboko kwa kwa [Yehova, NW]” kwali ne sho Nte, pantu uyu magazini nomba asabankanishiwa mu ndimi 111, mu kuba no kupulinta kwa avareji ukwa kucila pali 15,000,000 pa wafuma umo umo.—Linganyeniko Imilimo 11:19-21.

11, 12. Cine nshi cimo ica mu Malembo icaumfwika kuli abo abalanda ululimi lwine lwine?

¹¹ Ukupitila muli Baibolo ne mpapulo sha Nte sha kwa Yehova, kabili ukucilisha ukupitila mu kubilisha kwa aba Bena Kristu bapimpa ukwa mbila nsuma, ululimi lwine lwine lwalishibikwa mu kusaalala kwe sonde. Kabili mwandi kumwenamo kwakulisha ukupakishiwa na abo abalanda lwene! Mu cifulo ca kusoso kuti ‘Lesa ni Lesa, Kristu ni Lesa, no Mweo Mutakatifu ni Lesa’ mu lulimi lwa nkama ulwa cifundisho ca Bulesa Butatu, basuminishanya ne cifulo ca Baibolo ica kuti Yehova e Wapulamo, Yesu Kristu pamo ngo wacepako Mwana Wakwe, kabili umupashi wa mushilo maka yabomba aya kusungusha aya kwa Lesa. (Ukutendeka 1:2; Ilumbo 83:18; Mateo 3:16, 17) Bakalanda ba lulimi lwine lwine balishiba ukuti umuntu tasangwike ukufuma ku musango wa panshiko uwa bumi lelo abumbilwe na Lesa wakwato kutemwa. (Ukutendeka 1:27; 2:7) Bamwensekesha ukuti umweo ulaleko kubako pa mfwa—icishinka icifumyapo ukutiina abafwa. (Lukala Milandu 9:5, 10; Esekiele 18:4) Helo aumfwika ukuba inshishi ya munsaunte iya mutundu wa muntu, te cifulo ca kulunguluka kwa mulilo icapangwa no mulungu uunkalwe. (Yobo 14:13) Na kabili balishiba ukuti ukubuuka lisubilo lyapeelwa na Lesa ilya bafwa.—Yohane 5:28, 29; 11:25; Imilimo 24:15.

¹² Abo abalanda ululimi lwine lwine balanga umucinshi ku mulopa no bumi. (Ukutendeka 9:3, 4; Imilimo 15:28, 29) Bamwensekesha ukuti ubumi bwa pe sonde ubwa kwa Kristu e mutengo wa cilubula uwalipilwa pa mulandu wa bantunse ba cumfwila. (Mateo 20:28; 1 Yohane 2:1, 2) Tabapepa ku “batakatifu,” pa kwishibo kuti amapepo yabo yafwile ukulungikwa kuli Yehova Lesa ukupitila muli Yesu Kristu. (Yohane 14:6, 13, 14) Apantu Icebo ca kwa Lesa cisenuka ukupepo tulubi, ifipasho tafibomfiwa mu kupepa kwabo. (Ukufuma 20:4-6; 1 Abena Korinti 10:14) Kabili balasengauka amasanso ya kupupe fiwa pantu balakaana ukupupe mipashi, ukwasenukwa na ko kwine muli Baibolo.—Amalango 18:10-12; Abena Galatia 5:19-21.

13. Mulandu nshi abo abalanda ululimi lwine lwine tabafulunganishiwa?

¹³ Ababomfi ba kwa Yehova, abalanda ululimi lwine lwine, tabali abafulunganishiwa pa lwa kuntu bali mu kupita kwa nshita. Yehova alibasambilisha ukuti bali mu “nshita ya ku mpela,” mu kuba na Yesu ukubapo pamo ngo mupashi ushimoneka uwakatamikwa. (Daniele 12:4; Mateo 24:3-14; 2 Timote 3:1-5; 1 Petro 3:18) Mu kuba ne milalo ya maka iya mu mulu ku numa yakwe, Kristu ali apepi no kunina ukwingila mu bulwi ku kuputunkanya ubupingushi bwa kwa Lesa pali ino micitile ya fintu. (Daniele 2:44; Ukusokolola 16:14, 16; 18:1-8; 19:11-21) Ee, kabili abo abalelanda ululimi lwine lwine bali abapamfiwa ukubilisha imbila nsuma iya kuti Ubufumu bwa kwa Lesa pe samba lya kwa Kristu bwangu bwangu bukaleta amapaalo yakalamba ku mutundu wa muntu onse uwa cumfwila pe sonde lya paradise. (Esaya 9:6, 7; Daniele 7:13, 14; Mateo 6:9, 10; 24:14; Luka 23:43) Ico conse, kabili twapala fye pa mulu! Mu kushininkisha, ululimi lwine lwine e lulimi lwacilishapo kufumba, ulwaumisho mutengo pe sonde!

14. Kumwenamo nshi kumbi kupakishiwa na abo abalanda ululimi lwine lwine?

¹⁴ Ukumwenamo ukupakishiwa na abo abalanda ululimi lwine lwine kusanshamo “umutende wa kwa Lesa” uulinda imitima na maka ya muntontonkanya. (Abena Filipi 4:6, 7) Balomfwila amafunde ya Baibolo, ayatwala pa ntanshi ubutuntulu bwa bumi, insansa, no kwikushiwa ukwisa ukufuma ku kutemuna Yehova. (1 Abena Korinti 6:9, 10) Ee, kabili abalanda ululimi lwine lwine balikwate subilo lya bumi bwa ciyayaya mu calo cipya icalaiwa ica kwa Lesa.—2 Petro 3:13.

Lubomfyeni nelyo Lulufyeni

15. Ni shani fintu ukamwenamo ukufuma ku kumfwikisha kwawama ukwa lulimi lwine lwine?

¹⁵ Nga ca kuti uli no kulanda ululimi lwine lwine mu calo cipya, ufwile ukulwishiba bwino nga nshi ica kuti lwasanguka ululimi luntu utontonkanishishamo. Lintu umuntu alesambilila ululimi, intanshi atontonkanya mu lulimi lwakwe ulwa cikaya no kupilibwila amatontonkanyo yakwe mu lupya. Lelo lintu acililako kulamuka mu lulimi lupya, alatendeka ukutontonkanya muli lwene ukwabula ukukabila kwa mibombele ya kupilibula. Mu musango umo wine, ukupitila mwi sambililo lya mukoosha, kuti wakwata ukumfwikisha kwawama ukwa musango uyo ukwa lulimi lwine lwine ica kuti ukeshiba ifya kubomfya amafunde ya Baibolo ne fishinte ku kupikulula impika no kutwalilila umwa “kuyila ku mweo.”—Ilumbo 16:11.

16. Cinshi cingacitika nga ca kuti taulebomfya ululimi lwine lwine lyonse?

¹⁶ Ufwile ukubomfya ululimi lwine lwine lyonse, epali walufya amaka ya kulanda lwene bwino. Ukulangilila: Imyaka yapitapo, bamo aba ifwe twasambilile ululimi lwa cilendo. Kuti pambi twaibukisha amashiwi muli ulo lulimi lelo mu kupalako twalilaba amaka yesu aya luko pantu tatwalubomfya mu kutwalilila. Icintu cimo cine kuti cacitika ku lulimi lwine lwine. Nga ca kuti tatulelubomfya lyonse, kuti twalufya amaka yesu aya lwene, kabili ico kuti cakwata ifya kufumamo fya kayofi lwa ku mupashi. Lekeni kanshi tulande lwene lyonse pa kulongana na mu butumikishi bwa Bwina Kristu. Iyi mibombele, capamo ne sambililo lya pa lwesu, fikatwafwilisha ukusosa ifintu mu kulungika mu lulimi lwine lwine. Kabili fintu ico cili icacindama!

17. Cinshi cilangilila ukuti ululimi kuti lwaba ulwa kupususho bumi nelyo ulwa kulenge mfwa?

¹⁷ Imilandile kuti yaba iya kupususho bumi nelyo iya kulenge mfwa. Ici calangilwe mu kati ka kukansana pa kati ka mukowa wa bena Israele uwa kwa Efraimu na Kapingula Yefta uwa ku Gileadi. Pa kwishiba abena Efraimu abaleesha ukufulumukila kwi shilya lya Mumana wa Yordani, abena Gileadi babomfeshe ishiwi lya kupiminako “Shibolete,” ilyakwete iciunda ca kutendekelako ica “sh.” Abaume ba ku Efraimu bailetelele abene beka ku bashilika ba kulinda abena Gileadi pa fyabu fya Yordani pa kusosa “Sibolete” mu cifulo ca “Shibolete,” ukushimbula bubi bubi iciunda ca kwiswila ice shiwi. Pamo nge ca kufumamo, abena Efraimu 42,000 balipaiwe! (Abapingushi 12:5, 6) Mu musango umo wine, cintu bashibutotelo ba Kristendomu basambilisha kuti pambi caumfwika ukupalamina ku lulimi lwine lwine kuli abo abashili ababeleshanya bwino bwino ne cine ca Baibolo. Lelo ukulandila mu nshila yalubana iya butotelo kukashininkisha ukwa kayofi mu bushiku bwa bukali bwa kwa Yehova.

Tukatwalilila Abaikatana

18, 19. Bupilibulo nshi ubwa kwa Sefania 3:1-5?

¹⁸ Ukulosha kuli Yerusalemu wabulo busumino uwa pa kale no wapalana nankwe uwa muno nshiku, Kristendomu, casoswa pali Sefania 3:1-5 ukuti: “Kalanda ku watalama kabili uwatoolela, umusumba uucululusha! Tauumfwa kwi shiwi, taupokelela kusalapula, tautetekela Yehova, kuli Lesa wa uko taupalama; bacilolo ba mu kati ka uko ni nkalamo ishilila, abapingushi ba uko mimbulu ya ku cungulo, iishishapo ifupa lya ku lucelo; bakasesema ba uko bapusauka, bantu abafutika, bashimapepo ba uko nabapelule fya mushilo, nababifya Amalango. Yehova mu kati ka uko mulungami, tacita bupondamishi; ulucelo no lucelo alango bupingushi bwakwe, incelo shonse tabulapo; lelo uucito bupondamishi taishiba nsoni.” Bupilibulo nshi ubwa ayo mashiwi?

¹⁹ Fyonse fibili Yerusalemu wa pa kale na Kristendomu wa kasuba ka lelo bapondokele Yehova no kuikowesha abene no kupepa kwa bufi. Incitilo shalubana isha ntungulushi shabo shafuminemo ulumanimani. Ukwabulo kusakamana ukusoka kwabwekeshiwabwekeshiwapo ukwa kwa Lesa, tabakutike no kupalamina kuli wene. Bacilolo babo bapala inkalamo sha kwikata kama, ukusuula ubulungami mu kuituntumba. Ukupala imimbulu ya kwikata kama, abapingushi babo balilepaula ubulungi tupimfya tupimfya. Bashimapepo babo ‘balipelula ifya mushilo no kubifya amalango’ ya kwa Lesa. E co Yehova ali apepi no ‘kulonganike nko kabili ukulonganya amabufumu, ku kupongolwela pali bene icipyu cakwe, icifukushi ca bukali bwakwe conse.’—Sefania 3:8.

20. (a) Cinshi cifwile ukucitwa pa kupusunsuka ubushiku bwa bukali bwa kwa Yehova? (b) Ni shani fintu wingasubila ukuipakisha amapaalo ya ciyayaya ukufuma kuli Lesa?

²⁰ Ubushiku bwa bukali bwa kwa Yehova bulepalamina lubilo lubilo. E ico, pa kupusunsuka ukwingila mu calo cipya ica kwa Lesa, sambilila kabili landa ululimi lwine lwine ukwabulo kushingashinga. Kupitila fye mu kucite fyo wingasanga ukucingililwa ukufuma ku kayofi ka ku mupashi pali nomba na ku kayofi ka cibulungwa conse akalepalamina lubilo lubilo. Inte sha kwa Yehova balebilisha ubushiku bwa bukali bwa kwa Lesa no bukombe bwa kusansamusha ubwa Bufumu bwakwe. Fintu bacankwa ukulanda pa lwa bukata bwa bumfumu bwakwe! (Ilumbo 145:10-13) Bo waikatana pamo na bene, kabili kuti wasubila ukuipakisha ubumi bwa ciyayaya na mapaalo yambi ukufuma kuli Katendeka wa lulimi lwine lwine, Shikulu Mulopwe Yehova.

Kuti Wayasuka Shani?

◻ Ni nshila nshi shimo isha kusambililamo ululimi lwine lwine?

◻ Mulandu nshi cabele ca bunonshi ukulanda ululimi lwine lwine?

◻ Cinshi cingacitika nga ca kuti taulelanda ululimi lwine lwine lyonse?

◻ Ni shani fintu umuntu engapusunsuka ubushiku bwa bukali bwa kwa Yehova no kuipakisha amapaalo ya ciyayaya?

[Icikope pe bula 16]

Gideone na baume bakwe balisha intandala shabo no kwimya ifyenge fyabo

[Icikope pe bula 18]

Ukufuma mu 1879 ukuya ku ntanshi calengelwe ukumfwika ukuti Charles Taze Russell na banankwe balebomfiwa na Lesa ku kutwala pa ntanshi ululimi lwine lwine

[Ifikope pe bula 20]

Bushe uli uwaikatana ne Nte sha kwa Yehova mu kulanda ululimi lwine lwine?