Ifyo Cikaba Muli Paradaise Iikapangwa Cipya Cipya
YESU alandile ukwabula no kutwishika ku basambi bakwe ukuti, abantu bakaba no mweo na kabili, kabili atile nangu cikabe shani ici cikacitika. Abebele ati, “Ilyo ifintu fikabumbwa cipya cipya,” “mukapokelela umweo wa muyayaya.” Nomba bushe ni mwi Yesu aloseshe ilyo atile, “ilyo ifintu fikabumbwa cipya cipya”?—Mateo 19:25-29.
Ukulingana ne lyashi Luka alembele, ilyapalana na lintu Mateo nao alembele, Yesu atile “ku ntanshi,” abasambi bakwe bakapokelela “umweo wa muyayaya.” (Luka 18:28-30) Mulandu nshi Baibolo ilandila pa inshita ya “ku ntanshi” ukutila cimo cine ne nshita “ifintu fikabumbwa cipya cipya”?
Ico ilandila ifyo, ni pa kufwaya ukukomaila pa kuti nangu cibe shani, Yehova Lesa akalenga abantu bakaipakishe umweo ku ciyayaya muli paradaise pe sonde nga fintu fye alefwaya ukuti cibe pa kubalilapo fye. Abantu bakaba abapwililika filya fine Adamu na Efa bali ilyo bashilabembuka. E ico kanshi “ku ntanshi,” ifintu fikaba nga filya fine fyali mwi bala ya Edeni pantu “fikabumbwa cipya cipya.”
Ifyo Paradaise Akapangwa Cipya Cipya
Ilyo Yesu ali pa calo, asambilishe abakonshi bakwe ukulapepela ubuteko ubo Lesa akabomfya pa kulenga icalo conse ukuba paradaise. Yesu atile tufwile ukupepa ukutila: “Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Lesa alibika Umwana wakwe ukuba Kateka wa ubu Bufumu ubukalenga isonde lyonse ukuba Paradaise nga fintu fye Lesa alefwaya ukuti cibe.
Baibolo ilanda pa Muntu uo Lesa abika ukuba Imfumu ukutila: “Umwana natufyalilwa, umwana umwaume napeelwa kuli ifwe; kabili bukateka bukaba pa kubeya kwakwe, kabili akenikwa ati, . . . Cilolo wa mutende. Ukuteka kwakwe kukaba fye konse konse, na ku mutende wakwe, takwakabe mpela.” (Esaya 9:6, 7) Nomba bushe ubu buteko ubukalatungululwa no yu kateka, bukalenga shani ukuti ifyo Lesa afwaya fikacitike?
Baibolo itila: “Mu nshiku sha shamfumu isho, Lesa wa mu muulu akemya ubufumu [ubukatekwa na cilolo] ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.”—Daniele 2:44.
Lekeni nomba tulande pa fyo ifintu fikaba pe sonde ilyo Paradaise akapangwa cipya cipya, “ilyo fintu fikabumbwa cipya cipya,” kabili na lintu Umwana wa kwa Lesa akabomfya amaka yakwe nga ‘Kateka’ wa Bufumu bwa kwa Wishi.
Ifyo Fintu Fikaba mu Paradaise
Ukubuuka kwa bafwa
“Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe no kufumamo.”—Yohane 5:28, 29.
“Kukaba ukubuuka kwa balungama na bashalungama.”—Imilimo 24:15.
Takwakabe ukulwala na kabili, ukukota, nelyo ukufwa
“Pali iyo nshita amenso ya mpofu yakamona, na matwi ya bankomamatwi yakakomonwa. Pali iyo nshita uwalemana amolu akacilauka nge nsebula, kabili ululimi lwa kwa cibulu lukaula akapundu.”—Esaya 35:5, 6.
“Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.
Kukaba ifya kulya ifingi ifisuma
“Isonde likamesha ifilimwa fya liko; Lesa, Lesa wesu, akatupaala.”—Amalumbo 67:6.
“Ingano shikafula nga nshi pano isonde, pa muulu wa mpili shikafula icine cine.”—Amalumbo 72:16.
Kukaba amayanda ayasuma kabili bonse bakalabomba umulimo wa kubaletela insansa
“Bakakuula amayanda no kwikalamo, bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo, tabakalime amabala e lyo bambi bakalye ifisabo.”—Esaya 65:21, 22.
Takwakabe bumpulamafunde, ulukaakala nelyo inkondo
“Lelo ababifi, bakalofiwa mu calo, na ba bufi, bakabafumpulamo.”—Amapinda 2:22.
“Bakafula bapanga babo ukuti babe baplao na mafumo yabo ukuti yabe ifya kutungwilako imiti. Uluko talwakemishe uluko lunankwe ulupanga, nangu ukusambilila inkondo na kabili.”—Esaya 2:4.
Takwakabe ukumfwa umwenso, konse fye kukaba umutende
“[Inko] Shikekala mu mutende, ukwabula no wa kushitiinya.”—Esekiele 34:28.”
“Tafyakacite ububi nangu ubonaushi monse mu lupili lwandi ulwa mushilo; pantu isonde likesulamo ukwishiba Yehova filya amenshi yaisula muli bemba.”—Esaya 11:9.
Ala cikawama nga nshi ukuba no mweo ilyo icalo conse cikabe fi, lintu bonse abakaba aba mweo bakatemwa Lesa no kutemwa abantunse banabo! (Mateo 22:37-39) Mwilatwishika no kutwishika, fyonse ifyo Lesa alaya fikafikilishiwa pali iyo nshita. Lesa atila, “Nalisosa, . . . kabili nkacicita.”—Esaya 46:11.
Kwaliba ifingi ifyo limbi mwingafwaya ukwishiba pali Yehova Lesa na pa calo cipya ico alaya. Ica kumwenako fye, bushininkisho nshi butulenga ukucetekela ukuti icalo cipya cili mupepi? Bushe Ubufumu bwa kwa Lesa bukapyana shani amabufumu ya pano calo? Finshi fikacitika ifikalenga ukuti Ubufumu bwa kwa Lesa bukapyane pa mabufumu ya pano calo? Inte sha kwa Yehova bakatemwa nga nshi ukulanshanya na imwe amepusho pamo nga ya twalandapo. Nga mulefwaya ifyebo na fimbi moneni pe bula 32 muli ino ine magazini.
Kwashala fye panono icalo cipya cili no kubako, ico abantu bafwaisha pa myaka iingi, umo ifintu fyonse fikaba ifyalungama. Abengi abafwa bakabuuka pa kuti bakabe no mweo na kabili. Lesa alafwaya ukuti abantu bakabe aba mweo na kabili, e mulandu wine bakabela aba mweo. Mwilatwishika no kutwishika abantu bakaba aba mweo na kabili! Ca cine ubumi ubuli “ku ntanshi,” e “mweo wine wine.”—1 Timote 4:8; 6:19.
[Icikope pe bula 23]
Paradaise iyo abantu abakubalilapo babili bapanishe pa mulandu wa bucintomfwa bwabo ikapangwa cipya cipya