Wan Trep Long Bas Long Medel Blong Ostrelya

Man blong Wekap! blong Ostrelya i raetem store ya

?YU BIN sel i godaon long wan reva we i gat plante krokodael long hem? ?Yu bin haremgud blong singsing long wan naet we i gat mun laet, plante handred mael longwe long ol man? ?Yu bin joen finis long ol Kristin miting long wan trak we i stap ron long spid blong 60 mael long wan haoa? Ol ekspiryens olsem oli sam eksampel nomo we plante brata sista we oli kamaot long defren ples oli haremgud long olgeta taem oli ron long ol safari bas blong go long wan distrik asembli blong Ol Wetnes blong Jeova long Alis Springs long hot ples long medel blong Ostrelya.

Wan long olgeta i talem se, “Wod ya ‘safari’ i stret nomo from we mifala i no slip long wan haos, mifala i slip nomo long ol tenet we tu man nomo i save slip long wan. !Long taem ya we kolosap mifala i kasem Alis Springs, i no tekem tri menet blong bildim ol tenet blong mifala! Kolosap i olsem we yu stap wajem fas-fowod long video: Bas i stop, mo wan ples we i no gat samting long hem kwiktaem nomo i karem plante smosmol tenet.”

Welkam Long “Alis”

Alis Springs (ol man ples oli kolem “Alis”) i wan ples longwe we i gat smosmol tri long hem kolosap long drae ples we graon blong hem i red. I gat 23,000 man long ples ya mo i stap long saot blong ples ya we ol man blong stadi long ol taon oli stap talem se hem i medel blong Ostrelya stret. Naoia i ples blong ol turis we oli yusum olsem wan bigfala ples blong ol Aborijinis blong Ostrelya we oli gat waes mo oli soem ol spesel pija blong olgeta.

Be, long Ol Wetnes, tri dei asembli nao i mekem se oli harem gud tumas long fulwan safari. Sam long olgeta, i olsem wan jans blong gat bigfala glad blong joen gud bakegen. Wan kap ti we i hot we smok blong hem i stap go antap i wan saen blong soem fasin blong tekem ol strenja oli kam long haos long ples ya long Ostrelya, mo oli holem kastom ya long asembli wetem spesel bili-ti-mo-dampa tenet we oli save kam long hem blong spel long hem. Bili-ti i wan ti we oli save kukum insaed long wan tin we faea i bonem gogo i kam blak we oli kolem tin ya se bili. Samtaem oli yusum wan smol gru blong tri ya ekaliptus, we narafala nem long hem se gam, blong tanem wora we i stap boel, taem oli kafsaedem lifti i go insaed long bili. Oli putum wan haf blong ekaliptus i gokros antap long bili blong blokem smok i no go insaed long ti.

Dampa i wan kaen bred we i isi nomo blong mekem. Blong mekem, yu nidim self-resing flaoa, wora mo sol nomo. Taem i hot yet, yu katem dampa long ol pis we oli bigfala lelebet mo putum gud bata mo golden sirop antap long hem. Bili-ti-mo-dampa tenet, i kam wan ples blong asembli we ol man oli glad blong hivap mo storeyan long hem.

Oli Wok Strong Long Ples We Olgeta Nomo Oli Stap

I gat 72 Wetnes long Alis Springs Kongregesen mo oli lukaot long wan ples we i gat 77,000 mael. Dawin i stap kolosap 1,100 mael long not, mo Adeled i kolosap 1,000 mael long saot. I wan samting blong sapraes blong luk ol traem we ol man ya we oli stap long ol ples we oli stap longwe tumas oli kasem, longfala rod we oli mas folem oltaem blong go samples, ples i hot tumas, smok blong graon, mo olgeta nomo oli stap.

Taon blong Jaberu we oli stap tekem ston ya uranium long maen long hem i wan gudfala eksampel. I gat wan Wetnes nomo long ples ya, mo sista ya i stap 160 mael longwe long kongregesen we i stap moa kolosap. Be, sista ya i no slak long saed blong speret from se hem i stap hem wan. Hem i leftemap tingting blong plante man long taem we hem i stap long asembli ya. Mo tu, long Jilkmingan, ples blong ol Aborijinis we i stap longwe, long en blong Anhem Lan long Noten Teritori, fo Baebol studen oli kam blong joen wetem ol 26 man we oli baptaes long asembli ya.

Ol Brata Mo Sista Oli Mekem Laet Blong Olgeta i Saen

Asembli i finis, ol bas oli ron i go antap olgeta long not blong Ostrelya. Wan samting we i nambawan tumas long taem ya long safari i wan bot we i stap sel i go antap long fres, klin wora blong Katrin Goj, i stap go long ples ya Kakadu Nasnal Pak we ol man oli save gud. Trep ya i mekem se i faswan taem blong ol brata sista blong luk klia ol wael krokodael. !I nambawan tumas, be i wan samting blong fraet lelebet! Ale, afta long wan gudfala naet long bigfala taon long Noten Teritori, Dawin, Mataranka Stesen i wan narafala ples we safari i stop long hem, ol man oli save gud ples ya from ol pamtri we oli stap raon long ol spring wora mo ol bigfala hol we i gat wora insaed.

Be, samting we mifala i luk i no blokem ol wok blong mifala long saed blong speret. Ol bas oli kam ol Haos Kingdom. Evritaem mifala i mekem vas blong dei, mo mifala i mekem olgeta miting blong kongregesen taem bas i stap ron. Wan long olgeta draeva we i no wan Wetnes i sapraes tumas, nao long prapa tingting blong hem, hem i pem wan longfala rop, wan maekrofon, mo i joenem long laod spika blong bas ya blong mekem se oli save harem klia ol man we oli givim ansa.

Long trep ya, wan olfala woman i sik tumas mekem se hem i mas go kwik long wan hospital long ples ya. Wan fren i stap wetem hem, be ol bas oli mas ron nomo long rod blong olgeta. Tu dei biaen, afta we hem i kam gud bakegen, hem wetem fren blong hem tufala i sore mo tufala i harem nogud tumas from we tufala i mestem ol narafala safari. Be Kristin lav i mekem se tufala i no moa sore tumas.

Tu long ol Wetnes long ples ya we oli ol paelot oli harem trabol blong woman ya wetem fren blong hem. Ale oli hareap blong mekem ol samting. Kwiktaem nomo fo long olgeta oli tekem wan smol plen, oli go long taon blong Pot Ogasta blong kasem ol bas ya. Wan long olgeta we i stap long bas i talem wetem filing se: “!Mifala i fulap wetem lav mo fasin tangkyu long ol nambawan brata we mifala i stap joen wetem olgeta!” Be i no hemia nomo. !Taem plen i kasem ples ya we hem i stap go from, bitim ten man oli givim mane blong pem trep we paelot ya i mekem! Draeva blong bas ya i soemaot we hem i harem gud tumas long lav we ol brata oli soemaot, hem i talem se neva hem i bin luk samting olsem bifo.

Wan man we i stap long bas i talem se, “Long ol tri wik we yumi spenem long trep long Alis Springs, mi neva kasem wan ekspiryens we i leftemap tingting blong mi olsem mo i mekem bilif blong mi i strong. Samting we i bigwan moa hemia tingting blong joen tugeta we mifala evriwan i haremgud long hem. !Nating se mifala i stap go weples—trufala samting we i sas hemia fasin joen blong hat mo tingting blong mifala!”

[Map blong pija long pej 30]

(Lukluk niuspepa)

Ol rod blong trep blong safari blong go mo kambak long asembli blong Alis Springs

Wes Ostrelya

Noten Teritori

Kwinslan

Nyu Saot Wels

Saot Ostrelya

Viktoria

Tasmania

Dawin

Peth

Alis Springs

Brisban

Sidne

Adeled

Melbon

Hobat

Yuluru (Ston blong Ayes)

Pot Ogasta

Kakadu Nasnal Pak

[Tok blong pija long pej 28]

Ol Aborijinis oli stap long medel blong olgeta we oli stap wet blong baptaes long distrik asembli long Alis Springs

[Tok blong pija long pej 29]

Faea wetem bili ti mo dampa

[Tok blong pija long pej 29]

Krokodael i stap slip long san long Kakadu Nasnal Pak

[Tok blong pija long pej 30]

Yuluru (Ston blong Ayes) 290 mael saotwes blong Alis Springs

[Tok blong pija long pej 30]

Lukluk i go long Kakadu Nasnal Pak long Noten Teritori