Smol Naora—?Nambawan Kakae Ya i Kam Long Wan Plantesin?
MAN BLONG WEKAP! LONG EKWADO I RAETEM STORE YA
YES, nambawan kakae ya blong solwora we plante milyan man oli laekem, plante taem hem i kam long wan plantesin. Be, maet man we i kakae i neva save samting ya, from we ol smol naora we oli kam long plantesin, oli kolosap sem mak, no maet oli sem mak evriwan, long ol smol naora we oli kamaot stret long solwora. Yes, plante man long ol plantesin blong smol naora long Ekwado, oli karemaot ol smol naora stret long solwora, blong putum olgeta long ol lugun long plantesin blong olgeta.
Ol man blong hukum fis we oli kolem larveros, oli yusum net blong kasem ol smosmol bebi naora ya, we oli longfala olsem wan mo haf sentimita nomo. Oli kasem olgeta long maot blong ol reva we i gat natongtong long saed blong olgeta, no long ol bigfala wef blong solwora. Biaen, oli karem olgeta oli go long ol lugun, blong oli gru i kam bigwan. Be, ol man ya oli no save kasem naf smol naora long fasin ya. Taswe, plante plantesin oli karem ol smol naora long ol spesel ples, we ol man oli wok wetem ol nyufala teknik blong mekem ol bebi naora. Olsem nao, oli save gat naf smol naora blong fulumap ol lugun long ol plantesin. Yumi luklukgud nao long wok we i kamaot long wan plantesin blong ol smol naora.
Go Long Spesel Ples We Ol Naora Oli Bon
Spesel ples we mifala i visitim we ol bebi naora oli bon, hem i stap kolosap long solwora blong Pasifik, long wan naesfala sanbij. Ol ples olsem oli mas stap kolosap long bigfala solwora, from we oltaem ol man oli mas jenisim wora we ol bebi naora oli stap gru long hem. Oli yusum wan enjin blong pulum solwora i kam, oli klinim wora ya, oli mekem i hot smol, nao oli putum i go long ol bigfala tang.
Wan grup blong man we oli soem fasin fren mo oli putum ol klos we oli no flas tumas, oli mitim mifala. Hemia ol man we oli stadi long ol laef samting long solwora, ol man blong lukaot long spesel ples ya blong ol smol naora, mo ol narafala wokman. Fastaem, mifala i lukluk rum blong ol bigfala naora. Long ples ya, ol naora we oli bigwan finis mo oli kam stret long solwora, oli stap insaed long ol bigfala tang we oli gat samwe 17,000 lita wora long olgeta wanwan. Man we i lidim mifala i talem se: “Ol naora ya oli no blong kakae. Mifala i kasem olgeta taem oli bigwan finis, mo yusum olgeta blong mekem ol pikinini.”
Long rum ya blong ol bigfala naora, oli lukaotgud se ol naora oli no gat tumas laet. Stat long 3 klok long aftenun go kasem medel naet, ol man mo woman naora oli slip wanples. Long taem ya, ol wokman oli kilim ol laet, mo oli yusum toslaet blong faenem ol woman naora we oli rere blong putum ol eg. I isi nomo blong luksave ol woman naora ya we nem blong olgeta Penaeus vannemei, from we man naora i fasem wan smol bag blong wora blong hem i go long bodi blong ol woman naora ya, long bel blong olgeta. Taem ol wokman oli faenem wan woman naora we i fulap long ol eg, oli tekem hem i go long wan tang we i smol moa, maet 260 lita, blong i save putum ol eg long ples ya.
Oli putum woman naora ya long wan wud we i stap kolosap long top blong tang. Tang i bigwan antap mo i kam smol daon. Oli putum wan woman nomo long wan tang. Long ples ya, woman naora ya i save putum ol 180,000 eg blong hem, no maet i bitim namba ya. Taem ol eg ya oli stap kamaot long bodi blong hem, oli tajem wora blong man we i olsem glu, long bag we i stap afsaed long bel blong woman naora ya. Nao ol eg ya oli save gat pikinini insaed long olgeta. Biaen, ol eg mo wora oli pastru long wan smol hol daon long botom blong tang ya. Ol man blong lukaot long ples ya, oli kaontem hamas eg evri woman i putum.
Sam haoa afta we ol smosmol bebi naora oli kamaot long eg, oli putum olgeta long ol narafala tang blong oli save gru. Oli no putum plante tumas long wan tang. Ol tang ya oli luk olsem ol bigfala ples blong swim, maet oli gat 11,000 lita wora long olgeta wanwan. Blong 20 kasem 25 dei, ol bebi naora ya oli stap gru long ples ya. Oli kakae nalumlum, mo kakae blong solwora we oli mekem i drae finis.
Ples We Ol Smol Naora Oli Kam Bigwan
Ale, oli tekem ol naora, we oli bebi yet, oli go long ol plantesin. Nao oli lukaot long olgeta we oli kamaot long ol spesel ples ya, long sem fasin we oli lukaot long olgeta we oli kamaot stret long solwora. Oli putum olgeta long ol smosmol lugun, blong oli lan long wora we i no hot olsem bifo, mo i no gat plante sol long hem. Afta we sam dei i pas, oli rere blong go long ol bigfala lugun. Ol lugun ya we ol man nomo oli mekem, oli stap kolosap long wan bigfala hol we i fulap long wora. Oltaem oli yusum enjin blong pulum solwora no wora blong reva i kam, blong fulumap hol ya. Ol lugun we oli joen long hol ya oli bigwan olsem 5 kasem 10 hekta. Oli livim ol smosmol naora ya oli gru long ol lugun ya blong 3 kasem 5 manis.
Long ol manis ya, ol wokman oli jekem wora evri dei blong luk sipos i gat naf oksijen long hem. Mo tu, evri wik oli jekem hamas ol naora oli gru, blong luk sipos oli nidim moa kakae no oli stap kasem tumas kakae. Oli traem mekem se ol naora oli putum 1 no 2 gram evri wik.
Taem Blong Karem Kakae
Long taem blong karem kakae, oli mekem ol lugun oli kam drae. Taem ol smol naora oli kam kolosap long en blong lugun, ol man oli yusum wan net blong karemaot olgeta. Sipos no, oli yusum wan enjin blong pulumaot olgeta. Biaen, oli rinsem ol naora ya, mo oli kavremap olgeta wetem aes. Kwiktaem nomo, oli karem olgeta long ples blong fulumap olgeta long ol bokis. Long ples ya, oli katemaot hed blong ogeta, mo oli livim tel i stap long sel blong hem, sipos man we i pem olgeta i no wantem se oli mekem narafala samting. Nao oli wasem ol naora, mo oli seraotem ol bigwan long ol smolwan. Biaen, oli fulumap olgeta long ol bokis mo putum olgeta long aesbokis. Naoia, oli rere blong go long ol man we oli pem. Kolosap oltaem, oli putum samwe 2 kilo long wan bokis.
Ale, long nekis taem we yu kakae ol smol naora, traem tingbaot se maet nambawan kakae ya blong solwora i bin kamaot long wan lugun long wan plantesin, long ol ples olsem Latin Amerika mo Esia.
[Tok Blong Pija Long Pej 24]
Naora i bigwan olsem taem oli kakae
[Tok Blong Pija Long Pej 24]
Ol man blong hukum fis oli kasem ol smosmol naora long net
[Tok Blong Pija Long Pej 25]
Ol tang we oli putum ol naora blong oli gru
[Tok Blong Pija Long Pej 25]
Oli klinim ol smol naora bifo we oli fulumap olgeta long ol bokis
[Tok Blong Pija Long Pej 25]
Oli fulumap ol bigfala naora long wan bokis mo ol smol naora long wan bokis