Wan Traem Blong Maggy Mo Wan Blesing Long Mi

Tusde, Mei 2, 1995, hemia dei we gel blong mi i bon mo waef blong mi i ded. Mi sore tumas se Maggy i neva luk fes blong bebi blong hem. Naoia, hop blong mi, hemia blong soem Tamara long mama blong hem, taem we bambae Maggy i laef bakegen long ded.

AFTA we mitufala i mared blong 16 yia, dokta i talem long waef blong mi, Maggy, se hem i gat kansa blong titi, mo se bambae hem i ded afta sam manis nomo. Hemia faef yia bifo finis. Mi glad tumas we Maggy i haremgud smol long ol laswan yia blong laef blong hem. Kolosap long en blong laef blong hem nomo, soa we hem i kasem i bigwan tumas.

From kansa blong hem i bigwan tumas, ol dokta oli talem se hem i no save gat bel. !Taswe, mitufala i sapraes bigwan taem ol dokta oli tekem foto blong jekemap hem, nao oli luk se i gat wan bebi i stap long bel blong hem! Hem i wan gel. Maggy i gat bel blong fo manis haf finis. Hem i glad tumas blong save se bambae hem i kam wan mama blong fastaem long laef blong hem.

Maggy i mekem evri samting we hem i save mekem blong bambae bebi blong hem i strong. Hem i lukaot blong kakaegud. Mo nating se soa i kam bigwan bitim mak long tu laswan wik blong laef blong hem, hem i tekem meresin sam samtaem nomo, taem hem i harem se soa ya i rili winim hem.

Blesing Blong Wan Bebi We i Strong

Long Sarede, Epril 29, Maggy i harem se hat blong hem i stap pam strong, mo hem i talem se: “Ating bambae mi ded nao.” Mi stap wetem hem long fulwan wiken. Long Mande, mi telefon i go long dokta, mo kwiktaem biaen, mi karem hem i go long hospital long Montreal, Kanada, we i no longwe tumas long haos blong mifala long Sen Jerom.

Raonabaot long haf pas faef long nekis moning, wan nes i pas long doa blong rum blong Maggy, mo i luk se hem i stap harem nogud. Hem i kasem wan hat atak. Kwiktaem nomo, nes i singaotem wan dokta long nekis rum i kam. Maggy i ded, be ol dokta mo nes oli sevem bebi blong mitufala. Tamara i bon tu manis haf bifo long stret taem blong hem, mo hem i gat 1.1 kilo nomo.

Tamara i no gat naf blad, ale ol dokta oli wantem givim blad long hem. Be, mifala i storeyan wetem olgeta blong traem pulum olgeta blong yusum wan narafala meresin we i mekem blad i kam antap kwiktaem (nem blong hem erythropoietin). Oli mekem olsem, nao samting ya i givhan blong mekem blad blong hem i kasem stret mak blong hem. From samting ya, wan nes i talem se: “?From wanem yumi no yusum meresin ya long olgeta bebi?”

Tamara i gat sam narafala problem from we hem i bon eli tumas. Be hem i winim olgeta. Yes, taem Dokta Watters, wan dokta blong stadi long ol nev, i luk hem samtaem biaen, hem i talem long nes se: “Ating yu mekem mastik, hemia i no bebi we mi mas jekem ya. Long lukluk blong mi, bebi ya i no gat wan samting nating i rong long hem.”

Fesem Ded Blong Maggy Mo Ol Samting We Oli Kam Biaen

I had tumas long mi blong lusum Maggy. Mi harem se mi no gat paoa blong mekem wan samting. I strong long mi blong tokbaot ded blong Maggy tu. Be, mi traem tokbaot samting ya taem ol Kristin brata mo sista oli kam long hospital. Sloslou, soa i stap godaon taem mi toktok moa long saed ya. Evri taem mi ridim wan haf blong Wajtaoa no Wekap! we i kasem hat blong mi, mi putum i stap long laebri blong mi, nao taem mi harem se mi nidim, mi tekemaot mo ridim bakegen.

Wan narafala samting we i strong long mi, hemia taem mi kambak long haos we i emti. Mi faenem i had tumas blong winim fasin ya blong stap mi wan nomo. Filing ya i stap kambak long mi wanwan taem, nating se mi haremgud long nambawan kampani blong ol Kristin brata sista blong mi. Mi mo Maggy i bin mekem evri samting tugeta, mo mitufala i bin tokbaot problem ya we bambae mi kasem blong stap mi wan nomo. Hem i wantem se bambae mi mared bakegen. Be, ol samting oli no isi olsem.

Ol Narafala Kristin Oli Givhan

Ating mi no save winim bigfala traem ya sipos ol Wetnes blong Jeova we oli stap long Komiti Blong Toktokgud Wetem Ol Dokta (HLC), oli no bin givhan long mi. Long moning we Maggy i ded, wan Wetnes blong HLC, we i gat bigfala save long bisnes ya, i kam long hospital mo i givhan long mi stret olsem mi nidim.

Ol dokta mo nes long hospital, oli sapraes long help we Kristin kongregesena long Sen Jerom mo sam narafala kongregesen raonabaot, oli givim long mi. Long naet we oli talemaot long Kristin miting blong mifala se Maggy i ded, bitim 20 gudfala fren oli kam long mi blong talem se oli wantem halpem mi. Sapot we oli givim i rili mekem mi mi haremgud tumas.

Sam fren oli mekemrere kakae blong mi. Aesbokis i fulap blong plante manis. Mo tu, famle blong mi wetem ol Kristin brata mo sista, oli karem ol klos i kam blong smol gel blong mi. Oli karem plante tumas samting we mi mi no gat naf ples blong putum olgeta evriwan.

Haremgud Naoia Mo Hop Long Fyuja

Tamara i stap givhan long mi blong no harem nogud tumas long ded blong Maggy. Hem i pulum ol filing long hat blong mi fulwan. Evri dei, taem mi talem “gud moning” long hem long glad fasin, hem i smael bigwan long mi, i “toktok,” mo i saksakem ol han mo leg blong hem olbaot wetem glad.

Mi mi laekem blong lukluk ol sta long skae. Taswe, mi tingbaot taem we bambae mi save holem Tamara mo letem hem i luk long glas tu, long ol nambawan samting blong sapraes we Jeova, Bigfala Man we i Wokem yumi, i mekem. Taem mi tingbaot laef we i no save finis long Paradaes long wol, samting ya i rili mekem mi mi haremgud. Mo taem mi tingting se hemia nao hop we Tamara i gat, mi mi glad moa.—Ol Sam 37:9-11, 29.

Taem mi tingtingbak long ol samting we oli hapen long ol faef yia we oli jes pas, mi save talem se hem i wan taem blong harem nogud tumas mo wan taem blong glad tu. Mi lanem plante samting long saed blong mi wan mo long saed blong laef. Mi stap wet long fyuja we Baebol i tokbaot se, ‘bambae i no moa gat man i ded mo man we i krae from ded, bambae i no moa gat man i harem nogud long bodi blong hem.’—Revelesen 21:3, 4.

Ale, taem Maggy i laef bakegen long ded, bambae hem i no moa harem i soa long bodi blong hem taem hem i pulum win. Antap moa, strongfala hop blong mi we mi wantem tumas, i blong soem Tamara long Maggy, blong bambae hem i save luk smol gel ya we hem i hadwok tumas from.—Lorne Wilkins i talem store ya.

[Futnot]

[Tok Blong Pija Long Pej 26]

Wetem waef blong mi

[Tok Blong Pija Long Pej 26]

Smol gel blong mitufala, Tamara