Folem “Fasin Blong Mama Kangaru”—?Maet i Winim Problem We i Stap?

Yumi stap long wan hospital long Bogota, Kolombia, long 1979. Plante bebi we oli bon bifo long stret manis blong olgeta, oli stap ded. Long taem ya nao, wan dokta blong Kolombia i kamap wetem wan rod blong winim problem ya. Rod ya oli kolem “fasin blong mama kangaru.”

Taem ol bebi oli bon bifo long stret manis blong olgeta, ol dokta oli faenem i had blong kipim olgeta i laef i stap. Plante taem, oli putum ol bebi we kilo blong olgeta i smol tumas, long wan spesel bed we oli kolem incubator. Spesel bed ya i kipim bebi i wom gud go kasem taem we hem i karem moa kilo. Be long ol kantri we oli pua, ol hospital oli fulap tumas long man, i hadwok blong kipim ples i klingud oltaem, mo i no gat naf man blong wok no ol mesin no tul blong wok tu. From samting ya, kwiktaem nomo ol jem oli save pas i go long plante man.

Wan dokta long Kolombia i tingbaot wan rod we i luk olsem se i stopem problem ya long ol bebi. ?Wanem rod ya? Taem wan bebi i bon bifo long stret manis blong hem, hospital i kea long hem long semfala wei we oli bin mekem longtaem finis. Bambae oli kea long bebi ya, gogo kasem we oli sua se hem i save kamgud. Long semtaem ya, hospital i givim trening long mama blong bambae hem i save lukaotgud long bebi blong hem. Taem bebi ya i strong lelebet, mama nao bambae i mekem wok olsem incubator blong kipim bebi i wom. ?Hem i mekem olsem wanem? Hem i putum bebi blong hem insaed long klos blong hem blong bambae bebi ya i slip long titi blong hem. Hemia i olsem basket blong kangaru, mo hem i kipim bebi i wom gud, mo i isi tu long mama blong givim titi long bebi. From samting ya, oli kolem rod ya se fasin blong mama kangaru.

I no nidim sam spesel kaen mesin. Mama i mas werem wan sot no wan dres nomo we i gat lastik i goraon long bel blong hem. Taem bebi ya i kasem inaf kilo, mama i save karem hem i gohom. Wanwan taem bambae hem i kam pas bakegen long hospital blong oli jekem bebi ya.

Ol man oli faenemaot se rod ya i wokgud mo hem i sef. Antap long hemia, i luk olsem se rod ya i wokem strong filing bitwin long bebi mo mama blong hem. Yumi no sapraes we plante kantri naoia oli stap folem rod ya. Long Meksiko, ol narafala memba blong famle oli stap lanem fasin ya tu blong givhan long ol mama we oli taed. Taswe, naoia i gat ol “papa kangaru,” “bubu kangaru” no “sista kangaru.” Dokta Guadalupe Santos, we i lidim wan program blong trenem ol mama folem kangaru stael ya long Meksiko, i talem long Wekap! se: “Mifala i stat yusum fasin ya long 1992 finis mo mifala i luk se rod ya i wokgud tumas. Naoia mifala i no moa nidim blong yusum ol incubator plante olsem bifo, mo ol bebi wetem mama blong olgeta oli no moa nid blong stap longtaem long hospital.”