Stadi 4

Olsem Wanem Blong Rid Mo No Fogetem

1, 2. ?From wanem i impoten blong tingbaot ol samting we yumi ridim?

¹ Long ol man we oli spenem taem blong rid blong harem gud nomo, i no impoten tumas we oli stap tingbaot ol samting we oli bin ridim. Be wan man we i stadi blong kasem wan wok, hem i mas rid mo tingbaot ol samting we oli stap long ol buk blong hem. Sipos hem i wantem pasem tes blong hem mo kasem wan wok, samting ya i dipen long fasin blong stap tingbaot ol samting we hem i ridim. Be wan Kristin minista i mas tingbaot moa ol samting we hem i stap ridim, nating sipos hem i stap rid sam samtaem nomo no hem i stap rid plante. From we hem i wantem kam kolosap moa long Jeova mo kamgud moa long minista wok blong presem Jeova.—Dut. 17:19.

² Buk we Kristin i mas ridim plante hemia Baebol mo ol narafala buk we oli givim trufala save long Baebol. Hem i save se ol save we oli stap insaed long Baebol oli save lidim man blong kasem laef we i no save finis. Fasin ya blong rid i givhan long hem blong karem frut long minista wok blong hem, mo long Tiokratik Skul fasin ya blong rid i impoten tumas.

3, 4. ?From wanem yumi mas jusum gud ol samting blong ridim?

³ Fasin blong rid mo holem save ya long tingting i sem mak long fasin blong kakae. Yumi mas jusum samting we yumi stap kakae mo samting we yumi stap ridim. Nating se man i kakae blong harem gud, hem i no save kakae samting we bodi i no save brebrekem, no samting we i no save givhan long bodi, i nogud moa sipos samting ya i wan posen. Ol kakae oli mas isi blong bodi i brebrekem mo yusum nao oltaem yumi save harem gud from.

⁴ I sem mak nomo taem yumi rid. Nating se yumi stap rid sam samtaem nomo no yumi rid plante, be samting ya we yumi stap ridim i mas isi long tingting blong i brebrekem nao oltaem maen blong yumi i save harem gud from. Taswe i no waes blong fulumap maen blong yumi wetem ol samting we oli no tru, ol fasin we oli no stret, mo ol samting ya we oli save spolem yumi long saed blong speret. (Fil. 4:8) Yumi no save westem taem blong ridim ol buk we oli no save givhan long yumi. Yumi stap jusum gud ol kakae we yumi stap kakae, long sem fasin yumi mas jusum gud ol samting we yumi stap ridim.

5, 6. ?From wanem yumi mas gat program blong rid, mo wetaem yumi save mekem riding olsem?

⁵ Program blong rid. Afta we yu jusum stret buk blong ridim, yu mas gohed blong mekem narafala samting. Hemia, mekem wan program blong rid we i save go insaed long ol narafala program blong yu. Sipos yu no makem sam dei, no sam naet, blong yu rid long hem, bambae yu no traehad oltaem blong mekem olsem.—Wok 17:11.

⁶ Blong tingtinggud long riding blong yu, yu mas gat inaf taem mo tu gudfala ples we yu save stap long hem blong tingting dip long ol samting we yu bin ridim. Yu no stap rid long taem blong stadi nomo. Sipos long evri dei yu putum 10 no 15 menet blong yu stap rid long hem, bambae yu sapraes se yu save rid plante olsem. Sam man oli mekem riding olsem long moning, no bifo we oli slip long naet. Sam narafala man oli stap rid taem oli ron long ol trak no bas blong go long wok, skul no taem oli spel long dina. Samtaem sam famle oli joen tugeta evri dei blong rid long 5 no 10 menet afta kakae no bifo we oli slip long naet. Fasin blong rid oltaem, olsem evri dei i karem gudfala frut.

7. ?Wanem mak yumi mas kasem taem yumi ridim Baebol?

⁷ Long program blong yu, yu mas putum taem blong ridim Baebol tu. Sipos yu ridim ful Baebol samting ya i save givhan bigwan long yu. Yu save mekem olsem sipos yu putum mak olsem namba blong ol japta no ol pej we bambae yu ridim evri dei no evri wik. Be, taem yu rid yu no mas rid blong finisim buk nomo, be yu mas kasem save mo traem tingbaot ol samting we yu bin ridim long buk. Tekem taem blong tingting dip long ol samting we yu bin ridim. Taem yu ridim Baebol, oltaem yu mas tingbaot se yu stap kakae nambawan kakae long saed blong speret.

8, 9. ?Long program blong rid yumi save ridim wanem narafala buk tu?

⁸ Yu nidim taem tu blong ridim rere ol buk no magasin we bambae yufala i mekem long Wajtaoa stadi mo long ol narafala miting blong kongregesen. I gud blong givim ansa long ol miting, be taem yu rid yu no mas traem blong faenem ol ansa nomo. Traem kasem save long samting we yu bin ridim mo tingbaot olsem wanem hem i save givhan long yu.

⁹ Yu save ridim ol narafala Wajtaoa we i defren long hemia we bambae yufala i stadi long hem long wik. Magasin ya Wekap! hem tu i givim ol gudfala save. ?Mo tu, yu bin ridim ol olfala buk blong Sosaete long lanwis blong yu? Sipos yu tekem taem blong ridim, bambae yu save kasem blesing from. Sipos yu rid oltaem mo yu gat gudfala fasin blong rid, bambae yu gru kwik long saed blong speret.

10-17. ?Wanem fasin bambae oli givhan long yumi blong tingbaot plante long ol samting we yumi bin ridim?

¹⁰ Tingtingbak. Blong kasem ol gudfala samting long riding blong yumi, yumi mas tingbaot ol samting we yumi bin ridim. Plante taem ol man oli stap talem se bren blong olgeta i no save tingbaot ol samting we oli bin ridim. Be maet plante taem, olgeta oli no trenem bren, no oli no mekem bren i wok blong tingbaot ol samting. Hem i waes blong traehad blong mekem ol samting we yumi ridim oli givhan long yumi. Yumi no save mekem olsem sipos kwiktaem yumi stap fogetem ol samting we yumi bin ridim. Yumi mas lanem olsem wanem yumi save rid blong tingbaot. Ol man we oli rid plante, oli givim sam gudfala advaes long saed ya. Maet ol advaes ya oli save givhan long yu tu.

¹¹ Taem yu rid, traehad blong ridim ol grup blong ol wod i bitim we yu ridim ol wod wanwan. Fasin ya i save mekem riding blong yu i kwik moa mo bambae yu kasem mining blong ful toktok, i no ol tok wanwan. Taem yu rid yu no mas talem ol wod, no yu muvum maot blong yu mo oltaem yu no mas gobak blong ridim ol ful toktok bakegen sipos oli no bigfala poen long riding blong yu. Sipos yu ridim buk we i impoten tumas yu mas rid slou blong kasem stret tingting blong hem. Maet yu wantem ridim long bigfala voes, no long smol voes nomo blong tingting long hem. (Sam 1:2) Eksampel, ol tok blong Ol Sam mo Proveb, oli raetem long fasin we ol man oli mas ridim slou blong tingting dip long olgeta.—Sam 77:11, 12.

¹² I gud tu blong gat pensel taem yu rid, yu save makem ol stampa wod long riding blong yu mo maet yu save raetemdaon sam spesel poen we yu wantem ridim bakegen. Yu no mas makem plante samting tumas, sipos yu bitim mak fasin ya i no makemaot klia ol impoten poen long riding. Sipos yu faenem tok we i eksplenem no i givim risen long tingting we oltaem ol man oli stap askem long yumi taem yumi prij long ol haos wanwan, i gud blong raetemdaon namba blong pej mo haf long bak pej blong buk ya. Nao taem yu nidim yu save faenem kwiktaem. Be yu no mas raet long wan buk sipos hem i no blong yu.

¹³ Yu no save ridim wan haf blong buk no wan ful buk we yu no save stop nating, blong tingting long hem, no skelem wetem ol save we yu kasem finis. Yu mas stop smol taem yu rid blong mekem olsem, sipos yu rili wantem tingbaot ol bigfala poen long riding ya. Traem lanem olsem wanem blong jekemap ol samting we yu stap ridim, raetemdaon ol tok we oli givim risen mo oli sapotem ol bigfala poen blong hem. Mo tu, traem faenem ol rul we oli stret long laef blong yu mo oli save givhan long yu evri dei. Yu mas stop smol taem yu rid blong tingbaot olsem wanem yu save mekem ol tok ya oli wok.

¹⁴ Taem yu wantem ridim gud wan buk blong Sosaete fastaem i gud blong lukluk nem blong hem mo ol japta we oli stap long fas pej blong buk ya. Olsemia nao bambae yu save kasem stampa tok blong buk ya. Taem yu ridim wan magasin no wan japta long wan buk, fastaem ridim ol smosmol nem blong ol defren haf we oli stap long hem. Ol haf ya oli soemaot olsem wanem sloslou japta ya i eksplenem bigfala poen blong hem. Traem raetemdaon ol stampa blong ol ful toktok. Oltaem stampa ful toktok i faswan ful toktok blong evri haf no paragraf. Oli soemaot samting we haf no paragraf bambae i tokbaot. Traehad blong kasem bigfala tingting blong samting we yu stap ridim.

¹⁵ Narafala advaes se traem tingbaot olsem we yu luk samting ya we yu stap ridim, pija long tingting i save givhan long yu blong tingbaot. Long tingting blong yu, traem luk ol man we oli stap mo ples we oli stap long hem, harem ol noes mo voes blong olgeta, smelem senta blong olgeta, testem ol kakae no dring blong olgeta, yu save glad no yu save harem nogud wetem olgeta. Taem yu ridim wan store, traem tingbaot se yu tu yu stap long ples ya we store i kamaot long hem. Ol filing ya oli save mekem pija long store blong Baebol i kam klia. Olsemia nao i no hadwok tumas blong rimemba store blong Baebol.

¹⁶ Taem yu finisim wan japta, tekem smoltaem blong tingtingbak. Skelem ol poen ya we yu stap tingbaot wetem samting we yu stap ridim.

¹⁷ Sipos yu naf, tokbaot ol poen we yu bin lanem wetem wan narafala man, mekem olsem taem ol samting ya oli stap yet long tingting blong yu. Taem yu tokbaot ol samting ya bambae oli stap longtaem moa long tingting blong yu. Mo maet narafala man i save ademap sam samting moa long save ya blong yu. Sipos yu faenem sam gudfala poen blong yusum long wok blong prij, yusum olgeta kwiktaem long wok blong prij. Samting ya tu bambae i mekem se yu save tingbaot ol samting we yu bin ridim.

18-20. ?From wanem i impoten tumas blong lanem blong rid gud?

¹⁸ Pei we yu kasem from gudfala riding. Fasin blong rid i gat paoa long laef blong yumi. Wok we yumi stap mekem, fasin blong gat gudhan long wok, fasin blong harem gud long laef, fasin blong gru long saed blong speret oli dipen long fasin blong rid gud. Sipos wan man i no save rid bambae hem i no save lanem plante samting mo gat ol ekspiryens olsem. Ol papa mama oli save givhan long ol pikinini blong olgeta sipos oli gat program blong rid. Samtaem i gud blong talem long ol pikinini blong yufala blong rid long bigfala voes. Eksampel, oli save mekem olsem taem oli ridim ol tok long vas blong dei. Sipos yu no stap rid gud tumas, i gud se evri dei yu mas rid long 15 no 30 menet olsem. Long sam manis nomo biaen bambae yu kasem ol gudfala frut from.

¹⁹ Bambae i no longtaem yu save kamgud moa long minista wok sipos yu gat ol gudfala fasin blong rid, putum taem long program, blong yu rid mo stadi, mo yusum ol advaes ya. Bambae yu save tingbaot plante gudfala tok blong God blong yu yusum long laef blong yu mo long minista wok blong yu. Ol olfala tu oli save kamgud moa long fasin blong tingbaot ol samting sipos oli yusum ol poen ya. Yumi no mas ting se yumi olfala tumas blong kasem gudfala samting from.

²⁰ Risen from wanem God i putum ol plan blong hem long wan buk, i blong talemaot ol gudfala wok blong hem long ol man mo blong oli tingbaot oltaem. (Sam 78:5-7) Yumi save soemaot fasin tangkyu from gudfala fasin ya blong God sipos yumi stap traehad blong rid mo tingbaot Tok ya blong laef.