Japta 23

Ogenaesesen We God i Gat Long Wol

1. God i gat wan ogenaesesen long heven we yumi no save luk. ?Baebol i talem wanem long ogenaesesen ya?

?BLONG wanem yumi save se God i gat wan ogenaesesen blong hem long wol ya? Yumi save from we hem i gat wan ogenaesesen long heven tu, hemia we yumi no save luk. Jeova i mekem olgeta jerab, seraf mo plante narafala enjel blong oli mekem ol samting we hem i wantem long heven. (Jenesis 3:24; Aesea 6:​2, 3; Sam 103:20) Jisas Kraes i Jif blong ol enjel ya. (1 Tesalonaeka 4:16; Jud 9; Revelesen 12:7) Baebol i soemaot we olgeta enjel oli mekem defren kaen wok, olsem wok blong “king no jif no gavman no haeman.” (Kolosi 1:16; Efesas 1:21) Olgeta oli obei long Jeova. Oli stap wok tugeta blong mekem ol samting we Hem i wantem.​—Daniel 7:​9, 10; Job 1:6; 2:1.

2. ?God i no wantem we ol samting oli stap olbaot nomo, taswe hem i ogenaesem ol samting blong skae olsem wanem?

² Taem yumi tingbaot ol samting we God i wokem long heven mo wol, yumi luksave se hem i tinghae long ogenaesesen blong hem. Wan eksampel nao: I gat plante taosen milyan sta long yunivas, mo olgeta ya oli hivap long plante bigbigfala grup we oli kolem galaksi. Ol galaksi ya oli stap wokbaot long skae long stret rod blong olgeta. Olgeta narafala wanwan sta mo planet we oli stap long ol galaksi ya, oli no save mestem rod samtaem. Planet blong yumi, wol ya, i stap wokbaot i pasraon long san wan taem wan yia nomo, stret long 365 dei, 5 haoa, 48 menet mo 45.51 seken. !Yes, olgeta samting blong heven mo wol oli folem wan nambawan ogenaesesen!

3. ?Fasin ya blong ogenaesem gud olgeta samting we God i mekem long heven, long skae, mo long wol ya, i tijim wanem long yumi?

³ ?Nambawan ogenaesesen ya we God i mekem long ol enjel, mo olgeta samting we yumi save luk long skae mo long wol ya, i tijim yumi olsem wanem? Hem i tijim yumi se Jeova i wan God we i stap ogenaesema olgeta samting. From samting ya, yumi save se God i no save livim ol man blong hem long wol ya oli paspas. Oli no save stap olbaot nomo.

OGENAESESEN BLONG GOD LONG WOL​—BIFO MO NAOIA

4, 5. ?Olsem wanem yumi save se long taem blong Ebraham mo Isrel, God i stap ogenaesem ol man blong hem?

⁴ Baebol i soemaot we oltaem God i stap lidim ol man blong hem long fasin we i ron gud nomo. Hem i ogenaesem olgeta ya. Yumi save tingbaot ol man we oli bilif long God bifo, olsem Ebraham. Oli lidim famle mo ol man blong wok blong olgeta long stret rod blong mekem wosip long Jeova. Jeova i toktok wetem Ebraham blong talemaot ol samting we Hem i wantem. (Jenesis 12:1) God i givim oda long Ebraham blong i talemaot ol samting ya bakegen long sam narafala man, i se: “Mi mekem we mi savegud finis man ya [Ebraham], blong bambae hem i save givim oda long pikinini blong hem, mo long olgeta we oli stap long famle blong hem, blong olgeta ya bambae oli stap gohed nomo long rod blong Jeova.” (Jenesis 18:19) Hemia nao wan samting we Jeova i ogenaesem, blong olgeta man long grup ya bambae oli save wosipim hem long fasin we i stret nomo.

⁵ Biaen, taem ol man Isrel oli kam plante milyan man, Jeova i no letem wan man nating i folem prapa fasin blong hem blong mekem wosip. No gat. Be ol man Isrel oli mas kam olsem wan laen nomo, wan laen we i gat ogenaesesen blong mekem wosip long God. Laen blong Isrel ya, oli kolem “Kongregesen blong Jeova.” (Namba 20:4; 1 Kronikel 28:8) Sipos yu yu wan man blong mekem tru wosip long Jeova long taem ya bifo, oraet, yu tu yu mas wosip wanples wetem ol man blong kongregesen ya. Yu yu no mas seraot long hem.​—Sam 147:​19, 20.

6. (a) ?Olsem wanem God i soemaot we hem i glad long ol man blong Kraes? (b) ?Olsem wanem yumi save se ol Kristin oli gat wan ogenaesesen blong mekem wosip?

⁶ ?Be olsem wanem long faswan handred yia? Baebol i soemaot we Jeova i gat gladhat long ol man blong Pikinini blong hem, Jisas Kraes. Jeova i kafsaedem tabu speret blong hem i foldaon long olgeta ya. Hem i soemaot we hem i stap yusum Kristin ogenaesesen long taem ya, i no moa yusum laen blong Isrel. ?Olsem wanem? God i givim paoa long samfala Kristin long faswan handred yia, blong oli save mekem ol sikman oli kamgud bakegen, mo ol dedman oli laef bakegen. Oli mekem sam narafala merikel tu. Taem yumi ridim Kristin Grik haf blong Baebol, yumi luksave se ol Kristin oli gat ogenaesesen blong mekem wosip. Oli kasem oda finis blong mekem miting tugeta. (Hibrus 10:​24, 25) Olsem ya nao, sipos yu wan man blong mekem tru wosip long Jeova long faswan handred yia, yu tu yu mas joen wanples wetem Kristin ogenaesesen ya.

7. ?Olsem wanem yumi save se neva Jeova i stap yusum moa long wan ogenaesesen?

⁷ ?Samtaem Jeova i stap yusum moa long wan ogenaesesen long wantaem, no no gat? Long taem blong Noa, God i stap lukaot long Noa mo olgeta ya we oli stap wetem hem long bigfala sip blong hem. Olgeta ya nomo oli no lus long wora. (1 Pita 3:20) Mo tu, long faswan handred yia i no gat 2 no plante moa Kristin ogenaesesen. No gat. Be God i stap yusum wan nomo. I gat “wan Masta nomo, wan bilif nomo, wan baptaes nomo.” (Efesas 4:5) Sem mak bakegen, Jisas i talemaot finis we long taem blong yumi bambae i mas gat olsem wan stampa nomo blong tijim ol man blong God.

8. ?Olsem wanem Jisas i soemaot we bambae long taem blong yumi, God i gat wan ogenaesesen nomo long wol ya?

⁸ Jisas i tokbaot taem ya we bambae hem i king long Kingdom, i se: “?Hu man we i olsem man blong wok we i gat hed [slef we i stret mo waes, NW], we i save holem ol wok blong masta blong hem? Man blong wok olsem, masta blong hem i save putumap hem i bos blong ol narafala man blong hem, blong i givim kakae long olgeta long stret taem blong hem. Mo taem masta blong man olsem i kamtru, i faenem we hem i stap mekem ol wok olsem, man ya bambae i save harem gud. Tru mi talem long yufala, masta ya i save putumap hem blong i lukaot long olgeta samting blong hem.” (Matyu 24:​45-47 NTB) ?Taem Kraes i kambak, i King long Kingdom long 1914, hem i faenem wan “man blong wok” we i stap “givim kakae” blong speret? Yes, hem i faenem wan “man blong wok” olsem ya. Hemia nao smolhaf blong olgeta 144,000 “brata” blong hem. (Revelesen 12:10; 14:​1, 3) I stat long 1914 kam kasem naoia, plante milyan man oli wantem tumas ol “kakae” ya we smolhaf i stap givimaot. Nao ol man ya tu oli stat mekem tru wosip tugeta wetem smolhaf ya. Ogenaesesen ya blong ol man blong God, oli kolem Ol Wetnes blong Jeova.

9. (a) ?Blong wanem ol man blong God oli tekem nem ya, Ol Wetnes blong Jeova? (b) ?Blong wanem oli kolem ol haos blong wosip blong olgeta, Haos Kingdom?

⁹ Long olgeta samting we oli stap mekem, Ol Wetnes blong Jeova oli stap folem God mo Tok blong hem. Nem blong olgeta, Ol Wetnes blong Jeova, i soemaot stampa wok blong olgeta, se oli stap mekem wetnes long nem mo kingdom blong God Jeova, olsem Kraes tu i mekem bifo. (Jon 17:6; Revelesen 1:5) Mo tu, ples ya we oli stap mekem miting blong wosip long hem, oli kolem Haos Kingdom, from we kingdom blong God long han blong Mesaea, no Kraes, hemia nao i stampa tok blong olgeta Baebol. I klia we God i glad long fasin blong ol Kristin long faswan handred yia, taswe Ol Wetnes blong Jeova oli stap mekem ogenaesesen blong olgeta i folem fasin blong ol Kristin bifo. Naoia yumi save lukluk lelebet long Kristin ogenaesesen ya blong faswan handred yia, mo biaen yumi save makem ol samting we oli sem mak long ogenaesesen ya blong God we i stap naoia.

FASIN LONG FASWAN HANDRED YIA

10. ?Wanem samfala samting we oli mekem long Kristin ogenaesesen long faswan handred yia?

¹⁰ Nomata weples oli stap, be ol Kristin long faswan handred yia oli stap mekem grup blong mekem wosip tugeta. Ol kongregesen ya oli stap mekem miting oltaem, blong olgeta i save givgivhan long olgeta mo blong mekem stadi. (Hibrus 10:​24, 25) Stampa wok blong olgeta i wok blong prij mo tijim man long kingdom blong God, olsem Kraes tu i mekem bifo. (Matyu 4:17; 28:​19, 20) Sipos wan memba blong kongregesen i stap mekem ol fasin nogud, ale, oli putumaot hem long kongregesen.​—1 Korin 5:​9-13; 2 Jon 10, 11.

11, 12. (a) ?Olsem wanem yumi save se ol aposol mo “ol olfala” long Jerusalem bifo, oli stap lidim olgeta Kristin kongregesen? (b) ?Wanem mining blong “tiokratik” rul? (c) ?From we ol kongregesen oli stap lesin long rul ya, wanem i kamaot?

¹¹ ?Olgeta wanwan Kristin kongregesen long faswan handred yia i folem prapa rod blong hem, i no tingbaot ol narafala? ?Olgeta wanwan i stap mekem ol prapa disisin blong hem nomo? No gat. Baebol i soemaot we oli olsem wan nomo long Kristin bilif blong olgeta. I gat wan samting nomo we i lidim olgeta. Ale, taem oli rao long bisnes ya blong sakomsaes, olgeta wanwan kongregesen, no olgeta wanwan memba, oli no mekem disisin blong olgeta nomo long wanem oli mas mekem. No gat. Be oli sanem aposol “Pol mo Banabas, mo sam narafala man tu, blong oli go luk ol aposol mo ol olfala long Jerusalem from bisnes ya.” Nao taem “tabu speret” i givhan long olgeta man ya blong mekem wan disisin we i stanap long Tok blong God, oli sanem sam man we oli save trastem olgeta, oli go blong talemaot disisin ya long olgeta kongregesen.​—Wok 15:​2, 27-29.

¹² Olgeta kongregesen oli stap aninit long rul blong God. Rul olsem yumi kolem tiokratik rul. I min se God i stap lidim olgeta. ?Be wanem risal blong rul ya? Baebol i talem se: “Nao taem trifala ya [aposol Pol wetem tufala man] i gotru long ol taon, trifala i stap talemaot long olgeta we oli stap long ol ples ya, ol rul ya we ol aposol mo ol olfala long Jerusalem oli putum, blong olgeta man oli holem. Nao long fasin ya ol kongregesen oli stap kam strong moa bakegen long fasin blong bilif, mo evri dei namba blong ol man i stap kam antap moa.” (Wok 16:​4, 5) Yes, olgeta kongregesen oli lesingud long disisin ya we olgeta olfala oli mekem long Jerusalem, nao oli stap kam strong moa bakegen long fasin blong bilif.

TIOKRATIK RUL TEDE

13. (a) ?Long wol ya, ogenaesesen blong God i stap lesin long hu? ?Oli stap long weples? (b) ?Hed kampani ya i haf blong hu? ?Hem i stap mekem wanem?

¹³ Long wol ya, God i stap rulum no lidim ogenaesesen blong hem. Hemia nao tiokratik rul. Long hedkwota blong Ol Wetnes blong Jeova long Brooklyn, New York, i gat wan hed kampani blong ol Kristin elda we oli kam long ol defdefren kantri. Oli stap lukaot ol wok blong ol man blong God we oli stap long olgeta ples blong wol. Ol memba blong hed kampani ya oli haf blong “slef [ya] we i stret mo waes,” mo oli stap karem tok blong hem.

14. ?Olgeta disisin ya we hed kampani blong ol man blong God i stap mekem, i stap stanap long wanem?

¹⁴ Olgeta man blong hed kampani ya oli stap plante yia finis long wok blong God, olsem ol aposol mo elda long Jerusalem bifo. Be oli no stap mekem ol disisin we oli stanap long waes blong man. No gat. Oli stap folem rod blong hed kampani long Jerusalem bifo, we disisin blong olgeta i stanap long Tok blong God from we tabu speret i stap lidim olgeta. Oli stap aninit long tiokratik rul. ​—Wok 15:​13-17, 28, 29.

WOK BLONG LIDIM WAN BIGFALA OGENAESESEN

15. ?Blong wanem toktok blong Jisas long Matyu 24:14 i soemaot we God bambae i gat wan bigfala ogenaesesen long wol ya, long taem blong en?

¹⁵ Jisas Kraes i soemaot saes blong ogenaesesen ya we God bambae i gat long wol long taem blong en, i se: “Nao bambae oli stap talemaot gud nyus ya blong kingdom long olgeta ples long wol, blong oli wetnes blong hem long fes blong olgeta laen blong man; nao biaen bambae en i save kam.” (Matyu 24:14) Kingdom blong God i stap rul finis. !Hemia wan bigfala wok blong talemaot kingdom ya long plante taosen milyan man! Kristin ogenaesesen ya we i stap naoia, we hed kampani i stap lidim hem, ?hemia i naf blong mekem bigfala wok ya?

16. (a) ?Blong wanem Ol Wetnes blong Jeova oli gat ol bigfala ples ya blong prentem ol buk? (b) ?Oli stap prentem wanem kaen buk?

¹⁶ Ol Wetnes blong Jeova, oli stap talemaot nyus blong Kingdom long bitim 200 defren kantri olbaot long wol ya. Blong givhan long bitim 3,000,000 man ya (long 1987) we oli stap talemaot nyus blong Kingdom, i gat ol bigfala ples blong prentem ol buk long plante kantri. Long ol ples ya, oli stap prentem plante Baebol mo plante buk we oli storebaot Baebol. Evri dei, oli stap prentem samwe long wan milyan smol buk ya, Wajtaoa mo Wekap!, mo oli sanem oli go.

17. (a) ?Blong wanem oli stap wokem ol buk ya we oli tokbaot Baebol? (b) ?Ol Wetnes blong Jeova oli glad sipos yu tu bambae yu mekem olsem wanem?

¹⁷ Oli stap wokem ol buk ya blong Baebol blong halpem ol man blong kasem save long ol gudfala samting we God i wantem mekem. Taswe haf nem blong smol buk ya Wajtaoa, i talem se: “i talemaot Kingdom blong Jeova.” Mifala i glad sipos yu tu bambae yu givhan blong seremaot ol buk, mo yu tu bambae yu talemaot gud ol trutok blong Baebol we oli stap long ol buk ya. Wan eksampel nao: ?Yu yu lanem plante impoten samting finis long buk ya, Yu Save Laef Foreva Long Paradaes Long Wol? ?Be yu save wan man we yu save givhan long hem, blong hem tu i save lanem ol samting ya?

18. (a) ?Tede, ogenaesesen blong God i wanem kaen ogenaesesen? (b) ?Blong wanem ol man blong God oli nidim plante samting blong leftemap tingting blong olgeta?

¹⁸ Tede, ogenaesesen blong God i olsem wan ogenaesesen blong ol man we oli givim laef blong ol i go olgeta long God mo oli baptaes finis, mo oli stap talemaot nyus blong Kingdom. Long faswan handred yia ogenaesesen blong God i sem mak. Ogenaesesen ya i stap wok blong givhan long olgeta memba blong hem, blong olgeta evriwan i save joen long wok ya blong prij. Olgeta ya oli stap nidim plante samting blong leftemap tingting blong olgeta, mo oli nidim paoa blong speret, from we Setan mo ol man blong hem oli stap agensem mesej ya blong Kingdom. Ol rabis man olsem, oli bin kilim Jisas i ded from we hem i stap talemaot mesej ya. Baebol i givim woning se ol man blong Jisas bambae oli save kasem trabol tu, bambae ol man oli save ronem olgeta.​—Jon 15:​19, 20; 2 Timote 3:12.

19. (a) ?Long naoia, hu i stap halpem mo i givim paoa long ol man blong God? (b) ?I gat wanem rod blong blokem ol rabis fasin oli no save kam insaed long kongregesen blong spolem hem?

¹⁹ Long faswan handred yia, mo naoia tu, ogenaesesen i stap putumap olgeta “olfala,” no ol elda, blong oli save halpem olgeta kongregesen oli kam strong. Oli save halpem yu tu from ol advaes we oli stanap long Baebol, blong yu save winim plantekaen trabol. Ol elda ya oli stap lukaot long “ol sipsip blong God.” Nao sipos wan memba blong kongregesen i stat folem wan fasin blong laef we i no stret mo hem i no wantem jenisim fasin ya blong hem, oraet, olgeta “olfala” oli mas putumaot hem long kongregesen. Long fasin ya, kongregesen bambae i stap gud mo klin long saed blong speret.​—Taetas 1:5; 1 Pita 5:​1-3; Aesea 32:​1, 2; 1 Korin 5:13.

20. (a) ?Long faswan handred yia, Hed kampani long Jerusalem i stap sanem hu oli go? ?Blong wanem? (b) ?Hed kampani we i stap naoia, i stap sanem hu i go?

²⁰ Hed kampani we i stap long Jerusalem bifo, i sanem samfala man oli go blong leftemap tingting blong ol man blong God long ol narafala ples. Ol man ya, olsem Pol mo Saelas, oli karem tok blong hed kampani ya. Tede, yumi stap long taem blong en, nao hed kampani i stap mekem sem mak. (Wok 15:​24-27, 30-32) Samwe long tu taem wan yia, oli sanem wan man we i stap wok longtaem finis long saed blong God, blong i go visitim olgeta kongregesen. Man ya oli kolem seket elda. Hem i stap wan wik long olgeta wanwan kongregesen long seket no eria blong hem.

21. ?Seket elda i stap halpem ol kongregesen olsem wanem?

²¹ I gat moa long 52,000 kongregesen blong Ol Wetnes blong Jeova olbaot long wol. Olgeta ya oli seraot blong mekem ol seket. Samwe long 20 kongregesen i mekem wan seket. Nao taem seket elda i stap visitim ol kongregesen long seket blong hem, hem i stap givhan long ol wetnes ya blong Kingdom. Hem i stap joen wetem olgeta long wok blong prij mo tij. Olsem ya nao, hem i leftemap tingting blong ol Kristin mo hem i stap givim advaes we i gud blong halpem olgeta long wok blong prij, blong bambae oli save mekem i gud moa.​—Wok 20:​20, 21.

22. (a) ?Wanem samting ya we oli mekem tu taem wan yia, blong givim paoa long ol man blong God? (b) ?Mifala i wantem tumas we bambae yu yu mekem wanem?

²² Tu taem wan yia, ol kongregesen long olgeta wanwan seket oli stap mekem miting tugeta blong kam strong moa long saed blong speret. Bigfala miting olsem oli kolem seket asembli. Oli gat wan no tu dei. Samtaem i gat tu no tri handred man long ol asembli olsem, be samtaem i save kasem 2,000 no i bitim. Plis yu kam long nekis asembli long eria blong yu. Bambae yu yu luksave we asembli ya i gud tumas blong mekem yu yu kam strong moa long saed blong speret, mo blong halpem yu long ol fasin blong laef.

23. (a) ?Wanem ol narafala bigfala miting ya we oli mekem wan taem wan yia? (b) ?Wanem saes blong wan asembli ya we oli mekem bifo?

²³ Mo tu, long wan taem wan yia, i gat wan narafala bigfala miting we oli kolem distrik asembli. Hemia i blong samfala dei moa. I gud sipos yu yu traehad blong go long wan asembli olsem. Bambae yu yu luksave se ol asembli ya oli gud tumas, mo oli save halpem yu long saed blong speret. Samtaem i gat sam asembli we oli moa big yet. Hemia nao taem oli mekem wan asembli nomo blong olgeta kongregesen long wan kantri. Samtaem i gat wan we oli mekem we i blong olgeta kongregesen long haf wol. I gat wan we oli mekem finis long 1958, long Yankee Stadium mo Polo Grounds, long New York. Nao hemia i moa big i bitim olgeta narafala asembli. I gat 253,922 man we oli kam long asembli ya blong lesin long wan pablik tok we nem blong hem, se “Kingdom Blong God i Stap Rul​—?En Blong Wol i Kolosap?” Naoia i no moa gat ples we i big inaf blong holem plante man olsem. Taswe naoia oli save mekem ol bigfala asembli long plante bigfala taon long ol defren kantri, blong ol kongregesen oli save seraot lelebet, oli gat moa rum.

OL MITING LONG OL KONGREGESEN

24. ?Wanem faef miting ya we ol kongregesen oli stap mekem long evri wik?

²⁴ Hed kampani blong Ol Wetnes blong Jeova i stap mekem rere wan program blong ol miting, nao i sanem i go long olgeta kongregesen blong ol man blong God. From samting ya, olgeta kongregesen oli stap yusum sem program nomo taem oli stap mekem miting. Evri kongregesen i stap mekem faef miting long evri wik. Nem blong olgeta ya: Tiokratik Skul, Miting Blong Kingdom Wok, Pablik Miting, Wajtaoa Stadi, Buk stadi blong kongregesen. Maet yu no save long ol miting ya. Oraet nao, mifala i wantem talemaot olsem wanem long ol miting ya.

25, 26. ?Tiokratik Skul mo Miting Blong Kingdom Wok, tufala miting ya i wok olsem wanem?

²⁵ Tiokratik Skul i blong halpem ol studen, blong bambae oli save gat gudhan blong talemaot kingdom blong God long ol narafala man. Evri studen i save mekem wan smol toktok we i stanap long Baebol, mo ol narafala man oli lesin long hem. Biaen wan elda i givim sam advaes blong soemaot olsem wanem studen ya i save gohed.

²⁶ Long sem sapa ya, oli stap mekem Miting Blong Kingdom Wok. Program blong hem i stap long Kingdom Wok Blong Yumi, we oli wokem wan taem wan manis. Hed Kampani i mekem pepa ya i rere. Hem i gat tu no moa pej blong hem. Long miting ya oli soemaot ol gudfala rod blong talemaot mesej blong Kingdom long ol narafala man. Kraes tu i mekem sem mak bifo. Hem i givhan long ol man blong hem mo i soemaot ol rod we oli mas folem long wok blong prij.​—Jon 21:​15-17; Matyu 10:​5-14.

27, 28. ?Pablik Miting, Wajtaoa stadi, mo buk stadi blong kongregesen, trifala samting ya i wanem kaen miting?

²⁷ Pablik Miting mo Wajtaoa stadi i stap long Sande. Long samples oli stap mekem long wan narafala dei. Ol memba blong kongregesen oli traehad blong singaot ol man we oli intres long mesej blong Kingdom oli kam long Pablik Miting. Long miting ya, wan elda we i naf gud i mekem wan tok we i stanap long Baebol. Long Wajtaoa stadi oli stap yusum ol kwestin mo ansa blong tokbaot Baebol from wan haf blong Wajtaoa.

²⁸ Olgeta memba blong kongregesen oli joen tugeta long Haos Kingdom blong mekem ol miting ya we yumi jes tokbaot. Be oli seraot long ol smosmol grup blong mekem buk stadi. Wan taem wan wik, olgeta wanwan grup ya oli mekem miting ya long sam haos. Long miting olsem, oli stap yusum wan buk we i tokbaot Baebol, olsem buk ya we yu yu stap ridim naoia. Miting ya i no bitim wan haoa.

29. (a) ?Wanem lafet ya we ol tru Kristin oli stap mekem long wan taem wan yia? (b) ?Hu i stap kakae bred mo dring waen long lafet ya?

²⁹ I gat wan spesel miting bakegen we Ol Wetnes blong Jeova oli stap mekem wan taem wan yia. Hemia lafet blong ded blong Jisas. Taem hem i mekem faswan Memoriolb blong ded blong hem, Jisas i talem se: “Yufala i mas stap mekem samting ya blong tingbaot mi bakegen.” (Luk 22:​19, 20) Long miting ya, Jisas i no mekem sam flas samting we i bitim mak. No gat. Be hem i yusum waen mo bred we i no gat yis long hem olsem saen nomo blong laef blong hem we hem i givim blong pemaot olgeta man. Olsem ya nao, evri yia oli mekem kakae blong Memoriol ya. Nao smolhaf blong 144,000 man blong Kraes we tabu speret i makemaot, oli kakae bred mo oli dring waen blong soemaot we oli gat hop blong kasem laef long heven.

30. (a) ?Hu moa oli stap kam long Memoriol? ?Oli mekem wanem long miting ya? (b) ?Jisas i tokbaot ol man ya olsem wanem?

³⁰ Long olgeta ples blong wol, i gat plante milyan narafala man we oli kam long ol Haos Kingdom blong mekem Memoriol. Ol man ya oli kam blong lukluk mo lesin nomo. Olsem nao, oli save tingbaot ol samting we God Jeova mo Jisas Kraes tufala i mekem finis blong ol man bambae oli save fri long sin mo ded. Be olgeta man ya oli no bilif se bambae oli kasem laef long heven. Oli wantem tumas blong kasem itenel laef long paradaes long wol. Oli olsem Jon Baptaes bifo, we hem i stap tokbaot hem wan, se hem i ‘fren blong man ya we i jes mared.’ Hem i no haf blong 144,000 memba ya we oli olsem woman ya we i jes mared, woman blong Kraes. (Jon 3:29) I gat plante milyan man olsem, oli haf blong ol “narafala sipsip” ya we Jisas i tokbaot. Oli no haf blong “smol kampani” blong ol sipsip. Be Jisas i talem we oli stap wok tugeta wetem olgeta ya we oli haf blong “smol kampani.” Long fasin ya nao, oli kam olsem “wan kampani nomo.”​—Jon 10:16; Luk 12:32.

MEKEM WOK BLONG GOD LONG OGENAESESEN BLONG HEM

31. ?Olsem wanem yumi save se God i no glad long ol man ya we oli stap yet long ol gyaman skul, be oli wantem joen long ogenaesesen blong hem tu?

³¹ !I kliagud se God Jeova i gat wan ogenaesesen blong hem long wol tede, olsem we hem i gat bifo! Naoia hem i stap yusum ogenaesesen ya blong trenem ol man, blong bambae oli rere blong stap long nyufala stret fasin blong hem. Be sipos yumi joen wetem ogenaesesen blong God, yumi no save joen yet long wan narafala gyaman skul. No gat. Tok blong God i talem se: “Bambae yufala i no go joen wetem ol man we oli no bilif, oli narakaen. ?Olsem wanem stret fasin mo fasin blong brekem ol loa, tufala i save mekem fren? ?Mo olsem wanem laet mo tudak, tufala i save stap wanples? . . . ?Mo olsem wanem man we i bilif mo man we i no bilif, tufala i save joen long wan tingting? Taswe God i givim oda, i se: ‘Yufala i mas aot long olgeta, yufala i mas stap yufala nomo.’ ”​—2 Korin 6:​14-17.

32. (a) ?Yumi mas mekem wanem, blong bambae yumi save “aot long olgeta”? (b) ?Wanem blesing ya we bambae yumi save kasem, sipos naoia yumi gohed blong mekem wok blong God long tiokratik ogenenaesesen blong hem?

³² ?Wanem mining blong oda ya se “yufala i mas aot long olgeta”? Oraet, sipos yumi gohed yet long wan skul we i no blong God Jeova, i olsem we yumi stap sapotem skul ya, ale, fasin olsem i soemaot se yumi no obei long oda ya blong God. Olsem ya nao, sipos yu yu stap yet long wan narafala skul olsem, yu yu mas soemaot klia we yu yu lego hem. Nao sipos yu yu aot long skul ya mo yu yu stanap long saed blong God blong mekem ol wok blong Hem long tiokratik ogenaesesen blong hem, oraet, bambae yu tu yu save stap wetem ol man ya we God i tokbaot, i se: “Bambae mi mi stap wetem olgeta, bambae mi mi wokbaot wetem olgeta, mo bambae mi mi God blong olgeta, mo olgeta bambae oli man blong mi.”​—2 Korin 6:16.

[Ol Futnot]

[Tok blong pija long pej 192]

?Long taem blong Noa bifo, God i gat moa long wan ogenaesesen?

[Tok blong pija long pej 196]

OL OFIS HEDKWOTA BLONG OL WETNES BLONG JEOVA

Ol Kompyuta

Ples Blong Putum Skin Long Ol Buk

Mesin Blong Prentem Buk

Ples Blong Sanem Ol Buk Oli Go

HAOS BLONG PRENTEM BUK, BROOKLYN

[Tok blong pija long pej 197]

SAM NARAFALA HAOS BLONG PRENTEM BUK BLONG WATCH TOWER

Saot Afrika

Wallkill, New York

Kanada

Brasil

Inglan

[Tok blong pija long pej 198]

Sam blong olgeta 253,922 man long asembli blong Ol Wetnes blong Jeova long New York

Polo Grounds

Yankee Stadium

[Tok blong pija long pej 200]

Long ol miting blong Ol Wetnes blong Jeova, i gat wan program blong tijim ol man long Baebol